Romanos 4

Ri Abraham roma xutaqij ri xubꞌij ri Dios chare, nixta jun rumak xreqalej

1Si jun wineq roma ndutaqij ri Cristo, ndibꞌan chare chi nixta jun rumak ndireqalej chuwech ri Dios, ¿achike ndiqabꞌij pa ruwiꞌ ri ojer qamamaꞌ Abraham? 2Ri ndiqabꞌij, jareꞌ: Xa ta roma kꞌo utz xerubꞌanalaꞌ ri Abraham, xbꞌan chare chi nixta jun rumak xreqalej chuwech ri Dios, kin kꞌo ta cheꞌel xunimrisaj riꞌ chikiwech ri wineq, pero chuwech ri Dios,#1Co. 1:31 naq. 3Porque chupan ri rutzij ri Dios kereꞌ tzꞌibꞌan kan: Ri Abraham xutaqij ri xubꞌij ri Dios chare, romariꞌ ri Dios xubꞌen chare chi nixta jun rumak xreqalej.#Gn. 15:6; Ro. 4:19-22; Gá. 3:6; Stg. 2:23 4Atoq jun wineq ndisamej,#Ro. 11:6 ri rajel ndiyoꞌox, ma jun ta sipanik, xa kin kꞌas wi chi ndiyoꞌox chare. 5Jakꞌa jun wineq ri ndutaqij ri Dios, kin ndibꞌan chare chi nixta jun rumak ndireqalej chuwech, maske ma jun utz rubꞌanun chin ta rukꞌulun chi ndibꞌan keriꞌ chare. Y keriꞌ ndibꞌan chare, porque ri Dios hasta chake ri wineq maneq Dios pa kiwech, ndubꞌen chi nixta jun kimak ndikeqalej chuwech atoq ndikitaqij rijaꞌ. 6Keriꞌ chuqaꞌ rubꞌiꞌin kan ri David, atoq xchꞌaꞌa pa ruwiꞌ jun wineq ri jabꞌel roruqꞌij, roma ndibꞌan chare chi nixta jun rumak ndireqalej chuwech ri Dios, kꞌo man kꞌo utz erubꞌanaloꞌon pa rukꞌaslen. 7Ri David kereꞌ xubꞌij kan:

¡Kin jabꞌel rokiqꞌij ri ndikuyutej ri itzel teq achike kibꞌanaloꞌon#Sal. 32:1 y ndimuqutej ri kimak!

8¡Jabꞌel roruqꞌij ri ma jumbꞌey chik ndiyoꞌox pa cuenta rumak roma ri Ajaw!#Sal. 32:2

Keriꞌ xubꞌij ri David.

9¿Xaxe kami roj israelitas ri bꞌanun ri circuncisión chaqe ri jabꞌel roqaqꞌij, o keriꞌ chuqaꞌ ri ma israelitas ta ri ma bꞌanun ta ri circuncisión#Ro. 3:30 chake? Achel xqabꞌij yan pe: Ri Abraham roma xutaqij ri xubꞌij ri Dios chare, nixta jun rumak xreqalej#Gn. 15:6 chuwech ri Dios. 10Pero, ¿jampeꞌ xubꞌen ri Dios chare ri Abraham chi maneq rumak xreqalej? ¿Atoq bꞌanun chik ri circuncisión chare, o atoq kꞌajani? Atoq kꞌajani. 11Ri circuncisión xbꞌan chare ri Abraham, jun etal ri ndiqꞌalajrisan chi nixta jun rumak xreqalej, porque xutaqij ri xubꞌij ri Dios chare, y keriꞌ ri Abraham xok tataꞌatz pa kiwiꞌ konojel ri ndikitaqij#Gá. 3:7, 29 ri ndubꞌij ri Dios, maske ma bꞌanun ta ri circuncisión chake. Jajun chake rejeꞌ ndibꞌan chi nixta jun kimak ndikeqalej chuwech ri Dios. 12Y keriꞌ ri Abraham okuneq tataꞌatz ma xe ta pa kiwiꞌ ri bꞌanun ri circuncisión chake, xa kin tataꞌatz chuqaꞌ pa kiwiꞌ ri ndikitaqij ri Dios achel xubꞌen rijaꞌ, xutaqij ri xbꞌix chare roma ri Dios atoq kꞌajani tibꞌan ri circuncisión chare.

Kichin chuqaꞌ ri eriy-rumam ri Abraham ri rusujun ri Dios chare

13Ri Dios xusuj chare ri Abraham chi nduyaꞌ ri rochꞌulew chare rijaꞌ y chake ri eriy-rumam,#Gn. 12:3; 17:4; 22:17; 28:14 pero ma roma ta runimaxik ri ndubꞌij ri ley xyoꞌox chare ri Moisés. Ma ke ta riꞌ, xa kin roma ri Abraham xbꞌan chare chi nixta jun rumak xreqalej porque xutaqij ri xubꞌij ri Dios chare. 14Porque xa ta ja ri ngeniman ri ley xyoꞌox chare ri Moisés ri rukꞌulun chi ndiyoꞌox chake ri rusujun ri Dios,#Gá. 3:18 ma jun ta ndikꞌatzin chi roj qataqin ri Dios, y xa ma ndiyoꞌox ta chaqe ri rusujun rijaꞌ. 15Pero ma ke ta riꞌ, porque atoq ma ndinimex ta ri ndubꞌij ri ley, riꞌ ndukꞌen pe ri castigo nduyaꞌ ri Dios,#Gá. 3:10 pero apeꞌ maneq ley yoꞌon kan chin ndinimex, maneq cheꞌel ndiqꞌajox.

16Romariꞌ, ja ri ngetaqin ri ndubꞌij ri Dios, kin ja chake rejeꞌ ndiyoꞌox ri rusujun rijaꞌ, chin keriꞌ ndiqꞌalajin chi roma ri ru-favor ri Dios ndiyoꞌox#Ro. 3:24 ri rusujun chake konojel ri eriy-rumam ri Abraham, ma xe ta chake ri ekꞌo chuxeꞌ rutzij ri ley, xa kin chake chuqaꞌ ri kitaqin chi kin ndiyoꞌox wi ri rusujun ri Dios, achel xutaqij ri Abraham, ri tataꞌatz pa qawiꞌ roj qonojel ri ngojtaqin. 17Achel ndubꞌij ri tzꞌibꞌan kan, atoq ri Dios kereꞌ xubꞌij chare ri Abraham: Nibꞌen chawa chi rat tataꞌatz pa kiwiꞌ santienta jalajaj kiwech wineq. Keriꞌ tzꞌibꞌan kan. Y ri Abraham xutaqij ri xbꞌix chare roma ri Dios ri ndiyoꞌon kikꞌaslen ri animaꞌiꞌ,#Jn. 5:21 y ndibꞌanun chi ngekꞌojeꞌ ri kꞌajani kekꞌojeꞌ.

18Y ri Abraham xutaqij ri xubꞌij ri Dios chare, maske pa ruwech, maneq chik cheꞌel ndibꞌanatej rikꞌin rijaꞌ ri xubꞌij ri Dios. Pero roma xutaqij, xok tataꞌatz pa kiwiꞌ santienta jalajaj kiwech wineq, kin achel xbꞌix chare roma ri Dios atoq kereꞌ xubꞌij: Kin santienta awiy-amam xkekꞌojeꞌ,#Gn. 15:5 xucheꞌex. 19Ri Abraham ma jubꞌaꞌ xuyaꞌ kan rutaqixik re xubꞌij ri Dios chare, maske ndunojij chi maneq chik ruchuqꞌaꞌ pa rubꞌaqil chin ngeralkꞌualaj akꞌolaꞌ roma kꞌo laꞌeq 100 rujunaꞌ atoq riꞌ, y ri rixjayil Sara,#Gn. 18:11 kin ma ndalan ta wi. 20Ri Abraham ma kaꞌiꞌ ta rukꞌuꞌx xubꞌen rikꞌin ri xusuj ri Dios chare, y ma jumbꞌey xubꞌij ta qa pa ránima chi ma ndibꞌanatej ta, xa kin más xutaqij chi ndiyoꞌox ri sujun chare, y kin xuyaꞌ ruqꞌij ri Dios. 21Ri Abraham kin kuqul rukꞌuꞌx chi ri Dios kꞌo ruchuqꞌaꞌ chin nduyaꞌ ri ndusuj.#Gn. 18:14 22Y roma keriꞌ xutaqij ri Abraham, ri Dios xubꞌen chare chi nixta jun rumak xreqalej.

23Pero ma ruyon ta ri Abraham xkochin ri xtzꞌibꞌex#1Co. 10:11 kan chi nixta jun rumak xreqalej chuwech ri Dios, 24xa kin jajun roj ndiqakochij ri xtzꞌibꞌex kan, porque roj ri qataqin ri Jun ri xkꞌastajbꞌan pe ri Qajaw Jesús chikikajal ri animaꞌiꞌ,#1P. 1:21 ndibꞌan chuqaꞌ chaqe chi nixta jun qamak ndiqeqalej chuwech. 25Ri Qajaw Jesús xjach pa kamik chutojik ri mak qabꞌanaloꞌon,#Ro. 5:6, 8; 8:32 y xkꞌastajbꞌex pe chikikajal ri animaꞌiꞌ, chin nixta jun qamak ndiqeqalej chuwech ri Dios.

Currently Selected:

Romanos 4: cakX

Highlight

Copy