Kūfuma 7

1Hanuma ya henaho ū SEEBA ūng'wīla ū Musa, “Managa gīkī ū bebe naakūtūūlaga kūbiza gītī ūlī Mulungu ū kūlī Falao, hama ū nkūlūyo ū Alooni akūbiza gītī ng'hangi wako. 2Ū bebe ūkūyūhaya būlī shene īsho nakūkūlagīīla, hūna ū nkūlūyo ū Alooni akūng'wīla ū Falao, abalekele a Baisilaeli bafume ū mu sī yakwe. 3Alīyo nakwīgang'hanaja ī ng'holò ya ng'wa Falao, gīkī ībize nūūlū nakwīje na kinehe ī shimanīkījo shane, nī sha kūkumya ū mu Misili, 4atūmudegeleka. Hanuma ya henaho ī Misili nakwīgoloolela nkono gwane, nīīte mihayo mitaale ya kūtūūla mo nsango, nagafunye a mabità gane; a banhū bane a Baisilaeli. 5A henaho a Bamisili hū bakūmana gīkī ū nene nalī SEEBA, ūlū nūyīgoloolela nkono gwane ī Misili kūlwa kūbafunya mo a Baisilaeli.” 6A ba Musa nū Alooni bīīta ng'hana gīt'ūmo SEEBA akabalagīīlīla. 7Ī shikū jenījo aho balīyomba nū Falao, ū Musa walī na myaka makūmi anaane, ū Alooni myaka makūmi anaane n'idatū.

Nang'ha kūbiza nzoka

8Hūna ū SEEBA ūbawīla a ba Musa nū Alooni, 9“Ū Falao ūlū alamuwīle gīkī, ‘Beejagi mhayo gwa kūkumya,’ ū bebe ūkūng'wīla ū Alooni, ‘Gūsolage ū nang'ha gwako ūgūponeje ha sī ū kū būtongi bo ng'wa Falao,’ gūkūgalūka ībize nzoka.” 10A ba Musa nū Alooni būja ū kūlī Falao būkīīta gīt'ūmo akabawīlīla ū SEEBA. Ū Alooni ūgūponeja ha sī ū nang'ha gwakwe kū būtongi bo ng'wa Falao na a batūmami bakwe balīho; gūūgalūka yūbiza nzoka. 11Ū Falao witana basàla na balogi; a bagòta ba mu Misili būtūmamīla nzīla ja mu giiti, nabo būgwīta ū mhayo gwenūyo. 12Būlī ūmò wabo ūgūponeja hasī ū nang'ha gwakwe, gūgalūka kūbiza nzoka. Gwike ū nang'ha go ng'wa Alooni gwīmila ī milang'ha yabo, 13Ī ng'holò ya ng'wa Falao īkikala ngang'hanazu, ūlema ū kūbadegeleka; gīt'ūmo walī wahayīla ū SEEBA.

Shitūlo sha mininga

14Hanuma ū SEEBA ūng'wīla ū Musa, “Ī ng'holò ya ng'wa Falao ītaalī ndaamu, ataalī alemile ū kūbazunīlīja a banhū ū kūja. 15Na lūūlū, ī ntondo ī dilū ūlansange ū Falao ūkanindīīlīle bbihī na mongo, ūkūmanhīja nang'hwe kwenūko alīja kū minzī. Ūkūgūbūūcha mu nkono gwako nū nang'ha ūyo gūkagalūka kūbiza nzoka. 16Hūna ū Falao ūkūng'wīla, ‘Ū SEEBA, ū Mulungu wa Bahebulania wanitūmile kwiza kūkūwīla gīkī ūbalekele a banhū bakwe baje bakanamye kwitogolo. Alīyo kūshisha haha ūtaalī ū kwigwa. 17Alilūūlū, ū SEEBA alīhaya gīkī, ī haha gūliza mhayo, ūyo gūkūkwīta ūndeebe gīkī ū wei alī SEEBA. Ū nene nakūgatūla a minzī ga mu mongo na nang'ha ūyo nalī nago mu nkono gwane, gagalūke kūbiza mininga. 18Ī ndīlo ījo jilī mu mongo jikūcha jibole; hama a minzī ga mu mongo gakūnung'ha, a Bamisili baleemeelwe ū kūgang'wa.’” 19Hūna ū SEEBA ūng'wīla ū Musa, “Ng'wīlage ū Alooni gīkī, ‘Gūsolage ū nang'ha gwako, ūgūgoloole ū nkono gwako a higūlya ya minzī ga Misili, higūlya ya myongo yabo ī mido nī mitaale, higūlya ya malambo gabo na a mataba gabo, gagalūke kūbiza mininga.’ Pye a hose ū mu sī ya Misili gakūbiza mininga gike; a minzī ayo galī mu mabbīnhī nūūlū mu nno gagalūke kūbiza mininga.” 20A ba Musa nū Alooni bīīta gīt'ūmo akabalagīīlīla ū SEEBA. Ūgūnunja ng'wigūlya ū nang'ha gwakwe kū būtongi bo ng'wa Falao na a batūmami bakwe. Hūna ūgatūla a minzī ga mu mongo; pye a minzī gūgalūka kūbiza mininga. 21Ī ndīlo ījo jalī mu mongo jūcha, a minzī ga mu mongo gūnung'ha no, būlemeelwa ū kūgang'wa a Bamisili; hose pyī ū mu Misili gūbiza mininga gike! 22Alīyo a bagòta ba mu Misili nabo būgwīta ū mhayo gwenūyo kūlwa kūtūmamīla nzīla ja mu giiti. Na lūūlū ī ng'holò ya ng'wa Falao yongeja kūbiza ngang'hanazu, ūlema ū kūbadegeleka a ba Musa nū Alooni, gīt'ūmo SEEBA walī wahayīla. 23Ū Falao ūgalūka dūhū ūja mu kaya, ū mhayo gwenūyū atagwideedeng'hanije nūūlū hado ū mu ng'holò yakwe. 24Pye a Bamisili bandya kūja bakūsīngījaga balīkula ū mu ng'hilimva ya mongo, gīkī bapandīke minzī ga kūng'wa; nguno bakalemeelwa ū kūgang'wa a minzī ga mu mongo.

Shitūlo sha madanga

25Jūbīta shikū mpungatī kūfuma aho ū SEEBA akagūtūlīla ū mongo gwa Nile.

Currently Selected:

Kūfuma 7: SUKBI15

Highlight

Copy