wandījo 22

Abulahamu kūgeng'wa na Mulungu

1Ikanza ilebe ū mu shikū jenījo, ū Mulungu ūngema ū Abulahamu. Ūng'witana, “Abulahamu!” Nang'hwe widīka, “Kalame Baba!” 2Ūng'wīla gīkī, “Nsolage ū ng'witūnja wako; ū ng'witūnja wako ūyo ūmò wike ū Isaka, ūyo ūntogilwe, ūje nang'hwe kū sī ya Molia, ūkamfunye kū lūgūlū lūmò ūlo nalakoolekeje, abize shitambo sha kūpemva.” 3Mu dilū makīngo aho weela, ū Abulahamu ūbūūka kūgolanya nzobe#22:3 Kūgolanya nzobe: Kwītūūlīla ngoye ja kūtungīla miligo, na myenda ya kwigasīja ndamhīji. yakwe. Ūbamisha na basūmba babīlī batūmami bakwe, hamò nū Isaka; bandya kūpandagūla ng'hwi ja ha ng'walīlo gwa shitambo. Aho bamala būbūūka bajile ū kwipandī īlo Mulungu walī wanagīīla. 4Kū lūshikū lwa kadatū lwaho wahayūbūūcha miso ū Abulahamu, ūlīloleela kūle kū būtongi ī lipandī lyenīlo. 5Hūna ūbawīla a batūmami bakwe gīkī, “Ikalagi henaha nī nzobe, ū nene nū nyanda tūje ūko tūkalamye, tūkūshoka hangī tūmusange aha.” 6Ū Abulahamu ūjisola ī ng'hwi ja shitambo sha kūpemva, ūnseseja ū ng'witūnja wakwe ū Isaka. Ū wei ūgūbūūcha ū mooto nū lūshū. Aho balīshimīza būbīlī wabo gīko, 7Ū Isaka ūnyombya ū ise ū Abulahamu alīhaya, “Baba!” Ū Abulahamu widīka, “Ni kinehe ng'wanone!” Ū Isaka ūhaya, “Ū moto tūlī nago, nī ng'hwi jiiji; al'ī ng'holo ya shitambo sha kūpemva, ī yene īlī halī?” 8Ū Abulahamu ūhaya, “Ī ng'holo ya shitambo sha kūpemva, Mulungu akūtūpandīkīla ng'wanone.” Hūna būja nalo ū lūgendo balī babīlī dūhū gīko.

9Aho bashika a h'ipandī īlo Mulungu walī wanagīīla, ū Abulahamu ūbeeja ho ng'walīlo, ūjihela chiza chiza nī ng'hwi a ha ng'walīlo. Hūna ūntunga ū ng'witūnja wakwe ū Isaka; ūnaalīkīja a ha ng'walīlo, a higūlya ya ng'hwi. 10Wibeeja beeja, hūna ūlūdima ū lūshū mu nkono gwakwe, gīkī ansīnze ū ng'witūnja wakwe. 11Alīyo malaika wa ng'wa SEEBA ūng'witana kūfuma ng'wigūlū; ūhaya, “Abulahamu Abulahamu!” Widīka, “Kalame Baba!” 12Ūng'wīla, “Ūtizūnkuumya ū nyanda! Lekaga ū kūng'wītīla mhayo gose gose. Ī haha naamanaga lūūlū gīkī ūng'ogohile ū Mulungu, nguno ūtaniimile ū ng'wana wako, ū ng'witūnja wako ūyo ūmò wike!” 13Kūbūūcha miso ī gīkī ū Abulahamu, ūbona ng'ondi ya ng'holo, yigwasanyaga a mapembe gayo ng'wisaka. Wījīla ho wiza wīfunya kūbiza shitambo sha kūpemva, a ha ng'wanya gwa ng'witūnja wakwe. 14Ū Abulahamu ūlitana ī lipandī lyenīlo gīkī, “SEEBA akabapandīkīlaga.” Kūshisha nī lelo gūtaalī gūkūhayiagwa gīkī, “A ha lūgūlū lwa ng'wa SEEBA hū hene bakapandīkīlaga.”

15Ū Malaika wa ng'wa SEEBA ūng'witana ū Abulahamu lūkangala lwa kabīlī kūfuma ng'wigūlū. 16Ūhaya gīkī, “Nene ng'wenekīlī nalitonga kū lina lyane, alīhaya SEEBA; īkī wagwīta ū mhayo gwenūyū, waleka kūngugīla ū ng'wana wako, ū ng'witūnja wako ūyo ūmò wike, 17Ū nene nakūkūfuuha no no no. Ū būbyīle wako nakūbūkwīja būbize gītī sonda ja ng'wigūlū ū wingī waho, nūūlū gītī maseni ga ha nyanza. Na būkūbiza na būdūla wa kūbapyena banishi, na kūbataaja mizengo yabo. 18Na hangī īkī waligwaga ī lilaka lyane, pye a mahanga ga mu sī gakwīlūkīlwa mu nzīla ya būbyīle wako.” 19Hūna ū Abulahamu ūja ūkababītīla a basūmba ba ha ng'wakwe, ūshoka nabo Beeli-sheba.

Bitūnja ba ng'wa Naholi

20Hanuma ya makanza malebe, ū Abulahamu ūwīlwa gīkī, “Ū Milika nang'hwe wamyalīla bitūnja ū ndūgūyo ū Naholi. 21Ū wa kwandya Huzi, bangī ba Buzi, Kamueli (ise wa ng'wa Alamu), 22Kesedi, Hazo, Pilidashi, Jidilafu na Betueli.” 23Ū Betueli akamyala Lebbeka. A bitūnja a banaane benaba h'abo Milika akamyalīla ū Naholi, ū ng'wanong'wawe na Abulahamu. 24Walī na nkīma ūngī witanagwa Leuma, nang'hwe ūbyala bitūnja; ba Teba, Gahamu, Tahashi, na Maaka.

Currently Selected:

wandījo 22: SUKBI15

Highlight

Copy