Lukka 9

Yeesu gojeakta ginealan damaniyyeenya

(Mat 10:5-15; Mark 6:7-13)

1Hean gaguursa ginealangaaschi attamaniyyeenya ak ghoadaw uurda ea gheambalmeeda jea goobala meangeenda sean ea giheapta geyoonung'weakka, 2Goojeakta gaweay gwarukkwiida sugoochcheandumeeda Aseetta, nea ghoahaap fuga miyeani. 3Gwayeeshsha saawa, “Adoayaadi geadi gil iyoweayi bareannyeekka, eara haleanjeeda, ghana shageeda, ghana mukkatte, ghana lappiya ak ea adolassi hang'weakka iyyeenya. 4Gheeda jea ahitta wassean, oppiidana, ea eaghus ea noang'ami ng'eang'da nyaawa. 5Nea iyoahitti heeda meegasseegwa, iyooritteawi mujiineedida ghoalalakti birjeanda mida geeshangeagwa ak gayghoaw muwwunooda appadahuukka nyaawa.” 6Hean ghang'eatng'eat gaweay gharang'weakka gwarukkwiida Giijasta Miy nea ghoahaap fuga miyean aba hiji nyoo ghwahitta.

Heroode moapta ng'eanyi

(Mat 14:1-12; Mark 6:14-29)

7Hean iiyiy sugoochcheanda was Heroode iitta ng'asheega sean sisin, hean gwahirbaban, aba gideaba gwayi fuga mwaatkwa sittuuna Yohaana jeeda miyeeda, 8nea mwatkwa gwayeena niihiimu geaw Eliya, nea suuk gwayeena niduudu sibaneeda bea gea ghayi bea garayi. 9Nea Herode niny gwayeena, “Yohaana ghayi nalaji gheatta; nii ghamneawa gajea ng'eaha eaying'si badayda ng'asheesu seaniin?” Hean gagasa ghwadaah.

Yeesu ghoang'aatta fii sagalamnyooji muut

(Mat 13:21; Mark 6:30-44; Yoh 6:1-14)

10Muchchu ea nibiigu Giijasoodigaaschi gwarukusa iitta ginnisin. Ghwaat saawa ea ghwahitta mujiineeda suguura Betsayda. 11Iiduw nea gwajeeng'u emeetuw, geayaat geeshta; ama sihitta ghwadeapta saawa ak goobaloola iitta sugoochcheandumeeda Aseetta, ak ghoahaap fuga gasa giiheapta. 12Iiduw nea niriikghta gamikta; ghapka ginealanga ak gwayeeshsha niny, “Siksiina buuneeda gaweay gharang'weakka ea jeeda ng'eanyiida gagasa gichchea ghwaak; aba gideaba hiji geendi heeda manda sih.” 13Gwayeeshsha saawa, “Oattawa agooga buuneeda gichchaghwaak.” Geeyeeshsha, “Mendeawani gil geaghus mukkataji muut ea ghweayi iyyeenya. Geaghus eweaya eashaaha hamitteaba fiisu seaniin.” 14Abeeda fiisu headiga akghwahit ea sagalamnyooji muut. Hean gwayeeshsha ginealangaaschi, “Anung' gobiitpiit nea gwasna gharmuchcheekka eatta fii haradam adamanamughuush.” 15Ak gwasinda gidarukteayda, ghwanung' goobiitpiit sean. 16Ng'atta gageanu mukkattajeekka ghwanyawa ammuudiin ea ghweayeekka ghwanyawa assiyyeenyean ak gagatgat gheanyangaaschi gogeal humng'eeda, ak gabadiischeesa ak ghabanajaada, ak ghoadaw ginealangaaschi ghoang'attaawa emeeda. 17Gweagiischi sean ea gwalang'u. Gewweamu gheaptanga banajanga ak ghwannyiit sooscheew damaniyyeenya.

Betro goodeaga geaw Yeesu

(Mat 16:13-19; Mark 8:27-29)

18Eaweechcha nea ghamwaash Aseetta nea gabwageaw, nea abeeda gwandeayi sea ginealangaaschi; hean ghoanyaash nea gwayeeshsha saawa, “Heappi buuneeda ibalool gwayeena geawoschi ng'eaha?” 19Ghwasha Saawa nea gwayeeshsha, “Gwayeena guwosi Yohaaneeda Abattiisachchi; gwayeena suurja Eliya; nea suuk gwayeena guwosi siyagi aba jeeda sibanga ghayi bea garayi nuduudu.” 20Hean gwayeeshsha saawa, “Ama agooga goyeennyi geawoschi ng'eaha?” Ghwasha Betro nea gwayeeshsha, “Ang'iing'i guwosi Gristoyda Aseetta.”

Yeesu gabaloola iitta sawanadeadaannyi ea miyeadaannyi

(Mat 16:20-28; Mark 8:30—9:1)

21Gwareekusa nea gwayeeshsha, adiidu goorukusi sih ng'asheanji, 22Gwayeeshsha, “Balleannda Siida gayghwanyas sawanadeeda ng'waan muuchchi, nea gayghaheawa gweargwa ea ashoohoodiga hees ea ng'oorshoodiga, ak gajeenuus, ak gaygwaduudu eaweetteaba samwagu.” 23Ak gwayeeshsha buneasean, “Siida wassean iigasa gweadu geeshteanyu, ea ada gwasamsa geaw, ak gageanu behiidaannyi ghwasar galagasean ak gweadu geeshteanyu. 24Aba gideaba siida wassean iigasa gwalealu eaweagaaschi gaygabeagu, nea siida hutteawi aweagaaschi aba badaydeanyu gaygwalealu. 25Siida gaygwaloossa naaha iinyas haleanjeessean bea muunda ng'eanyiida ak gahutteawi eaweegaaschi? 26Siida isinnean gheanyanga ea ng'asheegeasu, eara ninyi gaygwasissa gheanyanga Balleanda Siida, damanda jea ghwahinna aba giighaambiittaanyi ea dea Bwaabwa ea dea malaykajeega ghaydidi. 27Aba huumwa gaydarukuneegwa gideaba aba jeeni itteang'wean gwanda fuga miinaada aba hiji maygwasamu miyeeda ea eaghus anidaah sugoochcheandumeeda Aseetta.”

Yeesu ghwayamwa ormeeda

(Mat 17:1-8; Mark 9:2-8)

28Ng'atta eawooji sis nea ghoahiit baloolda gaguursa Betro ea Yohaana ea Yakkobo, hean gaweay uhuumba gijeeda ghamwaash Aseetta. 29Damani Mwasheewa Aseettean, ghwayamwa ormeeda nea eara hang'wakkaaschi gaweeriidi muuchchi ea gameeng'meeng'i. 30Hean gabalool sea fii iyyeenya, Muusa ea Eliya, 31fiisu ghwahidu nea godeana gigheambiitta ak gabaloola badayda miyeadaannyi, jea gwasa aba Yerusaleemu. 32Aba damani Betro ea oorjooga suurja ea ning'ng'waay ruweanga muuchchi, ama ng'eatng'eat ghwadaa gigheambiittaannyi ea fuga assiyyeenya miinaada sea ninyi. 33Iiduw nea gwasimsa fiisu beatta gwayeeshsha Betro Yeesu, “Siida haw ghwanyawa gahaguuw ameang'amwani hiji; anda meesni udahabeascheew samwagu aba hiji, dea mabeanyi ang'iing'i nirja gaba Muusa nea niirja gaba Eliya;” nea niny abeeda mwanala eara gidarukta. 34Damani baloolean, ghwahidu shamoghooda ak gwadukuta; ghabeal iidaa nea gwadukuta shamooghooda. 35Ghwanya ghuutta nyaasha jeeda shamoghooda, nea gwayi, “Nii Balleandeanyu aloachchi, olleeysiiniit niny.” 36Ng'atta nyeashi, geadaah Yeesu akghwahit. Hean ghwasiinda ak ea meruksina sii aba eawoojikka ng'asheega daa.

Yeesu ghoahaap balleanda bearji meangeenda

(Mat 17:14-18; Mark 9:14-27)

37Muchchu nea ghwararang'aana uhuuda gijeeda, gwaroonnyi emeeda saang'a. 38Ng'ulla, gwarinna Sih jeeda emeeda ak goojuur nea gwayi, “Ginealshoochcheanda, geamuscheey ang'weersiina balleannji itteanyu was haghasheedean; 39ng'ulla inyeessa ibalaksa meangeenda ghwanung' goojuur, ak ghoahiil nea gwarinna ghuutta furghooda, ak gwasawan muuchchi, nea magassa gwaritteawa. 40Iyeayeeshshi ginealangaagu orruutta, ghwaraay.” 41Ghwasha Yeesu nea gwayeeshsha, “Ea fuga mandeawana masaweega was jeachcheenga rodeadi, ak gaydeabiitta heedeang'wa ea ghoaw eeju? Eanni balleanji hiji.” 42Damani wunaan, ghwanung' meang'nyeandeenda ghoabeada ak ghoahiil. Ak gojuursa Yeesu meangeenda muy, ak ghahaabwa balleandida ak ghoadaw ghwaan. 43Ghahamng'eanyi sean isiidaa uurda haw bea Aseetta.

Yeesu gabiikta gabaloola ng'asheega miyeadaannyi

(Mat 17:22-23; Mark 9:30-32)

Damani duu ghahamwang'eanyi aba haleanjeeni siniin, gwayeeshsha ginealangaaschi, 44“Anung' gaweay ng'asheesu jeesinga iidigeagwa; aba gideaba Balleanda Siida gajeayiin geattinga buuneeda.” 45Ea mwanala ng'asheanji surukusean, aba gideaba sufnya saawa, ak abeeda ea majeeng'na; ak ghoawal ghoanyaash niny iitteaba ng'asheanji.

Siida haweewa sean ng'eaha?

(Mat 18:1-5; Mark 9:33-37)

46Iiduw ghoaptu sheang'nyeeda eegasa eanal siida jea gwaheedu aba jeannyaawa. 47Hean gwajeeng'u Yeesu gidabaloola guroruunatka nyaawa, gaguursa jeebi mwanang' ak ghwayiin murdeadaanyi, 48ak gwayeeshsha saawa, “Siida deaptaawa gheawunngeasu jeepta uurji nii ghwadeaptanaan aniini, nea siida deaptanaan aniini ghwadeapta siida ghayi ajeaknean; aba gideaba siida mwanang'eewaneegwa oagasean ahaweewaneegwa oagasean.”

Siida mwahasheasa gaba meatkwedeanya

(Mark 9:38-40)

49Ghwasha Yohaana nea gwayeeshsha, “Siida haw, sidaayi siida arutta meangeenda aba ghawungaagu, ak geeyeeshshi nung'waada aba gideaba siidida mabwaheasa.” 50Gwayeeshsha Yeesu niny, “Adagudoaheawi; aba gideaba siida mwahasheasa siisi gaba meatkweedeanya.”

Fuga Samariya ghaheawa ghwadeapta Yeesu

51Iiduw nea nineekkiit eawoojiga jea ghabeawa humng'eeda hean gamanya beatta Yerusaleemu. 52Goojeakta buuneeda goosheedeawa niny, ak gaweay gharang'da Samariya, gwasissin heechchea gobiida; 53ak ghaheawa Fugeaba hoowa ghwadeapta niny, aba gideaba ghoang'ng'waay naweeda gawa Yerusaleemu. 54Daa ginealangaaschi was geaba Yakkobo ea Yohaana gwayeeshsha, “Ng'uttamiida, gigaasay eguursiina beasta jea gwaleabu humng'eeda ak gwadulu fiisu?” 55Gwayamsa geaw saawa ak gwareekusa. 56Ghang'eatng'eat gaweay gharang'da nuut.

Fuga gasa ghwaat geeshta Yeesu

(Mat 8:19-22)

57Iiduw nea gudugwanda naweeda gwayeeshsha Siih niny, “Gaydeadu geeshtaang'u aba hiji uwi sean.” 58Gwayeeshsha Yeesu niny, “Fureayoonga gwandeawa shoomeanga, nea dariidakka gwandeawa ghoorajeega nyaawa, nea Balleanda Siida ea mandeawaana eara heeda jea ghwayiin uhuudaannyi.” 59Gwayeeshsha siinuut, “Eanni geeshtteanyu.” Ak gwayeeshsha, “Ng'uttamiida, nyoo siksean ghanyi dawa dabuy ghweandeanyu.” 60Gwayeeshsha niny, “Nung'waada muscheekka gabuy muscheekka nyaawa; ak ang'iing'i, guwi rukkwiida sugoochcheandumeeda Aseetta.” 61Gwayeeshsha sii nuut, “Aniini gaydeadu geeshtaang'u, Ng'uttamiida; nea gidamadeeda ginyoo goonean gheatta dawa dahealli fugeaba gheenyu.” 62Gwayeeshsha Yeesu niny, “Manda siida jea ghoang'ng'waay mageemng'eanda ak goong'weersa bwadaw jea ghwahit aba sugoochcheandumeeda Aseetta.”

Currently Selected:

Lukka 9: DTGANT09

Highlight

Copy