NÁN RÓMA VɄ 2
2
Tayɨɨ sə̧' moo yúú nánán voolı̵́
1Ɨ́ móó káḿ sə̧' moo yúú dam voolı̵́ yȩ, mɔ́ kan ya̧g moo su̵u̵né pɛ́lı̵́. A̧máa mɔ́ kɔ́ hȩn káḿ sə̧'ə̧n moo yúú dam voolı̵́ yȩ á̧ḿ, ma aga mɔ́ sə̧' moo fó̧ó̧ móólȩ́ sú̵'ú̵. 2Ba gaa ví Tayɨɨ sə̧' woo moo kan yȩ́ń yúú nán ku̵u̵ kɔ́ hȩn ɓı̵́d yȩ voolı̵́. 3Ɨ́ móó káḿ kɔ́ hȩn ɓı̵́d, ma káḿ sə̧' moo yúú dam voolı̵́, káḿ duu kɔ́ hȩn woo á̧ḿ yȩ, mɔ́ taa ba bíń sə́d moo sə̧"ȩ́ Tayɨɨ woolı̵́ áa? 4Tóó tée mɔ́ ɓéé zó̧ó̧ to̧o̧ Tayɨɨ ka kɔ́ na'a, kan zó̧ó̧ ma"ȩ́, kan zó̧ó̧ ká̧'a̧d woo yȩ naa? Mɔ́ gaan zó̧ó̧ to̧o̧ Tayɨɨ woo bannɔ tiin mbaalı̵́ ɓı̵́d bii máa náa? 5A̧máa zó̧ó̧ móó ka sɛ́n tɔ́g kilí ní, káḿ sɛ́n zó̧ó̧ móó tiiní ní á̧ḿ yȩ, mɔ́ tii soo hȩn Tayɨɨ a si̧'i̧d bi si̧'i̧ní gbo̧o̧ mɛ́ń, zá̧ga̧ hȩn si̧'i̧ní woolı̵́ tée, zá̧ga̧ woo nán vú̵ń ho̧ moo sə̧"ȩ́ yȩ́ń woo. 6Tayɨɨ wú̵ń sú̵ú̵ kóó nɔ́nná hȩn yúú ba'ad woo ka kɔ́ máalȩ́. 7Nán ı̵́ ku̵u̵ ma' zó̧ó̧ kɔ́ hȩn du̵u̵, ku̵u̵ soo na"ȩ́, kan dəmné, kan vágád yȩ, wú̵ń pú̵ vu̵ vágád káákáá dáŋ́ woolı̵́. 8A̧máa nán ı̵́ ku̵u̵ kɔ́ddu̵ kɔɔg, ku̵u̵ kin moo yȩ́ń tɔ́g né, ku̵u̵ tii mbaa mbaalı̵́ ɓı̵́d mɛ́ń yȩ, wú̵ń sə̧'ə̧d vu̵ moo kan zó̧ó̧ yȩ́ȩ́.
9Hȩn ndɔ́gɔné kan hȩn zó̧ó̧ to̧"ȩ́ vú̵ń maa nán ku̵u̵ kɔ́ hȩn ɓı̵́d máa vu̵ 'waapád. Vú̵ń dəŋ maa nán Yúúda vu̵ yu̵, tée nán ı̵́ ku̵u̵ Yúúda pɛ́lı̵́ máa vu̵ á̧ḿ. 10A̧máa Tayɨɨ wú̵ń pú̵ nán ı̵́ ku̵u̵ kɔ́ hȩn du̵u̵ máa vu̵ na"ȩ́, kan hȩn dəmné, kan mbaalı̵́ ká̧'a̧d. Wú̵ń dəŋ kan nán Yúúda vu̵, tée nán ı̵́ ku̵u̵ Yúúda pɛ́lı̵́ máa, vú̵ń nuŋ á̧ḿ, 11moo Tayɨɨ səgən nánán né.
12Nán ı̵́ ku̵u̵ gaan dooká Múúsa woo vu̵ né, ma ku̵u̵ kɔ́ hȩn ɓı̵́d máa, vú̵ń ti, kóó u̵u̵ gaan dooká yȩ vu̵ né á̧ḿ si̧'. A̧máa nán ı̵́ ku̵u̵ gaa dooká Múúsa woo vu̵, ma ku̵u̵ duu kɔ́ hȩn ɓı̵́d á̧ḿ máa, Tayɨɨ wú̵ń sə̧' moo yúú voolı̵́ kɔ́ ı̵́ dooká yȩ ku̵u̵ o̧ wɔgɔ. 13Nán ku̵u̵ ki dooká Tayɨɨ woo vu̵ té' máa, vu̵u̵ to̧o̧n Tayɨɨ né, a̧máa nán ı̵́ ku̵u̵ duu dooká woo yȩ vu̵ máa, vu̵u̵ to̧o̧du̵. 14Nán ı̵́ ku̵u̵ gaan dooká Múúsa woo vu̵ né, ku̵u̵ zig Yúúda pɛ́lı̵́, ma ku̵u̵ kɔ́ hȩn dooká yȩ ku̵u̵ o̧ á̧ḿ, kóó u̵u̵ 'yɛ́n dooká Múúsa woo vu̵ nagá né si̧', vu̵ dɨ kan moo Tayɨɨ zó̧ó̧ voolı̵́. 15Hȩn woo tú', hȩn dooká yȩ ku̵u̵ o̧ máa, ba dɨ zó̧ó̧ voolı̵́ á̧ḿ. Yɛ́g tóó baa tú'ud vu̵ hȩn zó̧ó̧ voolı̵́; moo taalı̵́ voo vu̵ tú'ud vu̵ hȩn ka maa kɔ́lı̵́, tóó tée kan hȩn ka maan kɔ́lı̵́ né á̧ḿ. 16Zá̧ga̧ Yesu Krístu a sə̧' moo kan yɛ́g Tayɨɨ woo máa, hȩn ı̵́ ku̵u̵ yú̵g mbaa nánán voolı̵́ 'waapád yȩ, vú̵ń vúd. Moo yɛ duu moo to̧o̧ 'maŋ káń tú' má nɔ.
Hȩn moo Tayɨɨ ka o̧ yúú nán Yúúda voolı̵́ má nɔ
17Ɨ́ móó káḿ nán Yúúdaɨ, káḿ nda doo dooká Múúsa woo vu̵lı̵́, káḿ na' yúú móó yúú Tayɨɨ woolı̵́ yȩ, 18mɔ́ gaa hȩn Tayɨɨ ka hí̧í̧ máa ó̧; moo Tayɨɨ woo tú'um a̧m yee hȩn ı̵́ ka du̵u̵ máa á̧ḿ. 19Ma mɔ́ taa ba bin tú'ud nán yə̧m vu̵ hi̧naaȩ. Móo bi túd nán ku̵u̵ mbaa ya dimmí máa vu̵ kɔ́ ı̵́ lám wɔgɔ, 20bi tú'ud nán ı̵́ ku̵u̵ gaan hȩn né máa vu̵ hȩn gaalı̵́, bi tú'ud náásá̧ŋ́ waa vu̵ hȩn á̧ḿ, moo mɔ́ gaa moo Tayɨɨ woo ba wu̵ tú' hȩn dȩ"ȩ́ na'a, kan moo yȩ́ń á̧ḿ. 21A̧máa ı̵́ móó káḿ baa tú'ud dam vu̵ hȩn yȩ, moo ȩn káḿ tú'un fó̧ó̧ móó hȩn nélá? Ɨ́ móó káḿ pa moo u̵u̵ kɔ́ líw sá yȩ, moo ȩn káḿ kɔ́ líwwá? 22Ɨ́ móó káḿ o̧ u̵u̵ kɔ́ ɓáa sá yȩ, moo ȩn káḿ kɔ́ móólá? Ɨ́ móó káḿ kɔ́ zó̧ó̧ yȩ́ȩ́ moo tayɨɨ lee voolı̵́ yȩ, moo ȩn mɔ́ vbid hȩn lig hȩn ha"ı̵́ voolı̵́lá? 23Mɔ́ dəm fó̧ó̧ móó, bi mbaa kan moo Tayɨɨ woo nɔ, a̧máa mɔ́ kɔ́d Tayɨɨ hȩn sȩ́ḿ, mɔ́ duun moo woo né, 24moo debtere o̧: “Moo nán Yúúda víí nu ma, zig nán tóó vu̵ haa Tayɨɨ.”
25A̧m duu dooká Múúsa woo vu̵ tée, do̧ŋ dɔ́lı̵́ nán Yúúda voo#2:25 do̧ŋ dɔ́lı̵́ nán Yúúda voo nán Yúúda vu̵ dɔ́ do̧ŋ moo bi tii nán Tayɨɨ woo vu̵ yu̵. du̵u̵m sú̵'ú̵, a̧máa tow a̧m duun dooká yȩ vu̵ né tée, mɔ́ lá zagaɨ. 26Tow zaga tóó a duu dooká Múúsa woo, a kɔ́ hȩn woo tée, Tayɨɨ wú̵ń 'yɛ́gɛ kɔ́ ı̵́ naa do̧ŋ wɔgɔ; ı̵́ yo̧go̧ náa? 27Nán ka dɔ́n do̧ŋ ı̵́ fó̧ó̧ȩ né, a̧máa ka duu dooká Tayɨɨ woo vu̵ tée, wú̵ńnɔ sə̧' moo yúú móólȩ́, nán ı̵́ káḿ ɓéé dooká Tayɨɨ woo vu̵ yȩ mɔ́ yo̧, kóó káḿ 'yɛ́ debtere Tayɨɨ woo nagá, káḿ dɔ́ do̧ŋ yȩ nɔ si̧'.
28Nán Yúúda ı̵́ də́ń kəd máa, wu̵ nán ı̵́ ka kɔ́ hȩn moo nán u̵u̵ ho̧ má nɔ pɛ́lı̵́. Naa do̧ŋ ı̵́ də́ń kəd máa, wu̵ nán ı̵́ ka dɔ́ do̧ŋ fó̧ó̧ woolı̵́ má nɔ pɛ́lı̵́ á̧ḿ. 29A̧máa nán Yúúda aga də́ń kəd máa, wu̵ nán ı̵́ ka 'yɛ́ zó̧ó̧ Tayɨɨ woolı̵́,#2:29 ka 'yɛ́ zó̧ó̧ Tayɨɨ woolı̵́ vu̵ bíńda “ka dɔ́ do̧ŋ zó̧ó̧lȩ́” kan ya̧g gɛrɛ́ggɨ. ka dɔ́ do̧ŋ kan yigid Tayɨɨ woo má nɔ, a̧máa moo dooká ı̵́ ku̵u̵ bíńda máa woo nɔ pɛ́lı̵́. Nán Yúúda də́ń kəd máa, nán vu̵u̵ na'anɔ né, a̧máa Tayɨɨ wu̵ na"o̧.
Currently Selected:
NÁN RÓMA VɄ 2: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
