2 Timoteo 2

Jun utzulej rusamajel ri Cristo ndikꞌatzin ndukachꞌ kꞌayew

1Rat Timoteo ri rat achel nukꞌajol, rikꞌin ri favor yoꞌon pa awiꞌ, tikꞌojeꞌ ruchuqꞌaꞌ#Ef. 6:10 awánima, porque xe jun abꞌanun rikꞌin ri Cristo Jesús. 2Ri utzulej tijonik xawakꞌaxaj junan kikꞌin santienta wineq ri xeꞌakꞌaxan wichin, ja tijonik riꞌ tachilabꞌej chake hermanos ri ndanaꞌ chi kin xtikibꞌen rusamaj ri Dios y kꞌes kinoꞌoj chin ngekitijoj chꞌaqa chik.

3Y jajun rat takochꞌoꞌ ri kꞌayew#2Ti. 4:5 ndaqꞌasaj roma ndabꞌen rusamaj ri Cristo Jesús. Kin takochꞌoꞌ achel ndikochꞌon jun utzulej soldado. 4Ri soldado ri kꞌo pa cuartel ndikꞌatzin ndubꞌen ri ndiqaꞌ chuwech ri xoyon richin chin xok soldado, y romariꞌ ma ndubꞌen ta jun samaj ri ma chin ta pa cuartel. 5Y jun ri ndok pa jun etzꞌanin, ndikꞌatzin ndetzꞌan achel bꞌiꞌin chi ndibꞌan#1Co. 9:24 chupan ri etzꞌanin riꞌ, porque si ma xtubꞌen ta keriꞌ, ma nduchꞌek ta ri premio. 6Keriꞌ chuqaꞌ jun tikonel ri ndutij ruqꞌij ndubꞌen rusamaj pa qꞌas, rukꞌulun chi ja rijaꞌ ri nabꞌey kꞌo ruqꞌaꞌ chare ruwech ri tikoꞌ. 7Tanojij utz-utz re nibꞌij e chawa, porque si keriꞌ ndabꞌen, ri Ajaw ndubꞌen chawa chi más ndakꞌoxomaj nojel reꞌ.

8Kin takꞌuxlaꞌaj ri Jesucristo ri riy-rumam kan ri rey David. Rijaꞌ xken y xkꞌastajbꞌex pe chikikajal ri animaꞌiꞌ.#Ro. 1:3, 4 Jareꞌ ri utzulej teq tzij chin kolotajik ri nitzijoj riyin. 9Y roma nitzijoj ri utzulej teq tzij riꞌ, niqꞌasaj kꞌayew, y hasta yin ximon pa cheꞌ achel yin ta jun itzel achi keriꞌ. Pero ri rutzij ri Dios ma qꞌaton ta rutzijoxik. 10Romariꞌ nikachꞌ nojel ri kꞌayew niqꞌasaj. Keriꞌ nibꞌen koma ri eruchaꞌon ri Dios#2Co. 1:6 chin ngekolotej roma xe jun ndikibꞌen rikꞌin ri Cristo Jesús, y keriꞌ ngebꞌeqaqa apeꞌ kꞌo rijaꞌ y ndikꞌojeꞌ kiqꞌij chin jumul.

11Kin qetzij wi re ndibꞌix:

Si roj achel roj kamineq chik rikꞌin rijaꞌ, ndiqil chuqaꞌ qakꞌaslen roma rijaꞌ.#Ro. 6:5-8; 2Co. 4:10

12Si xtiqakachꞌ qawech chupan ri kꞌayew ndiqaqꞌasaj roma qataqin rijaꞌ, nduqaqa qꞌij atoq junan ndeqabꞌanaꞌ reinar rikꞌin.

Y si xtiqabꞌij chi ma roj ta richin rijaꞌ, keriꞌ chuqaꞌ rijaꞌ xtubꞌij chi ma roj ta richin.#Mt. 10:33; Lc. 12:9

13Y maske roj ndiqajalalaꞌ ruwech qatzij, rijaꞌ ma ke ta riꞌ ndubꞌen. Rijaꞌ kin ndubꞌen wi ri ndubꞌij.#Nm. 23:19

Porque kin richin wi chi ndubꞌen ri ndubꞌij.

Jun utzulej samajel chuwech ri Dios

14Rat Timoteo, takꞌuxlaꞌaj nojel reꞌ chake ri hermanos. Chuwech ri Dios tabꞌij chake chi ma tikichuquchaꞌ kiꞌ pa kiwiꞌ tzij, porque ma jun utz ndukꞌen pe#1Ti. 1:4 chake. Xa ndusuqꞌ kinoꞌoj ri ngeꞌakꞌaxan richin. 15Tatijaꞌ aqꞌij chi jumul rat jun utzulej samajel ngatzꞌetetej roma ri Dios, chi maneq roma ngakꞌix roma utz abꞌanun chare ri samaj, y chi pa rubꞌeyal ndayaꞌ ri tijonik pa ruwiꞌ ri qetzij. 16Ma tatzeq awiꞌ#1Ti. 6:20 chupan tzij ri xa aj rochꞌulew teq nojibꞌel ri ma jun rubꞌeyal, porque ri ndikitzeq kiꞌ chupan tzij achel riꞌ, xa más itzel ndubꞌen qa ri kikꞌaslen. 17Ri tzij ndikibꞌilaꞌ ri wineq riꞌ kin achel jun yabꞌil ri ndubꞌen chi ndiqꞌey ruchꞌakul jun wineq y ja tzij achel riꞌ ndikibꞌilaꞌ ri Himeneo y ri Fileto. 18Rejeꞌ xa xeꞌel yan e chupan ri qetzij, porque ndikibꞌij chi ri kꞌastajibꞌel kichin ri animaꞌiꞌ xbꞌanatej yan. Y romariꞌ ekꞌo jujun ri ma kuqul chi ta kikꞌuꞌx rikꞌin ri Dios. 19Pero roj ri kuqul qakꞌuꞌx rikꞌin ri Dios, rubꞌanun chaqe achel jun jay ri jabꞌel utz ri ruxeꞌ. Y chirij ri ruxeꞌ, tzꞌibꞌan kan chi ri Ajaw retaman kiwech ri erichin rijaꞌ.#Nah. 1:7 Y tzꞌibꞌan chuqaꞌ chi konojel ri ngebꞌiꞌin chi ja ri Ajaw ri kikolonel, tikiyaꞌ kan rubꞌanik ri ma utz ta.

20Pa jun nimalej achoch, ma xe ta bꞌambꞌel bꞌanun chare qꞌanapueq y saqipueq ekꞌo, xa kin ekꞌo chuqaꞌ bꞌambꞌel ebꞌanun chare cheꞌ y chare chꞌabꞌeq. Ekꞌo bꞌambꞌel ngekusex chin ndiyoꞌox achikejeꞌ ri santienta keqalen chikipan y ekꞌo bꞌambꞌel ri ngekusex chin ndiyoꞌox achikejeꞌ ri ma kꞌiy ta keqalen chikipan. 21Y keriꞌ chuqaꞌ roj, si ndiqayaꞌ kan rubꞌanik ri ma utz ta, kin ndichꞌajchꞌojir ri qakꞌaslen, y ngojok achel teq bꞌambꞌel ri ngekusex chin ndiyoꞌox achikejeꞌ santienta keqalen chikipan, y ngojkꞌatzin chare ri Ajaw porque roj runabꞌan chin ndiqabꞌen nojel ruwech utzulej samaj.

22Rat Timoteo, taqꞌataꞌ awiꞌ chuwech ri itzel teq rayinik achel ri kꞌo pa kánima ri kꞌajolaꞌ y ri xtaniꞌ. Pa rukꞌexel riꞌ, takꞌuaj jun chojmilej kꞌaslen#1Ti. 6:11 ri ndukꞌut chi xe jun ruwech atzij ayoꞌon chare ri Dios. Katojowan y takanoj chi ndikꞌojeꞌ uxlanen chikikajal ri hermanos. Keriꞌ tabꞌanaꞌ junan kikꞌin ri hermanos ri rikꞌin chꞌajchꞌaj kánima ngebꞌiꞌin chi ja ri Ajaw ri kikolonel. 23Riyin nikamuluj rubꞌixik chawa: Ma ndatzeq awiꞌ chupan tzij ri nixta jun kibꞌeyal y nixta jun utz ndikikꞌen pe. Rat awetaman chi tzij achel riꞌ xa ndikikꞌen pe oyowal.#1Ti. 1:4 24Y jun rusamajel ri Ajaw ma ndutzeq ta riꞌ pa oyowal, xa kin ndikꞌatzin chi utz runoꞌoj ndubꞌen chake konojel. Y ndikꞌatzin chuqaꞌ chi rijaꞌ jun utzulej tijonel#1Ti. 3:2; Tit. 1:9 y ngerukachꞌ ri altíra kinoꞌoj. 25Ki-kiꞌ awánima takꞌutuꞌ ruchojmil ri rutzij ri Dios chikiwech ri ndikipabꞌaꞌ kiꞌ chuwech ri qetzij, kolopeꞌ ri Dios xtisamej pa kánima chin ndijalatej ri kinoꞌoj y keriꞌ ndikiyaꞌ yan chik pa cuenta ri qetzij, 26chin keriꞌ xketzolij ta pe pa kuxnaqil y xkeꞌanimej pe pa ruqꞌaꞌ ri itzel ri tzꞌamayon kichin. Rijaꞌ erutzꞌamon chin ndikibꞌen ri rurayibꞌel.

Currently Selected:

2 Timoteo 2: cakX

Highlight

Copy