Gadiyeeda Giijasoodiga 24

Fuga Yahuudi ghoahaakta Baulo

1Iing'atta eawooji muut ghang'eat ashoohoochcheanda haw suguura Ananiya hean ghwaan nea goodeana gwearsu ng'ay ea dinagiida suguura Dertulo. Hean ghwayiin madeeda sugoochcheanda haw gidasiihaaktaawa Baulo; 2iiduw nea geeguursa, ghoang'eat Dertulo giiheakteayda nea gwayi, “Dea nihaghwideawaneasa iissa geehoosannyi nea geebeayi hoyyoo, nea aba gheambalmeadaang'u, Feliseeda Mureeda, nirdu ng'asheega siyamyam appadaydeaba ng'eanyiin, 3aba naweadinga sean ea heeda wassean iissa geamwaschi ng'asheesu aba badiischooda. 4Ak ea meegassi deammiikta aseettaang'u, geemuscheeyi aba alooheadaang'u alleeyseasa iit muuchchi. 5Aba gideaba sidaayi siisi gaba ng'ooweatta, siida ang'eedi giiheakteayda buuneeda aba jeeda fuga Yahuudi sean mida muunda ng'eanyiida, ak gabiissa ea siida mida madeeda fuga Nasarayo gil. 6Ak siisi gagasa ghang'uda ririnyeanda gheeda sibatta Aseetta, ak iiduw geeng'ng'waannyi. Ak [geegasayi eergweaksiinana naweeda deaweedeeda ghaheanya.] 7Iihahidu shirkarajeanda haw sunguura Lisiya ak ghwareadeasa aba uurda. 8Asi ginyaashi ang'iing'i gwadeeppa nyasa aba headaannyi ng'asheega sean siihaaktaawi.” 9Ghwaroop ghuutta fuga Yahuudi nea gwayeeshsha ng'asheesu siihaaktaawa ghoahiimu gideaba sean huumwa gil.

Baulo ghaweat geaw aba madeeda Feliksi

10Hean nea gwayeeshsha sugoochcheanda haw baloola, ghwasha Baulo nea gwayeeshsha, “Ghaanalli gideaba niyaagi gweannyeekka saang'a aba gadiyeani bea lachchooda girgweaguutkean aba jeedeaba emeani. Asi gaydaweat geaw nea geahoosannyi. 11Giimmuusi gakkiisiina geaw huumeandeaba ng'asheanji, gideaba miighwanaawa eawooji damaniyyeenya dea nabeawi damwaash Aseetta aba Yerusaleemu; 12ak ea miyeenyasanaan hich nea geesheang'nyeewi sih ghana ehidu nea ghang'waalng'waalli buuneeda, aba jeeda gheeda sibatta Aseetta ghana jeeda ghooriida sinnealshachcheewa ghana hiji wassean bea jeeda mujiini. 13Ghana sikteawana ng'asheanda ahaaktaawanaan; 14asi ghaamwaschi ng'asheanji aba madeadaang'u, nea gideaba aba naweeda, was dea diini, iissa ghaabwachchi Aseetta ghweanigaasa, ak ghaamwaschi ng'asheega sean siyiin madeedeanyu aba deaweeda ghana dea sung'oorsa sibanga, 15nea ghaaghuschi Aseetta, ak eara saawa ghamwas ng'asheanji, bea gideaba gaygwanda duunooda aba heeda fuga doobiiweadi ea gea mii doobiiweadi. 16Iissa aniini ghaanyaschi sawanadeeda galeagasean ak ghaanyaschi fughareeda miy aba heeda Aseetta ea heeda buuneeda. 17Iing'atta gweanyeekka saang'a ghawunnyi deassa fuga emeedeanyu haleanjeeda sisappa geadi bea ghadooweeda ea gujaweeda. 18Damandida easni ng'asheesuun, ghwahidu nea ning'atta gimmiinoodeaba geaw aba jeeda gheeda sibatta Aseetta, nea manda emeani eandeawi ghana deakghuyandeeda. 19Abeeda gwanda fiispa Yahuudi ng'ay leabu ng'eanyiida Asiya, fiisu gidabal gwachchi ghapka hiji ak goshooynaneegwa ak gwasin gichchea ghoahaaktaawa, iimida ng'asheanda wassean jea ghoahaaktaawanaan. 20Ghana nung'waada fiisu gwargu ramaseanda deaksean aba damanda ghayi amiinaadawi aba madeeda girgweageeda, 21geaghus ng'ashaanjagi earukutti nea ghaamiinaadi aba madeannyaawaan, ‘Appadayda duunnooda fuga nimeewa ghoaw gissirgweaksiinanean ghamneawa aba madeedeang'wa.’”

22Abeeda Feliksi ea doobiiwaat fughara aba Naweeda, iiduw gwayeeshsha, “Iihidu hiji shirikkarajeanda suguura Lisiya, gaydeang'weersa girgweageadaang'u.” 23Hean ghoadaw shirikkarajeanda iitta gideaba ayiina gah ak ghoanung' goobal geaw gilimwanang', ak ea adoakghuumnyi fugaaschi duupchi aba eassiinda haleanjeeda gasa.

Baulo gwanda madeeda Feliksi ea Drusila

24Ng'atta eawoojusu ng'ay ghwahidu Feliksi nea godeana gatmoadaannyi suguura Drusila, bea emeeda Yahuudi; hean ghwanung' eeyeadu Baulo amahit gooleeysiit ng'asheega baloola bea iitta masaweega Yeesu Gristo. 25Damanda balool Baulo ak ghwasat ng'asheega doobiiwnatta ea gheadeenda ea iitta girgweaksiinda jea ghwahidu, ghabeal Feliksi ak gwayeeshsha, “Nyoobiikta, iyaanyaschi gheatta gichcha gaydaguurneey.” 26Inyeessa damandida ghaghay gideaba Baulo gayghwasaaw. Hean inyeessa gaguursa ak goobalool. 27Muchchu nea ning'atta gweannyeew iyyeenya, ghoaghiis hoorgeeda Feliksi siisi suguura Barkiyo Festo; ak gagasa gooduupchi geaw fuga Yahuudi, muchchu Feliksi ghwanung'wa Baulo ghealooniga.

Currently Selected:

Gadiyeeda Giijasoodiga 24: DTGANT09

Highlight

Copy