Mattayo 19
19
Yeesu gwargi iitta nung'wiischooda
(Mark 10:1-12)
1Iiduw nea ghoahiit Yeesu ng'asheesu ghabeawa ng'eanyiida Galilaaya ak gawa ng'eanyiida Yahuudi, gigheawda eenda Jordaani; 2ghwaat geeshta emeeda saang'a ak ghoahaap aba hoowa. 3Ghapka headaannyi Farisayajeega ak gwasimsim nea gwayeeshsha, “Heappi ghwadoabiiwi gideaba siida gayghwanung' gatmoadannyi aba gilinyoo ea ramwasaani?” 4Ghwasha nea gwayeeshsha, “Miyoassoamwana gideaba siida ghayi sineegwa ammwadi gwasin siida was ng'eedeeda ea siida was gatmooda, 5ak gwayi, ‘Aba sareani gayghwanung'wa ng'eedeeda heeda ghwaan ea ghaamwat, ak gaygwaroochchi sea gatmoadaannyi, ama ng'atta ghoaw fiisu assiyeenyean saseanagi?’ 6Fiisu abeeda ea mudea iyyeenya, niiw saseanagi. Asi fukka aguuyi Aseettean, adiiduw gooheelli siida.” 7Gwayeeshsha Saawa, “Abeeda iiduw goodaydeaysa naaha Muusa gheatta barawajeanda nung'ooda?” 8Gwayeeshsha, “Muusa ghayi ghoadayda gheatta jea eanung'wa gatmooda aba hang'ooynachcheekka guroruunatkeagwa, nea abeeda ghayi mwadi ea masunu. 9Asi geayeeshshineegwa: siida wassean jea ghwanung' gatmoadaannyi imwanung'wa aba ng'asheega hiseadayeandumeeda, akghaghi nuut, gamealuuli.” 10Gwayeeshsha giinealangaaschi, “Ng'asheega siida ea gatmoadaannyi iisunu, ghang'wana ea meegeeshshi.” 11Hean gwayeeshsha saawa, mwoammu buuneessean ghoang'ng'waay ng'asheanji, geaghus fukka adaw Aseettean. 12Aba gideaba gwanda gulanga siji nea gwasnu ghang'eada jeesinga gheamadiga nyaawa, ak gwanda gulanga nung' buuneeda ghoaw gulanga, ak gwanda gulanga sin geat gulanga aba sugoochcheandumeeda humng'eeda. Dea ammu ghoang'ng'waay ng'asheanji, ea dang'ng'waanya.
Yeesu gang'ushsha diibiga manang'i
(Mark 10:13-16; Luk 18:15-17)
13Muchchu geeyeassa diibiga manang'i ghwayiin geattingaaschi iheenga diibiga ak ghamwaash ghawooda appadahuukka nyaawa. Iiduw goojuursa giinealanga; 14gwayeeshsha Yeesu, “Anung'waada diibiga manang'i ghapka heedeanyu, adoakghuumnyi; aba gideaba fuga uurji suu sugoochcheandumeeda humng'eeda daanyaawa.” 15Ghwayiin gattingaschi iheenga nyaawa, ak ghabeawa ng'eanyiitta.
Ghearemaneeda was meanang'oochcheanda
(Mark 10:17-31; Luk 18:18-30)
16Hean gabeessa Siyagi ak gwayeeshsha, “Giinealshoochcheanda, gaydasin ana ng'ashaan miy ijadanyas eaweega manda mudeanooda?” 17Ak gwayeeshsha niny, “Ghwasaan anda ginyaashchaan iitta miyinda? Siida miy aa agi, ama iigasayi una jeeda eaweega, ging'ng'waannyi digheannyeekka.” 18Gwayeeshsha niny, “Akkeega?” Gwayeeshshsha Yeesu, “Adinuusi siida, adimealuuli, adijagwadischi, adinapiisi siida ng'uyeega. 19Sissiina mureeda gweanu ea geamadu, ak gibwariiydi gischeewoochchaandaang'u gidubwariiydi geaw.” 20Gwayeeshsha gheareemaneedida, ng'asheesu seaniin nigeawiit dang'ng'waay; abeeda gudu ghwashoadeawan naaha gichcha? 21Gwayeeshsha Yeesu niny, “Iigasayi huuwa siida hidaat, guwi ak gishaaydi haleanjeadaang'u indeawi, ak giidawi fuga barbari, ak abeeda gaymideawana gheaseeda aba humng'eeda, ama ng'atta guwuni eanni geeshteanyu.” 22Iiy Ghearemaneedida ng'asheanji ghang'eat gawa nea gagiisan, aba gideaba gwandeawa haleanjeessang'a. 23Gwayeeshsha Yeesu giinealangaaschi, “Aba huumwa geayeeshshinegwa gajahang'waay beatta jea gawa meanang'oochcheanda jeeda sugoochcheandumeeda humng'eeda. 24Nuut gichcha geayeeshshineegwa, gajawussis muuchchi gideaba gaygwasik diyeayda suguura nngamiya seawadeeda sidageeda ea eamawuurji gideaba gaygawa meanang'oochcheanda jeeda sugoochcheandumeeda Aseetta.”
25Iiy Giinealanga ghahamng'eanyi muuchchi nea gwayi, “Abeeda iisun gayghoammu ghwalaalaan ng'eaha?” 26Goong'weersa Yeesu ak gwayeeshsha, “Ng'asheanji aba buuneeda ahang'waay, ak aba heeda Aseetta aawusis.” 27Deagheatta ghwasha Betro nea gwayeeshsha, “Ang'wearda, aseasa sinung'wi heeda haleanjeessean ak geeyeadu geashtaang'u. Abeeda gajeanyasa naha?” 28Gwayeeshsha Yeesu saawa, “Aba huumwa, geayeeshshineegwa, agoogeeda oyeadu geeshteanyu aba ng'eanyiideesh, jea ghwahidu eaweeda jea goopteadawa Balleanda Siida hoorgeadaannyi ghambiidaat, abeeda earagooga gajooppiidana hoorgajeekka attamaniyyeenyean ak goorgweaksi eemoojikka attamaniyyeenya bea Israeeliin. 29Nea giliwas sih nung'usa heeda gheeda ghana oorjeeda ghaamwat ghana haweega ghaamwat ghana ghwaan ghana ghamwaat ghana diibiga ghana madameega, appadayda gheawungeasu, gayghwanyas niba bughala ak gwahearan eaweega manda mudeanooda. 30Ak gea saang'a mida mwadi gayghoaw gea huuydean, nea gea huuydean gayghoow gea madeeda.”
Currently Selected:
Mattayo 19: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
