Gadiyeeda Giijasoodiga 20

Beatta Makkedoniya ea Akkaya

1Iiduw nea ning'atta deakghuyandeedida, hean gaguursa Baulo ginealanga ak goomajeek jeesinga nyaawa ak ghang'eat gawa ng'eanyiida Makkedoniya. 2Hean nea gwasik jeeda ng'eanyiida nea goomajeek saawa gawa ng'eanyiida Yunaani. 3Ng'atta goobiida hoowa sheeh samwagu, muchchu nea gagasa fuga Yahuudi ng'asheega munyas appadaydaannyi nea abeeda eanigasa niny gawa ng'eanyiida Siriya, hean gwasheamu ak gabiigu nea gwasku naweeda Makkedoniya. 4Gawa nea goodeayi Soppattoyda was balleanda Birho leabu Desalonikke; ea Gayoyda leabu Derbe, ea Dimotteo ea Dikkiko sea Drofimoyda ng'eanyiida Asiya. 5Fiisu goosheedeawaneasa ak ghoamukghneasa aba ng'eanyiida Drowa, 6hean geabeawi ng'eanyiida Filippi nea geeding'di maleambooda iing'atta eaweeda mukkattajeega memmattawiitta, ghang'atta eawooji muut ak geahitti heannyaawa aba Drowa, akkeeppiidi hoowa eawooji ispwa.

Baulo gabareassa dea huydean ng'eanyiida Drowa

7Eaweeda madeeda bea eawooji ispwa, nea abeeda ea subwachchi geat easuunya mukkatte, hean goobalool Baulo saawa, nea abeeda gagasa gideaba gaygawa iimuchchu; hean googeawiit baloaldaannyi ea ghoaw bugusta eaweeda. 8Abeeda gwanda beascheekka saang'a aba jeedeaba gheetta sideeksa uhuudeaba niirjean nea subwachchi geat. 9Nea abeeda gwanda balleanji mwanang' suguura Ewudekko apteada aba seawadeeda. Hean ghwalas gheatta ruweanga damanda baloola Baulo ea gageawiit; ea eeyibwak ea ghwajoar ruweanga, ng'atta ghang'adaana humng'eeda uhuuda gheeda siroap samwagu ak geegatkanna ng'eanyi nea nimi. 10Ghwararang'aada Baulo amahitta gwahiiysa geaw, ak ghwayiin daghattaannyi nea gwayi, “Adaghahameagwa ng'eanyi, aba gideaba eaweagaaschi gudugwanda.” 11Iiduw nea gabiikta Baulo gwadiyeada ak ghwasuuy mukkatte ak ghwaak, hean goobalool saawa, ea gageawiit, geeyibwak ea goorearu aseetta, ak ghang'eat Baulo gawa. 12Ng'atta geayaat balleanda ghoah nea majeek, ak ghwanyas buuneeda hawdeayda.

Ghang'eeda Drowa ea ghwahitta Miletto

13Iiduw geeshsheedi eweaya mwadi ak geeding'di maleambooda, ak geegasayi ettiing'da Baulo; aba gideaba niny abeeda nibada beatta jea ghwala ng'eanyiida ghajaam. 14Iiduw nea geeroonnyeesi Asso, hean geettiing'di niny ak geapkaannyi ea eahiinna Mitilene. 15Geabeawi jeeda basooda ea eahitta Giyo eaweedeaba iyyeenya; eaweeda bassa geahiitti Samos; ammuchchu eaweeda niirja geahitti Miletto. 16Aba gideaba gagasa Baulo ghwalach bugusta basooda gwasik Efeeso, aba gideaba magassa ghwashing'da aba ng'eanyiida Asiya; aba gideaba gwalamajeesa hitteayda Yerusaleemu, ijea ghoammu ghwahitta eaweeda Bendekosti.

Baulo goobalool gweargwa Efeeso damanda helleewa

17Damanda mideewa Miletto goojeaksa eeguursa gwearugwa ganiisa mida Efeeso. 18Hean hidu headaannyi, gwayeeshsha saawa, “Agooga ghoanalli gideabiideatti aba heedeang'wa damanyoojiga sean ng'eada dea nallaabi geeshteanyu ng'eanyiida Asiya, 19nea geagadiyeesi Ng'uttamiida nea geayeadayi geaw ng'eanyi muuchchi nea geasni dabeakka ea samsiinda anyaschi aba foolayda fuga Yahuudi; 20ea gideaba mii daheawa rukunooda ng'asheanda wassean miiseegwa, ak ghaanalleagwa aba eeshpwara nea ghaabeawi gheawi ak geawi gheawi, 21ak geamuuwwiisi sean fuga Yahuudi ea fuga Yunaani ak gearukusi iitta duukkuunooda aba heeda Aseetta ea iitta masaweega mida jeeda Ng'uttamiideanya was Yeesu Gristo. 22Ak ghamneawa, ng'ulla, geawi Yerusaleemu, nea ghwaadan Gurorooda, nea mwaanali ng'asheega jea gabussean aba hoowa; 23geaghus gitta nimuwwunean Gurorooda Ghaydit aba mujiinajeega sean bea gideaba ghoamuukghunaan ghealooniga ea sawanadeeda. 24Ak ea mwanung' ghoaw eaweegeasu gil ghana danung' ghoaw gidaghaloamwaat, geagasayi ghanyi dahiit gadiyeedeanyu anyaschi aba heeda Ng'uttamiida was Yeesu, ak geammuuwwu iitta giijasta miy bea dagheerjeandumeeda Aseetta. 25Asi ghamneawa, ng'ulla, aniini ghaanaalleagwa oagasean nea geaneayeewi jeedeang'wa nea geerukkwiidi giijasta sugoochcheandumeeda ak ea manda siida jea gudughwadaah gheamamdeanyu. 26Asi ng'asheesu geamuwwuneegwa askwareani gideaba mandanean gidinyeanda aba foojeandeang'wa oagasean, 27aba gideaba mii danung'waada rukunooda girgweageeda Aseetta. Asammiisiina geat oagasean sea hawanda, 28was gea ghayi nung' Gurorooda Ghaydit ahuuwa fuga jea ghoahaaghwa, ak goong'ulayi ganiiseeda Aseetta ghayi nyas aba foojeanda Balleandaannyi bea saseadaannyi. 29Ak ghaanalli iimuchchu nea neawi gayghwahidu jeedeang'wa suuyeekka ng'weani, jea ea mayghwalach hawanda; 30nea aba jeedeang'wa agooga gaygwarinna fuga jea gwargu ng'asheega ng'ooweatta, jea ghwanung' ghwaat ginealanga geeshta nyaawa. 31Asi oang'ng'wearni, nea ghoapkaachchi gideaba aba gweannyeew samwagu mii danung'waada rekusiimba giliwas sih aba dabeakka. 32Ak ghamneawa ghadawjeegwa Aseetta ea ng'asheanda dagheerjeandumeeda, jea ghoammu gwadeekneegwa nea gagooneegwa hearaniischooda aba jeeda fuga sean ghayi simmiidu. 33Ak ea mii dashissa ghaang' lappiyeeda siida ghana lagheanga meeng'meeng'i ghana eagweega. 34Ak ghoanalli agooga gideaba aniini geagasayi aba geattingeasu, ak ghaanyaschi haleanjeeda aba gitteenna, sea fugeandeawi. 35Aba haleanjeessean naahiimneegwa gideaba iisawaneattunu abeeda giweadi fuga ng'arng'ari, nea ghoapkaachchi ng'asheega Ng'uttamiida was Yeesu, heeda eneewa, ‘Ghang'wana giidaydeayda mwasamwa gideaba geegoonnyi,’”

36Iing'atta rukunoodeaba ng'asheesu, gwatkuy ak ghamwaash Aseetta sean. 37Ng'atta gooyyeawda sean ak ghwayiin Baulo daghanuunatka nyaawa nea ghwasam, 38ghwanung' gwaramagu gagiisan sean appadaydeaba ng'asheandida rukutean, bea gideaba maygudu abiikta adaaha gheamamdeanyu. Hean geayaat heeda maleambooda.

Currently Selected:

Gadiyeeda Giijasoodiga 20: DTGANT09

Highlight

Copy