Марк 7

Бурганның хоойлулары азы ада-өгбениң дүрүмнери

(Мф. 15:1-20)

1Иерусалимден чедип келген фарисейлер болгаш элээн каш ном-хоойлу тайылбырлакчызы Иисустуң чанынга чыглып келгеннер. 2Олар Ооң чамдык өөреникчилериниң холдарын чугбайн, арыг эвес байдалда чемненип олурарын эскерип кааннар. 3(Херектиң ужуру чүдел дээрге, бүгү иудейлер, а фарисейлер кымдан-даа артык, ада-өгбезиниң чаңчылдарын шыңгыы сагыыр#Гал. 1:14, тускай чурумчуткан аайы-биле холун чугбаан шаанда, чемненип олурбас улус чүве-дир. 4Базаардан садыглашкаш келгеш, олар холун чугбаан шаанда#7:4 Азы: «Олар садып эккелген хамык чүвезин чугбаан шаанда». , чем чивес турган. Оларның сагыыр кылдыр хүлээп алган оон-даа өске дыка хөй сагылга-дүрүмнери бар#Евр. 9:10, чижээлээрге, аяктарны, дөмбүңнерни, чес сакпыңнарны, дөжектерни чурумчуткан аайы-биле чууру дээн ышкаш.) 5Ынчангаш фарисейлер болгаш ном-хоойлу тайылбырлакчыларының Иисустан: «Чүге Силерниң өөреникчилериңер ада-өгбениң ёзу-чаңчылын тоовазыл? Чүге олар арыг эвес холдарын чугбайн, чем чиирил?#Лк. 11:38» – деп айтырганы ол.

6Иисус мынча деп харыылаан: «Ийи арынныг#Мф. 23:13 силерниң дугайыңарда Исайя медээчи Бурганның өмүнээзинден шын-на бижээн-дир:

„Бо чон Мени сөс кырында хүндүлээр,

а сеткил-чүрээ-биле Менден ырак.

7 Оларның Меңээ мөгейиишкини хей чүве-дир,

чүге дээрге оларның өөредии –

чүгле кижилер чогааткан сагылга-дүрүмнер-дир“ # Иса. 29:13; Кол. 2:22 .

8Силер Бурганның айтыышкыннарын тоовайн каапкаш, улустуң чаңчылдарын эдерер-дир силер»#7:8 Өске бурунгу сөзүглелдерде бо сөстерге «Аяк-сава чуурун сагып база өске-даа шак ындыг чүүлдерни хөйү-биле кылып турар-дыр силер» деп сөстерни немээн.. 9Оон Ол мынча дээн: «Силер боттарыңарның сагылга-дүрүмнериңер сагыыр дээш, Бурганның айтыышкыннарын тоовайн каапканыңар кончуг-ла эки-дир! 10Моисей силерге Бурганның айтыышкынын дамчыткан-на болгай: „Ачаң биле аваңны хүндүлеп чор“, ол ышкаш: „Ачазын азы авазын бак сөглээр кижини өлүмге онаар херек“#Хост. 20:12; 21:17. 11-12А силерниң чугааңар ёзугаар кандыг боор-дур? Ава-ачазынга: „Менден алыр ужурлуг чүвеңерни Бурганга өргүүрүм ол-дур“ – дээр кижи бар болза, силер аңаа ава-ачазынга чүнү-даа кылырын чөпшээревейн баар-дыр силер. 13Силер ооң-биле Бурганның сөзүн, боттарыңарның-на саналдаан чаңчылдарыңар дээш, күш чок болдуруп турар-дыр силер. Өске-даа шак ындыг чүүлдерни эңдере кылып чоруур-дур силер».

14Иисус чонну база катап чыып алгаш, мынча дээн: «Шуптуңар Мени дыңнааш, билип аарын кызыңар. 15-16Кижиже дашкаартан кирип кээр чүү-даа чүве ону бужартадып шыдавас#Аж.-ч. 10:15; Тит. 1:15. Кижиниң бодундан үнүп кээр чүве харын ону бужартадыр»#7:15-16 Өске бурунгу сөзүглелдерде бо сөстерге «Дыңнаар кулаа бар кижи дыңназын!» деп сөстерни немээн (Мф. 11:15; Мк. 4:9 көр)..

17Иисус чонну каапкаш, бажыңче кирип кээрге, өөреникчилери демги угаадыглыг чугааның дугайында Оон айтырган. 18Ол оларга мынча дээн: «Таанда-ла силер ам-даа билип шыдавааныңар ол бе? Кижиже дашкаартан кирип кээр чүү-даа чүве ону бужартадып шыдавас дээрзин көрбээниңер ол бе? 19Чүге дээрге ол кижиниң чүрээнче эвес, а ишти-хырнынче киргеш, оон мага-боттан үне бээр болгай». (Шак ынчалдыр Ол бүгү аъш-чем аймаан арыг деп чарлаан.)#Аж.-ч. 10:15; 11:9; Тит. 1:15

20Оон ыңай мынча дээн: «Кижиниң бодундан үнүп турар чүве харын ону бужартадыр#Мф. 12:34; Иак. 3:6. 21Кижиниң иштинден, ооң чүрээнден үнер чүүлдер бо-дур#Гал. 5:19-21; 1 Кор. 6:9-10: бузуттуг-бак бодалдар, самыыраар чорук, ооржу база өлүрүкчү чорук, 22кады чурттаан эжинге шынчы эвес чорук, чазый чорук, кара сагыш, меге, туттунмас самыыраашкын, адааргал, хоп-нүгүл, бодун тогдунары база сээдең чорук. 23Кижиниң иштинден үнер бо бүгү бузут харын ону бужартадып турар».

Өске чер чурттуг херээженниң бүзүрели

(Мф. 15:21-28)

24Иисус Галилеядан үнгеш, Тир болгаш Сидон хоорайларның чоок-кавызынче чорупкан#Иис. 19:28-29; Иса. 23:1-18. Ол бир бажыңга туруп алгаш, өске улус Ооң келгенин билбес боорун күзээн, ынчалза-даа дөмей-ле ону чажырып шыдаваан. 25Уруу букка алыскан бир херээжен база Иисустуң келгенин билип каан. Ол херээжен доп-дораан ынаар чеде бергеш, Ооң буттарының баарынга доңгая кээп дүшкен. 26Ол херээжен иудей эвес, а Сирияның Финикиязы#Аж.-ч. 21:2-3 чурттуг кижи болган. Херээжен Иисустан ооң уруунче кире берген букту үндүр сывырып бээрин ээрежип эгелээн.

27Иисус: «Уругларның чемин хунаап алгаш, ыттарга каап бээрге, кайын боор» – дээн#Мф. 7:6.

28А ол херээжен: «Дээрги, а ыттар база-ла уругларның чемненген столундан кээп дүшкен тогланчы чыып чиир ышкажыгай» – дээн.

29Иисус ынчан: «Ындыг харыың дээш, бук сээң урууңдан үне берди, чана бер» – дээн. 30Ол херээжен бажыңынга чедип келгеш, көөрге, уруу орун-дөжээнде чыдар, а бук оон үне берген болган.

Иисустуң үнү чок, дүлей кижини экирткени

31Иисус Тирниң чоок-кавызындан үнгеш, Сидон хоорайны таварып эрткеш#Мк. 8:24, Он-хоорай девискээрин#Мк. 5:20 таварыштыр Галилея хөлүнче чорупкан#Мк. 1:9. 32Ол черге улус үнү чок, дүлей бир-ле кижини Иисуска эккелгеш, аңаа холун дегзип, экиртирин Оон дилээн#Иса. 35:5-6. 33Иисус ону кыдыынче аппаргаш, Бодунуң салааларын ооң кулактарынче суккаш, оон дүкпүрүпкеш#Мк. 8:23; Ин. 9:6, демги кижиниң дылынга дээй каапкан. 34Ол ооң соонда карактарын дээрже шиглей көрүнгеш, хандыр улуг тынгаш, аңаа: «Эффафа!» – дээн. (Ол дээрге «Ажыттын!» дээни ол.) 35Демги кижи ол-ла дораан дыңнап турар апарган, ооң дылы чештинип, иле-тода чугаалап эгелээн. 36Иисус бо дугайында кымга-даа чугаалаваңар деп дужааган. Ынчалза-даа Ол шыңгыы хораан тудум, шупту улустуң ол бүгү дугайында медээни тарадыры дам баар болган#Мк. 1:44-45. 37Олар аажок кайгап-харап, мынча деп турганнар: «Ооң кылып турар хамык чүвези эки-дир. Ол дүлей улусту – дыңнап турар, үнү чок улусту – чугаалап турар кылып каар-дыр!»

Currently Selected:

Марк 7: TUV

Highlight

Copy