Yohaana 2

Nyeangiida mida Gaana

1Iimuchchu eaweetteaba samwagu gwanda nyeangiida Gaaneeda mida Galilaaya, eara gheamatta Yeesu abeeda gwanda hoowa; 2nea eara Yeesu ea ginealangaaschi ea suguursa ghapka nyeangiini. 3Iiduw nea ning'at difaayi gwayeeshsha gheamatta Yeesu niny, “Mudugwandeawa difaayi.” 4Gwayeeshsha Yeesu ghaamwat, “Ea iiyya, ang'iing'i gendeayeasi naaha? Damandeanyu miighwahidu.” 5Ghwalamda Gheamatta ak gwayeeshsha soomjooga, “Agooga asna gilinyoo gwargu niny.” 6Abeetta gwanda hoowa sirbaji lah ghayi sisna lagheanga, ak geyiina beega ahunniida fuga Yahuudi aba gimminnoodeaba geat, aba heesinnyeekka jeesinga nyaawa gwalassa galanajeega diktam ghana diktam ea damanamughush.

7Gwayeeshsha Yeesu saawa, “Oannyiida sirbajeesu beega.” Hean geannyiit ea ghwanaawnaawda. 8Ng'atta gwayeeshsha saawa, “Asi aramni ak goyeassi siida haw ang'aatta buuneeda.” Hean geyeasa. 9Iiduw nea gwasamu Siidida ang'aatta buuneedean beegiga, aniyamwa ghoaw difaayi, nea abeeda niny amwanala heeda leabu, (nea soomjookka ghwanyawa ramu beegean ghwanal), gaguursa Siitta ang'aatta buuneedean siida geeshshi 10ak gwayeeshsha, “Eajusu buuneeda inyeessa ghanyi goshoohu difaayi miyaas; amadaa beadi nileeshi buuneeda muuchchi, hean gabiissa goruudu gea munyas; ang'iing'i nukkwa gudumideawana difaayi miyaas eara ghamneawa.” 11Gwadeagooni diitta ghayi sin Yeesu bea madeedean gil aba Gaaneeda Galilaaya nea abeeda ghwanung' eadaah gigheambittaannyi; eara ginealangaaschi hean gabiissa ghamwas niny.

12Iing'atta ghangeat ghwararang'aada gawa Gapernaamu nea godeayi ghaamwat ea oorjooga ghaamwat ea ginealangaaschi; gobiida hoowa askwearjoojusu ng'ay.

Yeesu gawa jeeda gheeda sibatta Aseetta

(Mat 21:12-13; Mark 11:15-17; Luk 19:45-46)

13Abeetta gwanekiidean ghwelmeeda Basakka bea fuga Yahuudi, hean ghwascheang'da Yeesu gawa Yerusaleemu. 14Ghwanyasa jeeda gheeda sibatta Aseetta buuneeda; heeda mwashaayda heewga suurja ghwashaayda gisilga nea suurja ghwashaayda ghariibajeega, ea gea nyarja lappiyyeeda gadiyeatta. 15Hean gwasin ghealooda, amahit ghahoan buuneesean mideawa gisilga ea heewga aba jeeda gheeda sibatta Aseetta; ak ghoahiida lappiyeeda fuga nyarja lappiya nea gobimbineada measajeega nyaawa. 16Gwayeeshsha fugiga ghwanyawa sheahhiida gharibajeegean, “Oang'aamwana dugusu hiji; adoonung ghoaw ghooriida Bwaabwa ghoariida sikkeakshachcheewa.” 17Ghoapkaat ginealangaaschi gideaba geang'waar. “Barinyeegeasu aba gheang'u gayghwaagan.” 18Ghoanyaash fuga Yahuudi nea gwayeeshsha, “Gaysina ana gwadeagu jea eadaaha gideaba gisni ng'asheesu?” 19Ghwasha Yeesu nea gwayeeshsha, “Anyarja gheawi sibatta Aseettean ak gaydadeas aba jeemba askwearjooji assamwagu.” 20Hean gwayeeshsha Fuga Yahuudi, “Gheawi sibatta Aseettean ghayi destaannyi gageanu gweannyeew haradam ea lah, ak gaydeasa aba jeemba askwearjooji samwagu?” 21Nea abeeda Gheeda sibatta Asseetta rugu ea saseadaannyi gil. 22Iiduw nea niduunna miyeeda, ghoapkaat ginealangaaschi gideaba ghayi nurgu ng'asheesu, ak ghamwas ng'oruutka ea ng'asheega ghayi rugu Yeesu.

Yeesu ghwanal ng'asheega mida jeesinga buuneeda

23Damanda mideewa Yerusaleemu aba jeeda ghwelmeeda Basakka, ghamwas fuga saang'a gheawungaaschi idaa gwadeagooda sin; 24nea Yeesu amwamwasa fugiga aba gideaba nisikkideawa sean, 25aba gideaba niny ghwanal buneassean ak ea magassa gideaba gaygamuuwwu sih; aba gideaba niny ghwanal gidamida jeessiida.

Currently Selected:

Yohaana 2: DTGANT09

Highlight

Copy