1 Timoteo 1

Ri Pablo nduteq ruxunaqil ruwech ri Timoteo

1Riyin Pablo, jun ru-apóstol ri Cristo Jesús, roma keriꞌ xkibꞌen mandar ri Dios Qakolonel y ri Cristo Jesús ri achoq roma qoyobꞌen ri qakolotajik.#Col. 1:27 2Nitzꞌibꞌaj e re wuj reꞌ chawa rat Timoteo, ri kin qetzij rat achel nukꞌajol#2Ti. 1:2 roma ataqin ri Cristo. Ri Qatataꞌ Dios y ri Qajaw Cristo Jesús kin ta xtikiyaꞌ ki-favor pa awiꞌ, xtikijoyowaj awech, y xtikiyaꞌ uxlanen pa awánima.

Ma tiqayaꞌ qaxikin kikꞌin tijonik ma eqetzij ta

3Achel ri xinchilabꞌej kan chawa atoq ja nitzꞌen bꞌey chin ngibꞌa pa rochꞌulew Macedonia,#Hch. 20:1, 3 keriꞌ chuqaꞌ nibꞌij chawa wokami, chi kakꞌojeꞌ pa tinamit Éfeso, chin ndabꞌij chake jujun ri ngeyoꞌon juley chik tijonik ri xa ma junan ta rikꞌin ri utzulej teq tijonik ri eqatijon kan roj rikꞌin, chi ma tikibꞌen chik keriꞌ, 4y chi ma tikiyaꞌ kixikin rikꞌin tzij#1Ti. 4:7; 2Ti. 2:23; Tit. 1:14 ri ngetzijox pa kiwiꞌ ri tzaq teq wineq ri xekꞌojeꞌ e chochꞌulew ojer, tzij ri eyoꞌon qa ruqꞌa-raqen, y ma jumbꞌey ngekꞌis, ri ndikibꞌen chake ri wineq chi ndikichuquchaꞌ kiꞌ pa ruwiꞌ ri xa ma jun reqalen. Tzij achel riꞌ ma ngerutoꞌ ta ri wineq chin ta más ndikikuqubꞌaꞌ kikꞌuꞌx rikꞌin ri Dios chubꞌanik ri ndirajoꞌ rijaꞌ.

5Nojel re nuchilabꞌen chawa chi ndabꞌij, chin kin ta konojel ngeꞌojowan#Ro. 13:8; Gá. 5:14 rikꞌin chꞌajchꞌaj kánima, chin chuqaꞌ ndikinaꞌ pa kánima chi ma jun mak keqalen chuwech ri Dios, y chin qetzij kuqul kikꞌuꞌx rikꞌin ri Dios. 6Porque ekꞌo jujun sachineq chikiwech chi jariꞌ ri ndirajoꞌ ri Dios chake, y xa xbꞌa kánima chirij tzij ri ma jun utz ndukꞌen pe. 7Rejeꞌ ndikinaꞌ chi etijonelaꞌ chin ri ley xyoꞌox chare ri Moisés, pero ma kikꞌoxoman ta utz-utz ri achike ndikibꞌilaꞌ, y ri tijonik ri ndikibꞌij chi kin keriꞌ, nixta riꞌ kikꞌoxoman utz-utz.

8Qetaman chi ri ley#Neh. 9:13; Ro. 7:12 utz, pero ndikꞌatzin chi ndikusex pa ruchojmil. 9Porque ri Dios xuyaꞌ pe ri ley ma koma ta ri wineq chojmilej kikꞌaslen, xa xuyaꞌ pe koma ri ngeqꞌajo ruwiꞌ ri ley, koma chuqaꞌ ri ma ngeniman ta, koma ri maneq Dios pa kiwech, ri ngebꞌanun mak, ri ngeqasan ruqꞌij rubꞌiꞌ ri Dios y ma jun reqalen ndikibꞌen chare, ri ndikikamisaj ri kitataꞌ, ri ndikikamisaj ri kiteꞌ, ri ndikikamisaj xa achike na chi wineq.#Ap. 21:8 10Xyoꞌox chuqaꞌ koma ri ndikikꞌamalaꞌ qa kiꞌ xa achoq na ikꞌin chin ndikibꞌen mak, ri achiꞌaꞌ ri ndikikꞌamalaꞌ qa kiꞌ chi achiꞌaꞌ chin ndikibꞌen mak,#1Co. 6:9 ri ngekitzꞌen wineq chin ngekikꞌayij,#Ex. 21:16 ri ngereqꞌon, ri ngeꞌukusan rubꞌiꞌ ri Dios chin ngereqꞌon,#Mt. 5:33-37 y koma chuqaꞌ ri eyakatajneq chirij ri utzulej teq tijonik#2Ti. 4:3 ruyoꞌon ri Dios, 11utzulej teq tijonik ri rukꞌuan riꞌ rikꞌin ri utzulej teq tzij chin kolotajik ri pataneq rikꞌin ri Dios ri kin jabꞌel roruqꞌij. Y ja utzulej teq tzij riꞌ ri ruchilabꞌen ri Dios chuwa chi niyaꞌ rutzijol.#1Ti. 2:7

Ri Pablo ndumatioxij roma xjoyowex ruwech roma ri Dios

12Nimatioxij chare ri Qajaw Cristo Jesús ri ruyoꞌon wuchuqꞌaꞌ chin nibꞌen ri rusamaj, porque xunikꞌoj ri wánima, xutzꞌet chi kin xtinbꞌen wi ri rusamaj nduyaꞌ pa nuqꞌaꞌ, y nimatioxij chuqaꞌ chare chi xiruyaꞌ#Col. 1:25 chin nibꞌen ri samaj riꞌ. 13Xiruyaꞌ pa rusamaj, maske rubꞌanun kan riyin xinyoqꞌolaꞌ rubꞌiꞌ y xentzeqlebꞌej ri kitaqin rijaꞌ chin xinbꞌen itzel#Hch. 8:3; 9:1 chake; y santienta kichapik xinbꞌen. Pero ri Dios xujoyowaj nuwech, porque ri tiempo riꞌ, kꞌajani tintaqij ri Cristo y pa nutzij riyin, kin utz ri ngitajin rikꞌin. 14Pero ri Qajaw tzꞌan favor#1Co. 15:10 xuyaꞌ pa nuwiꞌ, y xuyaꞌ pa wánima chi kuqul nukꞌuꞌx rikꞌin y chi nginojowan roma nutaqin ri Cristo Jesús.

15Y re tzij re nibꞌij chawa, kin qetzij wi, y kin utz chi nditaqix koma konojel wineq: Ri Cristo Jesús xuqaqa chochꞌulew chin xerukal ri eꞌaj mak,#Mt. 9:13; 1Jn. 3:5 y chikikajal rejeꞌ, ja yin ri más santienta numak. 16Pero maske santienta numak, ri Cristo Jesús xujoyowaj nuwech y xukuy numak. Y keriꞌ ndukusaj chi ejemplo ri nukꞌaslen chin ndukꞌut chikiwech ri wineq ri xketaqin richin, chi layaj eroyobꞌen chin ndikiyaꞌ kan ri kimak y ndikiyaꞌ kánima rikꞌin, chin keriꞌ nduyaꞌ ri kꞌaslen ma ndikꞌis ta chake. 17Romariꞌ, ¡kin ta jumul xtiyoꞌox ruqꞌij ri Dios ri kin Rey#Sal. 10:16; 45:1, 6 wi chin jumul.#Sal. 145:13; Dn. 2:44; 7:14 Rijaꞌ ma nditzꞌetetej ta y jumul kꞌo rukꞌaslen y kin xe wi rijaꞌ Dios! Amén.

18Y rat Timoteo, ri kin rat achel nukꞌajol roma ataqin ri Cristo, nichilabꞌej chawa chi tatzijoj nojel re nubꞌiꞌin chawa. Ma tamestaj ri tzij kibꞌiꞌin pa awiꞌ ri hermanos ri ngeqꞌalajrisan ri ndubꞌij pe ri Dios pa kánima.#1Ti. 4:14 Rikꞌin ri tzij riꞌ tawilaꞌ ruchuqꞌaꞌ ri awánima chin ndabꞌen ri utzulej rusamaj ri Dios ri ruyoꞌon chawa chin ndabꞌen. 19Y chin ndabꞌen ri utzulej samaj riꞌ, ndikꞌatzin chi kuqul akꞌuꞌx rikꞌin ri Dios, y ndikꞌatzin chuqaꞌ chi pa awánima ndanaꞌ chi ma jun mak aweqalen chuwech.#1Ti. 3:9 Ekꞌo jujun ri ma xkiyaꞌ chi ta pa cuenta ri ndubꞌij pe ri kánima, y romariꞌ ma kuqul chi ta kikꞌuꞌx rikꞌin ri Cristo Jesús. 20Keriꞌ xkibꞌen ri Himeneo#2Ti. 2:17, 18 y ri Alejandro. Y romariꞌ xenjech pa ruqꞌaꞌ ri Satanás, chin keriꞌ tiketamaj chi ma tikiyaqꞌ rubꞌiꞌ ri Dios.

Currently Selected:

1 Timoteo 1: cakX

Highlight

Copy