METHU 17

Lyiguhniiñ

(Mk 9.2-13; Lk 9.28-36)

1 # Mk 9.2-10; Lk 9.28-36; 2 Pit 1.17-18. #Mt 26.37; Mk 5.37; 13.3. Ho allo lokhe daku lala Jisu mo agiñho Pitar ho Jems ho mohka anu Jon mi ingiitii, ho mohlumi hempḛr putoo ayoh ho chagiitii. 2Ho mo lyilutii mohluka kadopa, ho mohka nyimohii danyi chitañ byotii, ho mohka abitarii hii hudakiila puloo tii. 3Ho kato, hiiko Mose la Elija nyi mohluka agiñho ahtii, mohmi luriitii. 4Ho Pitar Jisu mi lutii, “Attoh, ayado ngunu so da; no matiirḛ hendo milo, ngo so tabyo pehiñhe pentoso, kone niipa ho kone Mose pa ho kone Elija pa.” 5#Mt 3.17; Jn 12.28. Mo luriila datiirañ, kato, hempḛr puloo jomii mohlumi hipu biitii, ho jomii hokii aguñ gonge lutii, “Siikasi ngiika heniiñja Oho#17.5 Malo ngiika Oho, ngiika (malo hii) Heniiñja ke, humina ngo ano hempyo biidunii; mo luniiñ tatolya.” 6Siimi henjeajiñ atañ tapa lala, mohlu mohluka nyimo mi nyañki giitii, ho miilañru biiso nyatii. 7Hojalo Jisu ahbiila ho mohlumi tennetii, lubiidola, “Gurito, ho biiso nyayo.” 8Ho mohlu amee kacha biikele, mohlu kone mitrḛ kappa kuma hojalo Jisu kontii misu.

9 # Mt 8.4; 16.20; Mk 3.12; 5.43; 7.36. Ho mohlu putoo hokii tola doku kiile, Jisu mohlumi lubiido, “Kone mitrḛ siika kappa niimi lukoyo, nii dahepa miyu ka Oho turiturku tama shiiniiñ hokii.” 10#Mk 9.11-13; Mt 11.14. Ho henjeajiñ atañ mohmi tahii biido, Hokoda niimpa pagenii atañ ludo kapyopa Elija ahpyo kendo lodake hiila? 11Mo lusitii, “Elija ahkiñdo, ho mo hikha drih atañmi miilyañ kendo; 12#Mt 11.14. hojalo Ngo nunumi lukoso Elija ahto kula datiiku, ho mohlu mohmi kala matii, hojalo nii mohlu miinatii mohmi miitii. Hopa miyu ka Oho tiirḛ mohluka alah ho heru henkiñdo.” 13Ho henjeajiñ atañ helanyatii mo Jon Baptisma binii bomi ngunumi lukodo hiila.

Jisu Jarpiñ Koniiñ Hemme Kone Mi Miipya Biido

(Mk 9.14-29; Lk 9.37-43)

14 # Mk 9.14-27; Lk 9.37-43. Ho mohlu miyuapur ahbii kiile, miyu kone mohko ahbiila ho mo hataho liibañ khangala lutii, 15“Attoh, ngiika oho mi aroh tope, niimpalukoda mo tahiñ shiitiñnii ho hempḛr uropa herudo; kiirañ mo yamuho chuhado, ho yasie hotiirḛ chuhado. 16Ho ngo mohmi niika henjeajiñ ko ahgii bihañ kiile, ho mohlu mohmi miipya lama.” 17Ho Jisu lusitii, “O henje manii ho ingyamiigya halugiira atañ, nii dahepa Ngo nunu agiñho dabo monchi? Nii dahepa Ngo nunumi hembyuñ mola dachi? Mohmi so ngiiko ahgii.” 18Ho Jisu mohmi gatii, ho igii mohkokii lintiiku, ho himme mi atta jaho miipyatii. 19#Mk 9.28-29. Ho henjeajiñ atañ ahsiela Jisu ko ahbiila ho lutii, Niimpa ngunu hiimi mompa lamato? 20#Lk 17.6; Mt 21.21; Mk 11.22-23; 1 Kor 13.2; Mk 9.23.Mo mohlumi lutii, “Nunuka henje papo kopa. Niimpalukoda jijeloda, Ngo nunumi lukoso, nunuko matiirḛ gihañ kormo kane jalo henje giido koda, nunu siika putoo mitrḛ luto, sokii inkaso iehi he, ho hii iehi kendo; ho hang miila manii hiila nyikiñma nunupa.” 21#17.21: Goñkhu 21: “Hojalo kuniiñ la nyoniiñ nyila siike sitañmi mompa lakiñ siidonii; khiibe hang ngoyalo miila kema”

Jisu hiira Mohka Shiisanii piigo mi Lupado

(Mk 9.30-32; Lk 9.43-45)

22 # Mk 9.30-32; Lk 9.43-45; Mt 16.21; 20.17-19; 26.2. Mohlu Galili ho dakele, Jisu mohlumi lutii, “Miyu ka Oho mi miyu atañmi nembi kendo, 23ho mohlu mohmi menkiñdo, ho mo lohiñ niika allo ho turi kendoku.” Ho mohlu hempḛr hengahenkhatii.

Pinii Ude Paka Biijokajo Biniiñ

24Mohlu Keparnam ho ahbii kiile, piniiude daka biijokajo myanii atañ Pitar ko ahbiila ho lutii, “Nunuka tonsḛrbo biijokajo bima ehna?” 25#Rom 13.7; Mt 22.17-21. Mo lutii, “Ḛh.” Ho mo ude ahbii kiile, Jisu kapyopa mohmi lutii, lubiidola, “No nii hiila hendo, Saimon? Kiiddiapiñ daka radde hukohokii biijokajo myadu malo bibyuñkodu? Mohka oho atañ kokii ha malo miko hokiiha?” 26Ho mo hiila lutii, “Miko hokii,” Jisu mohmi lutii, Hokoda oho atañ dasḛr kuke. 27#Mt 5.29; 18.6-9; Jn 6.61; 1 Kor 8.13. Hojalopa, mohlumi khiilii madopa, yasie siimie ho ingela ngiiyyi akho mi kulohe, ho kapyo japa ka ngiiyyi kubiiniimi lacha lala, ho hiika ngiiyyi ka aguñmi no khoko dokoda ho posa pere kappa kendoke; hiimi labiila mohlumi bito Ngiipa ho nunu pala.

Currently Selected:

METHU 17: APATBSI

Highlight

Copy