wandījo 48

Manase na Efulaimu

1Ikanza ilebe ū Yosefu ūwīlwa gīkī, “Ū so alīsaata.” Na lūūlū ūbasola a bitūnja bakwe a ba Manase nū Efulaimu, ūja nabo koi. 2Ū Yakobo aho wawīlwa gīkī, “Ū ng'witūnja wako ū Yosefu wiza kūkūlola;” ū Isilaeli wiyūmīlīja kūgūngūmūka, wigasha a ha būlīīlī. 3Ū Yakobo ūng'wīla gīkī, “Aho nalī Luzu, mu sī ya Kanaani, ū Mulungu wa būdūla bose#48:3 Mulungu wa būdūla bose: Shiohebulania, Eli Shadai. akaniilongela, ūnifuuha. 4Ūniwīla gīkī, ‘Nakūkwīta ūbize na mbyala nhaale, na a banhū bako nakūbakwīja. Nakūkwīta ūbize ihanga lya banhū bingī. Nī sī yenīyī nakūkwinha bebe na banhū ba shibyalīlwe shako, ībize yako ya wikomangīle kūshisha welelo bose.’ 5Ali lūūlū, a bitūnja bako a babīlī abo ūkabyalīlwa mu Misili nataalī ū nene kwiza kūūnū, babizaga bane; ū Efulaimu nū Manase bane, gīt'umo Lubeni na Simioni balī bane. 6Hūna a baana bose bose abo ūlabyalīlwe a ha numa ya benaba, bene bako. Ū mu sī īyo balinhwe bakūbalīlwa ū mu mina ga baana ba ng'wabo. 7Ū Laheli akazumalīkīla mu sī ya Kanaani tūlī mu nzīla nalīshoka kūfuma Padani. Tūūsangwa twegeela dūhū ī Efulata, nūnjīka bbihī n'ikūūwa lya Efulata (h'ī Betelehemu), ūnilekela būpīna.”

8Ū Isilaeli aho wababona a bitūnja ba ng'wa Yosefu a babīlī, ūbūja; “Banani a beneba?” 9Ū Yosefu ūng'wīla ū ise gīkī, “Angū h'a bitūnja bane abo Mulungu waninha ū mu sī īyī.” Hūna ū Isilaeli ūhaya, “Benhage aha nabafuuhe.” 10Gwike a miso ga ng'wa Isilaeli gakasangwa gandije kwīta wiija kūlwa nguno ya būkūji; nose walī atabonaga chiza. Na lūūlū ū Yosefu ūbeegeleja a bitūnja bakwe a halī ise; nang'hwe ū ise ūbakumbatīla na kūbabbipa. 11Ū Isilaeli ūng'wīla ū Yosefu gīkī, “Ī liganiko lya kūbūbona ū būshū wako lyalī lyashila, alīyo ī haha ū Mulungu wanizunīlīgije kūbabona na a baana bako.” 12Hūna ū Yosefu ūbīnja a ha mazwi ga ng'wa ise, hanuma winama ū kū būtongi bo ng'wa ise, ū kūnū achimīgije ha sī ū būshū. 13Hangī ū Yosefu ūbasola ūbabūcha būbīlī wabo, ū Efulaimu mu nkono gwakwe gwa būlyo ūnoleja kū nkono gwa lūmoso gwa ng'wa Isilaeli, ū Manase mu nkono gwakwe gwa lūmoso, ūnoleja kū nkono gwa būlyo gwa ng'wa Isilaeli; hūna ūbeegeleja a halī we. 14Ū Isilaeli ūgabisanya a makono gakwe; ūgūgoloola ū nkono gwakwe ū gwa būlyo, ūgūtūūla ha ntwe gwa ng'wa Efulaimu, nūūlū īkī walī ndo. Ū gwa lūmoso ūgūtūūla ha ntwe gwa ng'wa Manase, nūūlū īkī ū Manase hū walī tangī ū kūbyalwa.

15Hūna ūmfuuha ū Yosefu akūhayaga gīkī,

“Ū Mulungu ūyo babyaji bane ba

Abulahamu na Isaka bashimīzaga

mu kūng'wigwa we,

ū Mulungu ūyo alī Ndīīmi wane

shikū jose kūshisha lelo,

16Ū malaika ūyo wanipīja kūfuma

mu makoye gose;

ū ng'wenūyo ni abīīlūkīlage mbango

a bayanda benaba.

Bitanīlwe kū lina lyane,

na a mina ga babyaji bane,

a ba Abulahamu na Isaka,

nīyo biyongeje bakwīle ū mu sī.”

17Ū Yosefu aho wamona ū ise watūūla ū nkono gwakwe ū gwa būlyo ha ntwe gwa ng'wa Efulaimu, akaleka ū kūyega; na lūūlū ūgwīnja ū nkono gwa ng'wa ise a ha ntwe gwa ng'wa Efulaimu ūgūtūūla ha ntwe gwa ng'wa Manase. 18Ū Yosefu ūng'wīla ū ise, “Baba wahūbīla, ūyū hū myalwa wa kwandya, ntūūlīlage ng'wene ū nkono gwako ū gwa būlyo.” 19Alīyo ū ise akalema ūhaya, “Namanile ng'wanone, nilekage namanile. Nang'hwe akūbiza ihanga lya banhū; nīyo nū wei akūbiza ntaale. Alīyo ū nzunaye akūbiza ntaale kūntinda ū wei, nīyo ū būbyīle wakwe būkūbiza mahanga mingī.”

20Ū lūshikū lwenūlo ūbafuuha; ūhaya,

“Ū mu lina lyako, ū Isilaeli

akūyūfuuha alīhaya gīkī,

‘Ū Mulungu ni akwītage ūbize gītī

Efulaimu na Manase.’”

Ūbiza wantūūla ū Efulaimu kū būtongi wa ng'wa Manase. 21Hūna ū Isilaeli ūng'wīla ū Yosefu gīkī, “Ū nene nalī hihī kūcha, alīyo ū Mulungu akūbiza hamò ning'we, na akūmushosha hangī ū kū sī ya babyaji bing'we. 22Na lūūlū ū bebe īkī ūlī ntongeeji wa biyo, nalīkwinha inong'ho lya kūkongeja; nalīkwinha ū lūgūlū ūlo nakabataaja Baamoli mu kwilwisha būlūgū nabo bo līlūshū na būta wane.”

Currently Selected:

wandījo 48: SUKBI15

Highlight

Copy