METHU 14

Jon Baptisma Binii Boka Shiiniiñ

(Mk 6.14-29; Lk 9.7-9)

1 # Mk 6.14-16; Lk 9.7-9; Mk 8.28. Hiika myodu ho Galili mika sangiibo Herod Jisu ka tatukatu mi tapa biido; 2ho mo mohka miira atañmi lutii, “Siikasi Jon Baptisma biniibo, mo shiinii hokii turi doku; hiikohopa siika harchichike si mohko miigiñ nando.” 3#Lk 3.19,20. Niimpalukoda Herod Jon mi latu lala ho rala la ho pattiih udeho tuntii, niimpalukoda Herodias ka piigopa, mohka abañ Pilip ka mihie; 4niimpalukoda Jon mohmi lutii, “Niika mohmika biiniiñ si biiju ho biimake.” 5#Mk 6.19-29. Ho mo mohmi mempa nansutii, mo miyu atañmi biisotii, niimpalukoda mohlu mohmi nyibuhenii hiila khiitii. 6Hojalo Herod budu allo ahkele, Herodias ka nyimii wiinga nasu sotii sipahi atañka hataho, ho Herod mi hempyo miipatii, 7hopa mo hemme biidola lutii no nii kuchi ngo niimi bichi. 8Mohka annii lo luru kotola, mo kutii, “Ngiimi Jon Baptisma binii boka adiñ mi siika paaku ho bipe.” 9Ho radde henkur tiiku; hojalo mohka hemme kopa ho mohka nyibo ahnii atañ kiipa bitote hiila lutii; 10mo kiiniñtii ho Jon mi pattiih udeho adiñ patutii, 11ho mohka adiñmi paaku ho jolii bitii ho nyimii mi bitii, ho mo hiikahiimi mohka annii mi joliibitii. 12Ho mohka henjeajiñ atañ ahtii ho apo mi jobiikula ho alie tiiku; ho mohlu intiiku ho Jisu mi lukotii.

Jisu Jarngohemi Diigo Hobiido

(Mk 6.30-44; Lk 9.10-17; Jn 6.1-14)

13 # Mk 6.32-44; Lk 9.10-17; Jn 6.1-13; Mt 15.32-38. Siisi Jisu siimi tapa lala, mo hiiko hokii insa giitii hulu pa jirara myokoh ho. Hojalo miyuatañ hiimi tapa lala, mohlu alih pa imbo montii taun hokii. 14Mo siilyo ila dola mo hempḛr miyuabuje kappatii; ho mo mohlumi arohtii, ho mohluka achihmi miipya bitii. 15Alyiñdalyi kukele, henjeajiñ atañ mohko ahtii ho lutii, “Siika si jirara myokoh ke, ho allo loja talyiku; miyu atañmi kiiniñ toku lembaho ho mohlupa diigo riido kiine siito.” 16Jisu lutii, “Mohlu indo kupa lyikiñ make; nunu mohlumi diisa iche bito.” 17Mohlu mohmi lutii, “Ngunukii lyatañ pengohe ho ngiiyyi sonye sii dosudonii.” 18Ho mo lutii, “Hiimi so ngiiko biilii.” 19#Mk 14.22; Lk 24.30. Ho mo miyu atañmi tammi ho duha tote lutii; ho lyatañ pengo hemila ho ngiiyyi sonyemi biitola mo yapuñ ho kachatii, ho lyantii, ho petutii ho yatañ mi henjeajiñ atañmi bitii, ho henjeajiñ atañ miyu atañmi bitii. 20Ho hikha diitii ho diidetii. Ho mohlu yagii giilyañlenye poteje petu pepo diilemi tukuñ tiiku. 21Ho hiika diinii atañ milobo jarngo hepa diitii, nyimii la hemme nyimi khiita mapa.

Jisu Yasie ho Indo

(Mk 6.45-52; Jn 6.15-21)

22 # Mk 6.45-46; Jn 6.15-17. Hiika hiibaho mo henje ajiñatañ mi huluho chakula ho mohmi kapyo yapa pache dalyiho boke nentii, mohka miyuatañ mika nempya nensa tado. 23Ho miyu atañmi inke nenkulala, mo putoo ho chatii mohkontii kudupa. Alyiñdalyi tiiku, hiiko mohkontii datii, 24#Mk 6.47-52; Jn 6.16-21. siika myoduso hulu hii kiitiñ hokiila hempḛr adho hartii ku, lando poniiñlo tiicko nyatii; niimpalukoda allyi mohlumi herii hala dotii. 25Ho ayoh ka gunta tape niiho mo mohluko ahtii, siimie ho imbiidola. 26#Lk 24.37. Henjeajiñ atañ mohmi siimie ho ila dopa kappa lala, mohlu biiso nyatii, lubiidola, “Siikasi uyi ke!” Ho mohlu biisola gyutii. 27Hojalo nyibyaloda mo mohlumi luriitii, lubiidola, “Haronyato; Siikasi ngoke: biiso nyayo.”

28Ho Pitar lusitii mohmi, “Attoh, nohsu milo, ngiimi tiirḛ niika agiñho yasie ho ahke nempe.” 29#Jn 21.7. Mo lutii, “Ahto.” Ho Pitar hulu hokii agoho daliñtii ho yasie ho intii ho Jisu ko ahtii; 30hojalo mo allyi henii mi kappa lala, mo biisotii, ho huhapa miikele gyuritii, “Attoh, lyangurpe ngiimi.” 31#Mt 6.30; 8.26; 16.8. Jisu nyibyaloda mohka alah lyuliñla mohmi gatutii, mohmi lubiido, “Henje papo giiniibo miyu, niimpa hemmodu?” 32Ho mo anye huluho chaku kiile, allyi hengu ritiiku. 33#Mt 28.9,17. Ho hulu hoka dunii atañ mohmi heriinyatii, lubiidola, “Jijeloda no Pinii ka Oho.”

Jisu Genesaret ho Achih mi miipya biido

(Mk 6.53-56)

34 # Mk 6.53-56; Jn 6.22-26. Ho mohlu bochi kulala, mohlu Genesaret gandaho ahtii. 35Ho hoka miyuatañ mohmi kala lala, mohlu hikha aruñare ho kiiniñtii ho hikha achihnii atañmi mohko ahgii bitii, 36#Mk 3.10; Mt 9.20. ho mohmi lyartii, mohlumi mohka pulye nyetañ mijalo tene kiinepe; ho hutii tenetii hii hempyo nyatii.

Currently Selected:

METHU 14: APATBSI

Highlight

Copy