Márkus Moo dənée
Moo dənée
Sa̧a̧m moo to̧o̧ 'maŋ ndaddú̵ yȩ voolı̵́ 'waapád máa, ı̵́ Márkus woo wu̵ lú̵gu̵ né, a̧máa wu̵ moo see mba ı̵́ tóó yȩ vu̵.
Diga dəné Márkus woo máa, tú' Yesu ba Waa Tayɨɨ woo nɔ (1:1). A̧máa yéé yȩ mbaa hȩn zálı̵́ɨ. Kóó ı̵́ yo̧go̧ si̧', Márkus vud yéé yɛ ya tóólı̵́ ɓu̵u̵lı̵́ na'a debtere woolı̵́ (ba ho̧ 1:11; 9:7; ba ho̧ á̧ḿ 3:11; 5:7). A̧máa Yesu hí̧í̧ yéé yȩ a mbaa ya yú̵ggı̵́lı̵́ (ba ho̧ 5:43; 7:24; 8:30; 9:30). Moo ȩná? Moo sey aa ho̧ ví nɔm Yesu woo la' vbagadı̵́ tée, báń gaa ví ba Waa Tayɨɨ woo nɔ. Tée báń sú̵g ví kan ı̵́ nii só̧ó̧ze nán Róma voo á̧ḿ, báń gaawu̵ ví sú̵'ú̵.
Dɨ ı̵́ yo̧go̧, nán ba'ad gbo̧o̧ ı̵́ yo̧go̧ ka vúd yaa baalı̵́ tée, ba fȩȩwo̧ kan dəmné woo nɔ. Ba'ad ı̵́ Yoohá̧na ı̵́ mam Tayɨɨ wooné woo máa, wu̵ nánán Tayɨɨ woo vu̵ mbɔ́ggı̵́ɨ (1:2-8). Wu̵ woo Yesu mam Tayɨɨ á̧ḿ (1:9-11).
Ɨ́ yo̧go̧, pig woo máa hȩn zo"ı̵́ maa Yesu wu̵ dágá (1:12-13). Pig hȩn zo"ı̵́lı̵́ máa, Yesu dəŋ mbaalı̵́ sa̧a̧m nánán voolı̵́ ma. A̧máa sey Márkus ka ho̧ Yesu ka bee nán vu̵ u̵u̵ duu bi ú, ka tú'ud dúú vu̵ moo, ka za̧a̧ kan nán ho̧o̧ vu̵ á̧ḿ máa, Márkus tú' néélȩ́ Yesu woo yúú hȩn yȩ vu̵lı̵́ (dəŋ 1:14 há̧á̧ a 'wáa 8:30 woolı̵́).
Moo pəgəné Márkus woo ya idú máa, tú' Yesu ba 'waa ba'ad woo vu̵ ya hȩn ndɔ́gɔnélȩ́, kan nɔm woo, kan nímní woo nɔmmé ka mbaa laawu̵ Yerúsalemmé yȩ (dəŋ 8:31 há̧á̧ a 'wáa 10:52 woolı̵́). Yesu o̧d waa duulí woo vu̵ moo do' ta̧a̧nɔ́, a̧máa vu̵ kin ní sá̧ḿ. Yesu moo moo 'waapád yaan fó̧ó̧ woolı̵́, tú' fó̧ó̧ woo ba “ı̵́ Tayɨɨ ka ba"u̵ ya yɛ” nɔ. A̧máa nán vu̵ kin moo Yesu woo né, kóó a kɔ́ ba'ad gbo̧o̧ vu̵ ɓu̵u̵ ú̵ si̧'.
Yesu ka dɔ́ la kaa Yerúsalemmé máa, nán vu̵ fȩȩwo̧, vu̵ ta'adu̵ nag. Yesu nɛ́ŋ́ nán hȩn sɔ́g gílí vu̵ vud 'waapád lig hȩn ha"ı̵́lı̵́, a̧máa ı̵́ nii Yúúda vu̵ duunɔ moo. Ɨ́ Yesu woo máa, moo tú"í sí̧'í̧d woo a tú'ud ı̵́ maag woo vu̵ nɔ́ɔ́ dúú voolı̵́ máa, wu̵ yȩ nɔ, kan nɔ́ɔ́ waa duulí woo voolı̵́ á̧ḿ (sapíitər 11-13).
Sapíitər 14 kan 15 idú yɛ vu̵ tú' moo yúú bá' sí̧'í̧d Yesu woolı̵́ ú̵. Ba ki moo hȩn lálı̵́ sí̧'í̧d Yesu woo kan waa duulí woo vu̵ wu̵lı̵́ (vu̵ yȩ'ȩn beréd kan doo), Tayɨɨ ɓá"ı̵́ Yesu woo bab Gɛdsɛ́manɛ́ɛlȩ́, ma"ȩ́ woo, kan moo sə̧"ȩ́ yúú woolı̵́, ga"ı̵́ woo yúú la' vbagadı̵́, kan dɔnné woo bɛ́ɛ́gı̵́. A̧máa ya̧g ka̧'a̧mé bá' idú pig nɔm Yesu woolı̵́ máa, wakȩ́ȩ́ tóó vu̵ la maa bɛ́ɛ́g mbaa leená. Vu̵ ki Yesu ba níḿ nɔmmé sú̵'ú̵, ba mbaa zá̧a̧dɨ (16:1-8). Vu̵ lúú ɗug, vu̵ mbaa kɔ́ ı̵́ ya̧ŋ vu̵ wɔgɔ.
(Kɔpíi see Márkus woo tóó vu̵lı̵́ máa, nán hȩn bindigo vu̵ ha' moo tóó vu̵, vu̵ tú' pig nímní woo nɔmmé, Yesu ba tú'ud waa duulí woo vu̵ fó̧ó̧, vu̵ tú' ɗáálı̵́ Yesu woo dɔg be"ı̵́ 'waa la pád á̧ḿ. Moo to̧o̧ 'maŋ tóó (Matío, Lúg, Yoohá̧na) vu̵ tú' hȩn dágá yȩ vu̵ á̧ḿ laa tíŋ́.)
Pig i záŋ́ga moo to̧o̧ 'maŋ Márkus woo tée, víń gaa á̧ḿ, kɔ́ ı̵́ ı̵́ nii só̧ó̧ze nán Róma voo wɔgɔ, víń gaa Yesu nán Naazaréd yȩ ba Waa Tayɨɨ woo nɔ gínú (15:39)!
Currently Selected:
Márkus Moo dənée: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.