Márkus 9
9
1Yesu duu o̧d vu̵: “Mí o̧d ví moo yȩ́ńne, nán kíí dii yɛlı̵́ yɛ, tóó vú̵ń nɔɔ né, vú̵ń ho̧ gbaŋ waalı̵́ Tayɨɨ woo wú̵ń ya̧ kan néélȩ́ woo pȩ́ń.”
Fó̧ó̧ tiiní Yesu woo nɔ
(Matío 17:1-13; Lúg 9:28-36)
2Bá' gúú ka ya̧a̧ máa, Yesu ɓɛ Piɛ́r kan Yaakúbu kan Yoohá̧na, pa̧ŋ vu̵ ɗáá dɔgɔn gu̵u̵ gbo̧o̧ tóólı̵́, vu̵ mbaa wu̵lı̵́ vu̵ mɛ́ń. Yesu tíid vu̵ fó̧ó̧, 3sa̧a̧m woo bú mbaa kɛ́ŋ́kɛ́ŋ́, nán sa̧a̧m tɛlı̵́ tóó tɛ sa̧a̧m dȩ'ȩn ı̵́ yo̧go̧ hágá yɛlı̵́ né sá̧ḿ. 4Anábi Elía vu̵ kan Múúsa vu̵ vúd voolı̵́ nɔ́lȩ́, vu̵ mba moo kan Yesu. 5Piɛ́r ka moo o̧d Yesu: “Akaw, kaa sú̵g mbaa ví yɛ, du̵u̵ ú̵. Vɔ́ń kəb waa ta̧a̧nɔ́, ı̵́ móó a dágá, Múúsa woo a dágá, Elía woo a dágá.”
6Dú̵ú̵ ka kɔ́ vu̵ máa, Piɛ́r gaan hȩn ka o̧n yȩ né. 7Ma mam hi̧i̧g vúd fii vu̵ ya, sú' vu̵ zu̵u̵ ɓilim. Yɛ́g tóó kiy zu̵u̵ mam hi̧i̧g peelı̵́, o̧: “Ɨ́ yɛ waa míí nu, mí hí̧í̧wo̧ ó̧. I kiddu̵ tɔ́ggú̵.”
8 Waa duulí woo ku̵u̵ luu dɔg nɔ́ɔ́ máa, vu̵ ho̧n sı̵́ nán tóó né, séý Yesu wu̵ dágá, mbaa kan vu̵.
9Sey ku̵u̵ dɨ zu̵u̵ gu̵u̵ sílí máa, Yesu tiŋ waa duulí woo vu̵ u̵u̵ o̧d nán tóó moo yúú hȩn ba ku̵u̵ ho̧ yȩlȩ́ sá sá̧ḿ, há̧á̧ a ya̧ sey nímní woo nɔmmé pȩ́ń. 10Vu̵ tu̵ moo yȩ voolı̵́ zó̧ó̧lȩ́, vu̵ víń ya voolı̵́: “ ‘Nímní nɔmmé’ sú̵u̵ ȩná?”
11Pig woo máa, waa duulí woo vu̵ vigi: “Moo ȩn nán moo Tayɨɨ tú"í vu̵ o̧ Elía ban yaa pȩ́ńná?”
12Yesu hí̧i̧d vu̵: “Elía wú̵ń yaa pȩ́ń, wú̵ń mbɔ́g hȩn 'waapád du̵u̵ na'a. A̧máa moo Tayɨɨ o̧ née yúú míílí̧lá? Ɨ́ míí Tayɨɨ ka ba'an ya yɛ, míń nuŋ hȩn ndɔ́gɔné gbo̧o̧ ba'a, vú̵ń ho̧n hȩn leená pȩ́ńnáa? 13A̧máa mí o̧d ví, Elía yaa sú̵'ú̵, ma nán vu̵ kɔ́gɔ kɔ́ ı̵́ ku̵u̵ hí̧í̧ wɔgɔ, kɔ́ ı̵́ debtere Tayɨɨ woo ka o̧ yúú woolı̵́ máa wɔgɔ á̧ḿ.”
Yesu nɛŋ yigid ɓı̵́d vud fó̧ó̧ waa tóó woolı̵́
(Matío 17:14-21; Lúg 9:37-43a)
14Sey ku̵u̵ vȩ́' zu̵u̵ ya̧ dáŋ́ waa duulí woo tóó voolı̵́ máa, vu̵ ho̧ dúú gbo̧o̧ ba'a vu̵ gbɔ kan vu̵, kan nán moo Tayɨɨ tú"í vu̵, vu̵ fan moo kan vu̵.
15Sey dúú ku̵u̵ ho̧ la Yesu ná' máa, vu̵ mbaa ɗii, vu̵ kɛ ɗug la vá"u̵. 16Yesu vi waa duulí woo vu̵: “Ví fan moo kan vu̵ yúú ȩnnélá?”
17Nán tóó sa̧a̧m dúú yȩ voolı̵́ hí̧i̧du̵: “Akaw, mí pa̧ŋ waa#9:17 waa vu̵ bíńda “wayée waa” kan ya̧g gɛrɛ́ggɨ. míí yaan móólȩ́. Yigid ɓı̵́d kɔ́gɔ, mbaa kpo̧o̧gná. 18Yigid ɓı̵́d baa ma"o̧, gbɔgɔ hágá, fú̵g baa fúŋ́ vúd ya̧g woolı̵́, sə́ŋ́ nú', 'wóy mbaa kpu̵r. Ma mí vi waa duulí móó u̵u̵ nɛŋ yigid ɓı̵́d yȩ ó̧, a̧máa vu̵ nɛŋŋɔ mban né.”
19Ma Yesu hí̧i̧d vu̵ o̧: “Nán moo faalı̵́ vu̵, míń ma' zó̧ó̧ mbaa kan ví nɛ́nná? I pa̧nnɔ ya ú̵.”
20Vu̵ gaŋ waa pee pa̧nnɔ ya.
Sey yigid ɓı̵́d ka ho̧ la Yesu ná' máa, nam waa pee, wá̧á̧ kííb hágá kan fú̵g ya̧gá̧, 'wóy mbaa kpu̵r. 21Yesu vi waa ba'a: “Hȩn yɛ dəŋŋɔ bá' née yɛlá?”
Hí̧i̧du̵: “Dəŋŋɔ ya náásá̧ŋ́ woolı̵́. 22Baa gbɔgɔ vɛlı̵́ kan mammé á̧ḿ, moo bi nɔɔwo̧ ó̧. A̧máa, a̧m dɨ kan néélȩ́ kɔ́ hȩn tóó ú̵ tée, a̧m ho̧ gíḿ gaad vɔ́, a̧m maa vɔ́ ú̵.”
23Yesu hí̧i̧du̵: “Mɔ́ o̧: ‘A̧m dɨ kan néélȩ́ ú̵ tɛ́ naa?’... Hȩn tóó təən nán ku̵u̵ 'yɛ́ zó̧ó̧ Tayɨɨ woolı̵́ máa vu̵ né.”
24Vaŋná waa ba'a moo dɔg moo yúba o̧: “Mí 'yɛ́ sú̵'ú̵. A̧m maan, mí duu faa moo sá!”
25Yesu ka ho̧ dúú ku̵u̵ yaa ɗug máa, sée yigid ɓı̵́d, o̧ddu̵: “Yigid ɓı̵́d ı̵́ kpo̧o̧g yȩ mɔ́ yo̧, míi o̧m a̧m vúd la fó̧ó̧ waa yȩ woolı̵́ də́ń kəd.”
26Ma yigid ɓı̵́d wa̧a̧ wa̧ya̧g gbo̧o̧ ba'a, nam waa pee kan néélȩ́, duu daa vúd. Waa pee mbaa kɔ́ ı̵́ nɔm wɔgɔ. Nán vu̵ o̧: “Nɔɔ sú̵'ú̵! Nɔɔ sú̵'ú̵!”
27A̧máa Yesu ma"o̧ nagá, luu dii dɔg yúba.
28Sey Yesu ka dɔ́ kíilí máa, waa duulí woo vu̵ vigi vu̵ mɛ́ń: “Moo ȩn vɔ́ nɛŋ vóó yigid ɓı̵́d yȩ mban nélá?”
29Hí̧i̧d vu̵: “Á̧á̧ yigid ɓı̵́d ı̵́ yȩ vu̵ vún voo té' né, ba ɓá' Tayɨɨ pȩ́ń.”
Yesu duu o̧ moo nɔm woo, kan nímní woo nɔmmé
(Matío 17:22-23; Lúg 9:43b-45)
30Ku̵u̵ lúú wu̵lı̵́ máa, vu̵ sə̧' ya̧a̧ hág Gálilée. Yesu hí̧í̧ nán u̵u̵ gaa sá, 31moo baa tú'ud waa duulí woo vu̵, o̧: “Ɨ́ míí Tayɨɨ ka ba'an ya yɛ, vú̵ń dɔn nag nánán voolı̵́, vú̵ń nɔɔn, a̧máa pig nɔm míílí̧ bá' idú ta̧a̧nɔ́ woo tée, míń níḿ nɔmmé.”
32A̧máa waa duulí woo vu̵ kin moo yȩ né. Ma vu̵ duu ndɔggu̵ vilí á̧ḿ.
Nóo mba daga vu̵ na"ȩ́lá?
(Matío 18:1-5; Lúg 9:46-48)
33Yesu vu̵ ya̧ la kaa Kapɛrnáhu̧mmé.
Ku̵u̵ dɔ́ la kíilí máa, Yesu vi waa duulí woo vu̵: “Vín fan moo woo ȩn hi̧naalȩ́lá?”
34A̧máa vu̵ mbaa simná, moo vu̵n moo hi̧naalȩ́, vu̵ hí̧í̧ bi gaa nóo ba mba daga vu̵ na"ȩ́lá?
35Ku̵u̵ hí̧i̧ ní máa, Yesu mbaa hágá, bee waa duulí woo vu̵ wa̧nɓó' zu̵u̵ idú, o̧d vu̵: “Nán tóó a hí̧í̧ bi mbaa nán gbo̧o̧ȩ tée, a ho̧ fó̧ó̧ woo hȩn lee, a kɔ́d daga vu̵ ba'ad 'waapád.”
36Ma Yesu ɓɛ náásá̧ŋ́ waa tóó díid vu̵ tíŋ́, gaŋ tíddu̵ nagá, o̧d vu̵: 37“Nán a fȩȩ náásá̧ŋ́ waa tóó kɔ́ ı̵́ waa yɛ wɔgɔ, kan yɛ́g míí tée, fȩȩ míw. Nán a fȩȩn tée, fȩȩ ı̵́ ka ba'an ya máa á̧ḿ.”
Nán ka mán ba ví ní tée, wu̵ nán baa ví
(Lúg 9:49-50)
38Sey woolı̵́ Yoohá̧na o̧d Yesu: “Akaw, vɔ́ ho̧ nán tóó nɛŋ yigid ɓı̵́d vu̵ vud kan yɛ́g móó, ma vɔ́ há"u̵, moo ka duun ba ví ní má nɔ.”
39A̧máa Yesu hí̧i̧du̵: “Ka víń há"u̵ sá, moo nán ba kɔ́ hȩn sa̧ga̧ kan yɛ́g míí pȩ́ń, ba duu moo moo ɓı̵́d míí máa təə ú̵. 40Nán ka mán ba ví ní tée, wu̵ nán baa ví. 41Kóó nɔ́nná a pú̵ ví mam zɔlı̵́ ɗag koom dágá, moo kíí nán kirtȩ́n vu̵ yu̵ má nɔ tée, mí o̧d ví moo yȩ́ńne, hȩn sú̵ú̵lı̵́ woo wú̵ń tin ní.”
Hȩn ɓı̵́d waaná' woo pɛ́lı̵́
(Matío 18:6-9; Lúg 17:1-2)
42Yesu duu o̧: “Kóó nɔ́nná a zo' náásá̧ŋ́ waa ku̵u̵ 'yɛ́ zó̧ó̧ míílí̧ yɛ dágá a faa moo míí tée, du̵u̵du̵ ka vu̵n taddu̵ naag hȩn nané gbo̧o̧ ba'a vəgə́, ka vu̵n ndaa gbɔgɔ zu̵u̵ mam gbo̧o̧lȩ́. 43Nag móó ka wu̵ zo'om hȩn ɓı̵́d kɔ́lı̵́ tée, a̧m sə̧"o̧ gbɔ la. A̧m dɔ́ ya vágádı̵́ kan nag dágá máa, wu̵ du̵u̵ mba a̧m mbaa kan nag idú, ma Tayɨɨ a gbɔm vee gə̧ə̧ ı̵́ ka ním nílı̵̧́ tée, du̵u̵ né. [ 44Ya woo, ga'ad vu̵ lá fó̧ó̧ mbaan#9:44,46,48 lá fó̧ó̧ mbaan vu̵ bíńda “nɔɔ né” kan ya̧g gɛrɛ́ggɨ. wu̵lı̵́, vee ním wu̵lı̵́ né á̧ḿ.]
45“Doo móó ka wu̵ zo'om hȩn ɓı̵́d kɔ́lı̵́ tée, a̧m sə̧"o̧ gbɔ la. A̧m dɔ́ ya vágádı̵́ kan doo dágá máa, wu̵ du̵u̵ mba a̧m mbaa kan doo idú, ma Tayɨɨ a gbɔm vee gə̧ə̧lȩ́ tée, du̵u̵ né. [ 46Ya woo, ga'ad vu̵ lá fó̧ó̧ mbaan wu̵lı̵́, vee ním wu̵lı̵́ né á̧ḿ.]
47“Nɔ́ɔ́ móó ka wu̵ zo'om hȩn ɓı̵́d kɔ́lı̵́ tée, a̧m vbəddu̵ gbɔ la. A̧m dɔ́ gbaŋ waalı̵́ Tayɨɨ woolı̵́ kan nɔ́ɔ́ dágá máa, wu̵ du̵u̵ mba a̧m mbaa kan nɔ́ɔ́ idú pȩ́ń, ma Tayɨɨ a gbɔm vee gə̧ə̧lȩ́ tée, du̵u̵ né. 48Ya woo, ga'ad vu̵ lá fó̧ó̧ mbaan wu̵lı̵́, vee ním wu̵lı̵́ né á̧ḿ. 49Moo vú̵ń mbɔ́g nán 'waapád kan vee, kɔ́ ı̵́ ku̵u̵ mbɔ́g wi' kan ta̧m wɔgɔ. 50Ta̧m zú̵g máa, hȩn to̧o̧ȩ, a̧máa ta̧m hú̧u̧m ka vúd sú̵'ú̵ tée, ví duu mbɔ́ggu̵ kan ȩná? I to̧n ya víílí ú. I mbaa kɔ́ ı̵́ wi' ku̵u̵ gbɔ ta̧m wu̵lı̵́ máa wɔgɔ.”
Currently Selected:
Márkus 9: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
