METHU 8

Jisu Miyu Kone Mi Miipya Biido

(Mk 1.40-45; Lk 5.12-16)

1Mo putoo hokii toku kiile, hempḛr miyuabuje mohmi imbo montii; 2#Mk 1.40-44; Lk 5.12-14. #Mt 9.18; 15.25; 18.26; 20.20; Jn 9.38. ho kato, tahikoya giinii kone mohko ahtii ho mohka hataho liibañ khangatii, lubiidola, “Attoh, no hendo koda, no ngiimi darii dopa miila kendo.” 3Ho mo mohka alah lyuliñ la ho mohmi tennetii, lubiidola, “Ngo hendo. Darii toku!” Hempḛr nyibya loda mohka tahikoya hii darii tiiku. 4#Mk 3.12; 5.43; 7.36; 8.30; 9.9. Ho Jisu mohmi lutii, “Tageto kone mitrḛ luko lyayo; hojalo ingela, no atohmi nyibumi kakiñ siinge, ho Mose nii hiila lune hii chulipa ahmiñayiñ binge, miyu mika kakiñ kengi naniiñpa.”

Jisu Rom Sipahi Sabii ka Miira mi Miipya Biido

(Lk 7.1-10)

5 # Lk 7.1-10; Jn 4.46-53. Mo Keparnam ho ahda kiile, sipahi sabii kone mohko ahtii, mohmi yarbiido 6ho lubiido, “Attoh, ngiika miira liikuñla ude ho giila dohe, hempḛr henga henkhala.” 7Ho mo mohmi lutii, “Ngo ahbiila mohmi miipya talyike.” 8Hojalo sipahi Sabii lusitii mohmi, “Attoh, nohlo ngiika ude ho ahko dopa ngo khiiniiñ pa lyimake; hojalo no aguñ pa kontii luda tope, ho ngiika miira hempyo dakiñ doke. 9Niimpalukoda ngotiirḛ ngiimika otority giinii yaka agiñho dadu, sipahi atañmi ngo dagiila; ho ngo kone mi ludo koda, ‘inge,’ ho mo indu, ho koneyami, ‘ahto,’ ho mo ahdu, ho ngiika miira mi, ‘Siimi miito,’ ho mo hiimi miidu.” 10Jisu siika luniiñmi mohkokii tapa lala, mo aluñtii, ho mohmika imbo monii atañmi lutii, “Jijeloda, ngo nunumi lukoso, sichuli henje ngo kone hetḛr kappa ma Isrel hotiirḛ. 11#Lk 13.28-29. Ngo nunumi lukoso, abuje miyu ahkiñ do danyichaggo hokii ho danyiaggo dalyi hokii tiirḛ ho diibo nyakiñ do Abraham, Isak, ho Jakob ka agiñho dariiganda ka raddeganda ho, 12#Mt 13.42,50; 22.13; 24.51; 25.30; Lk 13.28. hojalo raddeganda ka oho atañmi agoho jopa linkiñdo kamo ramba dokoho, hiikoho khela ho mohluka aih nyensula dokiñdo.” 13Ho Sipahi sabii mi Jisu lutii, “Inge; hiila lyike nenchi niipa niihtañpa no henjeda.” Ho miira mi hiika myodu jaho miipyatii.

Jisu Abuje Miyu mi Miipya Biido

(Mk 1.29-34; Lk 4.38-41)

14 # Mk 1.29-34; Lk 4.38-41; Mt 4.23-24. Ho Jisu Pitar ka ude ho ahbii kiile, mo mohka ayyobomi doli achihla giila dopa kappa biido; 15mo mohka alah mi tennetii, ho mohka doli achih hempyo tiiku, ho mo guri kula mohmi miiho tiiku. 16Hiika alyiñ ho mohlu abuje igii jarpiñ koniiñ mohko ahgii bitii; ho mo aguñlo igii atañmi mompa bitii, ho hikha achihnii atañmi miipya bitii. 17Siikasi nii hiila na nyibuhenii Aijaya lutiinii hiimi lyipe kiine dupa lyitii, “Mo ngunuka ajju mi ho achih-ahe mi bapa bitii.”

Jisu Mi Imbo Mondu Pakoda

(Lk 9.57-62)

18 # Lk 9.57-60; Mk 4.35; Lk 8.22. Siisi Jisu hempḛr miyuabuje mohka aruñho kappa lala, mo pache dalyiho bonge hiila lubiido. 19Ho Pagenii ako ahbiila mohmi lutii, “Tonsḛrbo, ngo imbo talyi no noh inchi inja lopa.” 20Ho Jisu mohmi lutii, “Yali pa ubu dodu, ho piita patḛr asi; hojalo miyu ka Oho pa dinta dingi kotrḛ nyima.” 21Koneya mohmika imbomonii henjeajiñ mohmi lutii, “Attoh, kapyopa ngiimi ingke nengku rañpe ho ngiika aba mi alie kiine kurañpe.” 22#Mt 9.9; Jn 1.43; 21.19. Hojalo Jisu mohmi lutii, “Ngiimi imboto, ho shiinii bomi atoh ka shiima mi alie siike nento.”

Jisu Allyiaro Miiniiñ Mi Lunu Lobiido

(Mk 4.35-41; Lk 8.22-25)

23 # Mk 4.36-41; Lk 8.22-25. Ho mo huluho chakele, mohka henjeajiñ atañ mohmi chabo montii. 24Ho kato, hiiko hempḛr allyiaro uropa miiritii siimie ho, hopa hulu mi lando poniiñ hii puha biipa miitii; hojalo mo imila dotii. 25Ho mohlu ila ho mohmi ahutii, lubiidola, “Lyangurpe, Attoh; Ngunu lyulyi ke!” 26#Mt 6.30; 14.31; 16.8. Ho mo mohlumi lutii, “Niimpa nunu biisodu, nunu henje papo atañ?” Ho mo guritii ho allyiaro la siimie nyimi gatii; ho hempḛr chimie ritiiku. 27Ho miyuatañ aluñ ritii, lubiido, “Niitañ jaka si miyu kuna, allyiaro la siimie nyi lohe paka mohka luniiñmi talii danii?”

Jisu Jarpiñ Konii Anye Mi Miipya Biido

(Mk 5.1-20; Lk 8.26-39)

28 # Mk 5.1-17; Lk 8.26-37. Ho mo pache ho bochi dakele, Gadarenes gandaho, igii jarpiñ konii miyu anye mohmi iriitii, byuhkhiiñ hokii lila, hiimkane biiso nyatii ho kone hetḛr hiika lembo ho impo biila ila matii. 29#Mk 1.24; Jn 2.4.Ho kato, mo anye gyuritii, “No ngunumi nii miipa, Pinii ka Oho? No so ngunumi myodu ahma rampa henga-henkha miipa hapa ahdunii?” 30Siisi hempḛr alyee abuje ohho kola dotii mohluka dako hokii ichuche ingila. 31Ho igii atañ mohmi yartii, “No matiirḛ ngunumi mompa talyi milo, ngunumi inka alyee abuje dako ho mompa liipe.” 32Ho mo mohlumi lutii, “Inge!” Hopa mohlu linkula alyee ko poha nyatii; ho kato, hikha alyee atañ siimie ka siilyo biilyo ho chuha nyatii, ho yasie ho lyuha nyatii. 33Alyee mika kanii atañ hargiinyatii, ho citi ho harala mohlu hikha drih lyiniiñmi luko nyatii niihtañ pana hiika igii jarpiñ koniibo lyitiinii. 34Ho kato, hikha citi daka dunii atañ Jisu mi kappa dupa linyatii; ho miyuatañ Jisu mi kappa lala, mohlu mohmi yarbii do mohluka ari-apii sokii inge kute hiila.

Currently Selected:

METHU 8: APATBSI

Highlight

Copy