wandījo 34

Shekemu kūng'wikūmva Dina

1Lūshikū lūmò ū Dina ūyo Leya walī wamyalīla Yakobo, ūja kūbagīsha bashīke ba ng'wigūngūli. 2Shekemu, ng'witūnja wa ng'wa Hamoli, ūyo walī nsugi wa Bahīvī, ūmona ū ng'wanikī ng'wenūyo; ūndutanja ūja kūlaala nang'hwe bo nguzu. 3Hūna ī ng'holò yakwe yūdimana no nū Dina, ū nshīke wa ng'wa Yakobo. Kwīngīīla henaho, ū nsūmba ng'wenūyo ūntogwa no ū ng'wanikī, būbiza na mahooya gawiza. 4Hūna ū Shekemu ūng'wīla ū ise ū Hamoli gīkī, “Nilūngījage baba ū ng'wanikī ng'wenūyū nantoole.” 5Ū Yakobo ūwīlwa gīkī ū nshīke wakwe wasosohajiagwa, gwike a bitūnja bakwe baalī lūgundīīga, badīmaga mitugo; na lūūlū ūhuumūla dūhū kūshisha biza kaya. 6Ū ise wa ng'wa Shekemu ū Hamoli ūja ū kū ng'wa Yakobo kūhooya nang'hwe. 7Bahayūkashoka a bitūnja ba ng'wa Yakobo ū kūfuma ū kū madīīmīlo ga mitugo, aho bayiigwa īyo yalī yilonga yenīyo, bakapīnīhala hangī būpelana no. Nguno ū Shekemu akīīta mhayo gwa soni no ū kū Baisilaeli, ū gwa kūlaala na nshīke wa ng'wa Yakobo; mhayo ūyo gūtigelile kwītwa nūūlū hado. 8Gwike ū Hamoli akabibūūlīla ūbawīla gīkī, “Ū ng'witūnja wane ū Shekemu ī ng'holò yakwe īlī ū kūlī nshīke wing'we gete. Nalīmulomba mung'winhe abize nke wakwe. 9Itooleelagi dūhū na a bise; twinhagi a bashīke bing'we, na a bing'we muyūsola a bashīke bise. 10Mudūgije ū kwigasha hamò nise ūmu; ī sī yīyī īlī kū būtongi wing'we īmulindile. Zengagi mo, musūlūje na kūpandīkīla mo sabo.” 11Hūna ū Shekemu ūng'wīla ū ise wa Dina na a basīzaye, “Nanukūlagi nakūng'winha shose shose īsho mulanilombe. 12Nipangīlagi ī sabo ja kūkwa, gīt'umo mulabonele, nūūlū na ja nsango#34:12 Nsango: Nūūlū manong'ho. ūlū jilīho, nakūfunya dūhū; ū mhayo ū ntaale a bing'we ninhagi ū ng'wanikī abize nke wane.”

13A bitūnja ba ng'wa Yakobo aho bakūhooyaga nū Shekemu hamò nū ise ū Hamoli, batūmamīlaga būlomolomo; nguno ū ilūmbū lyabo ū Dina walī wasosohajiwa. 14Būbawīla, “Tūtūdūla a bise ū kūgwīta ū mhayo gwenūyo, tūtūdūla kūntooja ū ilūmbū lise kūlī ng'wing'wana atasaalilwe. Ū mhayo gwenūyo ū kū bise gūkūbiza gwa soni no. 15A bise tūkūmuzunīlīja ūlū ng'ūzunya mhayo gūyū, gīkī mubize gīt'umo tūlī a bise; būlī ngosha ū mu bing'we asaalwe. 16A henaho lūūlū hū tūkūyūng'winha a bashīke bise, na a bise tūkūyūbasola a bashīke bing'we. Ūlū ng'wīta gīko tūkūzenga hamò ning'we, tūkūbiza bamò bing'we. 17Alīyo ūlū mūtūzunyaga ū kūsaalwa, a bise tūkūnsola ū ilūmbū lise tūje.”

Bana Shekemu kūbūlagwa

18Ū mhayo gwabo gūnona ū kūlī Hamoli nū ng'witūnja wakwe ū Shekemu. 19Nīyo ū nsūmba ng'wenūyo walī akūjiwe no ū mu kaya ya ng'wa ise; na lūūlū īkī walī wadutwa no nū nshīke wa ng'wa Yakobo, atadīlile wandya kwigeya geya, kwīta ūmo bakahayīla. 20Hūna ū Hamoli nū ng'witūnja wakwe ū Shekemu būja ū kū mita gwa nzengo, ūko bamanhījaga na a bichaabo, būūkahooya na a banhū ba mu nzengo gwabo. Būbawīla gīkī, 21“A banhū benaba batūyegelile no; tūbazunīlījagi dūhū bazenge ū mu sī yise, nī būsūlūja bīīte. Nguno ī sī ngalī noi, īkūbigela dūhū nabo. Na a bashīke babo tūkūyūbatoola, na a boi babatoola a bashīke bise. 22Gwike a bagosha bakūzunya ū kwikala ng'wenūmu na kūbiza bamò bise ūlū tūzunya kwīta mhayo gūmò, a bagosha ū mu bise basaalwe babize gīt'umo balī a boi. 23Angū mulībona kinehe, ī mitugo jabo jitūbiza jise, nī sabo jabo ī jingī, nī shikolo ī shingī īsho balī nasho? Na lūūlū tūbazunīlījagi ū mhayo ūyo balīgūhaya, bazenge ng'wenūmu!” 24Pye a bagosha abo baalī baja ū kū mita bizunīlīja nū Hamoli, hamò nū ng'witūnja wakwe ū Shekemu; na ng'hana pye a bagosha ū mu nzengo gwenūyo būsaalwa.

25Aho jabīta shikū idatū, būsangwa bataalī balwaagije, nīyo balīyūsaatwa kībi no, bitūnja babīlī ba ng'wa Yakobo, ba Simioni na Lawī, a basīzaye ba ng'wa Dina, būsola mapanga gabo. Būbasanga ko a banhū benabo mu shībya, būbabūlaga pye a bagosha. 26Būmūlaga ū Hamoli nū ng'witūnja wakwe ū Shekemu, būng'wīnja ū ilūmbū lyabo ū Dina ū mu numba ya ng'wa Shekemu, būduta bajile. 27A bitūnja ba ng'wa Yakobo būja ū kū nzengo ūyo banhū baalī baabūlagwa; būūkashisola ī shikolo sha mu nzengo gwenūyo, ūmo ilūmbū lyabo walī wasosohagījiwa. 28Būgaswaga pye a madaale ga mitugo jabo, ng'holo, ng'ombe, nī nzobe; būlī shikolo īsho shaalī ū mu nzengo nī sha kū malaale, būsola būtwala. 29Pyī ī sabo jabo būjisola, pye na a bakīma na a baana babo; pyī nī shikolo sha mu kaya būshisola. 30Hūna ū Yakobo ūbawīla a ba Simioni nū Lawī gīkī, “A bing'we ng'wanenhelaga iyanga ī lyenīlī, nguno ng'wanibilaga inyīma ū kū benīkīlī sī īyī, a Bakanaani na a Bapelizi, a bazengi ba ng'wenūmu. A bise tūlī bagehu no; a boi ūlū bisangīja hamò hūna būnidumīla, bakūnikenaagūla kamò na kamò ū nene nī kaya yane.” 31Alīyo būnshokeja ū saabo balīhaya gīkī, “Nibūlī walī wangemile ū ilūmbū lise kūbiza malahya?”

Currently Selected:

wandījo 34: SUKBI15

Highlight

Copy