Gadiyeeda Giijasoodiga 1

1Aba gittabooda madeeda, Ea Diofilo, geasinnyi haleanjeessean ghayi sin Yeesu nea ghoanaal, 2ea ghwahitta eaweetta siyaada humng'eeda, iing'atta nea niidaw digheanda giijasoodiga ghayi loat aba naweeda Gurorooda Ghaydit. 3Ak goohiimsa geaw saawa iing'atta miyeeda nea majeek ing'atta sawanadeeda nea ghoahiimda geaw aba gwadeagwajeega saang'a, ak gabussa saawa iing'atta askwearjooji haradam, nea gabaloola iitta sugoochcheandumeeda Aseetta. 4Damanda mideayeewa gwareekusa saawa amwabeawana Yerusaleemu, ak ghoommuughu helleesiinda Ghweanda, nea gwayi, “gooyiing'si headeanyu, 5gideaba, Yohaana goobattiisan aba beega, nea heeda miighang'attaawa eawoojusu saang'a agooga gajeeppattiisaneegwa aba Gurorooda Ghaydit.”

Yeesu geayaat humng'eeda

6Iiduw nea ghabwat geat, geannyaash niny, “Ng'uttamiida, abeeda aba damani gajadeelsiina sugoochcheandumeeda Israeeli?” 7Ng'atta gwayeeshsha saawa, “Miih gadiyeedeang'wa gil nalooda damannyoojiga ghana gheatta sin Bwaabwa aba gheambalmeadaannyi. 8Ak gajanyasa uurda iiwuh heedeang'wa Gurorooda Ghaydit; ak gajahuuwa muushoodigeasu aba Yerusaleemu ea Yuudeeyeessean ea Samariya ea ghoaw muudeanooda ng'eanyiida.” 9Iing'atta rukunoodeaba ng'asheesu, damanda duu gang'ulleewa, gettiing'da humng'eeda, ak gageandeawa shamooghooda madeeda gheanyanga nyaawa. 10Hean nea gudugang'ula humng'eeda damanda beawa, ng'ulla ghamiinaada fii iyyeenya ammurdeeda nyaawa nea gookkwa hang'weakka eashish, 11ak gwayi, “Fuga Galilaaya ghwasaan anda ghoamiinaadi nea gong'ulayi humng'eeda? Yeesuheeni beawa heedeang'wa ak gawa humng'eedean, gaygabiikteaydunu gawuurji gidaghamneawa oadaakti nea gawa humng'eedean.”

Siida hoorgeeda Yuuda

12Iiduw gabiikta Yerusaleemu, nea abeeda gwaleabu gijeeni mida geediga sugura Masaytunajeega neekkeewa mujineeda Yerusaleemu, hitta gilomitteanagi; 13iiduw nea gehitta, gaweay jeemba ghooriini sideeksa uhuumba nuut, ak goobiitpiit geaba Betro, Yohaana, Yakkobo, Andereya, Filippo, ea Domaso, Batlomayo, ea Mattayo, Yakkobo balleanda Alfayo, Simoneeda Selotte, ea Yuuda balleanda Yakkobo. 14Fiisu abeeda ghabwat geat ghamwash Aseetta ghawooda, ak gwanda jeedeaba gadeemsu Mariyayda was gheamatta Yeesu, ea oorjooga ghaamwat. 15Aba eawoojikka ghang'eat Betro ghamiinaada aba jeeda fuga siduupcheewi (nea abeeda monneeda buuneeda ghwahitta bughala ea diktam), ak gwayeeshsha, 16“Fuga suduupcheewi, gaygwasa ng'ooruutka, ghayi rugu Gurorooda Ghaydit ammwadi aba ghuutta Dawdi, appadayda Yuudayda was siida asheedeawa fuga ang'ng'waay Yeesu. 17Yuuda abeeda gaba meatkweendeanya aba gideaba gealoat eara niny gwasin gadiyeeni.”

18(Ng'atta ghwasha siisi madamnyeanda aba gissiittaw aba munyindaannyi; ak ghoabeadaawa uhuuda ak ghwanyar jeeda ak gwardu hineagaaschi jarooda. 19Ghwanal buuneessean bea ng'eanyida Yerusaleemu hean geng'assa madamnyeandida gheawunga ak geguura, “Akealdama” nea gideaba madamnyeanda foojeanda.) 20“Aba gideaba geeng'orsa jeeda gittabooda Nyigheega gideaba,

‘Gagasa ghoaw gheannyi emeeda ak ea adagoobida sii jeada;’

nea

‘Hoorgeadaannyi bea gadiyeeda dageanda sinuut.’ 21Nea siyagi aba jeeda fuga siitteayeewi damannyoojiga sean wuna Ng'uttamiida was Yeesu nea gwaritteawa jeedeanya, 22ghang'eada gibattiisanda Yohaana ea gagul eaweetta ghayi siyaada humng'eeda nea ghabeawa heedeanya nea siyagi aba jeedeaba fiisu geaghus eetteayeena ghoaw muushoochcheanda aba duunnoadaannyi.”

23Hean iduw geergu gheawung'spa fii iyeenya, Yosefeeda suguura Barsaba nea ghaawun suuk geguura Yusto, ea Mathiya. 24Ng'atta geamwash Aseetta nea geeyi, “Ng'uttamiida, ang'iing'i ginali guroruunatka buuneessean, asi ahiimneasa aba jeedeaba fiisu assiyeenyean siida iloadi, 25ak gwasin gadiyeeni bea giijasoochcheandumeedean, gawa horgeeda ghayi bea Yuuda nung'usa heeda niny ak gawa hich nuut.” 26Ng'atta geeng'alealleesa saawa, ak iiduw gealoat Mattiya; ak gheawungaaschi geeng'oorsiinnyi sea gea giijasoodikka attamwanagiin.

Currently Selected:

Gadiyeeda Giijasoodiga 1: DTGANT09

Highlight

Copy