Gadiyeeda Giijasoodiga 22

1“Fuga eaduupcheewi, ea geaba Bwaabwa, eaniyean olleaydiit dargu ng'asheegeasu aba madeedeang'wa.” 2Siyiiy gidabaloolda aba ghuutta Eburaniya, hean geeyi saw ak geelleeysiit muuchchi aba damanda baloola ak gwayi:

3Aniini geawoschi siida Yahuudi, geejiilsean ng'eanyiida Darso mida Gilikkiya, ak geahissiini heeda mujiineeni, ak ghwaanaalaan Gamaliyeeli muuchchi ng'asheega deaweedeeda ghayi bea gweargwaasa ak geasinnyi gadiyeeda Aseetta gawuurji gidaghamneawa owuurjeewi agooga. 4Ghayi inyeessa ghaanung' ghwanyas hang'weaniidooda fukka aat Naweaniin nea geanuuseadi, ak ghaarachchi, inyeessa geajaksi ghealooniga sean headiga ea gadeemga, 5ng'asheesu aba damandida gamuuwwu ashoohoochcheanda haw ea gweargwa sean bea girgweageeda aba gideaba gagoonan barawajeanda fuga eaduupcheewi, ak ghaayaachchi Dameski, hean geawi daang'ng'waay fukkeanji ak geayeadu Yerusaleemu nea sirada geattinga ammuchchu geabwar.

Baulo gwargu gidalalanda

(Gadi 9:1-19; 26:12-18)

6“Iiduw nea geawi bareannyeekkeasu nea geaneekkiisi Dameski, abeeda nihitta aseetteaba lah bea askweari, deagheatta ghoabwaanyan weeshinda haw muuchchi leabu humng'eeda. 7Ak geabeedeaysi ng'eanyi ak ghaayiinyi ghuutta siida nea gwayi, ‘Sauli, Sauli, ghwasaan andagighabwaschaan?’ 8Ak ghaanyaaschi, ‘Ang'iing'i ng'eaha gil Ng'uttamiida?’ Ak gwasha nea gwayeeshshean, ‘Aniini geawoschi Yeesuyda Nasareetti ighabwasi.’ 9Fukkeanji gwachchi eandeawiin ghwadaa weeshindida ak eamiighwayiiy ghuutta siida abaloolan. 10Ak geabearsi gideaba, ‘Ghamneawa gaydasin naaha Ng'uttamiida?’ Ak gwayeeshshean Ng'uttamiida, Ng'eada ak guwi Dameski ak gajeerukuneey haleanjeesean jea eegoonnyi sina. 11Hean nea muttaammu daang'wearda aba weeshindida ng'waaniin, hean ghoang'ng'waanyaada geattindeanyu fukwachchi eandeawi ea ghoahiittanaan Dameski.”

12“Abeeda siyagi suguura Ananiya was siida doabiiwaat ang'ng'waay muuchchi deaweeda, biissa gwarukkuuna buuneessean bea Yahuudi mida hoowa ng'asheega miyaas badaydaannyi, 13ghwahidu heedeanyu, ak ghamiinaada aba murdeedeanyu ak gwayi, ‘Oorjeediyya Sauli, ang'wearda.’ Hean ghang'weardi aba geeshangiga ak ghaadaayi niny. 14Hean gwayeeshshean, ‘Aseetta ghweanigaasa niloannyi aba gidagasa, ak gidaahi dea Assagi Doabiiwaat ak giyiinyi ghuuttaannyi; 15ak gayhuwa muushoochcheanda aba heeda buuneessean, aba ng'asheega idaahi nea giyiinyi. 16Ghamneawa gimuughu naaha? Ng'eada eppattiisannyi, ak geehhuun ring'eegaagu, nea giguursi gheawungaaschi.’”

Baulo geeguursa gwarukkwiisa Emoojiga giijasta miy.

17“Iiduw nea geebiikti Yerusaleemu ak ghamwaaschi Aseetta aba jeeda gheeda sibatta Aseettean, hean geargweadayi 18ghaadaayi niny ak gwayeeshshean, ‘Lamwaja ak gibeawi Yerusaleemu, aba gideaba fiisu mayghamwas ng'asheesu imuuwwu bea badaydeanyuun.’ 19Ghaalamdi ak geayeeshshi, ‘Ng'uttamiida, saawa ghwanal muuchchi gidaghayi eabadiinniidi jeeda ghoorajeega sinnealshachcheewa ak ghang'ng'waannyi buuneeda nea ghaabwarji fuga mwasnyi ak geajaksi ghealooniga. 20Eara damanda ghayi sihhiidaawa foojeanda muushoochcheandaang'u suguura Stefaano, abeeda geandi heeda ak ghaadaayi aba heedeanyu gideaba ng'asheandida ghwadoabiiw, ak geefurji hang'weakkeaba fukka nuusiin.’ 21Ak gwayeeshshinean, ‘Una aba gideaba gaydeajeaktaneey heeda sheagi was ng'eanyiida Emoojiga.’”

22Geelleeysiit ama rugu ng'asheanji; hean geechchuur muuchchi nea geeyi, “Oang'ng'aamwana siisi hiji ak goonuuschi! Mammiisiina giibinda.” 23Ea mwasiinda giijuureanda nea gooyuuk hang'weakka nyaawa nea gwasaksa birjeanda humng'eeda, 24hean gwayeeshsha shirikkarajeanda haw ayaada ghealooniga ak ghoabwarji nea ghoannyaashchi ng'asheesu ak gajeanala gidajuura fiisu ea gwasnu appadaydaannyi. 25Iiduw nea nihit raditta aba ghealooniga, ghoanyaash Baulo shirikkarajeanjagi miinaada aba hoowa nea gwayeeshsha, “Heappi ghwadoabiiwi gideaba geabwar siida ng'eanyiida Ruumi, nea miyeergweaksa?” 26Iiy ng'asheanji shirikkarajeandida gawa gwarukusa shirikkarajeanda haw nea gwayeeshsha, “Gigasayi sina naaha? Siisi gaba ng'eanyiida Ruumi.” 27Hean gaweesa shirikkarajeanda haw ak gwayeeshsha, “Heappi rukunean, ang'iing'i guwosi siida ng'eanyiida Ruumi?” Ghwalamda ak gwayeeshsha, “Ea geawoschi.” 28Ghwalamda shirikkarajeanda haw ak gwayeeshsha, “Eara aniini geawoschi siida ng'eanyiida Ruumi, aba gideaba ghaadaydi lappiyeeda saang'a.” Ghwalamda Baulo ak gwayeeshsha, “Aniini ghayi geejiilsean ng'eang'i.” 29Hean ghang'eatng'eat gaweay aba geeshangiga fukka gwachchi gasa goonyeeri ng'asheegean aba geeshangiga; eara shirikkarajeanda haw iiduw ghabeal, iijeeng'u gideaba Baulo siida ng'eanyiida Ruumi gil, ea gideaba gwachchi nirada.

Baulo gwanda gheeda girgweageeda

30Iimuchchu sakteayda, gagasa danal gidabaysiina fuga Yahuudi giheakteaydaannyi, ak abeeda goottin, ak ghwanung' ghabwat gea ashoohoodiga hees sea gweargwa girgweageeda, ak gweadu Baulo ak ghwanung' ghamiinaada aba madeannyaawa.

Currently Selected:

Gadiyeeda Giijasoodiga 22: DTGANT09

Highlight

Copy