wandījo 20

Abulahamu na Abimeleki

1Hūna ū Abulahamu ūsaama, wīnga aho walī, ūja ūkazenga ipandī lya Negevu, ha gatī ya Kadeeshi na Shūūlī. Ikanza ilebe ūsegeja kwīnga na a henaho, ūkikala Geela. 2Aho alī kwenūko ūyūng'haya ū nke ū Saala gīkī, “Ilūmbū lyane.” Kwimanīla Abimeleki, ū ntemi wa Geela, watūma banhū kūnjīla ū Saala; ūnsola. 3Alīyo ū Mulungu ūng'wizīīla ū Abimeleki mu nzīla ya shilooti makanza ga būjikū, ūng'wīla gīkī, “Ū bebe ūlī mfu, kūlwa nguno ū nkīma ūyo wansolaga ng'wenūyo atoolilwe.” 4Alīyo ū Abimeleki akasangwa ataalī ū kūng'wegeela; na lūūlū ūhaya, “SEEBA, ūkūkenaagūla ihanga nūūlū lītī na shilingo? 5Tūhaya waniwīlile wei ng'wenīkīlī gīkī, ‘Ū ng'wenūyū ilūmbū lyane;’ nū nkīma nang'hwe atahayile gīkī, ‘Ū ng'wenūyū nsīza wane?’ Ū mhayo gwenūyū nagwītaga mu būtūngīlīja na ng'holò yape gete.” 6Ū Mulungu ūng'wīla ū mu shilooti shenīsho gīkī, “Ūlīhaya gwa ng'hana, namanile gīkī ū mhayo gwenūyū wagwītaga mu ng'holò yape, h'ī nguno yene natakūlekile ūnkuumye; nene ng'wenekīlī naakūhangījaga ūtizūnihūba. 7Ali lūūlū, nshoshage ū nkīma ng'wenūyo ū kūlī ngoshi; īkī ū wei ng'hangi, akūkūlombela ūbize mpanga. Alīyo ūlū ūtanshokije, managa hape gīkī ūkūcha, ū bebe ng'wenekīlī na a ba mu ng'wako.”

8Ū Abimeleki aho wamisha ī ntondo yaho ī dilū, ūbitana a bana ng'oma bakwe, ūbasomboolela pyī ī yenīyo. A banhū benabo bakogoha no! 9Hanuma ya henaho ū Abimeleki ūng'witana ū Abulahamu, ūng'wīla, “Mhayo kī ū gwenūyū watwītīlile? Naakūkenije kī nose ūnenhela būbi būtaale gīko ū nene hamò nū būtemi wane? Ū bebe wanīītīlile mihayo īyo ītigelile kwītwa!” 10Ū Abimeleki ongeja kūmūja ū Abulahamu, “Ī gete kī īsho shikakwenheleja nose wīte gīko?” 11Ū Abulahamu ūshosha, “Nakabona gīkī, a ha ipandī lyenīlī lūtīīho ū loogohano lwa ng'wa Mulungu, bakūnibūlaga kūlwa nguno ya nke wane.” 12Hama a higūlya ya henaho, ū wei ī chene ng'hana ilūmbū lyane, nūūlū īkī nke wane; nguno tūsangīlile ū sīswe, tūūlekana a baniniswe. 13Na lūūlū ū Mulungu aho wanīnja ū mu numba ya ng'wa baba, ūnīīta kūbiza wa kūja nakūsaama saamaga, nakang'wīla gīkī,#20:13 Nakang'wīla gīkī: Ūyo akawīlwa Saala, atī Mulungu. “Ū būtogwa wako ūmo ūnitogelilwe ū nene, ūkūyūboolecha mu nzīla īyī, būlī kwene ūko tūkūja nihayage gīkī, ‘Ū ng'wenūyū sīza wane.’” 14Hūna ū Abimeleki wenha ng'holo na ng'ombe, na basese bagosha na bakīma; ūng'winha ū Abulahamu, ūnshokeja nū nke wakwe ū Saala. 15Ū Abimeleki ūng'wīla ū Abulahamu gīkī, “Ī sī yane yīyī kū būtongi wako īkūlindile; igashaga hose hose aho ūlasole bebe ng'wenekīlī.” 16Nū Saala ūng'wīla, “Ū nsīzayo nang'winha shekeeli shihūmbī shimò sha feza, kūlwa kūkundīkīja būhūbi ūbo walī wītīlilwe bebe kū būtongi wa banhū bose; ī haha ūlī wape.” 17Aho yashila ī yenīyo, ū Abulahamu ūnombela ū Abimeleki nū nke, na a basese ba ha ng'wakwe a bakīma; būbiza na būdūla wa kūbyala hangī. 18Nguno ū Mulungu akasangwa wabalugalīla ū būbyīle pye a ba mu kaya ya ng'wa Abimeleki, kūlwa nguno ya ng'wa Saala, ū nke wa ng'wa Abulahamu.

Currently Selected:

wandījo 20: SUKBI15

Highlight

Copy