JON 7
7
Jisu la Mohka Anubarmii Atañ
1Siika hiiba ho Jisu Galili dalyiho intii; mo Judia dalyi imatii, niimpalukoda Jew atañ mohmi mendupa mela dotii. 2Siisi Jew atañka Tabarnakel dituñ hii tunii tiiku. 3#Mk 3.21,31; Mt 12.46. Hopa mohka anubarmii atañ mohmi lutii, “Siimi apatela ho Judia ho insa, niimpalukoda niika henjeajiñ atañmi niika miigo miiniiñ atañmi kapa kiine dupa. 4Niimpalukoda kone hetḛr miisila miigo miimake mo kone abilo chinko nando koda. No matiirḛ siika drih atañmi miido koda, attoh mi dohadolo mi kakiñ siito.” 5Niimpalukoda mohka anubarmii atañ tiirḛ mohmi henje matii. 6#Mt 26.18; Jn 2.4; 7.30. Jisu mohlumi lutii, “Ngiika myodu siisi ahma ranke, hojalo nunuka myodu hii kiirañ so dokañ sudu ke. 7#Jn 15.18-21. Dohadolo nunumi kariñ kemake, hojalo si ngiimi ke kariñ kendonii niimpalukoda ngo ludu mohluka miigo atañsi diimmah hiila. 8Nunu attoh ya dituñ ho inge; ngo siika dituñ so chate make, niimpalukoda ngiika myodu hii siisi lohepa ahma ranke.” 9Hiila lubiidola, mo Galili ho datii.
Jisu Shiitiñ Giiko Dituñ ho
10Hojalo mohka anubarmii atañka dituñ hoka chane kuho, motrḛ chatii, miyuatañ mi kapa dopa ma hojalo chasila chatii. 11Jew atañ mohmi dituñ soko ho metii, ho lunyatii, “Nohna mo?” 12#Jn 7.40-43. Ho hiikoho abuje mohka piigo mi budubudu miyuatañ lusu nyatii. Ho kone lutii, “Mo denki miyu ke,” tange lutii, “Ma, mo miyu atañmi lembo ngogii da.” 13#Jn 19.38; 20.19. Hojalo Jew atañ mika biiso mi kone hetrḛ goropa mohmi luma tii.
14Dituñ solaka dorañho Jisu piniiude ho chatii ho tonsḛrtii. 15Jew atañ hiimi hemur nyatii, lubiidola, “Niitañpa siika miyu si chindonii, mo hang puri masu tiirḛ?” 16Hopa Jisu mohlumi lusitii, “Ngiika tonsḛr niisi ngiikii make, hojalo mohkiike huna ngiimi kiiniñ tiinii; 17mi miyu kone jalo mohka miigo miina dokoda, mo chinkiñ do tonsḛr niisi Pinii kokiiha malo ngo ngiika atoh otority lo ludoha hiila. 18Huna atoh ka otority lo ludonii hii atoh mi assañ shiipa miido; hojalo huna mohmi assañ dupa miidonii huna mohmi kiiniñ tiinii hii jije, ho mohko hang gollumisu giima. 19#Jn 1.17. Mose nunumi dapo mi bima siiha ehna? Hojalo nunu kone hetḛr dapo mi talii nyama. Niimpa nunu ngiimi mendupa medu?” 20#Jn 8.48; 10.20; Mt 11.18; Mk 3.22. Miyu atañ lusitii, “Niiko igii giido! Hu niimi mempa medo?” 21#Jn 5.2-9. Jisu mohlumi lusitii, “Ngo miigo kone miihañ kiile, ho nunu hikha hiimi kapuñtale nyada. 22Mose nunumi mitupipa koniiñ mi bitii (hii Mose kokii ma, hojalo aba atañ kokii), ho nunu miyu mi dumoalo ho mitupipa danii. 23#Mk 3.5; Lk 13.12; 14.4. Miyu matiirḛ dumoalo ho mitupipa kodo koda, Mose ka dapo mi tatu mayapa hiila, nunu ngiimi dumoalo ho ngo miyu mi hikha mohka apo mi miipya dula hiila ha hadii dunii? 24#Jn 8.15. Nyitumoru mi kala lala ayakacho kayo, hojalo ayakacho kadiko kabiidola haliito.”
Mo Masiah Peha?
25Hopa Jerusalem daka miyu tange luda, “Siika miyu simi masu peha humi na mohlu mendupa mene nii? 26Ho si da mo, tapa dopa lula da, ho mohlu mohmi hang luma! otority atañ Jijepa chinsu dopeha si Kristo hiila? 27#Jn 6.42; 7.41; 9.29. Hojalo ngunu chindo siika miyu si nohkii ahdo hiila; ho Kristo ka ahlyi ho, kone hetḛr chinkiñma mo nohkii ahdo hiila.” 28#Jn 8.42. Hopa Jisu gyukotii, piniiude hoka mo tonsḛr toncha ho, “Nunu ngiimi chindo, ho nunu chindo ngo nohkii ahdo hiila? Hojalo ngo atoh pa ahsu make; mo ngiimika kiiniñ bo jije ke, ho mohmi nunu chima. 29#Jn 8.55; 17.25; Mt 11.27. Ngo mohmi chindo, niimpalukoda ngo mohkokii ahdu, ho mo ngiimi kiiniñtii.” 30#Jn 7.44; 10.39; Mk 12.12; Jn 8.20. Hopa mohlu mohmi ladupa metii; hojalo kone hetḛr mohmi alah tenga lamatii, niimpalukoda mohka myodu ahma tiirañ. 31#Jn 8.30; 10.42; 11.45. Hojalo abuje miyuatañ mohmi henje tii; mohlu lutii, “Niida Kristo ahchi, mo siimi abu yapa kagiñnanii drih miikiñ doha siika miyu ka miiniiñmi hentola?”
Kalyabiiniiñ Atañ mi Kiiniñtii Jisu mi Patiih bodupa
32Parisi atañ tapatii miyu atañka budubudu mo piigo mika lusu niimi, ho nyibu burii la Parisi atañ sabii atañmi kiiniñtii mohmi lake nendupa. 33#Jn 8.21; 12.35; 13.33; 14.19; 16.16-19. Jisu ho lutii, “Ngo nunuka agiñho ichuche dakiñ dorañke, ho ngo inchi ku mohko huna ngiimi kiiniñ tiinii; 34nunu ngiimi mekiñdo ho nunu ngiimi mepa kema; noh ngo da ho nunu ahla kema.” 35#Jem 1.1; 1 Pit 1.1; Jn 12.20; Miin 11.20. Jew atañ kone anyañ mi lusu nyatii, “Nohyu siika miyusi impa miidunii ngunuka mechi lasa mako? Mo Grik miyuatañ duko impa peha miidonii ho Grik atañmi tonsḛr dupa hiila? 36Nii hiila ka lusa niimi pe ludonii, ‘Nunu ngiimi mekiñdo ho nunu ngiimi mepa lakiñma,’ ho, No ngo da ho nunu ahla kema?”
Sango Binii Yasie Siigañ
37 #
Jn 4.10,14. Dituñ soniiñ ka kamija allo ho, hempḛr kahe allo, Jisu guri biila ho gyutii, “Mi kone matiirḛ hangḛr domilo, mohmi ngiiko ahke nento ho tanke nento. 38Huna ngiimi henje talyi nii, piniipota ka lunii chulipa, Mohka ahha hokii turnii yasie biliñ kendo.” 39#Jn 20.22; 12.23. Siisi siikasi Yajiyallo ka piigo mi mo lutii, huna mohmi henje talyi nii hii larii kendo; niimpalukoda siisilohepa Yajiyallo mi bima tiirañ, niimpalukoda Jisu mi siisi lohe pa assañ matii rañ.
Miyu Atañ ka Punko hoka Tache Siiniiñ
40 #
Jn 1.21; Mt 21.11. Mohlu siika aguñ atañmi tapa lala, miyu tange lutii, “Siikasi jije nyibuhenii.” 41Tonge lutii, “Siikasi Kristo.” Hojalo tange lutii, “Kristo Galili hokii ahkiñ siine? 42#Mt 1.1; Lk 2.4. Piniiaguñ hiila lumasa ehna Kristo David ka halugiira hokii kendo hiila, ho Betlehem hokii ahkiñ do hiila, David nii lemba hokii tiinii?” 43Hopa miyu atañka punko tache tahe ritii mohka piigo pa. 44#Jn 7.30; 10.39. Tange mohmi ladupa hentiñ, hojalo kone hetḛr mohmi alah tenga lamatii.
Jew Otority Atañ ka Henje maniiñ
45Sabii atañ inkur tiiku nyibu burii atañ la Parisi atañ ko, mohlumi hiila lutii, “Niimpa nunu mohmi ahgiima?” 46#Mt 7.28. Sabii atañ lusitii, “Kone hetḛr siika miyu ka luniiñ chulipa luma!” 47Parisi atañ ho mohlumi lusitii, “Nunu ngogii koma byoha, nunu tiirḛ ha? 48Otority atañ la malo Parisi atañ hokii mohmi henje nyane peha? 49Hojalo siika miyuatañ, hutiina dapo mi chinya manii, halii kokiñdo.” 50#Jn 3.1; 19.39. Nikodemas, huna mohko kapyo ho ahtiinii, ho mohluka apur hokii kone, mohlumi lutii, 51“Ngunuka dapo hii ayakacho kada dupeha miyu mi kapyopa mohmi tapa kiine marañpa ho chimpa kiine marañpa mo nii miitii hiila?” 52Mohlu lusitii, “No tiirḛ Galili hokii peha? Meto ho no kapa kendoke Galili hokii nyibuhenii kone hetḛr linkiñ make hiila.”
53Mohlu atoh atoh ude ho intiiku.
Currently Selected:
JON 7: APATBSI
Highlight
Share
Copy
Want to have your highlights saved across all your devices? Sign up or sign in
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
