Lucas 17

Ri Jesús ndubꞌij chi tiqachajij qiꞌ chin ma ngojtzaq pa mak

(Mt. 18:6, 7, 21, 22; Mr. 9:42)

1Ri Jesús xubꞌij chake ri ru-discípulos: Kin jumul kꞌo nditaqchiꞌin kichin ri wineq chin ngetzaq pa mak, pero, ¡juyo ruwech xa achike na jun ri nditaqchiꞌin kichin ri wineq chin ngetzaq pa mak! 2Xa más ta utz chare chi nditzeqebꞌex chuqul jun nim abꞌej jokꞌbꞌel trigo y ndetorix pa mar, ke chuwech ndubꞌen chare jun chikiwech re chꞌuteq wíta reꞌ chi ndiril jun roma nduyaꞌ kan ri Dios. 3¡Rix tichajij iwiꞌ! Si jun a-hermano xubꞌen itzel chawa, tabꞌij chare ri ma utz ta xubꞌen.#Lv. 19:17; Pr. 17:10; Stg. 5:19, 20 Si rijaꞌ nduyaꞌ chirij ri ma utz ta xubꞌen, takuyuꞌ ri xubꞌen chawa. 4Y si wuquꞌ mul pa jun qꞌij ndubꞌen itzel chawa, y wuquꞌ mul pa jun qꞌij ndurubꞌij chawa chi takuyuꞌ rumak, rat takuyuꞌ rumak.

Ri nditiker ndubꞌen ri rukuqubꞌan rukꞌuꞌx rikꞌin ri Dios

5Ri apóstoles xkibꞌij chare ri Jesús: Ajaw, tabꞌanaꞌ chaqe chi más ndiqakuqubꞌaꞌ qakꞌuꞌx rikꞌin ri Dios.

6Ri Ajaw xubꞌij: Xa ta kuqul ikꞌuꞌx rikꞌin ri Dios, maske juninikꞌ ta ok, achel jun chꞌuti wíta semilla mostaza, xibꞌij ta chare re jun cheꞌ sicómoro reꞌ: Takꞌuquꞌ e awiꞌ y taꞌatikaꞌ awiꞌ pa mar, xixchajeꞌ ta, y kin xutaqij yan ta itzij.#Mt. 17:20; Mr. 9:23

Ri ndikꞌatzin ndubꞌen jun samajel

7Si kꞌo jun isamajel ndesamej pa iwulew o nduyuqꞌuj iwawej, atoq nditzolij pe, rix ma kereꞌ ta ndibꞌij chare: Katámpe, katzꞌuyeꞌ chuchiꞌ mesa y kawaꞌ. 8Pa rukꞌexel riꞌ, xa kereꞌ ndibꞌij chare: Tabꞌanaꞌ akꞌojlen chin ndabꞌen ri nurikil, kanatzuquꞌ y hasta kꞌa kiwaꞌ na y xtintij na nuyaꞌ riyin, kꞌateriꞌ xkawaꞌ y xtatij ayaꞌ rat. 9Y rix ma ndimatioxij ta chare ri isamajel, maske ri samajel riꞌ xubꞌen ri xibꞌij chare. 10Keriꞌ chuqaꞌ rix, atoq ibꞌanun chik nojel ri rubꞌiꞌin ri Dios chiwa chi ndibꞌen, kereꞌ tibꞌij: Roj xa roj relik samajelaꞌ ri ma roj rukꞌulun ta ok chi ndimatioxix chaqe ri samaj qabꞌanun, porque xa kin xe ri xbꞌix chaqe xqabꞌen, kixchajeꞌ.

Ri Jesús ngerukꞌachojrisaj lajuj achiꞌaꞌ kꞌo lepra chikij

11Y atoq ri Jesús rutzꞌamon bꞌey chin ndeqaqa pa tinamit Jerusalén, xqꞌax pa kimonjon ri rochꞌulew Samaria y Galilea. 12Y atoq ja ndok apu pa jun aldea, xebꞌeꞌel pe chukꞌulik lajuj achiꞌaꞌ kꞌo lepra chikij y kꞌa nej xepeꞌeꞌ wi,#Lv. 13:46 13y xesikꞌin pe chubꞌixik: ¡Jesús, Tijonel, tajoyowaj ok qawech!

14Y atoq ri Jesús xerutzꞌet, xubꞌij chake: Kixbꞌiyin, teꞌikꞌutuꞌ iwiꞌ chikiwech ri sacerdotes,#Lv. 13:2; 14:2 xeꞌucheꞌex. Y atoq kꞌaja ebꞌaneq, xkꞌis e ri lepra chikij y xchꞌajchꞌojir pe kij. 15Jun chikikajal ri lajuj achiꞌaꞌ riꞌ, atoq xutzꞌet chi xkꞌachaj chuwech ri ruyabꞌil, xtzolij pe apeꞌ kꞌo ri Jesús y ndisikꞌin nduyalaꞌ ruqꞌij ri Dios. 16Y atoq xbꞌeqaqa chuwech ri Jesús, xxukeꞌ qa chuwech y xuqasaj rujolon pa ulew chin xumatioxij chare. Ri achi riꞌ aj Samaria. 17Ri Jesús xubꞌij: ¿Ma elajuj ta kꞌa ri xechꞌajchꞌojir chuwech ri lepra? Jakꞌa ri bꞌelejeꞌ chik, ¿apeꞌ xekanej kan? 18¿Nixta jun chik xtzolij pe chin xuruyaꞌ ruqꞌij ri Dios? ¿Xa kin xe re jun achi ma israelita ta xtzolij pe?

19Y xubꞌij chare ri achi riꞌ: Roma xakuqubꞌaꞌ akꞌuꞌx rikꞌin ri tzij xinbꞌij, kin xakolotej chuwech ri ayabꞌil. Kayakatej y kabꞌiyin.

Ri achike modo nduqaqa ri ru-reino ri Dios

(Mt. 24:23-28, 36-41)

20Jujun fariseos kereꞌ ndikikꞌutulaꞌ razón chare ri Jesús: ¿Jampeꞌ nduqaqa ri qꞌij chi ri Dios ndubꞌen reinar pa qawiꞌ? Y ri Jesús xubꞌij chake: Ri qꞌij atoq ri Dios ndutzꞌuk ndubꞌen reinar pa kiwiꞌ ri wineq, ma ndiqꞌalajin ta chikiwech ri wineq. 21Nixta jun wineq retaman apeꞌ kꞌo, chin ta xtubꞌij: Ri ru-reino ri Dios ja kꞌo chireꞌ, o xtibꞌix ta: Ja kꞌo más kelaꞌ apu. Porque ri ru-reino ri Dios kꞌo chik chiꞌikajal.

22Y ri Jesús xubꞌij chake ri discípulos: Nduqaqa ri tiempo atoq rix ndiwojoꞌ chi riyin ri aj chikaj ri xinuꞌalex chiꞌikajal, bꞌaláta ngikꞌojeꞌ chik jubꞌaꞌ chiꞌikajal, pero ma ngixtiker yan ta nginitzꞌet. 23Y ekꞌo wineq ri xkebꞌiꞌin chiwa: Ja kꞌo waweꞌ, o xtikibꞌij chuqaꞌ: Ja kꞌo apu kelaꞌ,#Mr. 13:21; 1Jn. 4:1 pero rix ma kixbꞌa chinukanoxik, y ma keꞌiwoqaj ri ngebꞌiꞌin keriꞌ. 24Porque atoq riyin ri aj chikaj ri xinuꞌalex chiꞌikajal nginuqaqa chik jumbꞌey, konojel nginikitzꞌet, kin achel nditzꞌetetej ri koyopaꞌ atoq ndiyikꞌan chikaj, kin nduyikꞌaj ri jun ruchiꞌ ri rokaj y ndeqaqa hasta apeꞌ kꞌo ri jun chik ruchiꞌ. 25Pero nabꞌey chi ndibꞌanatej ri xinbꞌij, ndikꞌatzin chi niqꞌasaj santienta kꞌayew#Lc. 9:22 y ri wineq aj wokami kin ma xkinkajoꞌ ta, xa itzel xkinikitzꞌet. 26Keriꞌ nibꞌij chiwa, porque achel xkibꞌen ri wineq pa ru-tiempo ri Noé,#Gn. 6:11, 12 keriꞌ chuqaꞌ ndikibꞌen ri wineq atoq nginuqaqa chik jumbꞌey riyin ri aj chikaj ri xinuꞌalex chiꞌikajal. 27Ri wineq chupan ri tiempo riꞌ xewaꞌ, xkitij kiyaꞌ, xekikꞌulubꞌaꞌ ri kalkꞌuaꞌl y xekiyaꞌ ri kimiꞌal pa kꞌulubꞌik, y keriꞌ ngetajin rikꞌin hasta kꞌa xuqaqa na ri qꞌij atoq ri Noé xok pa arca. Y xqaqa ri kamik chi jabꞌ y konojel ri ma xeꞌok ta pa arca xejiqꞌ pa yaꞌ. 28Keriꞌ chuqaꞌ xbꞌanatej chupan ri tiempo atoq ri Lot xkꞌojeꞌ pa tinamit Sodoma. Ri aj chiriꞌ ma xkinabꞌej ta ri pataneq chikij, xewaꞌ, xkitij kiyaꞌ, xeloqꞌon, xekꞌayin, xetikon y xekibꞌanalaꞌ jay, 29pero ri qꞌij atoq ri Lot xel pe pa tinamit Sodoma, ri Dios xubꞌen chi xqaqa pe qꞌaqꞌ y azufre chikaj, y konojel wineq ri xekꞌojeꞌ kan pa tinamit xekꞌis pa qꞌaqꞌ.#Gn. 19:16, 24 30Y achel xekibꞌanalaꞌ ri wineq pa ru-tiempo ri Lot, keriꞌ chuqaꞌ xkekibꞌanalaꞌ ri wineq chupan ri qꞌij atoq nginuqaqa chik jumbꞌey riyin ri aj chikaj ri xinuꞌalex chiꞌikajal.#2Ts. 1:7

31Chupan ri qꞌij riꞌ, ri nduxlan pa terraza y kꞌo achike ndirajoꞌ nderukꞌamaꞌ qa pa jay, ma tiqaqa chukꞌamik, xa kin tanimej paqiꞌ.#Mr. 13:15 Y keriꞌ chuqaꞌ ri kꞌo pa qꞌas, ma titzolij chirachoch. 32Tikꞌuxlaꞌaj ri xukꞌulwachij ri rixjayil ri Lot.#Gn. 19:26 33Porque xa achike na jun ri ndupoqonaj ri aj rochꞌulew rukꞌaslen, ma ndiril ta ri kꞌaslen ma ndikꞌis ta, pero xa achike na jun ri ma ndupoqonaj ta ri aj rochꞌulew rukꞌaslen chin nduqꞌasaj kꞌayew roma ngiroqaj, kin ndiril ri kꞌaslen#Mt. 16:25; Jn. 12:25 ma ndikꞌis ta.

34Y nibꞌij chiwa chi atoq riyin nginuqaqa chik, ri apeꞌ aqꞌaꞌ rubꞌanun, ekaꞌiꞌ ngewer chuwech jun chꞌat, jun ndukꞌuꞌex y jun ndiyoꞌox kan. 35Ekaꞌiꞌ ixoqiꞌ junan ngejokꞌon, jun ndukꞌuꞌex y jun ndiyoꞌox kan. 36Ekaꞌiꞌ ngesamej pa qꞌas, jun ndukꞌuꞌex y jun ndiyoꞌox kan.#17:36 Ri tzij ngeqil chupan re versículo reꞌ, ma chupan ta konojel ri ojer teq manuscritos más kꞌo keqalen ekꞌo wi.

37Y ri discípulos xkibꞌij chare ri Jesús: Ajaw, ¿apeꞌ ndibꞌanatej ri xabꞌij? Y ri Jesús xubꞌij chake: Apeꞌ pakꞌal jun cuerpo kamineq, chiriꞌ ndekimoloꞌ kiꞌ ri kꞌuch.

Currently Selected:

Lucas 17: cakX

Highlight

Copy