Gha ta Wəshi 22

Abraham kadzeghe melɛ le Izak

1Kwetere wəmbəa wəshi nyighɛ, pa Shala dzeghakɛ yɛ ta Abraham, ma ke shɛ: «Abraham!» Ma ke Abraham zhɛnete nda: «Wa nya 'ya nya!» 2Ma ke Shala: «Kelete Izak, wəzege kwetɛa ŋa nya ɗe na. Kwiɗi kadzete hɛɗia Moriya, tagha ne, dzeghekɛ ɗa melɛ le, pelɛ ghweme nya tencɛ ŋa 'ya!» 3Pelɛhetɛme Abraham mbanyɛ ŋkwa, mɓɛke ŋkɛ hwepate wəshi te kwara ta ŋkɛ, pa ŋkɛ hekakɛ ka mene slene ta ŋkɛ bake ba'a wəzege ta ŋkɛ Izak. Pa ŋkɛ peraweve sheghwə mbe kezha dzeghe melɛ, cape ŋkɛ kadzete ŋkwa nya gezete nda Shala. 4Te kwa maheke ta hɛ ne, pa Abraham kafete ghə ba'a nakɛ ŋkwa shɛ mba ŋkɛ cakeɗake. 5Ma ke Abraham sha mbeli nyi kemene nda slene: «Nza ŋayɛ mə teke le kwara. Ma 'ya le wəzege nya ne, katedzeme n'yɛ vaŋe pelɛke kahawe va Shala, kwa sebe ta ŋkɛ, katezhɛne geva n'yɛ kase sha gheyɛ!»

6Pa Abraham kelete sheghwə kezha dzeghe melɛ, pa ŋkɛ veyi nda kwa ghə ke wəzege ta ŋkɛ Izak. Ma gheŋkɛ le ŋa ŋkɛ, pa ŋkɛ kelete ghwə mbe dzeve le hwa, cape hɛ bake nci. 7Ma ke Izak sha yitenyɛ Abraham: «Yita yawe!» Ma ke zhɛnete: «Wa nya 'ya nya wəzege ta ɗa!» Ma ke Izak: «Ghwə ba'a sheghwə ya va gheɓə, ama tema zhɛgwəa təmə kezha dzeghe melɛ wa?» 8Ma ke Abraham zhɛnete: «Shala nde tesepa zhɛgwəa təmə kedzeghe melɛ, wəzege ta ɗa!»

Cape hɛ zlaɓe yitea dzeghwa ta nci. 9Ma kwa ntsehe hɛ te ŋkwa nya ncɛte nda Shala ne, pa Abraham pate reghwetɛ ba'a betate sheghwə te. Pa ŋkɛ hwepete wəzege ta ŋkɛ Izak ba'a vate ŋkɛ te sheghwə nyi te reghwetɛ. 10Pa Abraham hate dzeve kakele hwa kezha sla ghə te wəzege ta ŋkɛ. 11Ama pa nde ghwene ta Mahwətə hekakɛ ŋkɛ sawa pelɛ ghweme, ma ke shɛ: «Abraham, Abraham!» Ma ke zhɛnete: «Wa nya 'ya nya!» 12Ma ke nde ghwene ta Mahwətə shɛ: «Dɛapema dzeve na te wəzege nyagha ma! Mene nda ma wəsə kwa ndiremi na ma! Nahe 'ya keɗepe tsetsenya kahawe na va Shala: kefɛake ɗa wəzege kwetɛa ŋa na we!»

13Pa Abraham kafete ghə, newe ke sha ŋkwa ne, dəkwə ŋkɛ te game nya nza tereme ta ŋkɛ kekelawe kelawe hwa gezlere. Pa ŋkɛ lə kakeseve gamea shɛ ba'a dzeghekɛ melɛ le te ŋkwa wəzege ta ŋkɛ. 14Pa Abraham hekate nda slə ke ŋkwa shɛ “KaMahwətə nde tesepa”. Vatse geze mbeli pa ɓeshi: «Pelɛ ghəa ghweme ne, Mahwətə nde tesepa!»

15Pa nde ghwene ta Mahwətə hekakɛ Abraham sawa pelɛ ghweme kakwa bake zhigə, 16ma ke shɛ: «Wa nya ghena nya geze Mahwətə nya: Kazeme fela 'ya le sləa ɗa. Ma kwa menete na kala nya, kwa ɗema na kefɛake ɗa wəzege kwetɛa ŋa ne, 17katewəpi ŋa 'ya, kwele kwele tembake hwelefefia ŋa 'ya kala saseregwa nyi pelɛ ghweme keɗema kala ndaleghe nyi kwa hələ. Katefəhwe yɛ meleme hwelefefia ŋa va ka jaga ta nci. 18Laka ghenci tewəpi geva pɛtɛa hwelefefi nyi te hɛɗi lema, kwa nza nde nahe na keyɛte ghena ta ɗa.» 19Pa Abraham zhɛneghe geva kalə sha ka mene slene ta ŋkɛ. Cape hɛ kwa hweŋkwa zlaɓe kadzembe Bɛrshɛba nya nza Abraham mbe.

20Ma kwa sebe ta wəshi nyi kemenete geva nyi, ma ke mbeli sha Abraham: «Nahe Milka keyake nda ŋwale tezhili ke wəza meyɛ ŋa Nahor perə: 21Əws ya katezhɛa wəzege, Bəwz, wəza meghekɛ, Keməwɛl, yitenyɛa Aram, 22Kɛsɛd, Hazo, Pildash, Yidlaf ba'a Betəwɛl.» 23Nyi ya kaŋwale tezhili nyi yake nda Milka deghese ke Nahor, wəza meghekɛa Abraham. Ma Betəwɛl ne, yitenyɛa Rɛbɛka ŋkɛ. 24Nahe kwete male meghwa kese yitea Nahor, Rɛwəma sləa nta. Ghenta perə ne, nahe nde keyake ŋwale: Tɛba, Gaham, Tahash ba'a Ma'aka.

Currently Selected:

Gha ta Wəshi 22: BEK12

Highlight

Copy