Shītwa sha Batūng'wa 20

Kūja Makedonia na Būyunani

1Aho yabīta ī yose yenīyo ū Paulo ūbitana a bahemba ūbatimbya ng'holò, na ūbalaga ūbūūka kūja Makedonia. 2Waja alībīta hose hose ī mhandī jenījo akūlūngalūngaga mihayo mingī ya kūbakomeleja a banhū, nose ūshika ī Būyunani. 3Akamala mo myeji idatū; aho wahaya kūbūūka kūja Sulia kūbītīla mu nyanza, ūgalūcha a maganiko; ūshoka ūbītīla Makedonia, nguno akabona gīkī a Bayudaya baalī basīgana mhayo gwa kūmūlaga. 4Bakaja nang'hwe bana Tesalonike, ba Sopatilo ng'wana Piliho muna Beloya na Alisitako na Sekundo, na Gayo muna Delibe, hamò nū Timotheo; na bana Asia ba Tikiko na Tulofimo. 5Alīyo īkī a banhū benaba baalī batonga ū kūja, bahayūshika Tiloa būtūlinda. 6Aho shabīta shigukulu sha migatī ītī na shibimbya, nise tūbuga nyanza twīnga ī Filipi, tūmala shikū itanò hūna tūshika ī Tiloa ūko baalī; tūshinga ho shikū mpungatī.

Kwilaga kwa ng'wa Paulo na bana Tiloa

7A ha lūshikū lo kwandya mu nyuma tūkibilinga kūmega ngatī, ū Paulo ūlomeela kūshisha būjikū ha gatī, nguno walī ahelile kwīnga a ha ntondo yaho. 8Ū mu chumba ūmo twalī twibilingīla jalīmo tala ja kūgunanha. 9Ndinha nebe, lina lyakwe Yutiko, walī wigasha ha lūgala lw'idilisha, wanoga ūbītwa tūlo, ūtindīla īkī ū Paulo akalomeela ikanza ilīhu. Kūhayimanīla ū nsūmba ng'wenūyo wagwa ha sī; būmūcha omalaga kūcha, nguno akagwa kūfuma kū golofa ya kadatū. 10Ū Paulo aho wika ūshikīla kūngwīla ūnkumbatīla; hūna ūbawīla, “Mutogohage ataalī mpanga!” 11Wīnga ho ūlinha hangī ū kū golofa, ūmega ngatī ūlya, ongeja hangī ū kūhoya nabo; nose wela hūna ūja. 12Aho bamūcha ū nsūmba būyega no, nguno bakamona alī mhola.

Lūgendo lwa kūfuma Tiloa kūja Mileto

13Twahayandya ū lūgendo, a bise twingīla mu meli tūtonga kūja Aso, gūkahelwa gīkī tūkūjūnsolela kwene ū Paulo; nguno ū ng'wene akaja lwa magūlū. 14Aho watūsanga ī Aso, tūmbakīja tūbūūka tūjile tūūkashika Mitūlene. 15A henaho twīnga hoi kū ntondo yaho, tūbuga nyanza tūūkakola ha ng'walo gwa Kio; hama a ha ntondo yaho hangī tūshika Samo, ū kū lūngī tūshikīīla Mileto. 16Ū Paulo walī atogilwe kūbītīla Efeso; alīyo walī atatogilwe kūsola ikanza ilīhu ū mu Asia, nguno walī wangū wangū; gīkī ūlū yūdūlīkana ū lūshikū lo Pentekosite lūshike alī Yelusalemu.

Paulo na Banamhala ba Efeso

17Hūna aho alī Mileto ūtūmīja būkitanwa a banamhala ba kanisa ya Efeso. 18Aho bashika ūbawīla gīkī, “Mumanile ūmo nashimīzīlaga ū ng'wikanza ī lyose aho nikalaga hamò ning'we, kwandīja lūshikū lo kūshika kwane mu Asia. 19Nantūmamīlaga ū Seeba mu widohya na kūlīla, nguno ya kūgeng'wa kūtaale, kūlwa kwītīlwa yabūbi na Bayudaya. 20Nīyo hangī mumanile gīkī natamubisile mhayo nūūlū gūmò ūyo gwalī gūdūgije kūmugunanha, gīkī hīmba naleke kūmuwīla nūūlū kūmulanga hape hape kū būtongi wa banhū, na mu būlī kaya. 21Najaga nūbahūgūla a Bayudaya na a Bayunani, gīkī bangalūkīle Mulungu na kūnzunya Seeba wise Yesu Kilisito. 22Alīyo ī haha nalīja Yelusalemu, ū Moyo anitungile; hama īyo nalakamanhye nayo natīmanile. 23Gwike namanile dūhū gīkī, ū Moyo Ng'wela akūjaga ūnikaanīla mu būlī nzengo, ūniwīla gīkī nalindīīlilwe būtungwa na būluhi. 24Alīyo nahene ū nene natūbūbalaga ū būpanga bone gīkī būlī na solobo ū kūlī nene, kūtinda kūlūmalīja ū lūgendo lwane, nū nīmo gwa kūkumūcha Ng'hūlū Jawiza ja shigongo sha ng'wa Mulungu, nīmo ūyo nakagwanukūla kūfuma kūlī Seeba Yesu.

25“Ī haha namanile gīkī, pye a bing'we abo nabītaga nakūmulomeelaga ng'hūlū ja būtemi, mutalanibona hangī ū mu mīlī. 26Hūna lūūlū, ū lūshikū lwa lelo lwenūlū nalīkaanīla kū būtongi wing'we gīkī, ū nene nalī wape. Natīko ū kūsayīlwa#20:26 Natīko ū kūsayīlwa: Nūūlū, neelaga ū mu mininga. nūūlū būgwīlwa nsago a banhū. 27Nguno natalekile ū kūmuwīla pyī īyo ayīhelile ū Mulungu. 28Hū kūhaya ilang'hanagi a bing'we benekīlī, nī lidale ī lyose īlo Moyo Ng'wela amutūūlile kūbiza balang'hani balyo; īdīīmagi ī kanisa ya ng'wa Mulungu, īyo wīpandīka mu kwita mininga gakwe wei ng'wenekīlī. 29Ū nene namanile gīkī, ūlū nalīnge jikwandya kūng'ūbūkīla mhūge ndaku, ījo jitūlīsaatwa ī lidale. 30Hama nū mu bing'we benekīlī bakwandya kwigela banhū ba kūja bakūyombaga mihayo īchaama chaamile, bayūbahūmbūūla a bahemba gīkī babalondeele boi. 31Hūna lūūlū ikalagi miso, ng'wizūkwe gīkī ikanza lya myaka idatū nikalaga nakūlīlaga līīmi na būjikū, natalekile kūng'hūgūla nūūlū ūmò wing'we. 32Alīyo ī haha lūūlū, nalīmutūūla mu makono ga ng'wa Mulungu, na mu mhayo gokwe ūyo gūdūgije kūmuzenga, na kūng'winha wingīji hamò na bose abo bakwejiagwa. 33Ū nene natikūmbilwe na hado yaya hela ja ng'wa munhū ose ose, nūūlū sabo jingī, nūūlū ni shizwalo dūhū yaya. 34A bing'we aba mumanile gīkī naatūmamaga na makono gane aya nene ng'wenekīlī, gīkī napandīke sha kwigunaanīla ū nene, na a babo nikalaga nabo. 35Ū mu yose īyo nīītaga, nang'oolekejaga gīkī shiigelile kūtūmama gīko, tūyūbagunanha abo batidūgije; tūyūgwizūkwa ū mhayo go ng'wa Seeba Yesu; ūyo gūhayile gīkī, ‘Ū kwinha kūlī na lubango kūtinda kwanukūla.’” 36Aho wamala ū kūyomba ī yenīyo ūtuja mazwi, ūlomba hamò nabo pye a bose. 37Pye bakalīla no, kūnū balīnkumbatīla ū Paulo, na kūmbbipa. 38Gūkabaminya ū mhayo ūyo akagūhaya, ū gwa gīkī batalamona hangī ū mu mīlī. Hūna būnshindīkīla, būūkanshisha a ha meli.

Currently Selected:

Shītwa sha Batūng'wa 20: SUKBI15

Highlight

Copy