NÁN RÓMA VɄ 15

Ba soo hȩn ka to̧o̧d nán tóó vu̵ á̧ḿ, a̧máa a moo baa nɔ dágá sá

1Ɨ́ baa ví kaa néé ví kan zó̧ó̧ 'yɛ́lı̵́ yɛ, ba maa ví nán ı̵́ ku̵u̵ néen voo né máa vu̵ á̧ḿ; ba soo ví hȩn ı̵́ ku̵u̵ to̧o̧d ba ví máa vu̵ yu̵ dágá sá. 2Kóó nɔ́nná a kɔ́ hȩn a to̧o̧d daga tóó má nɔ, moo a laa kan zó̧ó̧ 'yɛ́lı̵́ tíŋ́ tíŋ́, 3moo Krístu kɔ́n hȩn ka to̧o̧n fó̧ó̧ woo má nɔ né, a̧máa debtere o̧: “Nán ku̵u̵ haam máa, du̵g móó yȩ yaa dɨ yúú míílí̧.”

4Hȩn kaa nuŋ vu̵ ví debterelı̵́ máa, ká vu̵ bíńda vu̵ moo u̵u̵ tú'ud ba ví mooɨ, moo aa 'yɛ́ ví zó̧ó̧ Tayɨɨ woolı̵́ yúú hȩn zó̧ó̧ ma"ȩ́ kan zó̧ó̧ ziginí debtere ka tú'ud ba ví yȩlȩ́. 5Tayɨɨ pú̵ ba ví zó̧ó̧ ma"ȩ́, zigid ba ví zó̧ó̧ á̧ḿ, tée a sȩn ví fó̧ó̧ moo i 'yȩ́ŋ́ mbaalı̵́ Yesu Krístu woo, há̧á̧ i to̧n ya víílí. 6Tée ya víí 'waapád víń su̵g ya̧g na' Tayɨɨ Ba' ı̵́ 'yɛ́lı̵́ baa ví Yesu Krístu woo.

Moo to̧o̧ 'maŋ mbaad zig nán vu̵ 'waapád

7I fȩ́ȩ́n ya víílí ú kɔ́ ı̵́ Krístu ka fȩȩ ví wɔgɔ, moo Tayɨɨ a nuŋ na"ȩ́ wu̵lı̵́. 8Mí hí̧í̧ bi o̧d ví, Krístu tii nán ba'ad nán Yúúda voo, moo ya̧g Tayɨɨ ka tad a vɔ́ yée vu̵ yȩ a dɔ́ sé' woolı̵́, moo aa gaa ví Tayɨɨ ba ta ya̧g buu ní má nɔ. 9Krístu yaa moo nán ı̵́ ku̵u̵ Yúúda pɛ́lı̵́ máa u̵u̵ na' Tayɨɨ yúú zó̧ó̧ to̧o̧ woo yȩlȩ́ á̧ḿ, kɔ́ ı̵́ debtere ka o̧:

“Moo woo nɔ míń na' yɛ́g móó sa̧a̧m zig nán tóó voolı̵́,

míń bee yéé dəmmɔ́.”

10Debtere duu o̧:

“Zig ı̵́ yȩ, i sú̵g dȩ' zó̧ó̧ kan zig Tayɨɨ woo yȩ nɔ!”

11Duu faa o̧:

“Zig yȩ ví 'waapád, i na' ı̵́ 'yɛ́lı̵́ Tayɨɨ la ú̵!

Nán hág 'waapád yȩ ví, i na"o̧ la ú̵.”

12Esáya á̧ḿ o̧:

“La' do̧o̧ wú̵ń duu hȩȩ waa, waa Izáy woo wú̵ń yaa dɨlı̵́.

Wú̵ń lúú waa gbanii yúú zig nán voolı̵́.

Vú̵ń 'yɛ́ zó̧ó̧ voo woolı̵́.”

13Tayɨɨ ka pú̵ ba ví zó̧ó̧ 'yɛ́lı̵́ yȩ, a kɔ́ zó̧ó̧ víí a dȩ', a pú̵ ví mbaalı̵́ ká̧'a̧d yúú moo woo kíí 'yɛ́ zó̧ó̧ víí wu̵lı̵́ yȩlȩ́, moo i 'yɛ́ zó̧ó̧ víí woolı̵́ kəd kan néélȩ́ yigid Tayɨɨ woo nɔ.

Ya̧g ba'ad Tayɨɨ ka pú̵ Pól má nɔ

14Dan kirtȩ́n vu̵, mí gaa míí zó̧ó̧ to̧o̧ hi̧' dɨ víílí, kan hȩn gaalı̵́ á̧ḿ, víń dɨ kan néélȩ́ gagad da ví vu̵ moo ya víílí ú. 15Kóó ı̵́ yo̧go̧ si̧', mí bíńda ví la moo ı̵́ ka' tóólı̵́ vu̵ ɗerwəl yɛlı̵́ ha̧d, moo bi ta'ad o̧d ví hȩn tóó kíí ki tíŋ́ máa vu̵ yu̵. Mí bíńda ví kan néélȩ́ Tayɨɨ ka pú̵n yɛ, 16moo a̧n mbaa nán ba'ad Yesu Krístu woo yúú nán ı̵́ ku̵u̵ Yúúda pɛ́lı̵́ máa voolı̵́. Mí kɔ́d Tayɨɨ ba'ad, mí pa moo to̧o̧ 'maŋ woo, moo zig ı̵́ ku̵u̵ Yúúda pɛ́lı̵́ máa u̵u̵ tii mbaa kɔ́ ı̵́ hȩn ha"ı̵́ ka to̧o̧d Tayɨɨ máa wɔgɔ, u̵u̵ tii mbaa nán woo vu̵ kan yigid Tayɨɨ woo nɔ.

17Moo woo nɔ mí dəm fó̧ó̧ míí Yesu Krístu woolı̵́, kan yúú ba'ad káń kɔ́d Tayɨɨ yȩlȩ́ á̧ḿ. 18Tow a̧n moo moo yúú hȩn tóólı̵́ tée, Krístu wu̵ kɔ́n kan fó̧ó̧ míí, moo a̧n pa̧n bi zig ı̵́ ku̵u̵ Yúúda pɛ́lı̵́ máa vu̵ ya, u̵u̵ kid Tayɨɨ tɔ́ggɨ. Krístu kɔ́ hȩn yȩ kan moo moolȩ́ míí, kan ba'ad míí á̧ḿ, 19kan néélȩ́ hȩn sa̧ga̧ vu̵ kɔ́lı̵́, kan hȩn zálı̵́ vu̵, kan néélȩ́ yigid Tayɨɨ woo. Ma mí baa tú' moo to̧o̧ 'maŋ Krístu woo ı̵́ yo̧go̧ ya ɓu̵u̵lı̵́ na'a, dəŋ Yerúsalemmé há̧á̧ ya̧ hág Iliríilí. 20A̧máa mí dii moo to̧o̧ 'maŋ palı̵́ duu də́ń ya ku̵u̵ kin ná moo Krístu woo wu̵lı̵́ né máalȩ́, moo mí hí̧í̧ bi ha'an ba'ad míí yúú ba'ad nán tóó voolı̵́ né. 21Hȩn woo kɔ́y kɔ́ ı̵́ debtere ka o̧ wɔgɔ:

“Nán ı̵́ ku̵u̵ o̧n vu̵ lá moo woo né máa, vú̵ń ho̧go̧ ó̧;

nán ı̵́ ku̵u̵ kin ná moo woo né máa, vú̵ń ki á̧ḿ.”

Pól moo ba bíń laa kaa gbaŋ Rómalȩ́ ó̧

22Hȩn ka há'an laalı̵́ víílí do' ɓu̵u̵lı̵́ na'a máa, wu̵ yȩ nɔ. 23A̧máa 'ya̧'a̧ yɛ máa, ba'ad míí 'wáa sı̵́ hág yȩ vu̵lı̵́ ú̵. Mí baa taa ve' kan ve' bi la ho̧ ví ú. 24A̧n dɨ laalı̵́ hág Ɛspá̧yyə̧lȩ́ tée, mí taa míń dii ho̧ ví wu̵lı̵́. Sey a̧n la mbaa víílí, zó̧ó̧ a ka̧'a̧n ɗı̵́d; a̧n nuŋ hȩn tóó víílí, i ba'an sú̵'ú̵ tée, míń daa laa hág yȩlȩ́.

25A̧máa 'ya̧'a̧ yɛ máa, míń dɨ laalı̵́ Yerúsalemmé, míń pa̧n nán Tayɨɨ woo ku̵u̵ du̵u̵lı̵́ yȩ vu̵ hȩn tóó pȩ́ń. 26Nán kirtȩ́n ı̵́ hág Masedo̧wá̧nné vu̵, kan ı̵́ hág Gɛrɛ́ggı̵́ vu̵, vu̵ mbɔ́g moo bi pú̵ hȩn tóó moo nán Tayɨɨ woo ı̵́ gíḿ Yerúsalemmé voo nɔ. 27Aga vu̵u̵ taa ı̵́ yo̧go̧, a̧máa maa ó̧ á̧ḿ. Nán kirtȩ́n ı̵́ Yerúsalemmé yȩ, ká vu̵ pa̧n nán ku̵u̵ Yúúda pɛ́lı̵́ máa vu̵ moo Tayɨɨ sú̵'ú̵. Maa nán ı̵́ ku̵u̵ Yúúda pɛ́lı̵́ yȩ u̵u̵ pú̵ nán kirtȩ́n Yúúda vu̵ hȩn naa ı̵́ voo ka' tóó á̧ḿ. 28A̧n pa̧ŋ hȩn pú̵lı̵́ yȩ pú̵ vu̵ 'waa sú̵'ú̵ tée, míń ya̧a̧ duu víílí, míń laa hág Ɛspá̧yyə̧lȩ́. 29Mí gaa a̧n lúú laa víílí tée, míń laa kan hȩn baggı̵́ Krístu woo 'waapád.

30Dan kirtȩ́n vu̵, yigid Tayɨɨ woo pú̵ ví zó̧ó̧ nán sú̵'ú̵; ma hȩn káń hí̧í̧ bi ɓá' ví kan yɛ́g Yesu Krístu woo máa, wu̵ yɛ nɔ, ba sú̵g kɔ́ ví sɨɨ, i ɓá'an Tayɨɨ, 31moo a̧n sə́d nag nán Yúúda ı̵́ ku̵u̵ kan zó̧ó̧ 'yɛ́lı̵́ pɛ́lı̵́ yȩ voolı̵́. I ɓá' Tayɨɨ yúú hȩn káń dɨd zig Tayɨɨ woo pa̧né dɔg Yerúsalemmé yɛ á̧ḿ, u̵u̵ fȩȩwo̧ du̵u̵ na'a. 32Moo woo nɔ Tayɨɨ a hí̧í̧ ú̧ tée, míń ya̧ la víílí kan zó̧ó̧ dȩ"ȩ́, míń nəə víílí du̵u̵ na'a á̧ḿ. 33Tayɨɨ ı̵́ ká̧'a̧d pú̵lı̵́ yȩ a mbaa kan ví 'waapád, aamɛ́n.

Currently Selected:

NÁN RÓMA VɄ 15: DIINT

Highlight

Copy