Lúg Moo dənée
Moo dənée
Lúg tú' moo to̧o̧ 'maŋ woo duu kan hi̧naa woo man kan ı̵́ Márkus woo á̧ḿ. Matío á̧ḿ kɔ́ dɨ ı̵́ yo̧go̧:
1) Yoohá̧na ı̵́ mam Tayɨɨ wooné du̵ ya̧g yúú Yesu ka dɨ yaalı̵́ yȩ woolı̵́ (3:1-20); pig woo máa, Yesu woo mam Tayɨɨ, Seeɗán zo"u̵ á̧ḿ (3:21—4:13).
2) Mbaal ı̵́ Yesu woo hág Gáliléelı̵́ máa, tú' moo Tayɨɨ wu̵lı̵́, za̧a̧ kan nán ho̧o̧ vu̵ wu̵lı̵́ á̧ḿ (4:14—9:50).
3) Yesu lúú hág Gáliléelı̵́ laa kaa Yerúsalemmé (9:5—19:28). A̧máa Lúg ha' moo dáń woo vu̵ yɛlı̵́ ɓu̵u̵lı̵́ na'a yúú moo Márkus woo yȩ vu̵lı̵́, kɔ́ ı̵́ ya̧g zílí yúú nán Samaríi tóó woolı̵́ wɔgɔ, kan nán naa ya̧ŋ tóó máa, kan waa tóó ka ti, ka duu nuguy sú̵'ú̵ máa wɔgɔ. Lúg vud moo tóó vu̵ o̧ yɛlı̵́ á̧ḿ, kɔ́ ı̵́ Yesu ka laa la gii Máŕta vu̵ kan Maaríi máa wɔgɔ.
4) Yesu kɔ́ ba'ad woo Yerúsalemmé (19:29—21:38).
5) Lúg duu hi̧naa woo há̧á̧ la ya̧ ya hȩn ndɔ́gɔné Yesu woo vu̵lı̵́, kan nɔm woo (sapíitər 22-23).
6) Ba'ad Lúg woo debtere yɛlı̵́ máa, 'wáa zá̧ga̧ páskalı̵́ (sapíitər 24). O̧ moo sey Yesu ka níḿ nɔmmé maa waa duulí woo tóó vu̵ hi̧naa Emáwsdı̵́ máa á̧ḿ. Pig woo máa Yesu ɗáá dɔg be"ı̵́.
Lúg dəŋ debtere woo mbɔ́ggı̵́, máa tú' nɛ́nná ba kii mbɔ́ggu̵lá (1:1-4). Ma Lúg ɓɛ moo to̧o̧ 'maŋ woo dəŋ kan sey ha̧a̧lȩ́ Yesu woo kan ı̵́ Yoohá̧na ı̵́ mam Tayɨɨ wooné woo (sapíitər 1-2). Moo máa yȩ wu̵ hɨ'ɨn Márkus vu̵ kan Lúg. Ya máa yȩ kaa záŋ́ga tée, ba ki sey maleeka ka o̧d Maaríi ban nuŋ ha̧ggɨ máa wu̵lı̵́. Lúg o̧ kan sey ha̧a̧lȩ́ Yoohá̧na ı̵́ mam Tayɨɨ wooné woo, kan sey ha̧a̧lȩ́ Yesu woo, kan sey waa tu̵ mbee ku̵u̵ yaawu̵ na"ȩ́ máa á̧ḿ. Lúg o̧ á̧ḿ kan yéé beelı̵́ Maaríi woo vu̵, kan Zakaríi, kan Simió̧ŋ. Ya dágá yȩlȩ́ Lúg tú' moo yȩ́ń woo yúú moo tú"í woo yɛlı̵́; o̧ Yesu ba vúd ya Tayɨɨ woolı̵́, ba vúd Izraɛ́l woolı̵́ á̧ḿ, o̧ Yesu ba yaa hágá yɛlı̵́ moo nán 'waapád voo nɔ. Lúg tú' zó̧ó̧ nán Tayɨɨ woo ka kɔ́d nán lee vu̵, kan ı̵́ ku̵u̵ kéé gbɔ vu̵ yȩ, kan wakȩ́ȩ́ vu̵, kan ı̵́ gíḿ waa vu̵, kan gáá vu̵. Lúg o̧ yigid Tayɨɨ woo ba wu̵ kɔ́ ba'ad yúú ba'ad Yesu woo yɛlı̵́ 'waapád. A̧máa Lúg o̧ moo to̧o̧ 'maŋ ba wu̵ pa̧ŋ zó̧ó̧ dȩ"ȩ́, kan Tayɨɨ na"ȩ́, kan Tayɨɨ ɓá"ı̵́.
Lúg wu̵ gbanaa gɛrɛ́g gaalı̵́ mba Matío kan Márkus kan Yoohá̧na á̧ḿ. Bíńda o̧d nán ı̵́ ku̵u̵ gaan hȩn dikab nán Izraɛ́l voo vu̵ ɓu̵u̵lı̵́ na'a né máa vu̵ á̧ḿ. Tú'ud vu̵ moo taalı̵́ woo vu̵ dȩ"ȩ́ na'a, tíid nán ı̵́ tóó ku̵u̵ ho̧ hȩn woo ku̵u̵ mbaad vu̵ gááná yȩ. Ɨ́ baa ví ɓəə yɛ máa, moo Lúg woo təən ba ví kilí kɔ́ ı̵́ tóó vu̵ wɔgɔ né. Nán a záŋ́ga duuwu̵ sá̧á̧sá̧á̧ tée, wú̵ń nuŋ ı̵́ nánán sənné nán voo vu̵ 'waapád wu̵lı̵́.
Currently Selected:
Lúg Moo dənée: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.