Márkus 13

Yesu moo ba vú̵ń lı̵́d lig hȩn ha"ı̵́ ú̵

(Matío 24:1-2; Lúg 21:5-6)

1Sey Yesu ku̵u̵ daa vúd lig hȩn ha"ı̵́lı̵́ máa, waa duulí woo tóó o̧ddu̵: “Akaw, a̧m ho̧ sı̵́ɨ 'yɛgɛ du̵u̵ gbo̧o̧ tóó vu̵, kan hȩn yo̧o̧lȩ́ du̵u̵ tóó ku̵u̵ na'a yȩlá!”

2Ma Yesu hí̧i̧du̵: “Mɔ́ ho̧ lig gbo̧o̧ ku̵u̵ yo̧o̧ na'a yȩ naa? 'Yɛgɛ tóó wú̵ń mbaan yúú daga woolı̵́ né sá̧ḿ, vú̵ń ndaa vu̵ tum 'waapád.”

Hȩn ndɔ́gɔné tóó vú̵ń yaa tíŋ́ hág 'wáanélȩ́

(Matío 24:3-14; Lúg 21:7-19)

3Yesu la mbaa gu̵u̵ la' kúḿmí, ya woo gbó'óna kan lig hȩn ha"ı̵́ ná'. Piɛ́r vu̵ kan Yaakúbu kan Yoohá̧na kan A̧ndɛrée vu̵ yaa vu̵ mɛ́ń, vu̵ vigi: 4“A̧m o̧d vɔ́ ú̵, hȩn yȩ vú̵ń ya̧ zag ndɛnná? Hȩn a tú' zaa ban ya̧ sú̵'ú̵ máa, wu̵ ȩná?”

5Ma Yesu bé'ed vu̵ moo tú"í o̧: “I gággú̵, nán tóó a zo' ví moo sá, 6moo nán ɓu̵u̵lı̵́ na'a vú̵ń yaa kan yɛ́g míí, vú̵ń o̧ ba bin míw. Vú̵ń zo' nán tóó vu̵ moo ɓu̵u̵lı̵́ na'a. 7Kíí ki moo sɨɨ vu̵ dáŋ́ víílí, kan ya ɗiilílí á̧ḿ tée, i ndɔg sá, moo hȩn yȩ vú̵ń yaa dɨlı̵́, a̧máa wú̵ń ná hág 'wáanée pɛ́lı̵́. 8Zig nán vú̵ń lúún sɨɨ kan daga vu̵. Gbanii vú̵ń lúún sɨɨ kan daga vu̵. Hág vú̵ń nam ya tóó vu̵lı̵́, go̧o̧m gbo̧o̧ vú̵ń kɔ́y. Hȩn ndɔ́gɔné máa ku̵u̵ dəŋ yȩ, vú̵ń man kan wakȩ́ȩ́ tóó ka dɨ waa ha̧a̧lȩ́ má nɔ.

9“Aga i gág fó̧ó̧ víí ú! Vú̵ń dɔd ví nán moo sə̧"ȩ́ voolı̵́ nagá, vú̵ń gbɔ́ ví lig sú̵ggı̵́ nán Yúúda voo vu̵lı̵́. Vú̵ń dii ví tíŋ́ ŋgó̧ḿna voolı̵́ kan tíŋ́ gbanaa voolı̵́ moo míí nu, moo i du̵n ya̧ggɨ. 10Víń dii tíŋ́ nán gaa Tayɨɨ sá voolı̵́ á̧ḿ, u̵u̵ ki moo to̧o̧ 'maŋ pȩ́ń. 11Ku̵u̵ pa̧ŋ ví laan moo dɔnné nag nán yȩ voolı̵́ tée, i gbɔ́ dam: ‘Yee vɔ́ń la o̧ nɛ́nná?’ sá. A̧máa víń nuŋ moo i la o̧ máa ya̧g woolı̵́ ú̵. Aga víńnɔ moo né, a̧máa yigid Tayɨɨ woo wú̵ńnɔ moo. 12Dag nii vú̵ń dɔd daa sá̧ŋ́ vu̵ ya nɔmmé, waa ba'a vú̵ń dɔd waa vu̵ á̧ḿ. Waa vú̵ń lúú moo kan ı̵́ ha̧a̧lȩ́ voo vu̵, vú̵ń nɔɔ vu̵. 13Nán 'waapád vú̵ń máń ví moo míílí̧, a̧máa nán ı̵́ a ma' zó̧ó̧ há̧á̧ a ya̧ bá' sí̧'í̧dí tée, wú̵ń sə́ddú̵.”

Hȩn a lı̵́d ba'ad Tayɨɨ woo má nɔ

(Matío 24:15-28; Lúg 21:20-24)

14Yesu duu o̧: “Víń ho̧ ı̵́ ba'ad Tayɨɨ woo lı̵́nné, vú̵ń 'yɛ́gɛ ya tóó ka maa né máalȩ́. (Nán a záŋ́ga moo yɛ tée, a ki gaa ú̵.) Tée, nán ı̵́ ku̵u̵ dɨ hág Yúúdalı̵́ máa, u̵u̵ kɛ ɗug dɔg gu̵u̵lı̵́. 15Nán ı̵́ ka dɨ dɔ́mmé tée, a dɔ́ la hȩn tóó ɓɛlı̵́ kíi tíŋ́ sá. 16Nán ı̵́ ka dɨ babbı̵́ tée, a fíí la moo sa̧a̧m woo ɓɛlı̵́ kíi woolı̵́ sá. 17Bá' yȩ vu̵lı̵́ zó̧ó̧ sı̵́ń ví̧i̧ wakȩ́ȩ́ ha̧g silí vu̵, kan ı̵́ ku̵u̵ dɨ waa a̧a̧né máa vu̵ yu̵. 18I ɓá' Tayɨɨ moo hȩn woo a kɔ́y sey ho̧o̧mé sá, 19moo sey woo hȩn ndɔ́gɔné wú̵ńnɔ yaa. Hȩn ndɔ́gɔné woo sey Tayɨɨ ka dəŋ yɨb hȩn vu̵ máa, daga woo kɔ́y ná né há̧á̧ ya̧ zá̧ga̧ ɓəə yɔ. Pig woo tóó wú̵ń duu kɔ́y né sá̧ḿ. 20Ɨ́ 'yɛ́lı̵́ Tayɨɨ kan du̵ bá' woo tóó gbɔn bá' yȩ vu̵lı̵́ né tée, nán dágá aga kan sə́n né. A̧máa Tayɨɨ wú̵ń du̵ bá' tóó vu̵ gbɔ, moo nán ı̵́ ka yee vu̵ máa voo nɔ.

21“Sey woo nán tóó ka o̧d ví: ‘Ȩȩhȩ́ȩ, ı̵́ nán sənné wu̵ yɛ nɔ,’ tóó tée: ‘Dɨ zulí’ tée, i fȩȩ moo woo sá. 22Moo ı̵́ nán sənné vbád kan anábi vbád vú̵ń dɨ yaalı̵́ɨ, vú̵ń soo kɛb moo bi kɔ́n hȩn sa̧ga̧ tóó vu̵ kan hȩn zálı̵́ tóó vu̵ wu̵lı̵́, moo bi zo'on nán ı̵́ Tayɨɨ ka yee vu̵ máa u̵u̵ ti á̧ḿ. 23I gággú̵. Ba mín o̧d ví hȩn 'waapád tíŋ́ sú̵'ú̵.”

Yesu a fíí ya tɛ́ nɔ

(Matío 24:29-31; Lúg 21:25-28)

24Yesu duu o̧d vu̵: “A̧máa bá' yȩ vu̵lı̵́, pig hȩn ndɔ́gɔné yȩlȩ́ tée,

zá̧ga̧ wú̵ń fii,

sȩȩ wú̵ń tún ní,

25zoo waa be"ı̵́ vú̵ń pee zu̵u̵ hágá yɛlı̵́,

hȩn néélȩ́ ku̵u̵ dɨ be"ı̵́ máa, vú̵ń nam á̧ḿ.

26“Tée ı̵́ míí Tayɨɨ ka ba'an ya yɛ, nán 'waapád vú̵ń ho̧n, míń yaa kan mam hi̧i̧g kan néélȩ́ gbo̧o̧, kan na"ȩ́. 27Míń ba' maleeka míí vu̵, vú̵ń su̵g nán Tayɨɨ ka yee vu̵ máa vu̵ ka' ya ndaddú̵lı̵́ á̧ḿ, dəŋ hág sí̧'í̧d tóólı̵́ há̧á̧ ya̧ ka' tóó.

Ya̧g zílí yúú zɔgɔbı̵́

(Matío 24:32-35; Lúg 21:29-33)

28“I kúgú ya̧g zílí yúú zɔgɔbı̵́. Sey kíí ho̧ ka pó̧'ó̧, ka sa kpag tée, ví gaa mam hí̧i̧g ba dɨ bə́'. 29Ɨ́ yo̧go̧ á̧ḿ, kíí ho̧ hȩn yȩ 'waapád ku̵u̵ ya̧ sú̵'ú̵ tée, i gaa gbaŋ waalı̵́ Tayɨɨ woo ba dɨ bə́' dáŋ́ ya̧gníimí. 30Mí o̧d ví moo yȩ́ńne, nán 'ya̧'a̧ yɛ vú̵ń nɔɔ 'waa né, hȩn yȩ 'waapád vú̵ń ya̧ pȩ́ń. 31Be' kan hág vú̵ń 'wáa ú̵, a̧máa moo míí vú̵ń 'wáa né sá̧ḿ.”

Tayɨɨ wu̵ dágá, wu̵ gaa sey hág 'wáané

(Matío 24:36-44)

32Yesu duu o̧d vu̵: “Moo bá' yaalı̵́ míí kan sey woo máa, nán tóó gaa né, kóó maleeka vu̵ be"ı̵́ á̧ḿ, kóó fó̧ó̧ míí á̧ḿ. Séý Ba'á Tayɨɨ wu̵ gaa dágá. 33I gággú̵, i nə sá, moo ví gaan bá' woo né. 34Yaalı̵́ míí wú̵ń kɔ́y kɔ́ ı̵́ nán tóó ka dɨ gáá laalı̵́ pȩ́ń, ka gbɔd nán ba'ad woo vu̵ kíi, ka pú̵ vu̵ ba'ad kə́dkə́d máa wɔgɔ. O̧d waa ya̧g dɔ́m a nə sá á̧ḿ. 35I nə sá, moo ví gaan sey yaalı̵́ ı̵́ kíi aga woo né. Tóó tée a dɨ mɛnnáa, a dɨ tı̵́gɨdáa, a dɨ damnaalá̧a̧, tóó tée dam yɔ́ggáa, 36moo kan yɔg ví ya, kan maa ví nəmmé. 37Moo káń o̧d ví yɛ, mí o̧d nán vu̵ 'waapád, i nə sá.”

Currently Selected:

Márkus 13: DIINT

Highlight

Copy