Romanos 16

Ri Pablo nduteq e ruxunaqil kiwech ri hermanos

1Nikꞌutuj nukamelal chiwa pa ruwiꞌ ri qa-hermana Febe, jun diaconisa chikikajal ri hermanos ri ndikimal kiꞌ pa rubꞌiꞌ ri Ajaw pa tinamit Cencreas,#Hch. 18:18 2chi tikꞌamaꞌ apu utz-utz ruwech pa rubꞌiꞌ ri Ajaw, kin achel rukꞌulun ndikꞌan kiwech ri loqꞌolej teq ralkꞌuaꞌl ri Dios. Titoꞌ rikꞌin ri achike ndikꞌatzin chare, porque rijaꞌ kꞌiy erutoꞌon y chikikajal ri erutoꞌon yinkꞌo riyin.

3Tiyaꞌ ruxunaqil kiwech ri hermana Prisca y ri hermano Aquila,#2Ti. 4:19 ri junan qabꞌanun pe rusamaj ri Cristo Jesús kikꞌin. 4Rejeꞌ jutzꞌima xekamisex roma nutoꞌik riyin, y ma xe ta riyin ngimatioxin chake, xa kin keriꞌ chuqaꞌ ndikibꞌen konojel ri bꞌotzaj teq hermanos ma israelitas ta ri ndikimal kiꞌ pa rubꞌiꞌ ri Ajaw. 5Tiyaꞌ ruxunaqil kiwech ri eralkꞌuaꞌl ri Dios ri ndikimal kiꞌ pa kachoch ri Prisca y ri Aquila.#1Co. 16:19 Tiyaꞌ ruxunaqil ruwech ri Epéneto ri tzꞌan niwojoꞌ. Ja rijaꞌ ri nabꞌey xutaqij ri Cristo pa rochꞌulew Asia. 6Tiyaꞌ ruxunaqil ruwech ri María. Rijaꞌ kin kꞌiy samaj rubꞌanun chiꞌikajal. 7Tiyaꞌ ruxunaqil ruwech ri Andrónico y ri Junias, ri enuwinaqul ri junan xqachibꞌilaj qiꞌ pa cheꞌ kikꞌin. Rejeꞌ kin kꞌo kiqꞌij chikikajal ri apóstoles, y nabꞌey xkitaqij ri Jesucristo ke chinuwech riyin.

8Tiyaꞌ ruxunaqil ruwech ri Ampliato ri tzꞌan niwojoꞌ roma xe jun rubꞌanun rikꞌin ri Ajaw. 9Tiyaꞌ ruxunaqil ruwech ri Urbano ri junan qabꞌanun pe rusamaj ri Cristo rikꞌin. Keriꞌ chuqaꞌ tiyaꞌ ruxunaqil ruwech ri Estaquis ri tzꞌan niwojoꞌ. 10Tiyaꞌ ruxunaqil ruwech ri Apeles. Rijaꞌ maske ruqꞌasan kꞌayew, kin xqꞌalajin chi qetzij rutaqin ri Cristo. Tiyaꞌ ruxunaqil kiwech ri ekꞌo pa rachoch ri Aristóbulo. 11Tiyaꞌ ruxunaqil ruwech ri Herodión, jun nuwinaqul. Tiyaꞌ ruxunaqil kiwech ri ekꞌo pa rachoch ri Narciso, rejeꞌ xe jun kibꞌanun rikꞌin ri Ajaw. 12Tiyaꞌ ruxunaqil kiwech ri Trifena y ri Trifosa. Rejeꞌ ndikibꞌen rusamaj ri Ajaw. Tiyaꞌ ruxunaqil ruwech ri hermana Pérside ri tzꞌan ndiqajoꞌ. Rijaꞌ kꞌiy rusamaj ri Ajaw rubꞌanun. 13Tiyaꞌ ruxunaqil ruwech ri hermano Rufo, jun achi nimalej ruqꞌij chikikajal ri kitaqin ri Ajaw. Tiyaꞌ ruxunaqil ruwech ri ruteꞌ, ri kin achel nteꞌ chuqaꞌ riyin. 14Tiyaꞌ ruxunaqil kiwech ri hermanos Asíncrito, ri Flegonte, ri Hermes, ri Patrobas, ri Hermas y konojel ri hermanos ri ekꞌo kikꞌin. 15Tiyaꞌ ruxunaqil kiwech ri hermano Filólogo, ri Julia, ri Nereo y ri ranaꞌ. Tiyaꞌ ruxunaqil kiwech ri Olimpas y konojel ri loqꞌolej teq ralkꞌuaꞌl ri Dios ekꞌo kikꞌin.

16Tiyaꞌ ruxunaqil iwech chiwech#1P. 5:14 rikꞌin jun loqꞌolej tzꞌubꞌanik chiꞌiqꞌoꞌtz. Konojel ri bꞌotzaj teq ralkꞌuaꞌl ri Dios ri ndikimal kiꞌ pa rubꞌiꞌ ri Cristo, ndikiteq e ruxunaqil iwech.

17Nikꞌutuj kamelal chiwa hermanos chi tichajij iwiꞌ chikiwech ri ndikajoꞌ ndikijech iwech, y ndikiyaꞌ jun achike pa ibꞌey chi ndiwil jun roma ndiyaꞌ kan ri utzulej tijonik kꞌutun kan chiwech. Ma tiwachibꞌilaj iwiꞌ kikꞌin.#2Ts. 3:6; 2Jn. 10 18Porque ri wineq ri keriꞌ ngekibꞌanalaꞌ, ma rusamaj ta ri Qajaw Jesucristo ngetajin chubꞌanik, xa ja ri itzel teq rayinik chin ri ki-cuerpo ri ngetajin rikꞌin. Rikꞌin chaꞌon teq tzij y rikꞌin tzij chin ndikiyaꞌ kiqꞌij wineq, ndikisuqꞌulaꞌ kinoꞌoj#Col. 2:4 ri payaya ndiqasex kijolon. 19Konojel wineq ketaman chi kin ngixniman chuwech ri Dios, y riꞌ ndubꞌen chuwa chi tzꞌan ngikikot. Pero niwojoꞌ chi kꞌes inoꞌoj chin ndibꞌen ri utz, y tibꞌanaꞌ chi ma kꞌes ta inoꞌoj chuwech ri itzel teq achike. 20Xa jubꞌaꞌ chik tiempo ndirajoꞌ chi ri Dios ri ndiyoꞌon uxlanen pa qánima, ndubꞌen chare ri Satanás chi ndikꞌojeꞌ chuxeꞌ iwaqen.#Gn. 3:15 Ri favor ri nduyaꞌ ri Qajaw Jesús kin ta xtikꞌojeꞌ pa iwiꞌ.

21Ri Timoteo#Hch. 16:1 nduteq ruxunaqil iwech. Rijaꞌ junan ngojsamej rikꞌin pa rusamaj ri Ajaw. Keriꞌ chuqaꞌ ndikiteq ruxunaqil iwech ri nuwinaqul Lucio, ri Jasón#Hch. 17:5 y ri Sosípatro.

22Riyin Tercio, ri ngitzꞌibꞌan e rutzij ri Pablo chiwa, niteq e chuqaꞌ ruxunaqil iwech pa rubꞌiꞌ ri Ajaw.

23Ri Gayo#1Co. 1:14 nduteq chuqaꞌ ruxunaqil iwech. Rijaꞌ rukꞌamon apu nuwech pa rachoch, achel ndubꞌen kikꞌin konojel ri ralkꞌuaꞌl ri Dios ri ngetuqaqa waweꞌ. Ri Erasto#Hch. 19:22 ri ndibꞌanun cuenta ri méra chin ri tinamit chireꞌ, nduteq e ruxunaqil iwech. Ri hermano Cuarto nduteq e chuqaꞌ ruxunaqil iwech. 24Kin ta xtikꞌojeꞌ pa iwiꞌ rix iwonojel ri favor ri nduyaꞌ ri Qajaw Jesucristo. Amén.#16:24 Ri tzij ngeqil chupan re versículo reꞌ, ma chupan ta konojel ri ojer teq manuscritos más kꞌo keqalen ekꞌo wi.

Tiyoꞌox ruqꞌij ri Dios

25Tiqayaꞌ ruqꞌij ri Dios, ri nditiker ndubꞌen chiwa chi más ndikꞌojeꞌ ruchuqꞌaꞌ iwánima rikꞌin, achel ndubꞌij ri utzulej teq tzij chin kolotajik ri niyaꞌ rutzijol, ri ndichꞌaꞌa pa ruwiꞌ ri Jesucristo. Ja utzulej tzij riꞌ ri runabꞌan pe ri Dios chin ndukusaj chin ngerukal ri jalajaj kiwech wineq chochꞌulew, y xe jampeꞌ pa nabꞌey ewan pe rubꞌeyal,#Col. 1:25-27 26pero chupan re tiempo rojkꞌo, xqꞌalajrisex#2Ti. 1:10 chiqawech. Y achel kiqꞌalajrisan kan ri profetas chi kꞌo jun qꞌij ndibꞌanatej, y achel chuqaꞌ rubꞌanun kan mandar ri Dios ri kin jumul kꞌo, roj ndiqayaꞌ rutzijol chake ri jalajaj kiwech wineq chochꞌulew chi tikitaqij ri Jesucristo y tikinimaj rutzij.

27Y roma ri ndubꞌen ri Jesucristo qoma, ¡kin ta jumul ndiqayaꞌ ruqꞌij ri Dios ri kin xe wi rijaꞌ Dios, y kꞌo nojel nojibꞌel rikꞌin! Amén.

Currently Selected:

Romanos 16: cakX

Highlight

Copy