Lukka 24
24
Dunnooda
(Mat 28:1-10; Mark 16:1-8; Yoh 20:1-10)
1Iimuchchu eaweeda madeeda bea wikkajeanda, nea ghaghar gayeew, gaweay heeda bung'eeda, nea ghwaat geediga ng'andidi nisin. 2Hean sihitta geadaah lagheaneedida nea sishsheagiida ghuutta shoomanda bung'eeda, 3iiduw nea gaweay jeeshshomanda bung'eeda ea mwadaaha muusta. 4Damani duuw ghahamwang'eanyi aba ng'asheanjiin, hean ghamiinaada fii iyyeenya aba murdeannyaawa nea gookwa hang'weakka meang'meang'i; 5damanda duughang'uda muuwda nea ghwahiiy geat gogeal iheenga nyaawa ng'eanyi, gwayeeshsha sih saawa, “Ghwasaan andagoogaseadayyi siida majeeck aba jeeda fuga nimeewa? 6Oapkaada gidaghayi rukuneegwa, damanda duuw gwandeewa Galilaaya, 7gideaba, Balleanda Siida gajeayiin geattinga fuga ring'eega, ak gengoor, ak gwaduudu eaweetteaba samwagu.” 8Hean geapkaat ng'asheagaaschi, 9bikna hooweanji bea bung'eedean gaweay ghoadaw iitta ginealangiga attamwanagiin ea buneessuurja. 10Nea Mariya Magdaleena gil, ea Yoana ea Mariya gheamatta Yakkobo, ea gadeemga suurja gwachchi mideawean suu fuga rukusa giijasoodiga iitteaba ng'asheesun gil; 11gawuurji ng'asheesu aba heannyaawa duguuga mwadagha, ak ghanyea meamwasa. 12Aka gawuurji ng'asheega nyaawa aba heannyaawa duguuga mwadaagha, nea ghanyea mwamwasa. Ng'atta ghang'eat Betro ak ghafwach ea ghwahitta heeda bung'eeda, ak ghwahiiy geaw gong'weersa jeeda, ghwadaa wegeakkiga sibung'dean akghwahit; hean ghang'eat gawa nea ghaham ng'eanyi aba ng'asheega bunu.
Beatta Emau
(Mark 16:12-13)
13Eaweettida gaweay fii iyyeenya aba jeannyaawa gharang'i suguura Emawu, nea sheageewa Yerusaleemu jea ghoahiitta aseetta iyyeenya hitteayda, 14gabalooleadawa iitteaba ng'asheekka nndeareetta bunuun. 15Aba damani balloleadawa nea gonyeari geadiin, gawa Yeesu ea gwaneekkiissa ak godeayi. 16Geadukuta gheanyanga nyaawa ea mwanala siida was. 17Hean gwayeeshsha saawa, “Ng'asheespa naaha obalooleadawi nea goweayiin?.” Ghaminaada nea niikkaroomnyi gheamamuunatka nyaawa. 18Ghwasha Siyagi aba jeannyaawa, suguura Gleoppa ak gwayeeshsha, “Neada ang'iing'i guwosi rabascheanda nea gubwaageawi aba Yerusaleemu mwanala ng'asheega sisiin aba hiji askwearjoojusu?” 19Hean gwayeeshsha saawa, “Ng'asheespa naaha?” Geyeeshsha niny, “Ng'asheega Yeesuuyda Nasareetti, ghayi was sibaneeda mideawa uurda sinooda ea baloolda aba madeeda Aseetta ea dea buuneessean, 20ea gidahaaktaayda ashoohoodigasa hees ea fuga ahaaghwa ng'eanyiida ak ghoadayda ergweaksiina miyeeda, ak gengoor. 21Nea abeeda aseasa geararji gideaba niny siichchea ghoaghu Israeeli gil. Gilnuut gichcha askwareani ea deaba samwagu aba ng'eetta ng'eada ng'asheesu. 22Gabiissa gwanda gadeem bea ng'eang'deanya gwachchi nung' eabeala. Weay bung'eeda sakteayda duuw 23ea mwadaaha mustaannyi; ak ghwahidu ak gwargu gideaba niroonnyi sea malaykajeanda eeshsha ea majeek. 24Eara fii suuk gichcha gwachchi sindeawi gaweay hoowa bea bung'eedean ak ghwadaakta gidagwachchi rugu gadeemgiga; nea niny ea meadaaha.” 25Ng'atta gwayeeshsha saawa, “Ea fuga dasheahi, mideawa guroruunatka hang'oonyi ak amwamwasa eara ng'asheega ghayi rugu sibanga! 26Mammisiina gideaba Gristo gayghwanyas sawanadeeda ama ng'atta gawa jeeda gigheambiittaannyi?” 27Hean ghoang'eada Muusa ea sibanga sean, ak gwarukusa saawa ng'ooruutka sean bea ng'asheega bwadaydaannyi. 28Gaweay ea gwaneekkiissa gharang'dida gwachchi weayiin. Ak gwahinda geaw giligasa ghang'atta, 29hean gemearmearani nea geeyeeshsha, “Shinya endeayeena, aba gideaba niisha Aseetta ak ea nihiidu eaweeda.” Hean gawa jeeda gheeda ak gwandeayi. 30Damandida mideayeewa aba agiischoodean gageanu mukkatte ak gang'ushsha ak ghabwanach ak ghoadaw saawa. 31Ghwajaada gheanyanga nyaawa, deagu ghwanal gideaba ninyi, ama ng'atta ghwaroada gheanyanga nyawa. 32Gonyeari geat nea gwayeena, “Neada jeesingaasa ea mwayeadana beasta damandida gwachchi abaloolaneasa aba naweedean, nea gang'achcha iitteanya aba gidaghayi nyaah ng'ooruutka?” 33Ghang'eatng'eat damandida ak gabiikta Yerusaleemu, ak ghwanyasa hoowa giikka attamwanagiin nea gwandeawa giikka eawooschu mideaydooschiin, 34nea gwayi, “Humwa gil niduudu Ng'uttamiida, geabwada nihiimsa geaw Simon!” 35Hean ghoadayda iitteaba ng'asheekka bussa aba naweedean, ea gida siyi bwak ea ghwanalda saawa gideaba ninyi damanda bwanaja mukkatte.
Yeesu gwaroonnyi sea ginealangaaschi
(Mat 28:16-20; Mark 16:14-18; Yoh 20:19-23; Gadi 1:6-8)
36Damani duuw gwandeawa jeedeaba baloliin, ghaminaada Yeesu appugusta nyaawa. 37Ghahamng'eanyi ak ghabeal muuchchi, nea ghaghay gili daa malonghajeanda. 38Gwayeeshsha saawa, “Ghwasaan anda nung'deagwa muuwda, ak ghwasaan anda goonyearayi geat ng'asheesu aba jeesingeagwa? 39Ong'ng'wersiina geattingeasu ea geeshangeasu, gideaba aniini gil; ong'ng'waanya eara saseedeanyu ak ghoadaayi; aba gideaba malonghajeanda mandeawana saseeda ea geekka gawuurji gidoadaaktanaan ghamneawa.” 40Iiduu ne ning'atta rukunoodeaba ng'sheesu gohiimsa geattingaaschi ea geeshangaaschi. 41Damani mii ghamwasa aba hooseaneegean, nea ghahamng'eanyi nea gwayeeshsha saawa, “Goondeawi gichchea ayaaga aba hiji?” 42Geattaw banajaneeda ghweayeanda sibeash. 43Gageanu ak ghwaak aba madeannyaawa.
44Hean gwayeeshsha saawa, “Suu ng'asheegeasu ghayi earukuneegwa, damanda sindeaydooscheewi, ak abeeda ng'asheega appadaydeanyu aba jeeda deaweedeeda Muusa ea sibanga ea gittaabooda Nyiigheega gajeahhiit.” 45Ng'atta ghwajaat fughareenga nyaawa ghwanal ng'ooruutka. 46Ak gwayeeshsha saawa, “Nii gidaghayi sung'waarda gil gideaba Gristo gayghwanyas hang'weanidooda ak gwaduuna miyeeda eaweetteaba samwagu, 47ea gideaba duukkuunooda ea samsiinda ring'eega gajeerukkwiida aba gheawungaaschi, aba jeeda emoojiiga sean, ghang'eada Yerusaleemu. 48Nea agooga gowoschi mushoodigeaba ng'asheesu. 49Ang'ulla, geayeaneegwa heelleeda Bwaabwa; asi oppiidana mujiineeni ea egoneegwa uurda leabu humng'eeda.”
Yeesu geayaat humng'eeda
(Mark 16:19-20; Gadi 1:9-11)
50Ghoadoabiiw ea ghoahiitta ng'eanyiida Bettaniya, ak gagatgat geattingaaschi ak gang'ushsha. 51Damani ng'ushshiinean goheelli geaw ak geettiing'da eayaat humng'eeda. 52Ama ng'atta gabiigu Yerusaleemu nea gahoosan muuchchi, 53goobiitta jeeda gheeda sibatta Aseetta nea gwaduumsheesa Aseetta.
Currently Selected:
Lukka 24: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
