Gadiyeeda Giijasoodiga 11

Betro ghoadaw ganiseeda Yerusaleemu iitta

1Iiduw ghwayiiy giijasoodiga ea fuga siduupcheewi mida ng'eanyiida Yahuudi gideaba eara fuga Emoojiga nimwas ng'asheega Aseetta. 2Gawa Betro Yerusaleemu, ak geenyareeksa nea gwasheang'nyi sea fuga ghasmeahooda, 3nea geeyeeshsha, “Ang'iing'i ghwasaan andaguwi heeda fuga miyeayaat ghasmeahooda ak gimbuchcheewi?” 4Hean iiduw gwarukuta Betro ng'asheega ghayi daa nea ghoong'eada gidaghayi ng'eatta: 5“Ghayi nea geandi jeeda mujiineeda Yoppa nea ghamwaaschi Aseetta; nea geandi jeeda ruweanga, geahiimnaani giduurji hang'da haw, nea gerrareang'na humng'eeda, nea geng'waanyaan meatkwajeega sean assang'wan; ak geanung' ghwaan headeanyu. 6Geang'weesi jeedida nea neekki ak ghaadaayi diyeanga ea diyeanga aga suurja ea diyeanga beawa jeesinga ea dariidakka humng'eeda. 7Ak ghaayiinyi ghuutta eeshshiinean, ‘Betro, Ng'eada; nuusa ak giyaagi.’ 8Geayeeshshi manda Ng'uttamiida, aba gideaba gilinyoo gaba ririnyaan ghana gidamiih miy miighanyi dayiin ghuutteanyu. 9Ghwanya ghuuttida leabu humng'eedean gichcha nea gwayi, ‘Haleanjeeda nimmiidu Aseetta adiguuri haleanjeeda geallaan.’ 10Ng'asheanji gabiikta nibwa samwagu, iiduw geattealda haleanjeesean humng'eeda. 11Hean ghapka fii samwagu aba geeshangiga sicheaksean leabu Gaysariya ak ghapka gheeda eandi. 12Gwayeeshiinean Gurorooda, adeayeewana fiisu nea adibeali. Oorjoosu allah siduupcheewiin eara saawa geadeayeewi, fiisu ghee Gorneliyo. 13Ak gwarukuneasa gidaghayi hissiinda malaykajeanda miinaada ak gwayeeshsha, ‘Ajeakta siida ng'eanyiida Yoppa gaguursa siisi suguura Simon, bea gheawunga suuk suguura Betro; 14niny gaygwarukneey ng'asheega jea gwalealneey, ang'iing'i ea fugeaba gheang'u.’ 15Damani duu dang'eada dhuutta balooldean, hean gwashuubeesa Gurorooda Ghaydit gawuurji gidaghayi sinyasti aseasa aba mwadi. 16Ak ghaapkaachi ng'asheega ghayi rugu Ng'uttamiida bea gideaba, ‘Yohaana goobeattiisana beega, ak agooga gajeepeattiisananeegwa Gurorooda Ghaydit.’ 17Asi iniidaw Aseetta eara fuga emoojiga suuk Gurorooda Ghaydit gidagoondaneasa aseasa damanda simwaseawi Ng'uttamiida was Yeesu Gristo, asi aniini geawoschi ng'eaha daheawa ng'asheega Aseetta?” 18Iiduw nea ghwayiiy ng'asheesu ghwasiinda. Ng'atta geakghambiit Aseetta nea geeyi, “Aseetta niidaw eara Emoojiga gheatta duukkuunooda ak ghwanyas eaweega.”

Ganiiseeda Antiyokiya

19Hean fukka ghayi darda aba sawanadeeda bunu appadayda Stefanohiin gaweay ea gwasheagiidi ea ghwahitta ng'eanyiida Foinikke ea Saypras ea Antiyokkiya, nea gwarukkiida ng'asheanda aba heeda fuga Yahuudi. 20Ak gwanda fuga mwaatkwa, was fuga leabu Saypras ea Grene, amaduw nea ghapka ng'eanyiida Antiyokkiya gobalool eara fuga Yunaani, nea gwarukkwiida iitta Ng'uttamiida was Yeesu. 21Gadiyeani geesna uurda Ng'uttamiida, hean ghamwas fuga saang'a ak ghoahaada buuneeda yamsageat Ng'uttamiida. 22Gageawiit iitteaba ng'asheesu ea ghwahitta iidiga fuga ganiiseeda mida Yerusaleemu, geechcheakta Barnaba gawa Antiyokiya. 23Hitta hooweanji ak ghwadaa dagheerjeandumeeda Aseetta, gahoosan; ak gwayeeshsha fukkeanji oppiidana jeedeaba doobiiwnadi itteang'wean aba heeda Ng'uttamiida nea ghwaarjeang'da; 24aba gideaba niny siida miy gil, ak gwandeawa Gurorooda Ghaydit ea masaweega, ak ghapka fuga saanga heeda Ng'uttamiida. 25Iiduw gawa Barnaba ng'eanyiida Darso gagasa Sauli; 26hean ghwanyas ak gweadu ng'eanyiida Antiyokkiya. Aba gideaba nindeayi gweayda mughuush sea fuga ganiisa, ak ghoanal fuga saang'a; nea aba Antiyokkiya ea heeda madeeda sishsheeda eguura ginealanga fuga Gristohi.

27Aba eawoojikka ghapka sibanga leabu Yerusaleemu ea ghwahidu Antiyokkiya. 28Hean ghamiinaada siyagi aba jeedeaba fukkeanji suguura Agapo ak gwargu ramooraneadaannyi aba uurda Gurorooda, gideaba gayghang'eat geejeeda ng'waan aba muunda ng'eanyiida sean; ghang'eada damanda waseewa Glaudio sugoochcheanda. 29Ghang'eat fukka was ginealangean ak gabaniiaat gida ammu wassean, ak geeyeassa weetta fuga siduupcheewi mida Yudeeyaan; 30ghoawaam lappiyeennyaawa, amahit geattaw Barnaba ea Sauli ghwaat ea ghwaahiitta heeda gweargwa.

Currently Selected:

Gadiyeeda Giijasoodiga 11: DTGANT09

Highlight

Copy