Gadiyeeda Giijasoodiga 9

Duukuunooda Sauli

(Gadi 22:6-16; 26:12-18)

1Aba damandida Sauli ghoabeal buuneeda muuchchi nea gwanuus ginealanga Ng'uttamiida, ak gawa heeda ashoohoochcheanda haw 2ak gamus niny barawajeanda jea ghwaat ghoorajeega sinnealshachcheewa mida Dameski, ea gideaba inyasa hoowa headiga ghana gadeemga aat Naweetta, ghoang'ng'waay ak gweadu Yerusaleemu. 3Iiduw nea gwanda naweeda nea gwaneekiissa Dameski, deagheatta ghoabwaay murdajeegaaschi sean weeshinda leabu humng'eeda. 4Goobeedeaysa ng'eanyi ak ghwanya ghuutta siida nea gwayeeshsha, “Sauli, Sauli, ghwasaan anda gighabwaschaan?” 5Gwayeeshsha, “Ang'iing'i ng'eaha gil, Ng'uttamiida?” Ghwasha nea gwayeeshsha, “Aniini geawoschi Yeesu, dea ghamneawa ighabwasi; 6asi ng'eada ak guwi mujiini, amiihitti gajeerukneey gichchea sina.” 7Nea fukwachchi adeana Sauli ghamiinaada aba hoowa nea ghwasinda, hean ghwayiiy ghuutta siida ama sing'wearda ea meadaaha sih. 8Ghang'eat Sauli aba ng'eanyi; ghwajaat gheanyeangaaschi ak ghwaraay ghoong'wearda; ama ng'atta geeng'ng'waanyaada geattinda ea ghwahitta ng'eanyiida Dameski. 9Goopteada Sauli eawooji samwagu nea moang'wearda, ak ea mwaaga gil nea mwali gil.

10Aba hooweanji bea Dameskiin gwanda ginealaneeda suguura Ananiya. Gwayeeshsha Ng'uttamiida siisi aba jeeda giirgweatka gideaba “Anania.” Ak gwayeeshsha, “Geandi hiji, Ng'uttamiida.” 11Gwayeeshsha Ng'uttamiida niny, “Ng'eada ak guwi ea hitta naweeda suguura naweeda doabiiwaat ama ihiitti ghea Yuuda giibwaardi siisi leabu ng'eanyiida Darso suguura Sauli; ng'ulla ghamneawa ghamwaash Aseetta. 12Ghamneawa anidaah siisi suguura Anania nea ghwahidu gah ak ghwayiin geattingaaschi uhuudaannyi ak abeeda ghwajaada gheanyangaaschi.” 13Ghwasha Anania nea gwayeeshsha, “Ng'uttamiida, naayiinyi ng'asheegeaba siisi aba heeda fuga saang'a, ak eara ng'asheega munyas nisma fugaagu ghaydidi aba Yerusaleemu; 14ak ghamneawa gwandeawa gheambalmeeda adaw ashoohoodiga hees bea gideaba gayghwoong'ng'waay ak gwajaksa ghealooniga fuga rukku gheawungaagu.” 15Gwayeeshsha Ng'uttamiida niny, “Una, aba gideaba siisi dabichcheanda siloat gil iitteanyu ghwaat gheawungeasu jeeda Emoojiga ea sugoodiga ea fuga Israeeli; 16ak gaydaahiimsa ng'asheega saang'a jea ghwanyasa sawanadeeda aba gheawungeasu.” 17Iiduw gawa Anania ea gawa jeedeaba gheedida. Ak ghwayiin geattingaaschi uhuuda nea gwayeeshsha, “Oorijeediyya Sauli, Ng'uttamiida was Yeesu heetta iroonyeewi aba naweeda nea abeeda gigalu hiji, goojeakneani ghwajaada gheanyangaagu nea ginyasi uurda Gurorooda Ghaydit.” 18Ng'atta ghoobitbinna gheanyangaaschi duguuguurji badatka aba geeshangiga, ak gabiikta ghoang'wearda. Hean ghang'eat ak geeppattiisan, 19ng'atta gweagiischi ak gabiiksa uurda.

Sauli gwarukwiida giijasta Aseetta aba Dameski

Iiduw gwandeayi eawojusu ng'ay sea ginealanga aba Dameski. 20Ak deagheatta ghoong'eat ghuutta rukwiideayda iitta Yeesu, nea gwayi, aba jeeda ghoorajeega sinnealshachcheewa gideaba “Niny Balleanda Aseetta.” 21Ghahamng'eanyi buuneessean alleeysiit, nea geeyi, “Siisi miidea ghayi las uhuuda buuneeda aba Yerusaleemu was fuga rukku gheawung'su? Ak ghwahidu hiji nea gagasa ghoong'waay buuneeda ak gwarada ak gweassa ashoohoodiga hees.” 22Iiduw ghwanyas Sauli uurda, ak ghwanung' ghabeal fuga Yahuudi mida Dameski aba ng'asheanji gideaba Yeesu niny Gristohi.

23Ng'atta eawoojiga saang'a, ghabwat geat fuga Yahuudi ak geemakcheamana nuusittaannyi, 24ghwanyas Sauli iitteaba makcheameani. Inyeessa geefur dooshinga askweari ea eawa, nea geegasa eenuus niny; 25iiduw gageanda ginealangaaschi eawa ak geappuuttaawa uhuuda ghamarda, ak gearraraang'daawa sooscheanda.

Sauli aba Yerusaleemu

26Iiduw nea ghwahitta Yerusaleemu gagasa gwandeay sea fukka was ginealangean; hean geewal aba gideaba miyeamwas gideaba eara niny niiw ginealaneeda. 27Ghwaat Barnaba niny, ea ghwaat heeda giijasoodiga, ak gwaruukusa gidanironnyeatta aba naweeda sea Ng'uttamiida, ak gobalool, ea gidarukwiideayda giijasta Aseetta aba Dameski aba meaynatta aba gheawunga Yeesu. 28Ng'atta gawa jeeda nea gwaritteawa jeannyaawa aba Yerusaleemu, 29gwarukwiida giijasta Aseetta aba meaynatta aba gheawunga Ng'uttamiida. Gabalool nea gwasheang'dooschi sea fuga Yahuudi baloola iitta Yunaani; ak gagasa gichchea gwanuusta niny. 30Iiduw nea gwajeeng'u fuga siduupcheewi ng'asheesu, geeyat ng'eanyiida Gaysariya, ak geenung' gawa Darso.

31Iiduw ganiisa aba jeeda Yudeeyayda sean ea Galilaaya ea Samariya ghwanyas hoyyoo nea gedeegu; hean ghabeawa muuwda aba heeda Ng'uttamiida nea gageanda salagheang'da Gurorooda Ghaydit ak ghoahaada.

Betro aba Liida ea Yoppa

32Asi ghamneawa damanda neayeewa Betro aba hiji ea hoowa aba jeannyaawa sean, ghwararang'aan eara niny ea ghwahidu heeda fuga ghaydidi abiitta Liida. 33Ghwanyasa hoowa siisi suguura gheawungaaschi Aeneya, nea nimnyaan ea ghwahitta gweannyeew sis nea gobittu damealga. 34Hean gwayeeshsha Betro niny, “Enea niihaapnyi Yeesuyda was Gristo; ng'eada mughuda mundaang'u.” Deagheatta ghang'eat aba geeshangiga. 35Daa buuneessean niny fuga ng'eanyida Liida ea Sharoon, hean gwayamsa geat Ng'uttamiida.

36Abeeda gwanda ng'eanyiida Yoppa ginealaneeni suguura gheawungaaschi Dabitta, nea gideaba Dorkas gil. Abeeda gwasna gadiyoojiga ninyas nea gaweeda buuneeda. 37Eawoojikka ghwalas sheagheeda ak iiduw ghami; iiduw nea ning'atta gihundaannyi ak geeweay eyiin jeemba ghooriini sideeksa uhuumba nuut. 38Abeeda Liida eaneekkeewa Yoppa, ghwayiiy ginealanga gideaba Betro gwanda hoowa, geechcheakta fii iyyeenya headaannyi eemus gideaba, “Asi geemuscheey beenni heedeanya nea adishing'di.” 39Ghang'eat Betro ak goodeayi saawa. Iing'atta hinnooda, geayaat ettiing'da uhuuda ghooriida sideeksa uhuumba nuut. Ghamiinaada masinung'weega sean aba murdeadaannyi nea goyyeawuda, nea gehhiimsa meachkweega ahaat uurda saseeda ea hang'weakka sin Dorkas damanda duu gwandeayeewa saawa. 40Hit goorutta Betro buuneessean jarooda ak ghang'da gutng'weakka ng'eanyi ak ghamwash Aseetta; ak gwayamsa geaw mustida ak gwayeeshsha, “Tabita ng'eada.” Ng'atta ghwajaat gheanyangaaschi, amang'wearda ghwadaa Betro ak ghang'eat goopteada. 41Ng'atta ghoadaw geattindaannyi ak gagatganna ng'eanyi. Ak gaguursa fuga ghaydidi ea masiinung'weega ak ghwayiin madeennyaawa nea majeek. 42Iiduw gageawiit iiteaba ng'asheanji aba ng'eanyiisean bea Yoppa, ak ghamwas fuga saang'a Ng'uttamiida. 43Ng'atta goobida Yoppa ea gageanu eawoojiga saang'a, nea goobiida gheapa siisi naba muuchka suguura Simon.

Currently Selected:

Gadiyeeda Giijasoodiga 9: DTGANT09

Highlight

Copy