NÁN RÓMA VɄ 5

Mbaalı̵́ ká̧'a̧d kan Tayɨɨɨ

1Tayɨɨ ka tii ba ví nán to̧o̧g woo vu̵ ı̵́ yo̧go̧, moo zó̧ó̧ 'yɛ́lı̵́lı̵́ máa, ba nuŋ ví ká̧'a̧d woolı̵́, moo ı̵́ 'yɛ́lı̵́ baa ví Yesu Krístu woo nɔ. 2Yúú woolı̵́ ma, ba nuŋ ví kɛb yúú zó̧ó̧ 'yɛ́lı̵́lı̵́, ba séé ví la sı̵́ Tayɨɨ woolı̵́ ú̵. Ba dɨ ví sı̵́ zó̧ó̧ nán woolı̵́. Hȩn ka dȩ'ȩd ba ví zó̧ó̧ máa, wu̵ kaa 'yɛ́ ví zó̧ó̧ moo ba báń nuŋ ví na"ȩ́ Tayɨɨ woolı̵́ ú̵ má nɔ. 3Moo hȩn yȩ vu̵ yu̵ dágá pɛ́lı̵́, a̧máa ba dȩ' ví zó̧ó̧ moo kaa nuŋ ví hȩn ndɔ́gɔné á̧ḿ má nɔ, moo ba gaa ví hȩn ndɔ́gɔné wu̵ pú̵ zó̧ó̧ ma"ȩ́. 4Zó̧ó̧ ma"ȩ́ wu̵ kɔ́ ma, ba sȩn fó̧ó̧ ya hȩn zo"ı̵́lı̵́. Kaa sȩn fó̧ó̧ ya hȩn zo"ı̵́lı̵́ tée, ba nuŋ zó̧ó̧ 'yɛ́lı̵́ wu̵lı̵́ á̧ḿ. 5Zó̧ó̧ 'yɛ́lı̵́ kɔ́ hȩn sɔn woo né, moo Tayɨɨ pú̵ ba ví zó̧ó̧ nán woo zó̧ó̧ baa vílí, kan yigid woo ka pú̵ ba ví yȩlȩ́ á̧ḿ.

6Ká tíŋ́ máa ba ví kan néélȩ́ pɛ́lı̵́, ma Krístu nɔɔ moo nán kaa duunɔ ví ní yȩ baa ví nu, kɔ́ ı̵́ Tayɨɨ ka gə bá' woo máa wɔgɔ. 7Nán tóó a nɔɔ moo nán yȩ́ń tóó woo nɔ máa, təə ú̵. Sey tóó tée, maa nánán tóó kan ma' zó̧ó̧ nɔɔ moo nán to̧o̧ woo nɔ. 8A̧máa Tayɨɨ tú'ud ba ví aa gaa ví bin hí̧í̧ ba ví 'yɛ́nné, moo ká ba ví nán hȩn ɓı̵́d kɔ́lı̵́ɨ, ma Krístu ya nɔɔ moo baa ví. 9Tayɨɨ to̧n kan ba ví yúú nɔm Krístu woolı̵́, tée báń sə́d ví zó̧ó̧ yȩ́ȩ́ Tayɨɨ woolı̵́ yúú ba'ad woo ka dɨ kɔ́lı̵́ yȩlȩ́. 10Ká ba mbaa ví ı̵́ maag Tayɨɨ woo vu̵ yu̵, ma duu mbɔ́g moo kan ba ví yúú nɔm Waa woo woolı̵́. Kaa to̧n ví kannɔ yȩ, báń sə́n ví yúú ba'ad ka dɨn kɔ́lı̵́ yȩlȩ́ náa? 11Hȩn gbo̧o̧ tóó kéé dɨlı̵́. Ba dȩ' ví zó̧ó̧ Tayɨɨ woolı̵́, moo ı̵́ 'yɛ́lı̵́ baa ví Yesu Krístu wu̵ mbɔ́gɔ́n ba ví kan Tayɨɨ.

Adamú vu̵ kan Krístu wu̵

12Hȩn ɓı̵́d dɔ́ ya hágá yɛlı̵́, moo nán dágá woo nɔ, yéé woo Adamú. Hȩn ɓı̵́d wu̵ pa̧ŋ nɔm yaan, ma nɔm maa nánán vu̵ 'waapád, moo nán 'waapád vu̵ kɔ́ hȩn ɓı̵́ddɨ.

13Múúsa ka pan ná dooká woo né máa, hȩn ɓı̵́d ká dɨlı̵́, a̧máa dooká Múúsa woo ká ku̵u̵ pɛ́lı̵́ máa, Tayɨɨ ká si̧'i̧n nán vu̵ moo hȩn ɓı̵́d voo vu̵ né á̧ḿ. 14Kóó ı̵́ yo̧go̧ si̧', nɔm wu̵ waa gbaŋ yúú nán ku̵u̵ kɔ́n hȩn ɓı̵́d man kan ı̵́ Adamú woo 'má' né máa voolı̵́ á̧ḿ, dəŋ ya bá' Adamú woolı̵́ há̧á̧ ya̧ bá' Múúsa woo. Adamú máa, man kan nán ka yaa pig woolı̵́ má nɔ.

15A̧máa hȩn kɔ́lı̵́ sɔnné Adamú woo yȩ, ba gú̵gú̵nɔ kan hȩn pú̵lı̵́ Tayɨɨ woo né. Moo yȩ́ńne, nán 'waapád vu̵ nɔɔ moo nán dágá woo nɔ. A̧máa zó̧ó̧ nán Tayɨɨ woo ká kɔ́ kan hȩn ka pú̵ nán vu̵ leená máa, wu̵ mba hȩn. Hȩn yȩ kɔ́y moo nán dágá woo nɔ á̧ḿ, wu̵ Yesu Krístu wu̵. 16Hȩn pú̵lı̵́ Tayɨɨ woo man kan hȩn ı̵́ nán hȩn ɓı̵́d kɔ́lı̵́ dágá yȩ ka pú̵n máa né. Moo sə̧"ȩ́ máa ka yaa yúú nán hȩn kɔ́lı̵́ sɔnné woolı̵́ yȩ, wu̵ sə̧' moo nɔm woo; a̧máa hȩn pú̵lı̵́ lee yȩ, yaa woo pig hȩn ɓı̵́d kɔ́lı̵́ na'a yȩlȩ́, wu̵ kɔ́ Tayɨɨ to̧n kan nán vu̵. 17Moo yȩ́ńne, nán dágá wu̵ kɔ́, ma nɔm ka waa gbaŋ moo hȩn kɔ́lı̵́ sɔnné nán dágá woo yɛ nɔ. A̧máa ı̵́ kaa nuŋ ví zó̧ó̧ nán Tayɨɨ woo na'a, kaa to̧n ví kannɔ té' yȩ, báń nuŋ ví vágád, báń waa ví gbaŋ moo Yesu Krístu woolı̵́ dágá.

18Hȩn Adamú ka kɔ́ sɔd yȩ wu̵ dɔd nán vu̵ ya moo sə̧"ȩ́lȩ́ 'waapád. A̧máa báń to̧n ví kan Tayɨɨ yúú hȩn to̧o̧g kɔ́lı̵́ nán dágá yȩ woolı̵́, Yesu Krístu ka səd nán vu̵ 'waapád, u̵u̵ nuŋ vágád wu̵lı̵́ yȩ nɔ. 19Tɔ́g ŋgó̧ó̧lȩ́ nán dágá woo ka kɔ́ nán 'waapád ku̵u̵ kɔ́ hȩn ɓı̵́d yȩ; tɔ́g kilí nán dágá woo wú̵ń kɔ́ nán 'waapád vú̵ń to̧n kan Tayɨɨ á̧ḿ.

20A̧máa dooká Múúsa woo vu̵ dɔ́ ya voo moo hȩn kɔ́lı̵́ sɔnné a ɓu̵u̵ ú̵! Ya hȩn ɓı̵́d kɔ́lı̵́ ka hi̧' wu̵lı̵́ máa, zó̧ó̧ nán Tayɨɨ woo hi̧' mba hȩn du̵u̵lı̵́ á̧ḿ. 21Hȩn ɓı̵́d ka waa gbaŋ moo nán u̵u̵ nɔɔ ó̧ máa, zó̧ó̧ nán Tayɨɨ woo waa gbaŋ yúú hȩn hí̧í̧lí̧ woo ka kɔ́y yȩlȩ́, moo bi pa̧ŋ ba ví laan vágád ı̵́ káákáálı̵́ moo Yesu Krístu ı̵́ 'yɛ́lı̵́ baa ví woolı̵́ á̧ḿ.

Currently Selected:

NÁN RÓMA VɄ 5: DIINT

Highlight

Copy