Lukka 23

Yeesu aba madeeda Bilatto

(Mat 27:1-2, 11-14; Mark 15:1-5; Yoh 18:28-38)

1Ghang'eatng'eat Fukka sean bea girgweageedean ak ghwaat madeeda Bilatto. 2Geang'ng'eat giheakteayda nea geeyi, “Geadaayi siisi nea ghoaschoarda emeedeanya, aba gideaba ghoaghuumwaneesa ea meattai Gaysaari gwaadi nea gwayeena niny Gristoyda was sugoochcheanda gil.” 3Ghoanyaash Bilatto nea gwayeeshsha, “Assang'iing'i guwosi sugoochcheanda Yahuudi?” Ghwasha niny ak gwayeeshsha, “Gidirukuteaydi ang'iing'i gil.” 4Gwayeeshsha Bilatto Ashohoodiga hees, ea emeeda, “Mwadaahi ng'asheanji muy aba badaydeaba siisi.” 5Godiiktiiksa muuchchi nea gwayeenniisa, “Siisi ghoang'waal buuneeda aba ginealshoadaannyi aba ng'eanyiida Yahuudi sean, ghang'eada Galilaaya ea ghwahidu hiji.”

Yeesu geayaat madeeda Heroode

6Iiy Bilatto ng'asheesu ghoanyaashta siisi ea gaba ng'eanyiida Galilaaya. 7Nyas iitta gideaba gwanda ng'eanyiida sugoochcheanda siyi Heroode, ghwaat heeda Heroode aba gideaba damandida gwanda Yerusaleemu. 8Gahoosan Heroode muuchchi idaa Yeesu, aba gideaba ghayi nigeawiit gagaseadayyi deaktaannyi, aba gideaba ghayi ninyas iittaannyi nea gagasa ghwadaa gwadeagooda jea gwasin. 9Ghoanyaash ng'asheega saang'a; ak ea mwasha. 10Ghang'eatng'eat ashoohoodiga hees ea ng'oorshoodiga ak ghoahaakta muuchchi aba urda. 11Gafool Heroode sea shirikkareadaannyi ak gwajuuga, ak gekkwealsa hang'i mideawa ormeeni miy ak geatealda heeda Bilatto. 12Ghang'eada damandida gwaduupchi Heroode ea Bilatto, aba gideaba ghayi ammwadi gwanda fuurjeeda dageascheeda nyawa.

Yeesu gergweaksiina miyeeda

(Mat 27:15-26; Mark 15:6-15; Yoh 18:39—19:16)

13Iiduw gaguursa Bilatto ashoohoodiga hees sea fuga ahaaghwa ng'eanyiida ea buuneeda, 14ak gwayeeshsha saawa, “Siisi goyeadu heedeanyu nea goyeennyi nischoarda buuneeda. Iiduw nea geasikteawi ng'asheanji aba madeedeang'wa, ea mwaadaahi aba headaannyi gidinyeanda was sean oahaaktaawi; 15nea eara Heroode godelneasa siisi aba gideaba mandeawana gidinyeanda miisa miyeeda; 16aba sareani gaydanung' eabwar ak geasiksi gawa.” [ 17Aba gideaba iissa gammiisa gideaba gaygoottissa siyagi mida ghelooniga aba damanda ghwelmeeda.] 18Hean gojuur sean nea gwayi, “Geanda siisi ak gisiksi Baraaba,” 19nea niny ea siida sijaksa ghealooniga aba gideaba ghwanung' ghaghoakghoayda emeeda mujiini ea gideaba gwanuus siida. 20Gabiikta Bilatto gobalool saawa nea gagasa gwasiksa Yeesu; 21gojuur nea gwayeeshsha, “Angoora, Angoora niny!” 22Gwayeeshsha gichcha deaba samwagu, “Nea gidinyeandeaba siisi ea naaha gil? Mwadaahi ng'asheanji jea enuusa, asi gaydabwar ak geasiksi gawa.” 23Gojuur muuchchi aba uurda nea gagasa engoor. Ea gwajoriischi gijureanda nyawa. 24Gorgweaksiinda Bilatto gidagassiida buuneeda. 25Gwasiksa siitta ghayi sijaksa ghealooniga nung' ghaghoakghoayda buneedean, ea gideaba ninuus siidean, was dea gasa saawa; ak ghoadayda Yeesu aba gidagassiida saawa.

Yeesu gengoor

(Mat 27:32-44; Mark 15:21-32; Yoh 19:17-27)

26Iiduw nea geayaat, geroonnyi Simoneeda ng'eanyiida Girene, nea abeeda gwaleabu neayeeda, ak geang'ng'waay ak geanung' ghwasar behiidida nea ghwaat Yeesu geeshta. 27Ak ghwaat geeshta emeetuw, ea gadeemga aat geeshta nea gaguuttu heareega nea gooyyeawda. 28Gwayamsa geaw Yeesu ak gwayeeshsha, “Haweega Yerusaleemu, adoyyeawdaneani, oyyeawda geat ea diibigeagwa. 29Asi ang'ulla, gayghwahidu eawoojiga jea gwayeena, ‘Ghang'wana gea was sonung'weega, ea jeesinga moang'ng'wa gwaji, ea gidinga miiyereer!’ 30Hean gaygwayeeshsha giijeega, ‘Oppedeayseasa;’ ea heayeeniga, ‘Afunyeesa.’ 31Aba gideaba isisissa ng'asheesu geetta shabwaat, gaygawuurjiin aba geetta ghajaam?” 32Hean geayaat eara fii iyyeenya adiiy enuusuudayyi niny. 33Iiduw nea sihitta hiji suguura Geapkeeda Uhuuda, gengoorsa uhuuda behiida, sea fukka adiiyiin, dea manda geattinda dugwa niirja gwanda geattinda ghadaam. 34Ak gwayi Yeesu, “Bwaabwa, eaniiyean samsiina fiisu; aba gideaba mwanala gissin.” Hean geelaja hang'wakkaaschi ak geng'alealleesa. 35Ghaminaada buuneeda nea geeng'ula, nea fukka ahaaghwa ng'eanyiidean gang'ula nea gwashka nea gwayeena, “Gwalealu suurja, asi dalealna geaw, iiwas Gristoyda Aseetta loat niny!” 36Eara fuga shirikkara gwashka ak gaweesa ak ghoadaw beesu ng'weani, 37nea geeyeenniisa, “Iiwosi sugoochcheanda fuga Yahuudi, gilealu geaw!” 38Gwanda ng'ooruutka uhuuda behiidaannyi sung'waar, “Nii sugoochcheanda Yahuudi gil.” 39Gwayeeshsha siyagi adiiy gwachchi singooruudayyi sea niny, “Ang'iing'i muwosi Gristohi? Asi lealni geaw ak gilealneasa eara aseasa!” 40Hean gowoowsa niirja nea gwayeeshsha, “Ang'iing'i miiwali eara Aseetta, nea eara ang'iing'i gindi jeedeaba girgweaksiini? 41Nii gammiiseasa aseasa, aba gideaba geanyaschi gimeardeanya aba gissisinnyi, nea siisi ea miigwasin gidamuy wassean.” 42Ng'atta gwayeeshsha, “Yeesu apkaadaan ihitti jeeda sugoochcheandumeadaang'u.” 43Ak gwayeeshsha, “Aba huumwa geayeeshshineey askweareeni, gajendeayesiina nyeamus.”

Miyeeda Yeesu

(Mat 27:45-56; Mark 15:33-41; Yoh 19:28-30)

44Geeyi bwak ama gul aseetteaba lah gwaduk ng'eanyiissean misaneeda ea gaba aseetta shageash, 45iiduw nea gagarbiit aseetta; hean ghang'at bugusta hang'dida subwaasha jeeda gheeda sibatta Aseettean nibiyyeenya. 46Ng'atta goyyeawda Yeesu nea gojuur muuchchi nea gwayi, “Bwaabwa, nayiinnyi guroroodeanyu geattingaagu!” Ahiit balooli ghoabitta. 47Daa shirikkarajeanda haw gwaduumsheesa Aseetta nea gwayi, “Aba huumwa siisi ea doabiiwaat!” 48Daa emeeda gwachchi bwatgeat aba hoowa nea ghwadaa ng'asheanjiin, gabikta gealga nyaawa nea gagiisan. 49Nea fuga sean duupchi ea gadeemga ghayi adeana aba ng'eanyiida Galilaaya, ghaminaada nea sheagi nea ghwadaa ng'asheeu.

Bunyitta Yeesu

(Mat 27:57-61; Mark 15:42-47; Yoh 19:38-42)

50Aba damandida gwanda siisi suguura Yoseefu was siida mujiineeda Yahuudi siguura Arimattaayu. Niny abeeda gaba gweargwa girgweageeda nea ng'eeni, ak gabiissa ea doabiiwaat, 51nea niny ea mwamwasa gidagasa saawa ea gissin, nea abeeda gomuukku sugoochcheandumeeda Aseetta. 52Ghang'eat siisi ak gawa ea gawa heeda Bilatto ama hitta gamus musta Yeesu. 53Ng'atta gorareang'u ak gokkwealsa hang'da miy ak ghwayiin jeemba bung'eeni mida jeemba laghaana ghayi miyeebung'sa sii. 54Nea eaweechcheanji ea eaweetta sing'aap gil jea ghwahinna sabattoohi. 55Nea Gadeemga ghayi adeana niny leabu ng'eanyiida Galilaaya ghwaat geeshta ghwadaa bung'eeda ea gissibuyda; 56hean iiduw gabiikta ghoah ak gwasin nagheeda ea geediga ng'andidi. Ak gafuuf eaweeda Sabatto gwahinda gidanyashta digheanda.

Currently Selected:

Lukka 23: DTGANT09

Highlight

Copy