Mattayo 11
11
Fuga ajeagu Yohaaneeda Abattiisachchi
(Luk 7:18-35)
1Iing'atta gidawda adadaw Yeesu giinealangaaschi attamaniyyeenya iittaannyi, ghabeawa hoowa ak gawa goonealshi aba jeeda mujiinajeega nyaawa nea gwarukkwiida Giijasta miy.
2Iiduw nea ghwayiiy Yohaaneeda Abaattiisachchi iitta gissina Yeesu nea gwanda ghealooniga, hean goojeakta giinealangaaschi ghoanyaash 3nea gwayeeshsha, “Assang'iingi guwosi siida ghayi jea ghwahidu ghana jea eefurda nuut?” 4Ghwasha Yeesu ak gwayeeshsha saawa, “Aweayeena ak goorukusi Yohaana iitta ng'asheega oayiinyi ea gea oadaayi: 5fuga ng'oawwi ghoang'wearda, fuga badeeda gaweelweel, gea bearji udamusuura geammidu, gea miinyi gwayiing'shi, fuga meewa gwaduuttu nea fuga barbari geerukusa Giijasta Miy. 6Nea ghang'wana siida mwasta gil appadaydeanyu.”
7Ngeatng'eat gabiikta, gwarukusa Yeesu emeeda ghwanyawa badageat iitta Yohaana, “Gooweayi adaaha naaha aba dareapcheeda? Nyeeshtooda ayuuk jeammeeda? 8Abeeda gooweayi adaaha naaha? Siida akkwa hang'weakka oormajeega? Ng'ulla fuga akkweali hang'weakka oormajeega goobiitta gealga sugoodiga. 9Abeeda ghwasaan andagooritti? Gooweayi adaaha naaha? Sibaneeda? Eah, geayeeshshiineegwa eara daahaweewa sibaneeda. 10Nii siida sung'oorsa ng'asheesuun gil,
‘Ng'ulla aniini geajeagu giijasoochcheandeanyu
madeeda gheanyangaang'u,
jea gwasinneey naweadang'u aba madeadaang'u.’
11Aba huumwa geayeeshshineegwa, manda siida wassean aba gea jii gadeemga dea haweewa Yohaaneeda Abattiisachchi eara siitta siyi amwanang'eawa sean aba jeeda sugoochcheandumeeda humng'eedean ahaweewa niny. 12Ghang'eada askwearjoojiga Yohaaneeda Abattiisachchi ea gagul ghamneawa sugoochcheandumeeda humng'eeda subwasay, nea fuga bwasay gageanda aba uurda. 13Aba gideaba ghang'eada sibanga ea deaweeda gwaramoorani eaghwahitta damanda Yohaana; 14nea iyoagasayi amwasa niny ea Eliyayda jea ghwaani. 15Siida mideawa iidiga ea dayiing'shi! 16Asi gaydagala naaha seaygeani? Gawuurji diibiga mida naada, guuriisa suurja nea gwayeenniisa, 17‘Geang'waschi, ak ea mwoang'wasi; geeyyeawdi, ak ea mooyyeawdani.’ 18Aba gideaba ghwahidu Yohaana ak ea meagiischi nea mwali gil, ak gwayi, ‘Gwandeawa meangeenda;’ 19ghwahidu Balleanda Siida ak gweagiischi nea gwaleeshi, ak gwayi, ‘Ng'ulla, nii aadeaw nea boogideati, nea gwaduupchi fuga ang'ng'oonyi gwaadi ea fuga riing'eega!’ Amaduw weaghumeeda ea nidaajiit aba sinaweagaaschi.”
Mujiinajeega mandeawana masaweega
(Luk 10:13-15)
20Iimuchchu goojuursa mujiinajeegiga ghayi sissa niny ng'asheega deamdeameadi ak ea madukkuunana riing'eega nyawaan. 21“Eamuy deang'wa Gurasiini! Eamuy deang'wa Betsayda! Aba gideaba ng'asheakka ghayi deamdeameadi sisissa jeadeang'wean, inyeada ghayi geasissa mujiineada Diro ea Sidooni, gajeenigeawiit gwadukkuuna ng'asheaga munyas ak ghwayeashta deareada nea gookkwa guniyajeaga. 22Asi geayeeshshineagwa, gajeawussus gideaba gayghamilikghta ghoorjooda nyaawa Diro ea Sidooni ea ghwalaabwaneegwa hoowa. 23Eara angiing'i Gapernaumu, gajeettiing'neey ea gula humng'eeda? Gajeahing'neayi ea una jeeda maloonghajeega. Aba gideaba inyeada ghayi ng'asheaga deamdeameadi sisin aba ng'eang'deang'wa geesissa mujiineeda Sodooma, gwachchi mujiineetta gajeagudugwanda ea gagul ghamneawa. 24Ak gaydayeeshshineegwa, eaweetta girgweaksinda gaynyasa ang'iing'i ghorjooda haw adaraam dea Sodooma.”
Apkaani heedeanyu ak gofuufchi
(Luk 10:21-22)
25Aba damandida gwayi Yeesu, “Geabadiischoweey ea Bwaabwa was Ng'uttamiida humng'eeda ea ng'eanyiida, aba gideaba gufnyi ng'asheesu fuga weaghoodi ea fuga mideawa fughareenga akkihiimsi diibiga manang'i; 26ea Bwaabwa nii gweagu gideaba gidubwariiydi, ang'iing'i gil. 27Nugoonan Bwaabwa haleanjeessean. Manda siida nal Balleanda geaghus Ghweanda, ghana siida nal Bwaabwa geaghus Balleanda ghana siida wassean gasa Balleanda goohiimsa. 28Apkaani heedeanyu oagasean agoogeeda deawiit nea ghabwanyeagwa sareenda, ak gaydeafuufeegwa. 29Aghasana geat jookkeedeanyu, ak ghoanalanaan ng'asheega; aba gideaba aniini geewoschi ng'eeni nea geayeadayi geaw ng'eanyi aba guroroodeanyu, ak abeeda gajanyasa hoseaneega aba jeesingeagwa.”
30“Aba gideaba jookkeedeanyu ea bumbun nea sareendeanyu aassas!”
Currently Selected:
Mattayo 11: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
