METHU 21

Jerusalem hoka Ahniiñ

(Mk 11.1-11; Lk 19.28-40; Jn 12.12-19)

1 # Mk 11.1-10; Lk 19.29-38; Jn 12.12-18. Ho mohlu Jerusalem aruñho ahchi biikula ho Betpage ho ahtii, Olives putoo ho, ho Jisu henjeajiñ anye mi kiiniñtii, 2mohlumi lubiido, “Niinyi ka pache dalyi daka lemba ho ahnge, ho niinyi gadoh dore rantola kappa kendoke, ho hiika agiñho atu miilañ, hiimi tapya biila so ngiiko boliibii. 3Mi matiirḛ niinyi mi hang taka lyimilo, niinyi luko tolya, ‘Attoh siimi anna doke’ ho mo nyibya loda nenkur bikiñ doke.” 4Siika lyiniiñsi nyibuhenii ka luniiñmi lyipe kiine dupa lyitii, lubiidola,

5“Zayon ka nyimii wiinga atañmi lukoto,

kato, nunuka radde nunuko ahla doke,

yanu, ho gadoh ayoho dula,

ho gadoh atu ho, gadoh ka oho.”

6Henjeajiñ anye ila Jisu ka luniiñ chulipa miitii; 7mo anye gadoh la gadoh ka atu mi bolii bitii, ho hiiko mohluka pulye tarii mi pyucha bitii, ho mo hiiko dutii. 8Abuya miyu mohluka pulye tarii mi lembo ho pyubitii, ho tange sannii halloh pala lala ho lembo ho hiimi tembitii 9#Lk 2.14; Mt 21.15; 23.39. Ho miyuatañ mohka hata hoka innii atañ ho kiiliñ hoka imbo monii atañ gyutii, “Hosana David ka Oho mi! Lyanko kendo huna Attoh ka armyañ pa ahdonii! Hosana kahejami!” 10Ho mo Jerusalem ho ahkele, hikha citi hii rukha adu ritii, lubiidola, “Hupe si?” 11#Jn 6.14; 7.40; Miin 3.22; Mk 6.15; Lk 13.33. Ho miyuatañ lutii, “Siikasi nyibuhenii Jisu hiike Galili daka Nazaret hokii.”

Jisu Piniiude Ho Ahdo

(Mk 11.15-19; Lk 19.45-48; Jn 2.13-22)

12 # Mk 11.15-17; Lk 19.45-46; Jn 2.13-17. Ho Jisu Pinii ka piniiude ho ahtii ho hoka hikha kiiri miiniiñ atañmi piniiude ka agoho nempa lintii, ho mo posa bihii bikhe siina naniimi kulu paji miitii ho pakoo pyunii ka duta nanii miilañmi. 13Mo mohlumi lutii, “Hiila ketola do, ‘Ngiika ude mi kuko ude hiila ke lukiñ donii’; hojalo nunu siimi diipyo niika dukuñ miru pa miibii donii.”

14Ho micha la liicha nyi mohko ahtii piniiude ho, ho mo miipya bitii mo anye mi. 15#Lk 19.39; Mt 21.9. Hojalo nyibu burii atañ la pagenii atañ mohka aya miigo miiniiñmi kappa lala, ho himme atañka piniiude hoka gyuniiñ mi, “Hosana David ka Oho mi!” mohlu hadiitii; 16ho mohlu mohmi lutii, “No tapa doha siika atañsi nii lunyada?” Ho Jisu mohlumi lutii, “Ḛh; nunu ronge hetḛr rika matopo,”

“himme la wiinga ajañ ka aguñ loke

mo assañ sandrḛ kiine kendonii”?

17 # Mk 11.11-14; Lk 13.6-9. Ho mohlumi apatela, mo citi ka ago linkula Betany ho ahtii ho hiiko mo ayoh dutii.

Taro Sannii mi Jisu Bebiido

(Mk 11.12-14,20-24)

18Aro konchiho, mo citi ho ahkur kula dokula, mo apiñ hayatii. 19Ho taro sannii mi katula lembo aruñho kappa lala mo hiika aruñho ahtii, ho hiiko hang kappa matii annii kontiisii. Ho mo lutii hiimi, “Ronge hetḛr hiira ahee hiliñ kulya yo niiko hokii!” Ho taro sannii ohepada sengi datii. 20#Mk 11.20-24. Hiimi henjeajiñ atañ kappa lala aluñ nyatii, lubiidola, “Niihtañpa taro sannii ohepada sengi dane?” 21#Mt 17.20; 1 Kor 13.2. Ho Jisu mohlumi lukotii, “Jijeloda, Ngo nunumi lukoso, nunu matiirḛ henje dokoda ho hemmo makoda, nunu taro sannii mika miiniiñ kontii mapa, nunu siika putoo siimi jalo ludo koda, ‘Sokii duhila yasie siimie ho duhahe,’ hii hiila lyikiñdo. 22#Jn 14.13-14; 16.23. Ho nunuka kuniiñ ho nii jalo kuchi, nunu hiimi pakiñ doke, nunu matiirḛ henje dokoda.”

Jisu Ka Otority Piigo mika Takaniiñ

(Mk 11.27-33; Lk 20.1-8)

23 # Mk 11.27-33; Lk 20.1-8; Jn 2.18-22. Ho mo piniiude ura ho ahkele, nyibu burii atañ la amiabañ atañ mohko ahtii mohka tonsḛr laka doho, ho lutii, “Nii otority la no siika atañ siimi miidu, ho hu niimi siika otority mi miidopa bitii?” 24Jisu mohlumi lusitii, “Ngo tiirḛ nunumi gonge taka talyi; ho nunu matiirḛ ngiimi luko lyimilo, ho ngotiirḛ nunumi luko talyi nii otority la ngo siika atañmi miidu hiila. 25Jon ka baptisma biniiñsi, hokoda nohkii pe? Dariiganda hokii ha malo miyu kokiiha?” Ho mohlu kone anyañ mi taka siitii, “Ngunu matiirḛ ‘Dariiganda hokii’ ludokoda, mo ngunumi lukiñdo, hokoda niimpa nunu mohmi henje nyama?” 26Ho ngunu matiirḛ ludokoda, Miyu kokii, ngunu miyu atañmi biisodo; niimpalukoda hikha miyuatañ Jon mi nyibuhenii lunyada. 27Hopa mohlu Jisu mi lukotii, “Ngunu chima.” Ho Jisu mohlumi lutii, “Ngo tiirḛ nunumi luko tama nii otority la ngo siika atañmi miidu hiila.

Oho Anye mika Lutiñnaniiñ

28 # Mt 20.1; 21.33. “Nunu nii hiila hendo? Miyu konekii oho anye dutii; ho mo kapyo yako ahla lutii, ‘Wiinga, robalu ho inge ho siilo balu miinge.’ 29Ho mo lusitii, ‘Ngo intema’; hojalo kami ho mo henkur lala ho intii. 30Ho mo anye niiko ahtii ho hiimi tiirḛ lutii; ho mo lukotii, ‘Ngo inchike, tonsḛrbo,’ hojalo imatii. 31Siika anye sokii hu aba ka heniiñ chulipa miitii?” mohlu lutii, “Kapyobo.” Jisu mohlumi lutii, Jijeloda, Ngo nunumi lukoso, biijokajo myanii la pfyoaridiisunii atañ nunumi impyo yapa Pinii ka raddeganda ho indoke. 32#Lk 3.12; 7.29,30. Niimpalukoda Jon nunuko denki ka lembo mi pakiñ hatii, ho nunu mohmi henje matii, hojalo biijokajo myanii la pfyoaridusubo atañ henje nyatii mohmi; ho nunu mohmi kapa lala tiirḛ, nunu kami kalo lohepa henkur ma ho mohmi henje nyama.

Robalu Miido Lyanii Atañ mika Lutiñnaniiñ

(Mk 12.1-12; Lk 20.9-19)

33 # Mk 12.1-12; Lk 20.9-19. Lutiñnaniiñ koneya tatota. Miyu kone robalu miitii, ho pakḛr dado sulu miitiñtii, roalha bikuñ kopa ubu hetii, ho sobya miilañ pentii, ho miidolyanii konemi atiitela, ho ganda ponge yaho intii. 34#Mt 22.3. Ahee hidu myodu ahku kiile, mo mohka miira atañmi kiiniñ biido miidolyanii atañko, mohka ahee mi pubbii hiila; 35ho miidolyanii atañ mohka miira atañmi sebiila ho higor patii, kone mi mentii, ho konemi yalañ kutii. 36Hiira tongelya miira atañmi mo kiiniñtii, kapyo hokiimi abuyapa; ho mohlu mohlumi tiirḛ hiira miitii. 37Kami kalo ho mo mohka oho mi kiiniñtii mohluko, lubiidola, Mohlu ngiika oho mi khiinedo. 38Hojalo miidolyanii atañ oho mi kappa lala, mohlu lusu nyatii, Sike pensikosabo; kiije, mohmi mempasa ho mohka biisa niimi ngunu biisa. 39Ho mohlu mohmi latu lala ho robalu ka agoho jopa limbiido, ho mohmi mentii. 40Ho robalu ka atoh ahdo kukoda, niihpe miikiñ donii hiika miidolyanii atañmi? 41#Mt 8.11; Miin 13.46; 18.6; 28.28. Mohlu mohmi lutii, “Mo hiika diimmah atañmi hempḛr herupa siidopa miikiñdo, ho robalu mi tongelya miidolyanii atañmi bikiñdo huna myodu ho ahee bidonii.”

42 # Miin 4.11; 1 Pit 2.7. Jisu mohlumi lutii, Nunu ronge hetrḛ piniipota mi rika mapo:

Ude miinii ka yalañ kakhu hii

siirañ rañtupa dukiñ doke;

siikasi Attoh ka miiniiñke,

ho hiikahii ngunu kata ho hempḛr kapyodo?

43Hopa Ngo nunumi lukoso, Pinii ka raddeganda mi nunukokii labii kendo kuke ho nii ganda na ahee hiliñ donii hiimi bikiñdo. 44“Ho huna siika yalañ so giihi talyinii chomiichoka kendoke; hojalo hiika hii nii hona giihi talyi nii, hiika hiimi giipi lobii kendo.”

45Nyibu burii la Parisi atañ siika lutiñnaniiñ mi tapa lala, mohlu talatii siika luniiñsi mohlumi ludo hiila. 46Hojalo mohlu mohmi pattiih bopa henka lala, mohlu miyu danii atañmi biisotii, niimpalukoda mohlu mohmi nyibuhenii hiila khiitii.

Currently Selected:

METHU 21: APATBSI

Highlight

Copy