Kūfuma 12
12
Kūlagīlwa Pasaka ya kwandya
1Ū SEEBA ūlūngalūnga na a ba Musa nū Alooni ū mu Misili; ūbawīla gīkī, 2“Ū ng'weji gwenūyū gūkūbiza gwa kwandya ū kū bing'we, gwa wandījo bo ng'waka gwing'we. 3Bawīlagi pye a Baisilaeli gīkī ū mu lūshikū lw'ikūmi ū ng'weji gwenūyū, būlī namugī shiigelila asole ng'wana wa ng'holo#12:3 Ng'wana wa ng'holo: Ng'holo songi, nūūlū mbūli songi. kūlwa nguno ya kaya yakwe; būlī kaya ībize na ng'wana wa ng'holo ūmò. 4Ī kaya ī ndo ūlū yūbiza ītadūgije kūmala ng'wana wa ng'holo ngima, īkwigeleelwa kūlya shilyani na bazenganwa bichabo. Shiigelile būmanīke ūbūkūmi bo banhū abo balīho, hūna ū ng'wana wa ng'holo asolwe kūlenganīla na būdūla wa kalīīle ka būlī ūmò wabo. 5Ū ntugo ūyo mulagūsolaanhye, gūsolagi kūfuma mu ng'holo nūūlū mbūli; ībize ng'hosha ya ng'waka gūmò, nīyo ītī na būlemehazu bose bose. 6Mukwīlang'hana kūshisha lūshikū lw'ikūmi n'inè ū mu ng'weji, lūshikū ūlo pye a Baisilaeli bakūjisīnza ī mitugo jenījo makanza ga mhīndī ya kaamunhū ūyo. 7Hūna bakūsola mininga gamò babile a ha nyango gwa numba īyo bakūbiza mo ī likanza lya kūlya, bakūgūbila a higūlya nū mu kabazu. 8Ū būjikū wenūbo, bakwīlya ī nyama yookije mu moto, hamò na ngatī gūtī na shibimbya, na makūbī malūlū#12:8 Makūbī malūlū: Nūūlū, ngagaani. 9Yaya ū kwīlya ī nyama ītaalī mbīsī, nūūlū īzugilwe; alīyo yoochiwe pye gete, ntwe, magūlū, nī sha munda. 10Mutizūlekeela gīkī mulaalye shipolo ha ntondo yaho, ūlū yūsaaga kūshisha ha ntondo, īpembagi mu moto ījige. 11Ī mbika ya kīīlīīle īlī gīkī, Mukūbiza mushitungile migwasho ī shizwalo shing'we, nū kū mhambala jing'we muzwalile shilatū; nī milang'ha ying'we ng'wībūūkije mu makono ging'we. Mukwīlya bo kalakala; ī yenīyo Pasaka ya ng'wa SEEBA. 12Ū būjikū wenūbo nakūbīta pye a hose ū mu sī ya Misili, nabayagaje pye a babyalwa ba kwandya; a ba banhū, na a ba mitugo. Nakūbinha nsango pye a bamulungu ba mu sī ya Misili, ū nene nalī SEEBA. 13A mininga gakūbiza lūmeng'ho lwing'we a ha numba īyo mukūbiza mo. Ūlū nūgabona a mininga nakūmubītīīla. Ī shitūlo īsho nakūbatūlīla a Bamisili shitūmukuumya a bing'we.”
Kūyizūkwa Pasaka
14“Ū lūshikū lwenūlū lwizūkagwi gwa ū mu shibyalīlwe shing'we pyī ī shose īsho shiliza, mukūlwisaaba kūbiza lwa kūnyegela SEEBA, ī shenīshi shilī shilagīlo sha būja na būja.” 15Mukūyūlya ngatī gūtī na shibimbya ikanza lya shikū mpungtī. Ū mu lūshikū lwa kwandya mukwīnja pyī ī shibimbya ū mu kaya jing'we; nguno ū kwīngīīla lūshikū lwa kwandya lwenūlo kūshisha lwa mpungatī, būlī ng'wene ūyo ūlya shose shose īsho shilī na shibimbya, akūkomanyiwa aponyiwe īnge ū mu Baisilaeli. 16Ū lūshikū lwa kwandya lūkūbiza lwa kwibilinga kwela, nū lūshikū lwa mpungatī. Ū mu shikū jenīji yaya ū kūtūmama nīmo nūūlū hado, ūlū ītī kūbeeja shilīwa sha kūlya banhū dūhū, ū gwenūyo hū gūdūgije ū kwītwa. 17Shidīlīlagi gete ī shigukulu sha ngatī gūtī na shibimbya; nguno ū mu lūshikū lwenūlo nalīgīnja a mabità ging'we ū mu sī ya Misili. Na lūūlū lizūkagwi ī likanza lyenīlo welelo bose ū mu shibyalīlwe shing'we īsho shiliiza. 18Ū mu ng'weji gwa kwandya kwandīja mhīndī ya lūshikū lw'ikūmi n'inè kūshisha mhīndī ya lūshikū lwa makūmi abīlī na lūmò, mukūlya ngatī gūbeejiwe na būsu būtasangije shibimbya. 19Līkūbīta ikanza lya shikū mpungatī shitigelaga shibimbya nūūlū hado ū mu kaya jing'we. Būlī ng'wene ūyo ūlya shose shose īsho shilī na shibimbya, abize nobeji, nūūlū ūmò wa babyaalwa; akwīnjiwa ū ng'wisangī lya Baisilaeli. 20Hose hose ūko mulī, mutizūlya shilīwa shisangije shibimbya, lyagi migatī ītī na shibimbya.
Kūsīnzwa kwa Pasaka
21Ū Musa ūbitana pye a banamhala ba Baisilaeli ūbawīla, “Jagi wangū ū kū kaya jing'we, būlī ng'wene akasolanhye ng'wana wa ng'holo wa kūlyiwa; mulasīnze#12:21 Mulaasīnze: Nūūlū gīkī, mulayīsīnze ī ng'holo ya Pasaka. kūlwa Pasaka. 22Hūna musole madūūtū ga hisopo muyūgadabbya mu mininga galī ng'wibakuli, ng'wībila ī milyango; a higūlya nū mu kabazu. Atizigela nūūlū ūmò wing'we wa kūja hanze ya numba yakwe kūshisha dilū. 23Ū SEEBA akūbīta pye a hose ū mu sī ya Misili, aje akūbatūlaga a babyalwa ba kwandya, ūlū ūgabona a mininga a higūlya ya nyango nū mu kabazu, akūgūbītīīla ū nyango gwenūyo; atūnzunīlīja ū nyagaja ingīle ū mu kaya jing'we kūmukenaagūla. 24Gūdimagi ū mhayo gwenūyū, nguno shilī shilagīlo shing'we sha welelo na welelo ū mu shibyalīlwe shing'we shose. 25Ūlū ng'wingīla ū mu sī īyo wang'wisagīja kūng'winha ū SEEBA, yaya ū kūleka kūgwīta ū mhayo gwenūyū. 26A baana bing'we ūlū būmubūūja, ‘Ū mhayo gwenūyū gūlī na makūlū kī?’ 27Bawīlagi gīkī, ‘Shilī shitambò sha Pasaka ya ng'wa SEEBA; nguno aho tūlī mu Misili wajibītīīlaga ī numba ja Baisilaeli ū ng'wikanza lya kūbatūla a Bamisili, alīyo a bise ūtūchīla shigongo ūjileka ī kaya jise.’” Hūna a banhū binamya ī mitwe yabo būlamya. 28Na ng'hana a Baisilaeli bakīīta gīt'ūmo ba Musa na Alooni bakabalagīīlīla.
Kūyagajiwa babyalwa ba kwandya
29Ū būjikū ha gatī ū SEEBA ūbatūla pye a babyalwa ba kwandya ū mu Misili, kwandīja ū tangī o ng'wa Falao, ūyo olī igeleelilwe kwigasha h'isumbī lya būtemi, kūshisha ng'witūnja ū tangī wa ntungwa ūyo walī atungilwe mu jeela; pyī nī mbyalwa ja kwandya ja mitugo. 30Ū Falao na a batūmami bakwe na a Bamisili a bose, būbūūka ī būjikū yenīyo balīīlīla; yalī ng'hūngū nhaale no ū mu Misili, nguno yalī ītīho kaya nūūlū īmò aho atachile munhū.
Kwīnga mu Misili
31Aho ītaalī būjikū gīko, ū Falao ūbitana a ba Musa nū Alooni, ūbapeeja alīhaya, “Bing'we būkagi na a Baisilaeli, mubīngīle a banhū bane, jagi mukanamye ū SEEBA gīt'ūmo mukwikalaga ng'ūhayīla. 32Gasolagi na a madaale ging'we ga ng'holo nī ng'ombe, ūmo mutogelilwe.” 33A Bamisili būbakangīlīja a banhū bīnge wangū ū mu sī yenīyo. Būhaya, “Ūlū ītī chene numho tūkūshila kūcha pye!” 34Na lūūlū a banhū būjisola ī mbilya#12:34 Mbilya: Būsu būlubilwe būlindanile kūzugwa shikolo gītī mandaji, chapati, nūūlū ngatī. jabo ja migatī, būsangwa bataalī ū kūguulanya mo ī shibimbya; būjibūūcha mu shiseme, būjilingīīla mu myenda, būja najo bajiseselile kū mabega. 35A Baisilaeli bakīīta gīt'ūmo Musa walī wabalagīīlīla, būbalomba a Bamisili shikolo sha feza na sha zahabu, na shizwalo. 36Ū SEEBA walī wabīīta a Bamisili bazunye ū kūbinha a banhū shikolo shose shose īsho būbalomba; na lūūlū būbiza babasonza a Bamisili ī shikolo shabo. 37A Baisilaeli bandya lūgendo; būshimīza kūfuma Lamesesi kūja Sukoti, baalī banhū gītī shihūmbī magana atandatū, a bagosha dūhū abo bashimīzaga; kūleka kūbabala a ba kīma na a baana. 38Na banhū bangī bingī dūhū bakaja hamò nabo; baaja na madaale mataale ga mitugo, ng'holo na ng'ombe. 39Ī mbilya ja migatī ījo baalī baabūūcha kūfuma Misili būbeeja migatī ītī na shibimbya, nguno bakapeejiwa wangū wangū ū mu Misili, būsangwa bataalī nūūlū kūbeeja shilīwa sha mu nzīla. 40Ī likanza īlo bakikala ū mu Misili a Baisilaeli lyalī myaka magana anè na makūmi adatū. 41Aho yakalīka ī myaka magana anè na makūmi adatū yenīyo, nū lūshikū lwenūlo lūshika, a mabità ga ng'wa SEEBA gakīnga ī Misili. 42Ū būjikū bo lūshikū lwenūlo ū SEEBA walī abūdīlīlile no, nguno waalī wa kūbīnja mu sī ya Misili a banhū bakwe. Na lūūlū a Baisilaeli ībigelile babūdīlīle no no no ū būjikū wenūbo; bankūje ū SEEBA ū mu shibyalīlwe shabo pyī īsho shiliza.
Migilo ya Pasaka
43Hūna ū SEEBA ūbawīla a ba Musa nū Alooni, “Ī mihayo īyī yigelile īdīlīlwe kūlwa nguno ya Pasaka, ū munhū nobeji atazunīlījiwe ū kwīlya. 44Alīyo ū nsese ūyo ng'wangūla na hela jing'we, ūlū ng'ūmala kūnsaala adūgije ū kwīlya. 45Lelo ū ng'wigashi wa kakanza dūhū, nūūlū ng'witūmamīja wa mheela, ū ng'wenūyo yaya ū kwīlya. 46Ī nyama yenīyo shiigelile īlīīlwe mu numba īmò; yaya ū kwīfunya ū mu numba īyo balīlīīla. Hama yaya ū kūgabīnzagūla a maguha gayo. 47Pye a Baisilaeli shibigeleelilwe kwīlya. 48Ū nobeji ūyo akwikalaga mu bing'we, ūlū ūtogwa kwīlya ī Pasaka ya ng'wa SEEBA, shiigelile basaalwe pye a bagosha ba mu kaya yakwe; hūna akūdūla ū kwīlya gītī ūmò wa babyalīlwa ba mu sī yenīyo. Atīho ngosha nūūlū ūmò wa kwīlya ūlū atasaalilwe. 49Ī shilagīlo shenīshi shilī kūlwa banhū bose, a babyalīlwa baamo ū mu sī, na a balobeji abo balikale hamò ning'we.” 50A Baisilaeli a bose bīīta gīt'ūmo baalī balagīlwa na Musa hamò na Alooni. 51Ū mu lūshikū lwenūlo ū SEEBA ūbafunya a Baisilaeli ū mu sī ya Misili, balī mabità na mabità.
Currently Selected:
Kūfuma 12: SUKBI15
Highlight
Share
Copy
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.
