Luka 2

Kūbyalwa kwa ng'wa Yesu

Mat 1:18-25

1Ū mu shikū jenījo shikafunyiwa shilagīlo na Kaisali Augusto, gīkī pye a banhū ū mu sī bandīkwe. 2Ū wenūbo būkabiza wandīkwa bo kwandya aho Kilenio alī nsugi wa Sulia. 3Hūna lūūlū pye a banhū būja kwandīkwa, būlī ng'wene kū nzengo go ng'wawe. 4Ū Yosefu nang'hwe ūbūūka ī Galilaya, kūfuma mu nzengo gwa Nazaleti. Ūlinha kūja Būyudaya kū nzengo go ng'wa Daūdi, gwitanagwa Betelehemu, nguno walī wa numba ya ng'wa Daūdi na būbyīle bokwe. 5Ūja akandīkwe hamò nū Malia ūyo walī anūngije, ū mu shikū jenījo ū Malia ūsangwa alī nda nhaale. 6Aho balī kwenūko lyūshikīīla ī likanza lyakwe lya kūbyala. 7Ūbyala ng'wana ngosha; tangi wakwe. Ūnkumba myenda ya sheleele, hūna ūnaalīkīja ng'wilīīlo lya mitugo, nguno bakagayiwa ū ng'wanya ū mu numba ya bageni.

Bamalaika kū badīīmi

8Ī mhandī jenījo baalīho badīīmi ba ng'holo baalī lūgundīīga; baalī kū matogolo bakūlang'hanaga madale ga ng'holo jabo makanza ga būjikū. 9Bahayimanīla malaika o ng'wa Seeba obilongela, būpīndiwa na būpe w'ikūjo lya ng'wa Seeba, bogoha na kogohele kataale no! 10Alīyo ū malaika ūbawīla gīkī, “Mutogohage nguno nang'wenhela Ng'hūlū Jawiza, ījo jikūbiza ja būyegi būtaale kū banhū bose. 11Ī lelo yenīyī, ū mu nzengo go ng'wa Daūdi ng'wabyalīlagwa Mpīja, Kilisito Seeba. 12Ī shimanīkījo shing'we shilī gīkī, mukūmona Ng'wana ng'weleele alingīīlilwe myenda ya sheleele, alaajiwe ng'wilīīlo lya mitugo!” 13Kūhayimanīla lilonga ibita itaale lya ng'wigūlū, nū malaika ng'wenūyo wisanja nabo. Būnkumīlīja Mulungu balīhaya gīkī, 14“Ikūjo lībize kūlī Mulungu higūlya no,

nū mu sī ībize ho mhola ū kū banhū abo banyegije.”

15A bamalaika aho bīnga baja ng'wigūlū, a badīīmi benabo biwīla gīkī, “Tūjagi ī Betelehemu tūkagūbone ū mhayo ūyo gwilongaga gwenūyū, ūyo watoolekeja ū Seeba.” 16Ng'hana bihuuta bajile ko, būūkansanga ū Malia nū Yosefu, hamò nū Ng'wana alaalile ng'wilīīlo lya mitugo. 17Aho bamona ū Ng'wana bīsomboola ī mihayo yakwe, gīt'ūmo baalī bawīlīlwa. 18Pye abo bakigwa īyo bakawīlwa na a badīīmi būkumya no. 19Alīyo ū Malia wīsūmbya pyī ī mihayo yenīyo, wībīka mung'holò yakwe, ūyūyideedeng'hanya. 20A badīīmi aho bībona pyī ī yenīyo, būshoka balīnkumīlīja Mulungu, na kūngongoola. Nguno īyo baalī bawīlwa bakībona ī yose, gīkī yalī gīt'ūmo baalī bigwīla.

Yesu kwenhwa mu hekalu ha weleele

21Ū Ng'wana aho washisha shikū inaane būnsaala, būng'winha ī lina lyakwe ī lya Yesu, īlo walī winhwa na malaika kūko ataalī nūūlū kūtungīlwa nda. 22Jahayūshika ī shikū ja kwejiwa kwabo, būntwala Yelusalemu kūjūntūūla kū būtongi bo ng'wa Seeba, gīt'ūmo shihayīlile shilagīlo sha ng'wa Musa. 23H'ūmo yandīkīlilwe mu shilagīlo sha ng'wa Seeba, gīkī, “Būlī ng'wana ngosha ū wa kūhangūla nda ya ng'wa nina, akwitanwa alī ng'wela kūlī Seeba.” 24Būfunya na shitambo gīt'ūmo shilagīlo sha ng'wa Seeba shihayīlile: Ng'hūūlū ibīlī, nūūlū ng'hune ibīlī ja mhunda. 25Ū mu Yelusalemu walīmo ngosha witanagwa Simioni, munhū ntūngīlīja na wa logohano. Walī akūlindīīlile ū kūlūngūjiwa kwa Baisilaeli; nū Moyo Ng'wela walī hamò nang'hwe. 26Nīyo ū Moyo Ng'wela walī wamanīkīja gīkī, atūcha aho ataalī kūmona Kilisito#2:26 Kilisito: Shiyunani Kilisito, Shihebulania Masīya; lina h'ī līmò. O ng'wa Seeba. 27Hūna ū Moyo ūtongeela ū munhū ng'wenūyo kūja kū hekalu, ūūkingīla mo. Aho bang'wenha a babyaji bakwe ū Ng'wana ū Yesu, kwiza kwītīlwa gīt'ūmo shalī shīmīle sha shilagīlo, ū munhū ng'wenūyo 28ūng'wanukūla ū Ng'wana mu makono gakwe. Hūna ūnkumīlīja Mulungu alīhaya gīkī.

29“Seeba ī haha lūūlū

wanzunīlīja ū nsese wako kwīnga,

aje mu mhola gīt'ūmo ūkahayīla.

30Nguno a miso gane gabūbona ū būpīji wako,

31Ūbo ūbalonja longegije banhū bose.

32Isana lya kwakīla mahanga,

n'ikūjo kūlwa banhū bako a Baisilaeli.”

33Ū ise nū nina wa Ng'wana bakīkumya īyo īkahayiwa kūlwakwe. 34Hūna ū Simioni ng'wenūyo ūbafuuha. Ū nina ū Malia ū ng'wene ūng'wīla, “Managa gīkī, ū Ng'wana ng'wenūyū ahelelilwe nīmo ūyo gūkwenheleja banhū bingī ū mu Baisilaeli kūgwa, na bangī kūgūngūmūka; hama akūbiza shimanīkījo sha kwihalalījiwa. 35Hangī maganiko gang'holò ja banhū bingī gakūtendwa ha ng'wape; nīyo nū bebe ū būpanga boko būkūching'wa līlūshū!” 36Walīho na ng'hangi nkīma, Ana ng'wana Fanueli; ngikūlū o shikū ningī, o lūganda lo ng'wa Asheli. A ha būnhya bokwe walī watoolwa, wikala nū ngoshi ikanza lya myaka mpungatī, 37Ūchīlwa! Hūna wikala gīko dūhū atatoolilwe, kūshisha myaka makūmi anaane n'īne. Walī atīngaga ū mu hekalu, wikalaga ng'wenūmo līīmi ji na būjikū pe; nīmo gokwe kūlomba na kūfunga. 38Nang'hwe ī likanza lyenīlo wiza hoi, ūbawīla ī mihayo ya Ng'wana ng'wenūyo, pye a bana Yelusalemu abo baalī balindīīlile būpīji.

Kūshoka Nazaleti

39Aho bīmala pyī ī myanya gīt'ūmo shalī shihayīlile ī shilagīlo sha ng'wa Seeba, būshoka Galilaya kū nzengo gwabo gwa Nazaleti. 40Ū Ng'wana ūkūla, ūbiza na nguzu, na a masala ūkwīja no, hama nī lubango ja ng'wa Mulungu jalī hamò nang'hwe.

Yesu mu hekalu ha būdinha bokwe

41Būlī ng'waka a babyaji bakwe bajaga Yelusalemu, kū shigukulu sha pasaka. 42Na a haho washisha myaka ikūmi n'ībīlī, būlinha bajile ko gīt'ūmo shalī shīmīle sha shigukulu. 43Aho jang'wa ī shikū ja shigukulu, būbūūka kūshoka kaya. Alīyo ū ndinha ū Yesu ūsaaga Yelusalemu, gwike a babyaji bakwe baalī batamanile. 44Būshimīza lūgendo lwa lūshikū lūgima, baliganika gīkī nang'hwe alīmo dūhū ū ng'wibita lya banhū. Bahayūngayiwa, bandya kūnkooba ū mu badūgū nū mu bimane babo. 45Aho baduuma ū kūmona, būshoka ī Yelusalemu bakūnkoobaga. 46Jūbīta shikū idatū, bahayūja kū hekalu būūkansangīla mo, wigashaga na balangi, alībadegeleka na kūyūbabūja mabūjo. 47Pye abo bang'wigwaga babūkumyaga ū witegeleja bokwe, na a mashosho gakwe. 48A babyaji bakwe aho bamona būdedebala! Ū nina ūng'wīla gīkī, “Bebe Ng'wana, nibūlī watwītīlile mhayo gūlī gīko? Ū nene nū so watūpīnīhagije no, tūkūkūkoobaga!” 49Nang'hwe ūbashokeja ūbawīla, “Nibūlī mulīnikooba? Mutamanile gīkī shinigeleelilwe kūbiza mu numba ya ng'wa Baba?” 50Gwike batagwitegelegije ū mhayo ūyo akabawīla gwenūyo. 51Alīyo ūshoka nabo, būtulumenha bajile ī Nazaleti, ūyūbigwa mu yose. Ū nina wībīka mung'holò yakwe pyī ī yenīyī. 52Ū Yesu ūkūla, ongeja ū mu witegeleja, nū mu kūnyeja ū Mulungu, na a banhū.

Currently Selected:

Luka 2: SUKBI15

Highlight

Copy