Mataio 4
4
O le Fa‘aosoosoga o Iesu
(Mare 1.12-13; Luka 4.1-13)
1‘Ona ta‘ita‘iina lea o Iesu e le Agaga i le vao tu‘ufua, ‘ina ‘ia fa‘aosoosoina e le tiapolo. 2E fasefulu ao e fasefulu fo‘i po sa anapogi ai o ia, ‘ona fia taumafa ai lea. 3‘Ona alu ane lea ‘iā te ia o lē e fa‘aosooso ma fai atu, “ ‘Āfai o oe o le Alo o le Atua, fetalai atu i ma‘a nei ia liu areto.”
4A ‘ua tali atu o ia, “ ‘Ua tusia, ‘E lē na o mea‘ai e ola ai le tagata, ‘ae ola fo‘i i afioga uma e tulei mai i le fofoga o le Atua.’ ”#Teu 8.3
5‘Ona ‘ave lea o ia e le tiapolo i le ‘a‘ai pa‘ia, ma fa‘atū i le tumutumu o le malumalu. 6‘Ua fai atu le tiapolo ‘iā te ia, “ ‘Āfai o oe o le Alo o le Atua, ‘ia e oso nei i lalō, auā ‘ua tusia,
‘ ‘Ua tofia e le Atua ana agelu e tausia oe,
ma tau‘ave oe i o latou lima,
‘ina ne‘i tu‘ia lou vae i se ma‘a.’ ”
7‘Ua tali atu Iesu ‘iā te ia, “ ‘Ua tusia fo‘i, ‘ ‘Aua ‘e te tofotofo i le Ali‘i lou Atua.’ ”#Teu 6.16
8‘Ona toe ‘ave lea o ia e le tiapolo i luga o le mauga e matuā maualuga lava, ma fa‘aali atu ‘iā Iesu mālō uma o le lalolagi ma o latou matagofie. 9‘Ua fai atu le tiapolo, “ ‘Ou te foa‘iina atu ‘iā te oe nei mea uma, pe ‘āfai ‘e te fa‘apa‘ū ma ifo mai ‘iā te a‘u.”
10A ‘ua tali atu Iesu ‘iā te ia, “Alu ‘ese ia oe Satani; auā ‘ua tusia, ‘ ‘E te ifo atu i le Ali‘i lou Atua, ‘ua na o ia lava ‘e te ‘au‘auna i ai.’ ”#Teu 6.13
11‘Ona alu ‘ese lea o le tiapolo, a ‘ua ō mai agelu ma ‘au‘auna mai ‘iā Iesu.
O le Amataga o le Galuega a Iesu i Kalilaia
(Mare 1.14-15; Luka 4.14-15)
12‘Ua fa‘afofoga Iesu ‘ua tu‘uina Ioane i le falepuipui, ‘ona maliu atu lea o ia i Kalilaia. 13‘Ua tu‘ua e ia Nasareta, ‘ae maliu atu ma nofo mau i Kapanaumi. O le tasi lenei o nu‘u e tu i tafatafa o le vaituloto, i le tuā‘oi o Sepulona ma Nafatali; 14‘ina ‘ia taunu‘u ai le valo‘aga a le perofeta o Isaia, ‘ua fa‘apea mai:
15“Le nu‘u e o Sepulona ma le nu‘u o Nafatali,#Isai 9.1-2
o nu‘u ia o lo‘o i le ala e aga‘i atu i le vai,
i tala atu o le Ioritana, o Kalilaia o Nu‘u ‘ese!
16O tagata sa nonofo i le nu‘u o le pogisā tele,
‘ua va‘aia e i latou le malamalama tele,
o i latou fo‘i sa nonofo i le nu‘u o le ata o le oti,
‘ua susulu mai i ai le malamalama.”
17Talu mai i lea aso ‘ua amata loa ‘ona lauga atu Iesu, ma fai atu, “Inā salamō ia, auā ‘ua latalata mai le Mālō o le lagi.”
‘Ua Vala‘auina e Iesu Tagata Fai Faiva e To‘afa
(Mare 1.16-20; Luka 5.1-11)
18O le isi aso na maliu ane ai Iesu i tafatafa o le Vaituloto o Kalilaia, ‘ona silafia ai lea e ia le uso e to‘alua, o Simona (o Peteru le isi ona igoa) ma lona uso o Anetere‘a. Sa fagogota i lā‘ua i le vai, auā o i lā‘ua o tagata fai faiva. 19‘Ua vala‘au atu Iesu ‘iā te i lā‘ua, “O mai tatou ō. O le a ‘ou ‘avea ‘oulua ma fai faiva i tagata.” 20‘Ona tu‘ua loa lea e i lā‘ua o la ‘upega, ‘ae mulimuli atu ‘iā te ia.
21E le‘i leva ‘ona savavali atu i latou, ‘ae toe silafia atu fo‘i e Iesu le isi uso e to‘alua, o Iakopo ma Ioane, o atali‘i o Sepetaio. Sa fa‘atasi i latou ma Sepetaio lo la tamā i le va‘a, o lo‘o tau fōnofōno o latou ‘upega. ‘Ua vala‘auina i lā‘ua e Iesu, 22‘ona tu‘ua loa lea e i lā‘ua lo latou va‘a ma lo la tamā, ‘ae o ma Iesu.
‘Ua Tāla‘i atu e Iesu le Tala Lelei ma Fa‘amālōlō Ma‘i
(Luka 6.17-19)
23Sa ta‘amilo Iesu i Kalilaia ‘atoa ma a‘oa‘o atu i o latou sunako, ma tāla‘i atu ai le Tala lelei o le Mālō. Na fa‘amālōlōina fo‘i e ia ma‘i ‘ese‘ese i nu‘u uma. 24‘Ua salalau atu le tala ‘iā te ia i Suria uma. ‘Ona aumai lea ‘iā te ia o tagata sa maua i ma‘i ‘ese‘ese: o tagata uluitinoina e temoni ma ē e ma‘i māliu, o ē e pipili ma ē e tino gagase. ‘Ona fa‘amālōlōina lea e ia o i latou uma. 25‘Ona mulimuli atu lea ‘iā te ia o tagata e to‘atele mai Kalilaia, ma Tekapoli#4.25 Tekapoli: O ‘a‘ai ia e sefulu, i le itū i sasa‘e o Ioritana. ma Ierusalema, ma Iutaia, ‘atoa ma tala atu o le Ioritana.
Currently Selected:
Mataio 4: SCNT
Highlight
Share
Copy
Want to have your highlights saved across all your devices? Sign up or sign in
Samoan Contemporary New Testament © Bible Society of the South Pacific, 2009.