Márkus 6
6
Nán Naazaréd vu̵ 'yɛ́n zó̧ó̧ Yesu woolı̵́ né
(Matío 13:53-58; Lúg 4:16-30)
1Yesu ka lúú wu̵lı̵́ máa, daa laa kaa ha̧a̧lȩ́ woolı̵́. Waa duulí woo vu̵ dugu. 2Zá̧ga̧ asawəlı̵́ máa, bé' moo tú"í lig sú̵ggı̵́ nán Yúúda voolı̵́. Nán ɓu̵u̵lı̵́ na'a vu̵ ki moo tú"í woo, kɔ́ vu̵ la ɓá', vu̵ o̧: “Hȩn yȩ vu̵ yaadu̵ tɛ́lá? Nóo tú'udu̵ hȩn gaalı̵́ yȩlá? Dəŋ née ka kɔ́ hȩn sa̧ga̧ yȩ vu̵ á̧ḿmá? 3Nán lig ga'ané máa, wu̵ yȩ nɔ pɛ́láa? Maaríi waaɨ náa? Daa sá̧ŋ́ vu̵u̵ Yaakúbu kan Yu̵u̵sɛ́d kan Yúúda kan Simɔ́ŋ vu̵ yu̵ pɛ́láa? Daa kȩ́ȩ́ vu̵u̵ sa̧a̧m baa vílí yɛ nɔ náa?”
Hȩn woo ká há' vu̵ zó̧ó̧ 'yɛ́lı̵́ Yesu woolı̵́ á̧ḿ. 4Ma Yesu o̧d vu̵: “Vu̵ ɓéen anábi ya tóólı̵́ né, séý kaa ha̧a̧lȩ́ woolı̵́, kan mɛm woo voolı̵́, kan kíi woolı̵́.”
5Yesu ká nugun néélȩ́ hȩn sa̧ga̧ kɔ́lı̵́ wu̵lı̵́ né, za̧a̧ nán ho̧o̧ tóó vu̵, ka ha'ad vu̵ daa nag yúlí má nɔ, 'wáa yȩ.
6Ku̵u̵ faa moo yúú woolı̵́ máa, kɔ́gɔ la ɓá'.
Yesu ba' waa duulí woo vu̵ idú idú
(Matío 10:5-15; Lúg 9:1-6)
Yesu 'yȩ́ḿ kə̧́ə̧́ daa kaa waa tóó vu̵lı̵́ dáŋ́ Naazaréddı̵́, baa tú' moo wu̵lı̵́. 7Sey woo máa, bee waa duulí woo vu̵ wa̧nɓó' zu̵u̵ idú su̵g, ba' vu̵ la idú idú. Pú̵ vu̵ néélȩ́ yúú yigid ɓı̵́d voolı̵́. 8O̧d vu̵: “I ɓɛ hȩn 'yȩ́ȩm vu̵ sá, i pa̧ŋ də́ń táaɨ. I pa̧ŋ hȩn lálı̵́ kan kə́ə kan sɨɨde sá. 9I dɔ́ sa̧a̧m idú sá, a̧máa i dɔd tɛ́gɛ́ víí la ú̵.”
10Duu o̧d vu̵: “Kíí dɔ́ kíi tóólı̵́ tée, i mbaa wu̵lı̵́ há̧á̧ a ya̧ sey lúúlí víí. 11Ya tóó ku̵u̵ fȩȩn ví ní, ku̵u̵ fȩȩn moo víí ní, kíí dɨ lúúlí wu̵lı̵́ tée, ví ta'ad nag víí,#6:11 nag víí vu̵ bíńda “i ta'ad hád zu̵m doo pɛ́ɛ́g víílí” kan ya̧g gɛrɛ́ggɨ. moo a mbaad vu̵ hȩn ya̧g du̵lı̵́ɨ.”
12 Waa ba'ad vu̵ laa, vu̵ baa pa moo, nán u̵u̵ tii mbaalı̵́ 'maŋŋɨ. 13Vu̵ nɛŋ yigid ɓı̵́d vu̵ vud ɓu̵u̵lı̵́ na'a fó̧ó̧ nánán voolı̵́. Vu̵ baa so̧'o̧d nán ho̧o̧ vu̵ kúḿ, vu̵ za̧a̧ vu̵.
Nɔm Yoohá̧na ı̵́ mam Tayɨɨ wooné woo nɔ
(Matío 14:1-12; Lúg 9:7-9)
14Yɛ́g Yesu woo ka kiy na'a máa, gbanaa Heeród ki á̧ḿ. Nán tóó vu̵ o̧: “Yoohá̧na ı̵́ mam Tayɨɨ wooné wu̵ níḿ nɔmmé, moo woo nɔ ma nuŋ néélȩ́ hȩn sa̧ga̧ kɔ́lı̵́ yȩ nɔ.”
15Tóó vu̵ o̧: “Anábi Elía wu̵.”
Tóó vu̵ o̧ voo: “Anábi tóó kɔ́ ı̵́ anábi gbo̧o̧ Tayɨɨ woo vu̵ wɔgɔ.”
16 Heeród ka ki moo yȩ máa, o̧: “Wu̵ yu̵. Yoohá̧na ká mí du̵ yúú woo sə̧' pee nɔ. Wu̵ níḿ nɔmmé.”
17-18Moo wakȩ́ȩ́ tóó ká du̵u̵lı̵́, yéé woo Herodía, ká kȩ́ȩ́ Filíb Heeród daa sá̧ŋ́ woo nɔ.
Pig woo Heeród ka éé Herodía máa, Yoohá̧na la o̧d Heeród: “Maa ba mɔ́n éen móó kȩ́ȩ́ dam sá̧ŋ́ woo né.”
Moo woo nɔ ma Heeród ba' nán vu̵ la ma' Yoohá̧na ga' lig púúsinalȩ́.
19Herodía pee baa 'yɛ́d Yoohá̧na mbíim zó̧ó̧lȩ́, hí̧í̧ bi nɔɔwo̧ ó̧. A̧máa kan néélȩ́ woo pɛ́lı̵́, 20moo Heeród há"u̵ ú̵. Heeród ndɔg Yoohá̧na, moo gaa Yoohá̧na ba kɔ́ hȩn hí̧í̧lí̧ Tayɨɨ woo, ba nán Tayɨɨ woo nɔ á̧ḿ.
Sey Heeród ka ki moo Yoohá̧na woo tée, zó̧ó̧ tó̧"o̧. Kóó ı̵́ yo̧go̧ si̧', hí̧í̧ moo woo kilí á̧ḿ.
21Ma Herodía nuŋ hi̧naa tóó. Zá̧ga̧ ha̧a̧lȩ́ Heeród woo ka ya̧ máa, Heeród kɔ́ hȩn lálı̵́ béé nán gbo̧o̧ vu̵, kan kolonɛ́l vu̵, kan ı̵́ nii hág Gáliléelı̵́ vu̵ 'waapád. 22Wakȩ́ȩ́ waa Herodía woo dɔ́ ya naa náb. Náb woo to̧o̧d Heeród mbaa ná', kan nán pee vu̵ á̧ḿ.
Pig woo máa, gbanaa o̧d wakȩ́ȩ́ waa pee: “A̧m vin hȩn káḿ hí̧í̧ má nɔ, míń pú̵mmɔ́.”
23 Heeród sa̧a̧du̵ hȩn á̧ḿ, o̧: “Hȩn a̧m vin máa, míń pú̵m wu̵ yu̵, kóó hág míí yɛ ka' dágá si̧'.”
24Wakȩ́ȩ́ waa pee vúd la vi na' woo: “A̧n vi ȩná?”
Na' woo hí̧i̧du̵: “Yúú Yoohá̧na ı̵́ mam Tayɨɨ wooné woo nɔ.”
25Há̧á̧ vȩ́' la vaŋná gbanaa woolı̵́, o̧ddu̵: “Mí hí̧í̧ i pú̵n yúú Yoohá̧na ı̵́ mam Tayɨɨ wooné woo ɗag zag tóólı̵́ 'ya̧'a̧ yɛ nɔ.”
26Gbanaa ka ki ná' máa, zó̧ó̧ woo ví̧i̧, a̧máa moo ká sa̧a̧ hȩn sú̵'ú̵, kan moo nán ka béé vu̵ hȩn lálı̵́ yȩ voo á̧ḿ, duu sɛ́n moo woo pee buuní ní. 27Ma ba' la só̧ó̧ze vaŋná, o̧ddu̵ a la du̵ yúú Yoohá̧na woo sə̧' pa̧ŋ yaanɔ. Só̧ó̧ze pee la sə̧' Yoohá̧na lig púúsinalȩ́, 28pa̧ŋ yúú woo yaan ɗag zaggı̵́, pú̵ wakȩ́ȩ́ waa pee, ma la pú̵ na' woo.
29 Waa duulí Yoohá̧na woo ku̵u̵ ki máa, vu̵ ya gaŋ fó̧ó̧ woo la dɔd bɛ́ɛ́gı̵́.
Yesu pú̵ nán uzinɛɛre nɔ́nɔ́ vu̵ hȩn lálı̵́
(Matío 14:13-21; Lúg 9:10-17; Yoohá̧na 6:1-14)
30 Waa ba'ad Yesu woo vu̵ fíí ya sú̵g woolı̵́, vu̵ o̧ddu̵ hȩn ku̵u̵ kɔ́, kan hȩn ku̵u̵ tú' máa 'waapád. 31Sey woolı̵́ nán ká vu̵ baa yaa woolı̵́ gur gur. Yesu kan waa duulí woo vu̵ nugun sey hȩn lálı̵́ né á̧ḿ. Ma Yesu o̧d vu̵: “I yaa ú̵, ba laa ví ya tutugu tóólı̵́, ví la nəə waaná'.”
32Vu̵ lúú kan nɛ́ŋ́ moo laalı̵́ ya tutugu tóólı̵́ vu̵ mɛ́ń. 33Nán ɓu̵u̵lı̵́ na'a vu̵ ho̧ lúúlí voo, vu̵ gaa vu̵, vu̵ kɛ ɗug kan doo kaa voo vu̵lı̵́, vu̵ la laa vu̵ ya vu̵n dɨ laalı̵́ wu̵lı̵́ peelı̵́.
34Sey Yesu ka vúd dɔg nɛ́ŋ́ŋı̵́ máa, ho̧ dúú vu̵ du̵u̵n də́ń né, kɔ́gɔ la gíḿná, moo vu̵ mbaa kɔ́ ı̵́ mbee tóó ku̵u̵ kan nán tu̵lı̵́ pɛ́lı̵́ máa wɔgɔ. Bé'ed vu̵ moo tú"í ɓu̵u̵lı̵́ na'a.
35Zá̧ga̧ ka 'yɨg máa, waa duulí woo vu̵ yaa woolı̵́, vu̵ o̧ddu̵: “Ya yɛ hó̧ggɨ, zá̧ga̧ ka dɔ́ 'waa máalá̧! 36A̧m gbɔ nán vu̵ u̵u̵ laa bab vu̵lı̵́ kan kaa waa vu̵lı̵́ moo hȩn lálı̵́ hɨlı̵́ɨ.”
37A̧máa Yesu hí̧i̧d vu̵ o̧: “Aga a víi pú̵ vu̵ hȩn lálı̵́.”
Ku̵u̵ ki ná' máa, vu̵ duu o̧ddu̵: “Oo la fȩȩd vu̵ beréd booro tȩmɛre idú pú̵ vu̵ u̵u̵ lá áa?”
38Yesu duu vi vu̵: “Ví dɨ kan beréd kígi nɛ́nná? I la ho̧ la lée!”
Ku̵u̵ la ho̧ sú̵'ú̵ máa, vu̵ hí̧i̧du̵: “Dɨ kígi nɔ́nɔ́, kan ze' idú.”
39Duu o̧d vu̵: “I mbɔ́g nán yȩ vu̵ u̵u̵ mbaa hú' kan hú' yúú hó̧d há̧a̧dı̵́.”
40Vu̵ mbɔ́g nán pee vu̵, tóó vu̵ mbaa fó̧ó̧ tȩmɛre, tóó vu̵ vo' nɔ́nɔ́. 41Yesu ɓee dɔg beréd nɔ́nɔ́ pee kan ze' idú pee vu̵ á̧ḿ, 'yɛ́ dɔg nɔ́ɔ́ be"ı̵́, dȩn Tayɨɨ nag, ma yɨɨ beréd zu̵u̵ kan ze' idú pee á̧ḿ, pú̵ waa duulí woo vu̵, moo u̵u̵ yȩ'ȩ dúú pee vu̵ ú̵. 42Ya voo 'waapád vu̵ lá, vu̵ ha̧', 43ma vu̵ duu su̵g kéélı̵́ woo kan ze' pee á̧ḿ, hi̧' ɓaa wa̧nɓó' zu̵u̵ idú. 44Wayée ku̵u̵ lá beréd yȩ vu̵ máa, vu̵ dɨ fó̧ó̧ uzinɛɛre nɔ́nɔ́.
Yesu 'yȩm yúú mammé
(Matío 14:22-33; Yoohá̧na 6:15-21)
45Pig woolı̵́ máa Yesu dɔd waa duulí woo vu̵ nɛ́ŋ́ŋı̵́, moo u̵u̵ ɗáá ɓə́ə́ laa bi la mam dən, kaa Bɛdsáýdalı̵́. Aga bi ba' dúú vu̵ pȩ́ń.
46Ku̵u̵ vá'án 'waa máa, Yesu daa ɗáá dɔg gu̵u̵lı̵́ moo Tayɨɨ ɓá"ı̵́ wu̵lı̵́.
47Mɛn ka kɔ́ máa, nɛ́ŋ́ dɨ mam sa̧a̧mé. Yesu ká dɨ lá ya ɓá"ı̵́ wu̵ dágá. 48Ho̧ nɛ́ŋ́ yú̵ú̵lı̵́ təə vu̵ du̵u̵n də́ń né, moo sápéém ká yaad vu̵ dɨ tíŋ́.
Damnaalȩ́ máa, Yesu yaa voolı̵́, 'yȩm ya yúú mammé, hí̧í̧ bi ya̧a̧ vu̵ daa ú̵.
49Sey waa duulí woo ku̵u̵ ho̧go̧ la 'yȩ́ȩm yúú mammé máa, vu̵ taa ba yigid ɓı̵́d tóó nɔ, vu̵ wa̧a̧ wa̧ya̧g, 50moo ya voo 'waapád vu̵ ho̧go̧ ó̧, zó̧ó̧ tó̧' vu̵. Yesu há̧ń o̧d vu̵: “I ndag zó̧ó̧ la ú̵! Míw náa? I kɔ́ dú̵ú̵ sá.”
51Yesu ka duu dɔ́ maa vu̵ dɔg nɛ́ŋ́ tíŋ́ máa, sápéém gə́d.
Waa duulí woo ku̵u̵ ho̧ hȩn yȩ vu̵ máa, vu̵ mbaa ɗii, 52moo vu̵ duu kin sı̵́ hȩn sa̧ga̧ yúú beréddı̵́ yȩ né, vu̵ kin moo woo né sá̧ḿ.
Yesu za̧a̧ nán ho̧o̧ vu̵ hág Gȩnɛzarɛ́ddı̵́
(Matío 14:34-36)
53Ku̵u̵ ɗáá ya̧a̧ mam 'waa sú̵'ú̵ máa, vu̵ ya̧ hág Gȩnɛzarɛ́ddı̵́, vu̵ woo nɛ́ŋ́ ga'.
54Sey ku̵u̵ vúd dɔg nɛ́ŋ́ŋı̵́ máa, nán vu̵ há̧á̧ gaa Yesu. 55Vu̵ kɛ ɗug laa ya 'waapád, vu̵ bé' nán ho̧o̧ vu̵ gáné yaan kan píg, ya ku̵u̵ ki Yesu ba du̵u̵lı̵́ máalȩ́. 56Ya Yesu ka dɔ́ wu̵lı̵́ 'waapád, kaa waa, kan kaa gbo̧o̧, kan lumnde vu̵ á̧ḿ, vu̵ 'yée nán ho̧o̧ vu̵ píggí píggí, saalı̵́, vu̵ dȩnnɔ nag moo ii za' ya̧g sa̧a̧m woo nɔ si̧'.
Ma nán ku̵u̵ za"u̵ máa, ho̧o̧ ka̧' vu̵ 'waapád.
Currently Selected:
Márkus 6: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
