Марк 1

Иоанн Медеглекчиниң суртаалы

(Мф. 3:1-12; Лк. 3:1-9; Ин. 1:19-28)

1Бурганның Оглу#Ыд. ыр. 2:7 Иисус Христос дугайында Буянныг Медээниң эгези бо-дур. 2Исайя медээчиниң номунда#1:2 Өске бурунгу сөзүглелдерде «Исайя медээчиниң номунда» деп эвес, а «Медээчилерниң номнарында» деп бижээн. мынча деп бижиттинген:

«Көр даан, Мээң төлээм Сээң орууңну белеткеп берзин дээш,

ону Сени мурнай чорудуп тур мен» # Хост. 23:20; Мал. 3:1; Мф. 11:10; Лк. 7:27 .

3 «Ээн кургаг ховуда алгырган кижиниң үнү:

„Дээрги-Чаяакчыга оруктан белеткеңер!

Ооң эртер кокпаларын дорттап бериңер“» # Иса. 40:3 .

4Ынчангаш ээн кургаг ховуга Иоанн Медеглекчи чедип келген#Лк. 1:80; Ин. 1:6. Ол улуска: «Бачыттарыңар дээш өршээл алыр дизиңерзе, бачыдыңар миннип, Бурганче ээлгениңер демдээ кылдыр сугга суктурар ужурлуг силер» – деп суртаалдап турган. 5Улус аңаа бүгү Иудеядан база Иерусалим хоорайдан боттарының бачыттарын ажыы-биле миннир дээш кээп турган#Аж.-ч. 19:18, а Иоанн оларны Иордан хемге сугже суп турган. 6Иоанн теве дүгүнден кылган хептиг база белинде хөм курлуг чораан#4 Хаан. 1:8, а ооң чиир чеми шартылаа болгаш ховунуң ары чигири болган#Лев. 11:22; 1 Хаан. 14:26. 7Ол улуска мындыг суртаал берген: «Менден күчү-күштүг Кижи мээң соомдан чоруп олурар. А мен доңгайгаш, Ооң идииниң шидиишкинин безин чежеринге төлеп чок кижи-дир мен. 8Мен силерни сугже суктум, а Ол силерни Ыдыктыг Сүлдеже сугар#Иоил 2:28».

Иисустуң сугга суктурганы болгаш күткүттүргени

(Мф. 3:13—4:11; Лк. 3:21-22; 4:1-13)

9Ол хүннерде Галилеяның Назарет хоорайдан#Мф. 2:23; Лк. 2:39 Иисус чедип келген. Иоанн Ону база Иордан хемче суккан чүве-дир. 10Иисус сугдан үнүп ора, дээрниң аңгайтыр ажыттына бергенин#Аж.-ч. 7:56 база Ооң кырынче көге-буга дег бадып орар Бурганның Сүлдезин көрүп каан#Иса. 11:2; Ин. 1:32-33. 11Оон дээрден мынча дээн үн дыңналган#Мк. 9:7; Ин. 12:28: «Сен Мээң ханы ынак Оглум-дур сен, Мээң сеткилимге кирер-дир сен#Иса. 42:1; Мк. 9:7; 2 Пет. 1:17». 12Ооң соонда ол-ла дораан Ыдыктыг Сүлде Ону ээн кургаг ховуже чорудупкан. 13Ээн кургаг ховуга Ол дөртен хүн дургузунда эрликке күткүттүрүп#1 Чыл. 21:1; 1 Фес. 3:5, аң-мең аразынга чурттап келген. Дээрниң төлээлери Аңаа бараан болуп турган#Лк. 22:43.

Иисустуң баштайгы өөреникчилери

(Мф. 4:18-22; Лк. 5:1-11)

14Иоанны тудуп хоругдаанының соонда, Иисус Бурганның Буянныг Медээзин суртаалдап, Галилеяга#Иис. 21:39; 3 Хаан. 9:11; Иса. 9:1 чедип келген. 15Ол: «Доктааткан үе келген-дир#Гал. 4:4, Бурганның Чагыргазы чоокшулаан-дыр#Мф. 3:2: бачыдыңар миннип, Бурганче эглиңер база Буянныг Медээге бүзүреңер!» – деп суртаалдап турган.

16Бир-ле катап Иисус Галилея хөлүнүң чаны-биле эртип бар чыткаш#Сан. 34:11; Мф. 14:34; Мк. 6:53, четкилерин хөлче салып турган балыкчылар Симон болгаш ооң дуңмазы Андрейни көрүп каан#Ин. 1:40-42. 17Иисус оларга мынча дээн: «Мени эдериңер. Силерни кижилер тывыкчылары кылып каар мен#Мф. 13:47». 18Алышкылар четкилерин каапкаш, ол-ла дораан Ону эдерип чорупканнар#Мк. 10:28. 19Оон Ол бичии ырадыр кылаштай бергеш, Зеведейниң оглу Иаков биле ооң дуңмазы Иоанны көрүп каан, олар база-ла хемеде четкилерин септеп олурган. 20Иисус оларны база дораан кый деп алган. Олар ачазы Зеведейни хөлечиктери-биле катай хемеге каапкаш, Иисусту эдерип чорупканнар.

Иисустуң аарыг кижилерни экиртип эгелээни

(Лк. 4:31-41)

21Олар шупту Капернаум хоорайга чедип келген#Мф. 4:13. Үр болбаанда, Иисус амыр-дыш хүнүнде синагогаже кирип келгеш, улусту өөреди берген. 22Ооң берген өөредиин улус кайгап ханмаан, чүге дээрге Иисус оларны ном-хоойлу тайылбырлакчылары ышкаш эвес, а эрге-чагырга ээлээн кижи ышкаш өөредип турган#Мф. 7:28-29.

23Ол синагогага букка алыскан бир кижи алгырып үнген: 24«Назарет чурттуг Иисус, Силерге бистен чүү херегил?#Мк. 5:7 Силер бисти узуткаар дээш келдиңер бе? Силерни кымыл дээрзин билир мен#Аж.-ч. 19:15, Силер – Бурганның Ыдыктыг Төлээлекчизи-дир силер!»#Ин. 6:69

25Иисус букка: «Ыыттава, ол кижиден үне бер!» – деп шыңгыы дужааган. 26Бук ынчан ол кижини курулдурупкаш, ыыткыр алгырбышаан, оон үне берген#Мк. 9:20; Аж.-ч. 8:7.

27Шупту улус кайгап-харааш, аразында: «Чүү деп чүвел бо? Ол Кижи буктарны безин чагырарга, олар Аңаа чагыртып турар, кандаай ындыг чаа, күштүг өөредиг чүвел бо?#Аж.-ч. 17:19» – деп турган. 28Удатпаанда Ооң дугайында дамчыыр чугаа бүгү Галилеяга тарай берген.

29Иисус Иаков болгаш Иоанн-биле кады синагогадан үнгеш, үр болбайн, Симон биле Андрейниң бажыңынга чеде бергеннер. 30Симоннуң кат-иези#1 Кор. 9:5 халыын аарыгдан аарып чыдар боорга, олар Иисуска дораан чугаалааннар. 31Ол чыткан херээженче чоокшулап келгеш, ооң холундан тудуп алгаш, тургузуп эккелген#Мк. 5:41; 9:27; Аж.-ч. 3:7; 9:41. Демги херээженниң эъдиниң изии дораан чавырлы берген, экирээн кижи ол дораан оларга бараан болуп эгелээн.

32Кежээ дүшкенде, хүн ажа бергенде, Иисуска бар-ла турган аарыг-аржык болгаш букшуураан улусту эккелгеш туруп бергеннер. 33Хоорайның бүгү чурттакчылары хаалга аксынга чыглып келген. 34Янзы-бүрү аарыгларга алыскан хөй кижини Ол ынчан экиртип каан. Хөй буктарны кижилерден үндүр сывыртапкаш, оларга Ооң дугайында чугаалаарын хоруп каан, чүге дээрге буктар Ол кым дээрзин билир турган#Мф. 12:16; Мк. 3:12.

Иисустуң Галилеяга суртаалдааны

(Лк. 4:42-44)

35Иисус дараазында эртен чер чырываанда-ла тургаш, дашкаар үнгеш, ээнзиргей черге барып, Бурганга мөргүп турган#Мф. 14:23; Лк. 5:16. 36Симон болгаш Ооң-биле кады чораан улус Ону дилеп чорупкан. 37Оон Иисусту тып алгаш, Аңаа: «Хамык улус Силерни дилеп тур» – дээннер. 38Иисус оларга мынча дээн: «Чоок-кавы суурлар болгаш хоорайларже бараалыңар, Мен аңаа база суртаалдаайн, чүге дээрге кылыр дээш келген херээм-не ол болгай!#Иса. 61:1» 39Иисус бүгү Галилеяны эргий кезип, синагогаларга суртаалдап база буктарны үндүр сывыртап чоруп берген.

Кежи аарыг кижини экирткени

(Мф. 8:1-4; Лк. 5:12-16)

40Бир-ле катап Иисуска кежи аарыг кижи чедип келгеш#Лев. 13:3; Сан. 12:10; 4 Хаан. 5:1; 2 Чыл. 26:20, Ооң мурнунга дис кырынга олура дүшкеш, Аңаа: «Күзээр-ле болзуңарза#Мк. 9:22, Силер мени арыглап каар силер» – деп чалынган. 41Иисус ону кээргей бергеш, холун сунуп, кежи аарыг кижиге деггеш, аңаа мынча дээн: «Күзеп тур мен, арыгланы бер!» 42Кеш аарыы ол-ла дораан демги кижиден адырлы берген. Ооң кежи арыгланы берип, каң-кадык апарган#Лк. 17:14. 43Иисус оон ол кижини чорудуп тура, аңаа шыңгыы чагып каан#Мф. 9:30: 44«Дыңна, кымга-даа бо дугайында чугаалава. Баргаш, Бурганның бир-ле бараалгакчызынга көстүп каг, оон Моисейниң хоойлузунда айытканын ёзугаар, арыгланганың дээш, Бурганга өргүлден кыл#Лев. 14:1-32; Лк. 17:14. Сен ол өргүлүң-биле экирээниңни улуска херечилеп көргүскен боор сен». 45А ол кижи чоруткаш, болган таварылганың дугайында шупту улуска чарлап, үзүк-соксаал чок чугаалап эгелээн#Мк. 7:36. Ынчангаш Иисус хоорайларже көзүлдүр кээр арга чок апаргаш, хоорай даштында ээнзиргей черлерге туруп алыр ужурга таварышкан. Улус Аңаа дөмей-ле чер болгандан кээп туруп берген.

Currently Selected:

Марк 1: TUV

Highlight

Copy