Mattayo 9
9
Yeesu ghoahaap siida abittu damealga
(Mark 2:1-12; Luk 5:17-26)
1Gwading'da maleambooda ak ghoaghawa basooda ak ghwahitta mujiineeda nyaawa. 2Hean geeyeassa siida abittu damealga nea geeyeanna badayda bulaliida, hean daa Yeesu masaweega nyaawa, gwayeeshsha siitta abittu damealgean, “Nung' gahoosan guroroodaang'u Balleandeanyu; sisamsa riing'eegaagu.” 3Hean gwayi ng'oorshoodiga mwaatkwa aba jeesinga nyaawa, “Siisi goong'eawi Aseetta.” 4Gwajeeng'u Yeesu gidabaloolda saawa aba jeesinga nyaawa, ak gwayeeshsha, “Ghwasaan anda goobalooli ng'asheega munyas aba jeesingeagwa? 5Awussus anneeda gideaba geeyi, ‘Sisamseey riing'eegaagu,’ ghana eeyi, ‘Ng'eada ak guwi?’ 6Geagasayi anala gideaba, Balleanda Siida gwandeawa gheambalmeeda aba badayda ng'eanyiida jea gwasamsiina ring'eega;” ak gwayeeshsha siitta abittu damealgean, “Ng'eada, sareana muundaang'u ak guwi ghoah.” 7Ghang'eat siidida ak gawa gheannyi. 8Daa emeeda siidida ghang'ut muuwda ak ghoaghaambiit Aseetta ghayi adaw buuneeda gheambalmeeda sunuun.
Yeesu gaguursa Mattayo
(Mark 2:13-17; Luk 5:27-32)
9Damanda ng'attaawa Yeesu aba hoowa ghwadaa siisi suguura Mattayo nea gwanda jeeda ghoriida sing'ng'oonnya gwaadi; gwayeeshsha, “Eanni geeshteanyu.” Ghang'eat ak ghwaat geeshta. 10Iiduw nea goopteada aba ghoah damanda agiischooda, deagheatta ghwahidu Fuga saang'a ang'ng'oonyi gwaadi, ea fuga riing'eega ama hidu goobiitpiit sea Yeesu ea ginealshoodigaaschi. 11Daa Farisayajeega, gwayeeshsha giinealangaaschi, “Anda giinealshoochcheandeang'wa goombuuchchi fuga ang'ng'oonyi gwaadi ea fuga riing'eega?” 12Iiy niny gwayeeshsha, “Fuga majeekcheewi magaseadayyi bwanamwaganga, geaghus fuga miyeani. 13Asi aweayeena ak ghoanaali geat ng'asheesu, ‘Geagasayi baydeayda nea mii haleanjeeda sisappa geadi bea ghadoweeda.’ Aba gideaba mwaawuni daguursa fuga doobiiweadi, ghawunnyi daguursa gea mideawa riing'eega.”
Iitta raditta jalooda
(Mark 2:18-22; Luk 5:33-39)
14Hean gaweay heeda Yeesu Giinealanga Yohaana ak gwayeeshsha, “Ghwasaan anda aseasa ea Farisaayajeega geeradayi jalooda, nea giinealangaagu ea maratta jalooda?” 15Ghwasha Yeesu nea gwayeeshsha, “Fuga suguursa nyeangiida ghoammu gaguuttu heareega nea gwandeawa siida geeshi? Gwanda askwearjoojiga jea ghwahidu jea egeandeawa siida geeshshi jeennyaawa, aba damani gayghwarat jalooda. 16Manda siida jea ghawaasa weasteesh hang'da waas. Aba gideaba weasteesh gayghabwaash hang'dida waasiin ak abeeda gayghoahaada seawadeeda. 17Eara buuneeda mayiinna difaayeeda miighwaheas jeeda ghadeatka woosi; iisihindunu gaygwanyara ghadeatka, ak gaweay difaayeeda, ak gameewa ghadeatka; buuneeda gwayiina difaayeeda miighwaheas jeeda ghadeatka eashish ak gabaseayu sean.”
Huda siida haw ea Gatmooni waas weleeda Yeesu
(Mark 5:21-43; Luk 8:40-56)
18Damandida rukuna ng'asheesuun, ghwahidu siisi haw bea emeeda Yahuudi ak gwatkuyi aba madeadaannyi ak gwayeeshsha, “Nimi hudeanyu ghamneawa. Beenni eweaya iina geattindaagu uhuudaannyi ak gaygwaduudu.” 19Ghang'eat Yeesu ea giinealangaaschi ak ghwaat geeshta. 20Ng'atta ghwaan Gatmoonagi beardooschi miyeanda areami foojeanda gweannyeew damaniiyyeenya gweadu geeshta ak ghawaasa weeleeda hang'daannyi; 21aba gideaba gwayi aba jeadaannyi, “Iyaawaaschi weeleeda hang'daannyi gaydahaap.” 22Ghwasach ghaat Yeesu ak ghwadaa ak gwayeeshsha, “Hudeanyu hoosana nihapnyi masaweega imwaschaan.” Ghahaap gatmoodida aba damandida. 23Ng'atta gawa Yeesu jeedeaba gheetta bea sugoochcheandean. Hean ghwadaa emeeda saang'a mida gea ayyeawda nea gaguttu heareega, 24gwayeeshsha, “Ang'amwana hiji, aba gideaba huda miighami gabeachchi ruweanga.” Geebarra rear. 25Iiduw nea siing'ng'aamwa buuneeda hoowa, gawa Yeesu jeeda ghoriida ak ghoang'ng'waay geattinda huda ama ng'atta ghang'eat. 26Gageawiit iitteaba ng'asheanji aba jeedeaba ng'eanyiitta seaniin.
Yeesu ghoahaap fii iyyeenya ng'oawwi
27Ghabeawa Yeesu hoowa nea damandida beawaan, ghwaat geeshta fii iyyeenya ng'oawwi, nea goojuur nea gwayeeshsha, “Balleanda Dawdi eaniyean bwaydaneasa.” 28Weah Yeesu jeeda gheeda gamaseaw fugiga assiyyeenya ng'oawwin ak ghoanyash gideaba “Ghoamwaschi gideaba ghammuuschi dahabeagwa?” Ghwasha saawa nea gwayeeshsha, “Geamwaschi Ng'uttamiida.” 29Hean ghawaas gheanyanga nyaawa nea gwayeeshsha, “Aba gitteenna masaweegeagwa gagasa anyasa.” 30Ghwajaada gheanyanga nyaawa. Ama ng'atta gwareekusa Yeesu nea ghoang'waniit, nea gwayeeshsha “Adiiduw goorukwsi eara sih ng'asheanji.” 31Ghang'eatng'eat Saawa gaweay ak ghoabwaash iitta Yeesu fugeaba ng'eanyiitta seaniin.
Yeesu ghoahaap siida manda ghuutta
32Ak gwayeeshsha, “Aweayeena” Hean gwaritteaysa ak gaweay jeeda ukkurmajeega. 33Hean siirruutta meangeenda gabalool siidida. Ghaham ng'eanyi eemeeda nea gwayi, “Ng'asheanda sunu miyeadaaha aba jeeda ng'eanyiida Israeeli.” 34Nea Farisayajeega saawa gwayeena, “Gooruutta meangeenda aba uurda dea haweewa meangeenda.”
Yeesu ghabwayda buuneeda
35Gwaneayeewa Yeesu jeeda mujiinajeega sean ea gharang'weakka nea goonealshi aba jeesinga ghoorajeega nyaawa siinnealshachcheewa ikkaanyaawa nea gwarukkwiida Giijasta miy bea sugoochcheandumeeda, nea ghoahaap geeyoonung'weakka sean ea gili nyoo ea sawanadeeda. 36Hean daa emeetuw nea gabadageat ghabwayda aba jeedaannyi aba gideaba ghwadaa gwatemban gawuurji gisilga nyaah jeagischoochchean. 37Ghwalamda ak gwayeeshsha giinealangaaschi, “Booga asaang'a, ak eang'ay fuga gadiyeeda; 38asi amwoasha Ng'uttamiida bea booga goojeagu fuga gadiyeeda ghapka ghwalachchi boagaaschi.”
Currently Selected:
Mattayo 9: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
