wandījo 44

Shikombe ng'wigūnīla

1Ū Yosefu ūng'wīla ū ntūmami wa ha ng'wakwe gīkī, “A magūnīla ga banhū benabo gookajage shilīwa hangī, gīt'umo būlī ng'wene adūgije kūbūūcha; nī hela jabo ūbatūūlīle, būlī ng'wene ū ng'wigūnīla lyakwe. 2Hūna ī shikombe shane ī sha feza ūshitūūle ū ng'wigūnīla lya nzuna wabo ū wa kūmalīīja, shibize ng'wenūmo nī hela jakwe ī ja shilīwa.” Ng'hana wīta gīt'umo akawīlīlwa nū Yosefu. 3Aho weela ū būjikū, a banhū benabo būshindīkīlwa ītaalī dilū, bandya lūgendo nī nzobe jabo. 4Aho bataalī kūgūsegenela ū nzengo, ū Yosefu ūng'wīla ū ntūmami wakwe gīkī, “Bakūūbījage wangū a banhū benabo, ūlū ūlabapandīke ūbawīle gīkī, ‘Nibūlī ū wiza ng'wabūlīpa yabūbi? 5Ī shikombe shenīshi shitī sha ng'wa baba būgonzo sha kūng'welà na kūlagūlīla? Ū mhayo ūyo ng'wagwītaga gwenūyū mi no!’” 6Aho wabapandīka ūbawīla ng'hana ī mihayo yenīyo. 7Nabo būshosha balīhaya, “Mhayo kī gwenheleja nose ū nkūjiwa ū sīswe būgonzo ahaye mihayo īlī gīko? A abise basese bako tūlingilo ūskwīta mhayo gūlī gīko; gūkachīīlage kūle ūko. 8Ū beebe manīlaga dūhū a ha gīkī ī hela ījo tūkajisangīla mu magūnīla gise twajenhanīgije kūfuma Kanaani. Nibūlī hangī tūgime kwiba feza nūūlū zahabu kūfuma mu numba ya ng'wa so būgonzo? 9Ūlū alilonge ūmò wa mu bise batūmami bako alī nasho akūcha; hama pye a bangī tūkūbiza basese ba ng'wa sīswe būgonzo.”

10Nag'hwe ūshosha, “Ū gwenūyo ng'wadala, na lūūlū twītwe gīkī, ūyo alilongeali nasho h'ūyo akūbiza nsese wane; a bangī pye mukūbiza mutī mu kwihīga.” 11Ī likanza lyenīlo būlī ng'wene wicha ha sī ū nigo gwakwe ūgūtaligūla. 12Hūna ū ntūmami ng'wenūyo wandya kūbaloja ī miligo yabo, kwandīja ū ntaale wabo ūkamalīīgīja kūlī ndo wabo. Ī shikombe shilongela ng'wigūnīla lya ng'wa Benjamini. 13Ī likanza lyenīlo būtandūla shizwalo shabo kūlwa būpīna; ī miligo yabo bīdaamhīja ha nzobe jabo haho na haho, būshoka ū mu nzengo.

Yuda kwiyanda kūlī Yosefu

14Aho washoka ū Yuda na a baana ba ng'wawe, būnsanga ū Yosefu ataalī mo ū mu numba; būshikīla kwiponeja ha sī ū kū būtongi wakwe. 15Ū Yosefu ūbawīla, “Mhayo kī ū gwenūyū ng'wītaga? Mutamanile gīkī ū munhū wa kūbiza gītī nene adūgije kūmanīja mihayo nūūlū ya mu mbisīla?” 16Ū Yuda ūhaya, “Tūlī na mhayo kī ūyo tūdūgije kūng'wīla ū sīswe būgonzo? Tūyombe mhayo kī? Gūlīho mhayo kī ūyo gūdūgije kūtūgunanha mu kwibūūla kwise? Ū Mulungu waboolechaga hape ū būkenaagūji wa basese bako. Ī haha pye tūlī basese ba ng'wa sīswe nkūjiwa; a bise aba, nū yūyo wabonagwa nasho ī shikombe.” 17Alīyo ū Yosefu ūhaya, “Ū nene ngilo ū kwīta mhayo gūlī gīko. Ūyo wabonagwa nasho ī shikombe, ng'wenūyo dūhū h'ūyo akūbiza nsese wane. A bangī pye shimīzagi mhola muje kūlī sīng'we.”

18Hūna ū Yuda ūng'wegeela ūng'wīla, “Baba nkūjiwa, nkūlīlagwe ū nsese wako ayombe kamhayo kaka ū kūlī baba nkūjiwa. Ūtizūmpelanīla ū nsese wako, nūūlū īkī ūlī na būdūla gītī Falao ng'wenekīlī. 19Ū bebe baba nkūjiwa ūkatūbūja a bise basese bako gīkī, ‘Mulī na sīng'we nūūlū nzuna wing'we?’ 20Tūkakūshokeja gīkī, ‘Ū sīswe tūlīnang'hwe, gwike wakūlaga; hama alīho na nsūmba, ng'witūnja wakwe akabyalwa kū būnamhala wakwe. Ū nsūmba ng'wenūyo walī na nkūlūye, ūzumalīka; ūsaaga wei iyene dūhū ū mu bitūnja ba kūbyalwa nū nina. Na lūūlū ū ise antogilwe no!’ 21Ū bebe aho wigwa gīko ūkayomba, ‘Ng'wenhagi nize namone nane na miso gane.’ 22A bise tūkakūnshokeja ū bebe baba nkūjiwa gīkī, ‘Ū nyanda atūdūla ū kwīnga aneke ū ise, ūlū wīta gīko akūzumalīka ū namhala!’ 23Alīyo ū bebe ūkatūwīla a bise basese bako gīkī, ‘Ū nzuna wing'we wa kūmalīīja ūlū atizile hamò ning'we, mutī bakūbūbona hangī ū būshū wane.’ 24Na lūūlū aho twashoka ū kūlī ntūmami wako ū sīswe, tūkang'wīla īyo ūkīhaya ū bebe baba nkūjiwa. 25Alīyo lyashikile ikanza ū sīswe ūtūwīla, ‘Jagi ko hangī mukatūsumīle ī shilīwa nūūlū shigehu.’ 26Nise tūshosha, ‘Tūtūjaga ko. Ū kūja ū kwenūko numho ū nzuna wise abize alī hamò nise. Ū nzuna wise ūlū atī hamò nise, tūtīko ū kūbūbona ū būshū wa munhū ng'wenūyo.’ 27Ū nsese wako ū sīswe ūtūwīla gīkī, ‘Ū nke wane akanibyalīla bitūnja babīlī. 28Ūmò ūnileka ūkajimīīla; nane nūhaya, Ū ng'wenūyo walyiwe mashiinū, na kūshisha lelo īyī natīnamona. 29Ūlū munīngīje nū ng'wenūyū, hūna mhayo gose gose gwabūbi gūkang'wilongele koi, mukūnibūlaga na būpīna, mubize ng'wanihilimīkīja mu shigila gete!’ 30Na lūūlū ūlū nūja ū kūlī nsese wako ū sīswe alīyo ū nyanda atī hamò nise, ū sīswe ūyo būpanga bokwe būlī hamò nū būpanga bo nyanda, 31akūyagala ūlū ūbona gīkī ū nyanda atīho. A bise basese bako tūkūmūlaga na būpīna ū sīswe, tūng'hilimīkīje mu shigila gete. 32Ū nene nsese wako hū nakiyeega ū kūlī baba kūlwa nguno yakwe ū nyanda. Nakahaya gīkī, ‘Ūlū nūlemeelwa kūng'wenha kūlī bebe hangī, ū nene hū nakūbūbūūcha ū būbi wenūbo ū kū būtongi wako baba, shikū jose ja būlamu bone!’ 33Ali lūūlū, nalīkwikūmbīlīja ū nene nsese wako nashiige aha, a ha ng'wanya gwa nyanda, nabize nene ū nsese wa ng'wa baba nkūjiwa; ū nyanda ashoke kaya na a bakūlūye. 34Nakūdūla ginehe ū nene ū kūja ū kūlī baba, ū nyanda ūlū atī hamò nane? Yaya natūdūla! Natatogilwe kūgūbona ū mhayo gwabūbi gwenūyo gūlīngwīla ū baba!”

Currently Selected:

wandījo 44: SUKBI15

Highlight

Copy