Lúg 24

Yesu níḿ nɔmmé sú̵'ú̵

(Matío 28:1-10; Márkus 16:1-8; Yoohá̧na 20:1-10)

1Ya̧g ka̧'a̧m hí̧m zá̧ga̧ aladdı̵́ máa, wakȩ́ȩ́ pee vu̵ laa bɛ́ɛ́gı̵́, vu̵ pa̧ŋ duusá̧n ba vu̵n mbɔ́g pee. 2Ma vu̵ maa 'yɛgɛ vu̵n yú bɛ́ɛ́gı̵́ pee vbíí lúú sú̵'ú̵.

3Ku̵u̵ dɔ́ la máa, vu̵ nugun sı̵́ fó̧ó̧ ı̵́ 'yɛ́lı̵́ Yesu woo né. 4Vu̵ taa hȩn tóó gaan sı̵́ yúú woolı̵́ né á̧ḿ. Vaŋná nán tóó vu̵ idú vu̵ gbɔ vúd maa vu̵ ya wu̵lı̵́, vu̵ dɔ́ sa̧a̧m hee gáálı̵́ na'a. 5Dú̵ú̵ kɔ́ wakȩ́ȩ́ pee vu̵, vu̵ sú'u nɔ́ɔ́ hágá hágá. Nán pee vu̵ o̧d vu̵: “Moo ȩn ví soo ı̵́ zá̧a̧d sa̧a̧m nán nɔm voolı̵́lá? 6Yɛlı̵́ pɛ́lı̵́, níḿ sı̵́ nɔmmé ó̧. I dȩ́' moo ká o̧d ví hág Gáliléelı̵́ má nɔ. 7Ká o̧: ‘Ɨ́ míí Tayɨɨ ka ba'an ya yɛ, vú̵ń dɔn nag nán hȩn ɓı̵́d kɔ́lı̵́ voolı̵́, vú̵ń ga'an la' vbagadı̵́, a̧máa bá' idú, ta̧a̧nɔ́ woo tée, míń níḿ nɔmmé.’ Ɨ́ yo̧go̧ pɛ́láa?”

8Wakȩ́ȩ́ yȩ vu̵ duu dȩ́' moo yȩ gaa dɔg sı̵́ wu̵lı̵́. 9Vu̵ lúú bɛ́ɛ́gı̵́, vu̵ vȩ́' ya o̧d waa duulí ı̵́ wa̧nɓó' zu̵u̵ dágá pee vu̵ moo yȩ, kan nán tóó vu̵ 'waapád. 10Wakȩ́ȩ́ sú̵u̵ ká Maaríi Magdaláa, kan Záan, kan Maaríi Yaakúbu na' woo, kan wakȩ́ȩ́ tóó vu̵ á̧ḿ. Vu̵ pá'ad waa ba'ad Yesu woo vu̵ hȩn yȩ vu̵. 11A̧máa vu̵ ki moo wakȩ́ȩ́ voo yȩ kɔ́ ı̵́ moo lee wɔgɔ. Vu̵ fȩȩn moo voo né. 12A̧máa Piɛ́r lúú dɔg kɛ ɗug laa bɛ́ɛ́gı̵́, nə'əy tə́gə nɔ́ɔ́, ho̧n hȩn tóó né, séý sa̧a̧m wu̵ mbaa, ma daa vȩ́' ka la. Hȩn yȩ la"u̵ la fid.

Hȩn ka ya̧a̧ hi̧naa Emáwsdı̵́ má nɔ

(Márkus 16:12-13)

13Zá̧ga̧ dágá yȩlȩ́ waa duulí Yesu woo tóó vu̵ idú, vu̵ dɨ laalı̵́ kaa tóólı̵́, Emáwsdı̵́, ɗii kan Yerúsalem kílomɛ́ɛtər wa̧nɓó' zu̵u̵ dágá. 14Vu̵ dɨ moo mbalı̵́ yúú hȩn 'waapád ka kɔ́y yȩlȩ́.

15Sey ku̵u̵ dɨ moo yȩ mbalı̵́, kan moo fanné máa, Yesu séé ya kan fó̧ó̧ woo, sú̵g 'yȩm kan vu̵. 16A̧máa hȩn woo big vu̵ la kəd, vu̵ gaanɔ sı̵́ né. 17Yesu vi vu̵: “Ví mba moo woo ȩn, ya 'yȩ́ȩm víílílá?”

Ma vu̵ dii kan zó̧ó̧ ví̧i̧ní. 18Nán dágá yéé woo Kelópa, hí̧i̧du̵: “Mɔ́ ya səə Yerúsalemmé, ma mɔ́ yo̧ ní, mɔ́ gaan móó hȩn ka kɔ́y bá' yȩlȩ́ yȩ née!”

19Yesu duu vigi: “Ȩná?”

Vu̵ hí̧i̧du̵: “Moo Yesu nán Naazaréd tóó woo, wu̵ anábi ká dɨ kan néélȩ́ ba'ad tóó kɔ́lı̵́, kan moo moolȩ́ tíŋ́ Tayɨɨ woolı̵́, kan tíŋ́ zig yɛ voolı̵́ 'waapád má nɔ. 20Gbanaa hȩn ha"ı̵́ vu̵ kan ı̵́ nii Yúúda baa ví vu̵, vu̵ ma"o̧ pú̵ Pilád, a sə̧' moo nɔm yúú woolı̵́. Vu̵ ga"u̵ la' vbagadı̵́. 21Ká vɔ́ 'yɛ́ vóó zó̧ó̧ woolı̵́ ba wú̵ńnɔ səd Izraɛ́l. A̧máa hȩn yȩ vu̵ kɔ́y bá' ta̧a̧nɔ́ woo wu̵ yɛ nɔ. 22Moo yȩ́ńne, wakȩ́ȩ́ tóó vu̵ sa̧a̧m vóólı̵́ vu̵ o̧d vɔ́ moo yȩ, kɔ́ vɔ́ la ɓá', vɔ́ mbaa ɗii. Moo vu̵ laa bɛ́ɛ́gı̵́ ya̧g ka̧'a̧m hí̧m, 23vu̵ ho̧n fó̧ó̧ Yesu woo né. A̧máa vu̵ o̧ ba bin ho̧ maleeka vu̵n o̧d bi Yesu ba mbaa zá̧a̧dɨ. 24Nán tóó ku̵u̵ sú̵g kan vɔ́ wu̵lı̵́ máa, vu̵ laa bɛ́ɛ́gı̵́. Vu̵ nuŋ hȩn kɔ́ ı̵́ wakȩ́ȩ́ vu̵n o̧ pee wɔgɔ, a̧máa Yesu máa vu̵ ho̧nnɔ né.”

25Yesu ka ki moo yȩ máa, o̧d vu̵: “Ví nán moo taalı̵́ pɛ́lı̵́. Ví fȩȩn moo anábi voo ku̵u̵ o̧ 'waapád yȩ vaŋná né á̧ḿ. 26Ví gaa Tayɨɨ ba hí̧í̧ ı̵́ nán sənné ba a nuŋ hȩn ndɔ́gɔné nɔm yȩ pȩ́ń, ba a dɔ́ ya na"ȩ́ woolı̵́. Ɨ́ yo̧go̧ pɛ́láa?”

27Ma dən vu̵ ya moo tú"í yúú hȩn ku̵u̵ bíńda debtere Múúsa woolı̵́, kan debtere anábi voolı̵́ máa á̧ḿ, há̧á̧ la ya̧ debtere tóó vu̵ 'waapád.

28Ku̵u̵ la ya̧ dáŋ́ kaa ba vu̵n dɨ laalı̵́ wu̵lı̵́ peelı̵́ máa, Yesu kɔ́ kɔ́ ı̵́ ka bi ya̧a̧ ó̧ zu wɔgɔ. 29A̧máa nán pee vu̵ 'mááwo̧ kɔɔgná, vu̵ o̧: “A̧m mbaa kan vɔ́ yɛlı̵́, moo zaa zá̧ga̧ wú̵ń dɔ́ sú̵'ú̵.”

Ma dɔ́ la mbaa kan vu̵.

30Sey ku̵u̵ bi lá hȩnne máa, Yesu ɓɛ beréd, dȩn Tayɨɨ nag, yɨɨ zu̵u̵ pú̵ vu̵. 31Ma vu̵ duu ho̧ gaawu̵ dɔg sı̵́ wu̵lı̵́. Vaŋná Yesu há̧á̧ ti vu̵ zu̵u̵ sú̵lú̵g.

32Ka lúú sú̵'ú̵ máa, nán pee vu̵ víń ya voolı̵́: “Sey ka o̧d ba moo hi̧naalȩ́, ka tú'ud ba moo debterelı̵́ yȩ, zó̧ó̧ dȩ' ba dɔg wu̵lı̵́ náa?”

33Vu̵ lúú dɔg ya̧g woolı̵́, vu̵ vȩ́' laa Yerúsalemmé. Vu̵ la nuŋ waa duulí ı̵́ wa̧nɓó' zu̵u̵ dágá pee vu̵, vu̵ sú̵g kan nán tóó vu̵. 34Waa duulí vu̵ o̧d ı̵́ idú pee vu̵: “Moo yȩ́ńne, ı̵́ 'yɛ́lı̵́ níḿ nɔmmé sú̵'ú̵. Simɔ́ŋ ho̧go̧ sú̵'ú̵ á̧ḿ.”

35Nán ı̵́ pee vu̵ o̧d ı̵́ vu̵n sú̵g pee vu̵ hȩn ka kɔ́y hi̧naalȩ́ yȩ, vu̵ o̧: “Sey Yesu ka yɨɨ beréd máa, vɔ́ gaawu̵ sı̵́ wu̵lı̵́.”

Yesu duu tú'ud waa duulí woo vu̵ fó̧ó̧

(Matío 28:16-20; Márkus 16:14-18; Yoohá̧na 20:19-23; Debtere ba'ad waa ba'ad voo nɔ 1:6-8)

36Sey ku̵u̵ dɨ moo yȩ moolȩ́ máa, Yesu kan fó̧ó̧ woo ya dii sa̧a̧m voolı̵́, vá' vu̵ o̧: “Ká̧'a̧d Tayɨɨ woo a mbaa kan ví ú.”

37Zó̧ó̧ tó̧' vu̵, dú̵ú̵ kɔ́ vu̵, vu̵ taa voo bin ho̧ yigid tóó nɔ. 38A̧máa Yesu o̧d vu̵: “Zó̧ó̧ tó̧' ví moo ȩná? Moo ȩn moo faalı̵́ ka dɔ́ zó̧ó̧ víílí ı̵́ yo̧go̧lá? 39I ho̧ lá ví nag míí, kan doo míí vu̵ yu̵. Míw náa? I za'an ho̧ lá ví, yigid tóó 'yɛ́n fó̧ó̧ yo̧go̧ kan nɛ́ŋ́ kɔ́ ı̵́ kíí ho̧n yɛ wɔgɔ né.”

40Sey ka moo moo yȩ 'waa máa, tú'ud vu̵ nag woo kan doo woo vu̵. 41Zó̧ó̧ dȩ' vu̵ mba kɛb, a̧máa vu̵ fȩȩ ná moo né á̧ḿ, vu̵ mbaa la ɗii. Moo woo nɔ Yesu vi vu̵: “Ví dɨ kan hȩn lálı̵́ tóó yɛlı̵́ áa?”

42Ma vu̵ pú̵gu̵ ze' maané. 43Ɓɛ lá zu̵u̵ nɔ́ɔ́ voolı̵́.

44Pig woolı̵́ máa, o̧d vu̵: “Káa mbaa ví máa, mí baa o̧d ví hȩn ku̵u̵ bíńda yúú míílí̧, debtere Múúsa woolı̵́ máa 'waapád, kan debtere anábi voolı̵́, kan debtere yéélı̵́ máa, vú̵ń dɔ́ sé' woolı̵́ pȩ́ń.”

45Yesu duu pú̵ vu̵ zó̧ó̧ moo taalı̵́, moo u̵u̵ gaa hȩn debtere ka o̧ má nɔ. 46O̧d vu̵: “Ká vu̵ bíńda ná', ı̵́ nán sənné ban nuŋ hȩn ndɔ́gɔné nɔm, ma bá' idú, ta̧a̧nɔ́ woo tée, ban níḿ nɔmmé. Ɨ́ yo̧go̧ pɛ́láa? 47Vú̵ń pad zig 'waapád moo kan yɛ́g woo, vú̵ń dəŋ Yerúsalemmé, vú̵ń o̧d nán vu̵ u̵u̵ tii zó̧ó̧ voo moo Tayɨɨ a kéé hȩn ɓı̵́d kɔ́lı̵́ voo gbɔ la ú̵. Ɨ́ yo̧go̧ pɛ́láa? 48Víńnɔ du̵ ya̧g yúú hȩn yȩ vu̵lı̵́. 49Míńnɔ ba'ad ví hȩn ya̧g talı̵́ Ba'á woo. A̧máa ı̵́ víí, i mbaa kaalı̵́, Tayɨɨ a pú̵ ví néélȩ́ ı̵́ be"ı̵́ pȩ́ń.”

Yesu ɗáá dɔg be"ı̵́

(Márkus 16:19-20; Debtere ba'ad waa ba'ad voo nɔ 1:9-11)

50Pig woo Yesu pa̧ŋ vu̵ laan dáŋ́ kaa Bɛtaníilí̧, yo̧o̧ nag bag vu̵ hȩn.

51Sey ka dɨ vu̵ hȩn baggı̵́ máa, hı̵́'ı̵́n kan vu̵, lúú dɔg be"ı̵́. 52Ɨ́ voo vu̵ gu doo núug hágá, vu̵ na"o̧. Vu̵ vȩ́' laa Yerúsalemmé kan zó̧ó̧ dȩ"ȩ́ gbo̧o̧ ba'a. 53Vu̵ mbaa na'am gbo̧o̧ lig hȩn ha"ı̵́lı̵́ zá̧ga̧ 'waapád, vu̵ na' Tayɨɨ wu̵lı̵́.

Currently Selected:

Lúg 24: DIINT

Highlight

Copy