Mattayo 7

Girgweaksiinda buuneeda

(Luk 6:37-38, 41-42)

1“Adoorgweakkiisi buuneeda gajiiduw eara agooga geergweakseegwa. 2Aba gideaba gidoorgweakkisiindi buuneeda, abeeda gajeergweaksiinduneegwa agooga, ak gidoottenniidi agooga eara agooga gajeetteeneegwa. 3Anda ak ging'weersi hararooyeanda mida gheang'da oorjeeda geamadu, nea ming'weersiini geetta mida gheang'daang'u ang'iing'i? 4Ghana gajammusa eshshiindaan oorjeeda geamadu, ‘Nung'u dageanu hararooyeanda mida ghang'daang'u,’ nea ghana gwanda jeeda gheang'daang'u ang'iing'i geetta? 5Ea siida ammiittu geaw, nyoo ghannyi asheeda geanda geetta mida jeeda gheang'daang'u, ak abeeda gajammuusa geanni hararooyeanda mida gheang'da oorjeeda geamadu. 6Adoattawji gudajeega haleanjeeda ghaydidi, ghana ahisana ukkurumajeega booshkeagwa ak ghwadattas, gajiiduw gwayamseegwa geat ak ghwageagwa.”

Muusa, gassa, guurdeawana dooshta

(Luk 11:9-13)

7“Amusa, ak gajeegooneegwa, agassa ak gajanyasa, aguurdeawana dooshta ak gajeejeasseegwa. 8Aba gideaba siida nyoo gamusiischi gajeattaw, ama siida gasiischi gayghwanyas, nea siida guurdeawa dooshta gajeejeassa. 9Heappi gajea ng'eaha aba jeedeang'wa, jea gamus balleandaannyi mukkatte, ak ghwoadaw lagheaneeda? 10Ghana iimus ghweayeanda, jea ghwoadaw ichchibooda? 11Abeeda iyoanalli agoogeeda munyas gideaba gajoattawa diibigeagwa haleanjeeda miyaas, ea mayghwaraanya muuchchi Ghweandeang'wa mida humng'eeda ak ghoadaw gea miyaas fukka ikkaaschi musiini! 12Haleanjeeda sean ogasayi gideaba gaygwasinneegwa buuneeda, eara agooga asissiina saawa, aba gideaba nii ng'asheanda was deaweeda ea sibanga.”

Gidaghuutta mwariis

(Luk 13:24)

13“Aweayeena ghoah nea goosku gidaghuutta mwariis; aba gideaba gidaghuut aabwara nea naweeda aabwara dea jea gahutteawweegwa ak asaang'a fuga jea gwasik gidaghudeani. 14Gidaghuut amwariis nea naweeda amwariis dea jea gagal ghuhooda, ak gajea ng'ay fuga jea ghwadaah.”

Geetta ea haghweagaaschi

(Luk 6:43-44)

15“Ashageada sibanga ng'uyyeega fuga iissa ghapka heedeang'wa nea niikwa eagweega gisilga, nea aba jih ea suyeekka ng'weani. 16Gajanala aba haghweega nyaawa. Buuneeda ghoammu gabinna haghweega sabiibu geetta halaghweenga ghana haghweega shaboogheechcheanda heeda ng'eamga?”

17“Gwasunu eara geetta miy gwajiila haghweega miyaas, nea geetta muy gwajiila haghweega munyas. 18Geetta miy mwoammu gwaji haghweega munyas, nea geetta muy amwoammu gwaji haghweega miyaas. 19Gili nyoo ea geetta iimaji haghweega miyaas gajealach ak geejaksa jeeda beasta. 20Asi gajanalana haghweega nyaawa.”

Aniini moang'wa danaleagwa

(Luk 13:25-27)

21“Mii giliwas sih ennisean, ‘Ng'uttamiida, Ng'uttamiida,’ jea gawa jeeda sugoochcheandumeeda humng'eeda, geaghus siida sin gidagasa Bwaabwa mida humng'eeda. 22Eaweettida gaygwayeeshshinean fuga saang'a; ‘Ng'uttamiida, Ng'uttamiida, miyearamoorana aba ghawungaagu, nea aba ghawungaagu geerruutti meangeenda, ak geesinnyi haleanjeeda saang'a deamdeameadi aba ghawungaagu?’ 23Abeeda gaydayeeshsha saawa, ‘Aniini moang'wa danaleagwa eara hay, ang'amwana heedeanyu, agoogeeda sina ng'asheega munyas.’

Fii iyyeenya deekshi

(Luk 6:47-49)

24“Asi siida wassean nyoo ghwayiiy ng'asheegeasu ak gwasin, gajeegala weaghoochcheanda fughareeda, deeksa gheannyi uhuuda harearacheanda; 25Ghwaroabwan roopta, ak ghwahidu guldeayda, ghwahidu jeammeda ak ghwalas gheedida, ak ea mwoabeada, aba gideaba sindeettannyi geedeeksa uhuuda harearachcheanda. 26Ama siida was sean iiy ng'asheesu ikkeasuun ak ea masna, gajeegala siida dasha, ghayi deeksa gheannyi uhuuda iseaskweanda; 27ghwaroabwan, ak ghwahidu guldeayda, ghwahidu jeammeeda ak ghwalas gheedida, ak ghoabeada; ak gibeedeaydaannyi aahaw.”

Gheambalmeeda Yeesu

28Iiduw nea nihiit Yeesu ng'asheesu, ghahamng'eanyi emeeda aba ginealshoadannyi, 29aba gideaba goonealsheatta siida mideawa gheambalmeeda, nea mawuurji eara ng'oorshoodiga nyaawa.

Currently Selected:

Mattayo 7: DTGANT09

Highlight

Copy