Mataio 6
6
O le A‘oa‘oga e Uiga i le Mea Alofa
1“ ‘Ia ‘outou fa‘aeteete, ‘ina ne‘i fai lelei a ‘outou amio ‘ona o le va‘aiga a tagata; auā tou te lē maua ai se taui mai lo ‘outou Tamā o i le lagi.#Mata 23.5
2“A ‘outou fai meaalofa, ‘aua ne‘i ilia se pū e fa‘ailoa atu ai i tagata, e pei o le faiga a tagata fa‘afia amiotonu i sunako ma ala tetele. ‘Ua fa‘apea la latou faiga ‘ina ‘ia vi‘ia ai i latou e tagata. O le ‘upu moni ‘ou te ta‘u atu ‘iā te ‘outou, o lo latou taui lava lenā. 3A ‘outou fai meaalofa, ‘aua lava ne‘i iloa e lou lima tauagavale le mea e faia e lou lima taumatau, 4a ‘ia fai fa‘alilolilo; auā o lo ‘outou Tamā o i le lagi na te silafia mea lilo, ma na avatua fa‘aaliali le taui ‘iā te oe.
O le A‘oa‘oga e Uiga i le Tatalo
(Luka 11.2-4)
5“A ‘outou tatalo, ‘aua ne‘i ‘outou fa‘apei o tagata fa‘afia amiotonu, auā ‘ua fai ma a latou masani le tatalo fa‘aaliali i totonu o sunako ma magāala, ‘ina ‘ia va‘aia ai i latou e tagata. O le ‘upu moni ‘ou te ta‘u atu ‘iā te ‘outou, o lo latou taui lava lenā.#Luka 18.10-14 6A o oe, pe a e tatalo, ‘ia e ulu atu i totonu o lou potu, ma tapuni le faitoto‘a, ma e tatalo ai i lou Tamā o lo‘o i ai i le mea lilo; o lou Tamā fo‘i o lē e silasila i le mea lilo, na te avatua fa‘aaliali le taui ‘iā te oe.
7“A ‘outou tatalo, ‘aua le tautū i ‘upu e masani ai e pei ‘ona faia e tagata o Nu‘u ‘ese; auā fa‘apea lava a latou o le tele o ‘upu e talia ai a latou tatalo. 8‘Aua ne‘i fa‘apei o i latou na. Auā ‘ua silafia e lo ‘outou Tamā mea uma tou te mana‘omia a‘o le‘i ōle atu ‘outou ‘iā te ia. 9‘Ia fa‘apenei la ‘ona ‘outou tatalo:
‘Lo matou Tamā e o i le lagi,
ia pa‘ia lou suafa,
10ia o‘o mai lou Mālō.
‘Ia faia lou finagalo, i le lalolagi e pei ‘ona faia i le lagi.
11‘Ia e foa‘i mai ia te i matou i le aso nei a matou mea‘ai e tatau ma le aso.
12‘Ia e fa‘amāgalo ‘iā te i matou ‘iā matou agasala,
e pei o i matou fo‘i ‘ona matou fa‘amāgaloina atu i ē ‘ua agaleaga mai ‘iā te i matou.
13‘Aua fo‘i ‘e te ta‘ita‘iina i matou i le fa‘aosoosoga,
a ‘ia e lavea‘i i matou ai le leaga.’ #6.13 O nisi fa‘aliliuga e fa‘aopoopo i ai le: auā e ou le Mālō ma le mana, ‘atoa ma le vi‘iga e fa‘avavau lava. Amene.
14“Auā ‘āfai tou te fa‘amāgalo atu i tagata ‘ua fa‘aleaga mai ‘iā te ‘outou, e fa‘amāgaloina fo‘i ‘outou e lo ‘outou Tamā o i le lagi;#Mare 11.25,26 15‘ae ‘āfai tou te lē fa‘amāgalo atu isi tagata, o le a fa‘apea lava ‘ona lē fa‘amāgaloina o ‘outou leaga e lo ‘outou Tamā.
O le A‘oa‘oga e Uiga i le Anapogi
16“ ‘Āfai tou te anapopogi, ‘aua ne‘i ‘outou mata fa‘anoanoa e pei o le faiga a tagata fa‘afia amiotonu, o ē ‘ua fa‘aleagaina o latou mata ‘ina ‘ia iloa e tagata o lo‘o anapopogi i latou. O le ‘upu moni ‘ou te ta‘u atu ‘iā te ‘outou, o lo latou taui lava lenā. 17A o oe, pe a e anapogi, ia u‘u lelei lou ulu ma fufulu ou mata; 18‘ina ‘ia lē iloa e tagata o lo‘o e anapogi, ‘ae tau lava o lou Tamā o lo‘o soifua i le mea lilo; o lou Tamā fo‘i o lo‘o silasila i le mea lilo na te avatua fa‘aaliali le taui ‘iā te oe.
O ‘Oloa i le Lagi
(Luka 12.33-34)
19“ ‘Aua ne‘i ‘outou fa‘aputuina mo ‘outou ‘oloa i le lalolagi; auā e ‘atia e mogamoga ma pala i le ‘ele, ma o lo‘o i ai fo‘i tagata gaoi latou te ‘eliina a‘e ma gaoi; 20a ‘ia ‘outou fa‘aputuina mo ‘outou lava ‘oloa fa‘alelagi, e lē o i ai se mogamoga po o se ‘ele e fa‘aumatia ai; e leai fo‘i ni tagata gaoi e ‘eliina ma gaoi ai. 21Auā, o le mea o lo‘o i ai a ‘outou ‘oloa, o lo‘o i ai fa‘atasi fo‘i ma o ‘outou loto.
O Sulu o le Tino
(Luka 11.34-36)
22“O mata o sulu ia o le tino. ‘Āfai e lelei ou mata, e malamalama ai lou tino ‘atoa, 23‘Ae a leaga ou mata, e fa‘apea fo‘i ‘ona pogisā ai lou tino ‘atoa. O lea, ‘āfai e pouliuli le malamalama o i totonu ‘iā te oe, ‘ona matuā tele ai lea o le pogisā.
O le Atua ma ‘Oloa
(Luka 16.13; 12.22-31)
24“E lē mafai e se tagata ‘ona ‘au‘auna i ni ali‘i se to‘alua, auā o le a ‘ino‘ino i le tasi ‘ae alofa i le isi; a lē o lea, e fa‘apipi‘i atu o ia i le tasi ‘ae lafoa‘i le isi. E lē mafai ‘ona ‘outou ‘au‘auna i le Atua ‘atoa ma ‘oloa o le lalolagi.
25“O lea, ‘aua ne‘i ‘outou popole vale i mea e tausi ai o ‘outou ola; i mea‘ai ma mea inu; po o lavalava fo‘i. E lē sili ‘ea le ola i lo mea‘ai ma mea inu? E lē sili ‘ea fo‘i le tino i lo lavalava? 26Va‘ai fo‘i i manu felelei: e lē totōina e i latou ni fa‘ato‘aga ia maua ai mea‘ai; e lē selesele fo‘i pe fa‘aputu saito i le fale e teu ai; peita‘i, e fafagaina i latou uma lava e lo ‘outou Tamā o i le lagi. E lē sili ‘ea ‘outou i manu felelei? 27O ai ‘ea se isi o ‘outou na te mafaia i lona popole ‘ona fa‘aopoopo le umi o lona ola i se futu e tasi?
28“O le ā le mea tou te popole ai i o ‘outou lavalava? Va‘ai fo‘i i lautalotalo o le vao, pe fa‘apefea ‘ona tutupu; e lē galulue pe milo i latou. 29Peita‘i ‘ou te fai atu ‘iā te ‘outou, e o‘o lava ia Solomona ma lona matagofie tele, e le‘i ‘ofu o ia e pei o se tasi o ia mea. 30‘Āfai e fa‘apea ‘ona fa‘a‘ofuina e le Atua le vao o le fanua, o lo‘o ola mai nei i le asō, ‘ae lafoina taeao i le ogāumu, e lē sili ‘ea ‘ona fa‘a‘ofuina ‘outou e ia, o ‘outou o ē e fa‘atuatua itiiti?
31“O le mea lea, ‘aua tou te popole vale i mea‘ai po o mea inu, po o lavalava fo‘i. 32Auā o mea uma ia ‘ua sā‘ilia e tagata o Nu‘u ‘ese. A ‘ua silafia lava e lo ‘outou Tamā o i le lagi e aogā ia mea uma ‘iā te ‘outou. 33A ‘ia ‘outou mua‘i sā‘ili lona Mālō ma lana amiotonu, ‘ona fa‘aopoopoina atu lea o ia mea uma ‘iā te ‘outou. 34O le mea lea, ‘aua tou te popole mo le aso a taeao, auā o lo‘o i ai lava i le aso a taeao mea e tele e popole ai. E tofu le aso ma ona lava fa‘alavelave.
Currently Selected:
Mataio 6: SCNT
Highlight
Share
Copy
Want to have your highlights saved across all your devices? Sign up or sign in
Samoan Contemporary New Testament © Bible Society of the South Pacific, 2009.
