MIINIIÑ 7

Stepen ka Luniiñ

1Ho bukuñ nyibu lutii, Siikasi hiila? 2Ho Stepen lutii:

anubarmii ho aba atañ, ngiika luniiñmi tato. Pinii hudakhada ngunuka aba Abraham ko ahtii, mohka Mesopotamia hoka daho, Haran hoka duma rampa, 3ho mohmi lutii, Niika gandaho niika uru atañmi apa tela hokii inge gandaho nohna niimi ngo kakiñ talyi nii. 4Ho mo iritii Chaldean ganda hokii, ho Haran ho dutii. Ho mohka aba shiiku lala, Pinii mohmi hiiko hokii nempa lintii siika ganda so nohna nunu siisi dunii; 5hojalo mo mohmi hang gandanencha hokii bimatii, alih dahe tiirḛ, hojalo hemmetii siimi niipa bichi ke ho niika ohoasi niika hiiba hoka ahsabomi, mohkii oho nyima siitrḛ. 6Ho Pinii hiila lutii, mohka ohoasi hii nyibo pa lyila mihka gandaho dukiñdo, mohlu miira lyila dukiñdo ho nyang lampe mohlu khiima pama miiko kendo. 7Hojalo ngo ayakacho kachi ganda mi humina mohlu miiho talyi nii, Pinii lutii, ho hiika hiiba ho mohlu linku la ho siika lengo so ngiimi herii kendo. 8Ho mo mohmi mitupipa niika hemmesiiniiñ mi bibiido. Ho Abraham Isak ka aba pa lyitii, ho allo lopinye niiho mohmi mitupipatii; ho Isak Jakob ka aba pa lyitii, ho Jakob alyañlenye aba-apa ka aba pa lyitii.

9Ho miloboatoh atañ, Josep mi kariñtii, Egip ho pyutii; hojalo Pinii mo agiñho dabo montii, 10ho mohmi hikha mohka ahiare hokii papyabitii, ho mohmi Paraoh Egip ka radde, ka kata ho kaji dopa ho chila mi bitii, huna mohmi Egip ka govonor ma miitii ho hikha mohka ude mi kabii niipa. 11Ho hiiko hikha Egip ho Kanan ho diime ahtii, ho hempḛr pamyotakho, ho ngunuka aba atañ diigo kapa matii. 12Hojalo Jakob Egip ho emmo do hiila tapa lala, mo ngunuka aba atañmi kapyopa kiiniñtii. 13Ho ronye niipaka ahlyi ho Josep attohmi chindopa miisu tiiku mohka anuabañ atañmi, ho Josep ka uru atañmi Paraoh chintiiku. 14Ho Josep kiiniñ lala ho mohka aba Jakob ho hikha mohka henii-myanii atañmi mohko gyolii biido, kanukhange la lyangohe miyu atañmi; 15ho Jakob Egip ho totii. Ho mo shiitii, mo atoh tiirḛ ho ngunuka aba atañ tiirḛ 16ho mohlu Shechem ho joku liibii tiiku ho byuh atiitii Abraham ka rupu laka Hamor ka oho atañ kokiika Shechem hoka riiniiñho.

17Hojalo hemme binii myodu tunii lyikunii, nii mina Pinii Abraham mi bitiinii, miyuatañ taro ritii ho Egip ho bupya busatii 18Egip koneya radde Josep mika kachiñ manii ka sari menda hemi. 19Mo ngunuka miyu atañmi kana mapa miitii ho ngunuka aba atañmi chechepa mohluka wiinga ajañ atañmi lukope lutii, mohlu mempa dupa. 20Siika myodu so Mose mi biitii, ho Pinii ka hataho kapyotii. Ho mohmi mohka aba ka ude ho piilo bariñhe asotii; 21ho mohmika chimpa lyikuho, Paraoh ka nyimii wiinga mohmi mohka attoh wiinga hiilyañpa asotii. 22Ho Mose mi hikha Egip daka chila mi lukotii, ho mo tamochikhotii mohka luniiñ ho miiniiñ atañ ho.

23Mo nyang alyañpiilye kukele, mohka ahha ho mohka anubarmii Isrel ka oho atañ ko, soha dokoda hiila hentii. 24Ho hiikohokii kone mi miigya dopa kapa lala, mo hensḛrkadu miyu mi miipyatii ho mohmi miilitii membiidola Egip dakii bomi. 25Mo hiila hentii mohka anubarmii atañ hela dudo Pinii mohlumi tiipya kendo ngiika alah lo hiila, hojalo mohlu chimatii. 26Ho allo lohe yaho mo mohluka gasu ko ahtii ho mohlumi lyartii, lubiidola, Miyu atañ, nunu anubarmii siike, niimpa nunu kone anyañ gasu nyado? 27Hojalo hu miyu na aya mapa ariapii mi miitiinii mohmi nempa lintii, lubiidola, Hu niimi ngunumi sangiinii ho ayakacho kaniipa miitii? 28No ngiimi tiirḛ mempa hendoha biilyo ka Egip miyu mika mencha ho? 29Siika luniiñmi tapa lala Mose hagii tiiku, ho mompakoniiñ pa lyila Midian ka gandaho datii, nohna mo oho anye ka aba pa lyitiinii.

30Siisi nyang alyañpiilye nyanja kukele, miidopopi kone mohko ahtii Sinai Putoo daka jabyo ho, tareapya ho yamu miilyo chuli. 31Mose siimi kapa dala la mo hemurtii; ho mo kadḛr dupa aruñ ahde kiile, Attoh ka luniiñ mohka ahtii, 32Ngo niika aba atañka Pinii ke, Abraham ka Pinii ho Isak ho Jakob ka. Ho Mose alyetii ho kadu pa haro matii. 33Ho Attoh mohmi lutii, Niika alih hokii luku mi khepato, niimpalukoda niika dako lengo si darii lengo ke. 34Ngo ngiika miyuatañ mika miihimiire niimi kapa doke Egip hoka dunii atañmi ho mohluka kheniiñ mi tapa doke, ho ngo mohlumi papya dupa todu. Ho siisi ahto, ngo niimi Egip ho kiiniñso.

35Siika Mose humina mohlu luniiñ tama tiinii, lubiidola, Hu niimi sangiiniipa ho ayakacho kaniipa miitii? Pinii anyerupa sangiinii ho papyaniipa kiiniñtii miidopopi ka alah lo tareapya ho mohko ahla. 36Mo mohlumi lingii tiiku, Egip ho kahotamo ho kagiñnanii miibii dola ho Lanchañ Siimie ho, ho jabyo ho nyang alyañpiilye anyañ. 37Siika sike Mose huna Isrel miyu atañmi lutiinii, Pinii nunupa nyibuhenii nunuka anubarmii hokii sucha bikiñdo niihtañpa ngiimi suchatii. 38Siika sike hii huna jabyo daka miyu apurho danenii miidopopi ka agiñho mohmi Sinai Putoo ho lune, ho ngunuka aba atañ agiñho; ho mo turnii aguñ tapatii ngunumi bidupa. 39Ngunuka aba atañ mohmi talii matii, hojalo mohmi nempa lala, ho mohluka ahha Egip dalyi hoya henga tii, 40Aron mi lubiidola, Ngunupa pinii atañmi putope ngunu mika impyo giiniipa; siika Mose pakoda ngunu mika Egip ganda hoka lingii bosi, ngunu chima mo nii lyido hiila. 41Ho hiika allo ho mohlu subuñ atu dore putii, ho puchiniimi membitii ho mohluka alah loka miiniiñmi hempyo biinya tii. 42Hojalo Pinii mokurtii ho mohlumi yapuñ daka takḛr mi herii dopa bitii, nyibuhenii kheta hoka keniiñ chulipa:

Nunu ngiimi achu-amyo pakhii niimi la ho membi niisi miya bidu nii,

nyang alyañpiilye jabyo ho, Isrel daka miyuatañ?

43Ho nunu Moloch ka tabyo mi pyatii,

ho Rephan uyi ka takḛrmi,

nunuka herii talyi hiila ka miichi nii;

ho ngo nunumi Babilon ka agoho nempa talyi.

44Ngunuka aba atañ kii haki bina nanii tabyo jabyo ho dotii, Mose mika lurii bo lohepa mohmi siimi pento hiila lune, mohka kapanii chulipa. 45Ngunuka aba atañ hiimi Josua ka agiñho biilii mohluka gandasiiko mika pyadula miilyiho Pinii ka mohlumi ka nempa lyiho ngunuka aba atañ hataho. Hopa hiika hii David ka allo lohepa dotii. 46huna Pinii ka kata ho kaji kotiinii ho kutii Jakob ka Pinii ka dugii nanko pa meto hiila. 47Hojalo hiika hii Solomon tii huna ude mi mohpa peniiñ. 48Hojalo Hempḛr Kayeja alah loka ude peniiñ ho duma ke; nyibuhenii ka luchañ ho,

49Dariiganda hii ngiika duta nangko,

ho kiiddiapiñ hii ngiika alih dagiñ nangko.

Niitañ ude nunu ngiipa pempa, Attoh lutii, malo niihtañ ka dumo ko ngiika dumo sako?

50Hikha siika drih atañsi ngiika alah loka puniiñ masuha?

51“Nunu henje manii miyuatañ, mitupipakomanii ahha ho yaroo atañ, nunu kiirañ Darii Yajiyallo mi mompa siida. Nunuka aba atañ miichañ ho, nunu tiirḛ. 52Nii nyibuhenii atañmi nunuka aba atañ miihimiire mane? Ho mohlu mempa biine huna lupyo la luko nenii Denki Kone ka ahsa niimi, humina nunu siisi talubalo tiinii ho mentiinii, 53nunu huna dapo mi larii tiinii miidopopi ka biniiñmi ho hiimi atiima.”

Stepen mika Yalañ Kuniiñ

54Siisi mohlu siika drih atañmi tapa lala mohlu hadii ritii, ho mohlu mohluka aih mi mohlumi hadiila nyensutii. 55Hojalo mo, Darii Yajiyallo poteje giitola, yapuñhaho ho kachatii ho Pinii ka hudakhada mi kappatii, ho Jisu Pinii ka lahbi alah ho datii; 56ho mo lutii, “Kato, ngo dariiganda mi miiko dopa kapa do, ho miyu ka Oho Pinii ka lahbi alah ho dapa.” 57Hojalo mohlu hempḛr uropa gyutii ho mohluka yaroo mi tage mapa ho bulu hiido tongepa mohko haratii. 58Ho mohlu mohmi citi ka agoho jopa limbiido ho mohmi yalañ kubiido; ho haki atañ mohka abitarii atañmi yapa atu koneka alih ho atiitii Sol hiiniiñboko. 59Ho mohluka Stepen mi yalañ kula dopa, mo kutii, “Attoh Jisu, ngiika yajiyallo mi larii to.” 60Ho mo liibañ khangatii ho hempḛr uropa gyutii, “Attoh, siika mohluka ingyamiigya mi mohlumi halii lyayo.” Ho mo hiila siimi lula la, mo shiihi tiiku.

Currently Selected:

MIINIIÑ 7: APATBSI

Highlight

Copy