Lúg 22
22
Nán gbo̧o̧ vu̵ yá̧ḿ Yesu bi ma"o̧ ó̧
(Matío 26:1-5; Márkus 14:1-2; Yoohá̧na 11:45-53)
1 Mam vúnní 'yɛ́ wág sá ku̵u̵ beewu̵ páska máa, ká dɨ bə́'. 2Gbanaa hȩn ha"ı̵́ vu̵ kan nán moo Tayɨɨ tú"í vu̵, vu̵ soo hi̧naa bi nɔɔ Yesu wu̵, a̧máa vu̵ ndɔg dúú vu̵ yu̵.
Yúúdas bi dɔd Yesu nag nán gbo̧o̧ voolı̵́
(Matío 26:14-16; Márkus 14:10-11)
3A̧máa nán tóó sa̧a̧m waa duulí wa̧nɓó' zu̵u̵ idú voolı̵́ máa, yéé woo Yúúdas. Vu̵ beewu̵ Iskarió á̧ḿ. Seeɗán dɔ́ la zó̧ó̧ woolı̵́, 4Yúúdas la mba moo kan gbanaa hȩn ha"ı̵́ vu̵, kan ı̵́ nii só̧ó̧ze ku̵u̵ tu̵ lig hȩn ha"ı̵́ máa vu̵. Ma mbɔ́g moo yúú hȩn a kɔ́ pȩ́ń, Yesu a dɔ́ voolı̵́ nagá máa. 5Ma zó̧ó̧ voo dȩ', vu̵ taddu̵ ya̧g tée ba bíń pú̵gu̵ sɨɨde.
6Yúúdas ka fȩȩ ya̧g talı̵́ voo sú̵'ú̵ máa, soo kɛb du̵u̵lı̵́ na'a, moo bi dɔd Yesu voolı̵́ nagá, dúú u̵u̵ ho̧ sá.
Yesu mbɔ́g hȩn lálı̵́ páska sú̵'ú̵
(Matío 26:17-25; Márkus 14:12-21; Yoohá̧na 13:21-30)
7 Zá̧ga̧ mam vúnní 'yɛ́ wág sá ka ya̧, u̵u̵ sə̧'ə̧ mbee waa páska vu̵ wu̵lı̵́ máa, 8Yesu ba' Piɛ́r vu̵ kan Yoohá̧na, o̧d vu̵: “I la mbɔ́g hȩn lálı̵́ páska, ba lá ví ú.”
9Ma vu̵ hí̧i̧du̵: “Mɔ́ hí̧í̧ oo la mbɔ́g ya woo tɛ́lá?”
10Yesu duu o̧d vu̵: “I ki pȩ́ń. Sey kíí dɨ dɔ́lı̵́ la kaalı̵́ tɛ́ na, víń kan kan wayée tóó gaŋ gbág mam. Sey ka dɔ́ kíi woolı̵́ tée, ví dugu wu̵lı̵́, 11ví o̧d ı̵́ kíi aga: ‘Akaw o̧ lig ba ii lá hȩn lálı̵́ páska kan waa duulí bii vu̵ wu̵lı̵́ máa, ba dɨ tɛ́lá?’ 12Tée wú̵ń tú'ud ví lig ı̵́ yúba gbo̧o̧ ba'a, kan hȩn vu̵ tíŋ́ woolı̵́ 'waapád. Tée víń mbɔ́g hȩn lálı̵́ páska wu̵lı̵́.”
13Ku̵u̵ laa máa, vu̵ nuŋ hȩn 'waapád kɔ́ ı̵́ Yesu ba o̧d vu̵ pee wɔgɔ. Ma vu̵ mbɔ́g hȩn lálı̵́ páska wu̵lı̵́.
Yesu lá hȩn lálı̵́ Tayɨɨ kan waa duulí woo vu̵ yu̵
(Matío 26:26-30; Márkus 14:22-26; 1 Nán Koríńti vu̵ 11:23-25)
14Sey hȩn lálı̵́ páska ka ya̧ sú̵'ú̵ máa, Yesu ya mbaa ya hȩn lálı̵́lı̵́ kan waa ba'ad woo vu̵. 15O̧d vu̵: “Hȩn lálı̵́ páska káń lá kan ví yɛ to̧o̧n 'yɛ́nné, moo kaa dəŋ lá ví tíŋ́ hȩn ndɔ́gɔné nɔm míílí̧ yɛ nɔ. 16A̧máa mí o̧d ví, míń duu lánnɔ sı̵́ né há̧á̧ hȩn woo wú̵ń dɔ́ sé' woolı̵́ ya gbaŋ waalı̵́ Tayɨɨ woolı̵́ pȩ́ń.”
17Ɓɛ ɗag waa hȩn zɔlı̵́, dȩn Tayɨɨ nag, o̧: “I fȩȩ hȩn yɛ, i yȩ'ȩn zɔ ví la ú̵, 18moo mí o̧d ví, 'ya̧'a̧ yɛ míń duu zɔn sı̵́ doo yɛ né, há̧á̧ gbaŋ waalı̵́ Tayɨɨ woo wú̵ń ya̧ pȩ́ń.”
19Pig woolı̵́ máa, ɓɛ beréd, dȩn Tayɨɨ nag, yɨɨ zu̵u̵, pú̵ vu̵, o̧: “Hȩn yɛ fó̧ó̧ míí, [káń dɨ pú̵lı̵́ moo víí má nɔ. I kɔ́ ná', moo ví taan wu̵lı̵́.”
20Pig hȩn lálı̵́lı̵́ máa, duu ɓɛ ɗag waa hȩn zɔlı̵́, o̧: “Hȩn zɔlı̵́ yɛ, wu̵ ya̧g talı̵́ 'maŋ yúú mɛm míí ka dɨ yɛ́nné moo víí yɛ nɔ.] 21A̧máa i ho̧ ó̧, nán ka dɨn dɔnné nag nánán voolı̵́ máa, dɨ hȩn lálı̵́ kan mí yɛlı̵́. 22Ɨ́ míí Tayɨɨ ka ba'an ya yɛ, míń dɨ nɔm kɔ́ ı̵́ Tayɨɨ ká o̧ máa wɔgɔ. A̧máa zó̧ó̧ wú̵ń ví̧i̧ nánán ı̵́ a dɔn voolı̵́ nagá máa ó̧.”
23Ma waa duulí woo vu̵ víń ya voolı̵́, nóo voolı̵́ sa̧a̧mé ban kɔ́ hȩn yȩlá?
Nóo nán gbo̧o̧ ka mba daga vu̵lá?
24 Waa duulí Yesu woo vu̵ lúun moo ya voolı̵́, vu̵ o̧: “Sa̧a̧m baa ví yɛ, nóo nán gbo̧o̧ ka mba daga vu̵lá?”
25Yesu ka ki ı̵́ yo̧go̧ máa, o̧d vu̵: “Gbanii hágá yɛ vu̵ baa igid nán voo vu̵. A̧máa kóó ı̵́ yo̧go̧ si̧', nán gbo̧o̧ hágá yɛlı̵́ vu̵ hí̧í̧ nán bii u̵u̵ bee bi ı̵́ hȩn du̵u̵ kɔ́lı̵́. 26Ɨ́ víí máa, i kɔ́ ı̵́ yo̧go̧ sá. Ɨ́ nii víí máa a mbaa kɔ́ ı̵́ náásá̧ŋ́ wɔgɔ. Nán gbo̧o̧ a mbaa kɔ́ ı̵́ nán ba'ad wɔgɔ. 27Nóo nán gbo̧o̧lá? Nán ı̵́ ka mbaa ya hȩn lálı̵́lı̵́ má naa? Tóó tée, nán ı̵́ ka kɔ́ddu̵ ba'ad má naa? Ɨ́ ka mbaa ya hȩn lálı̵́lı̵́ máa, wu̵ mbaga. A̧máa ı̵́ míí, mí mbaa víílí sa̧a̧mé kɔ́ ı̵́ nán ba'ad wɔgɔ.
28“Ɨ́ víí máa, sey nán ku̵u̵ duun mí kan hȩn ɓı̵́d máa, ví kéé gbɔn mí ní. 29Ɨ́ míí, míń dɔd ví gbanaa kɔ́ ı̵́ Ba'á ka mbɔ́g moo bi 'yɛ́n gbaniii yɛ wɔgɔ. 30Tée víń sú̵g lá hȩn kan mí, víń zɔ hȩn kan mí ya gbaŋ waalı̵́ míílí̧. Víń mbaa láané, víń 'yɛ́ zig Izraɛ́l ı̵́ wa̧nɓó' zu̵u̵ idú yȩ vu̵.”
Yesu o̧ Piɛ́r ban su̵u̵ bi ú
(Matío 26:31-35; Márkus 14:27-31; Yoohá̧na 13:36-38)
31Yesu o̧: “Simɔ́ŋ, Simɔ́ŋ, a̧m ki pȩ́ń. Seeɗán ɓá' Tayɨɨ néélȩ́ na'a yúú víílí 'waapád, moo bi tɨgɨ ví kɔ́ ı̵́ tú̵d gu̵u̵g wɔgɔ. 32A̧máa ı̵́ míí mí o̧d Tayɨɨ moo yúú móólȩ́, moo zó̧ó̧ 'yɛ́lı̵́ móó a 'wáa sá. A̧máa ı̵́ móó, káḿ kɔ́ hȩn, káḿ duu tii zó̧ó̧ fíí ya míílí̧ yɛ, a̧m zigid dam vu̵ zó̧ó̧ á̧ḿ.”
33A̧máa Piɛ́r o̧ddu̵: “Ɨ́ 'yɛ́lı̵́ míí, mí mbɔ́g fó̧ó̧ 'waa sú̵'ú̵, moo dɔ́lı̵́ kan mɔ́ lig púúsinalȩ́, kan nɔmmé á̧ḿ.”
34Yesu duu o̧ddu̵: “Piɛ́r, mí o̧m, vid ɓəə yɛ nɔ́g va̧a̧ wú̵ń hȩ́ȩ ná né, mɔ́ń su̵u̵n do' ta̧a̧nɔ́, mɔ́ń o̧ bin gaan mí ní.”
Kə́ə kan pag naaɨ
35Yesu duu o̧d vu̵: “Sey káń ba' ví, kíí pa̧ga̧n kə́ə sɨɨde né, kə́ə 'yȩ́ȩm ka pɛ́lı̵́, tɛ́gɛ́ ka pɛ́lı̵́ á̧ḿ máa, hȩn tóó gee ví áa?”
Vu̵ hí̧i̧du̵: “Áá'a.”
36Ma duu o̧d vu̵: “A̧máa 'ya̧'a̧ yɛ, nán ka dɨ kan kə́ə sɨɨde tée, a ɓɛ. Nán ka dɨ kan kə́ə 'yȩ́ȩm tée, a ɓɛ á̧ḿ. Nán ı̵́ ka 'yɛ́n pag naa né tée, a gí sa̧a̧m woo, a fȩȩn wu̵lı̵́. 37Moo mí o̧d ví, hȩn ku̵u̵ bíńda debterelı̵́ máa, wú̵ń kɔ́y yúú míílí̧ ú̧. Moo sú̵u̵ wu̵ yɛ nɔ: ‘Ká vu̵ beewu̵ nán hȩn ɓı̵́d kɔ́lı̵́ɨ.’ Moo hȩn ku̵u̵ bíńda yúú míílí̧ máa, dɔ́ sı̵́ sé' woolı̵́ ú̵.”
38 Waa duulí woo vu̵ duu o̧ddu̵: “Ba'á, pag naa tóó vu̵u̵ idú yɛ nɔ.”
Duu o̧d vu̵: “Maa yȩ.”
Yesu ɓá' Tayɨɨ yúú gu̵u̵ la' kúḿmí
(Matío 26:36-46; Márkus 14:32-42)
39Pig woolı̵́ máa, Yesu vúd daa laa gu̵u̵ la' kúḿmí kɔ́ ı̵́ ka baa kɔ́ see máa wɔgɔ. Ma waa duulí woo vu̵ dugu.
40Ka ya̧ ya woo máa, o̧d vu̵: “I ɓá' Tayɨɨɨ, moo ka vín dɔ́ hȩn zo"ı̵́lı̵́.”
41Aga daa séé la kɔ́ ı̵́ ya kaa gbɔ 'yɛgɛ, ka pɛ la wu̵lı̵́ máa wɔgɔ. Ma gu zu̵u̵ doo núug hágá, 42baa ɓá' Tayɨɨ ná': “Ba' míí, a̧m hí̧í̧ ú̧ tée, hȩn ndɔ́gɔné nɔm yɛ a ya̧n sá.#22:42 hȩn ndɔ́gɔné nɔm yɛ a ya̧n sá vu̵ bíńda “a̧m luu ɗag waa yɛ míílí̧ ú̧” kan ya̧g gɛrɛ́ggɨ. A̧máa a̧m duu hȩn hí̧í̧lí̧ míí sá, séý hí̧í̧lí̧ móó a wu̵ kɔ́y.”
[ 43Maleeka Tayɨɨ woo tóó vúd maa Yesu, zigidu̵ zó̧ó̧. 44Zó̧ó̧ nam Yesu ɓu̵u̵lı̵́ na'a, ma pin Tayɨɨ kan hȩn ɓá"ı̵́. Ha̧a̧g woo təgə hágá kɔ́ ı̵́ mɛm wɔgɔ.]
45Ka ɓá' Tayɨɨ 'waa máa, vȩ́' yaa waa duulí woo voolı̵́, maa vu̵ dɨ nəm kan zó̧ó̧ ví̧i̧níi.
46Ka ho̧ vu̵ la ná' máa, o̧d vu̵: “Moo ȩn ví nəlá̧? I níḿ dɔg, i ɓá' Tayɨɨɨ, moo ka vín dɔ́ hȩn zo"ı̵́lı̵́.”
Vu̵ ma' Yesu
(Matío 26:47-56; Márkus 14:43-50; Yoohá̧na 18:3-11)
47Sey Yesu ka dɨ moo yȩ o̧lȩ́ máa, dúú vu̵ ya̧ ya. Yúúdas ı̵́ ka dɨ sa̧a̧m waa duulí wa̧nɓó' zu̵u̵ idú woo voolı̵́ pee, ɓə́əd vu̵ tíŋ́, séé ya Yesu woolı̵́ moo bi vá"u̵ kan hȩn hu̧u̧lí̧i̧. 48A̧máa Yesu o̧ddu̵: “Yúúdas, ı̵́ míí Tayɨɨ ka ba'an ya yɛ, mɔ́ ka vá'an, ma mɔ́ń dɔn nag nánán vooláa?”
49Nán ı̵́ ku̵u̵ gbɔ daa kan Yesu, ku̵u̵ ho̧ hȩn kɔ́ a dɨ kɔ́yné yȩ máa, vu̵ o̧: “Ba'á, oo du̵ kan pag naaa?”
50Nán dágá voolı̵́ sa̧a̧mé du̵ nán ba'ad ı̵́ nii hȩn ha"ı̵́ woo pee tɔ́g nag nán sə̧'. 51A̧máa Yesu o̧ddu̵: “Gbɔ la ú̵. Dii naggɨ.”
Yesu za' tɔ́g woo, ma ndɔ́g yó̧.
52Pig woolı̵́ Yesu ka ho̧ gbanaa hȩn ha"ı̵́ vu̵ kan ı̵́ nii só̧ó̧ze lig hȩn ha"ı̵́lı̵́ vu̵, kan ı̵́ nii Yúúda tóó ku̵u̵ yaa wu̵lı̵́ máa, o̧d vu̵: “Ví yaa míílí̧ kan pag naa vu̵ kan yé'en vu̵ kɔ́ ı̵́ kíí laa dɨ kɛm tóó woolı̵́ wɔgɔ máalá̧! 53Ká mí mbaa kan ví zá̧ga̧ 'waapád lig hȩn ha"ı̵́lı̵́. Kóó ı̵́ yo̧go̧ si̧', nán tóó za'an mí ní. A̧máa zá̧ga̧ víí wu̵ yɛ nɔ, kan néélȩ́ vid woo á̧ḿ.”
Piɛ́r su̵u̵ Yesu
(Matío 26:57-58,69-75; Márkus 14:53-54,66-72; Yoohá̧na 18:12-18,25-27)
54Ku̵u̵ ma' Yesu máa, vu̵ pa̧ŋŋɔ laan ı̵́ nii hȩn ha"ı̵́ woolı̵́ kíilí. Piɛ́r duuwu̵ pigim ɗiilí na'a.
55Nán tóó vu̵ kab vee na'am sa̧a̧mé, vu̵ sú̵g mbaa wu̵lı̵́. Piɛ́r ya mbaa sa̧a̧m voolı̵́ á̧ḿ. 56Wakȩ́ȩ́ ba'ad tóó ho̧go̧ mbaa dáŋ́ vɛlı̵́, tə́gəwu̵, o̧: “Ɨ́ yɛ ká mbaa kan nán yȩ á̧ḿ.”
57A̧máa Piɛ́r su̵u̵ ya̧g o̧: “Mí gaanɔ míí ní, na' míí.”
58Zag zaa pɛ́lı̵́, nán tóó duu ho̧go̧ o̧: “Mɔ́ á̧ḿ, mɔ́ dɨ sa̧a̧m nán yȩ voolı̵́.”
A̧máa Piɛ́r duu hí̧í̧: “Áá'a, míw pɛ́lı̵́, baa!”
59Zamndi dágá ka ya̧a̧ daa máa, nán tóó kə́d duu ya sȩn fó̧ó̧ o̧: “Moo yȩ́ńne, nán yɛ mbaa kannɔ á̧ḿ, moo nán Gálilée.”
60A̧máa Piɛ́r hí̧i̧du̵: “Mí gaan hȩn káḿ o̧n yȩ né, baa.”
Piɛ́r o̧ moo yȩ 'waa ná né, nɔ́g va̧a̧ há̧á̧ hȩ́ȩ́. 61Ɨ́ 'yɛ́lı̵́ Yesu tii daa nɔ́ɔ́, tə́g Piɛ́r. A̧máa Piɛ́r duu dȩ́' moo ı̵́ 'yɛ́lı̵́ ba o̧ddu̵: “Vid ɓəə yɛ nɔ́g va̧a̧ wú̵ń hȩ́ȩ ná né, mɔ́ń su̵u̵n do' ta̧a̧nɔ́” pee. 62Ma Piɛ́r daa vúd laa gɔ́ŋ́, ká̧ŋ́ kan zó̧ó̧ ví̧i̧ní.
Vu̵ vud Yesu fó̧ó̧ kan du̵g, vu̵ zúŋ́ŋɔ
(Matío 26:67-68; Márkus 14:65)
63-64Nán ku̵u̵ tu̵ Yesu máa, vu̵ kɔ́ddu̵ ba̧a̧m, vu̵ go̧o̧wo̧ nɔ́ɔ́, vu̵ zúŋ́ŋɔ, vu̵ vigi: “Nóo ku̵u̵ zúgumá? A̧m moo dɔg sı̵́ moo anábi móó pee na!”
65Vu̵ háá du̵g zaga vu̵ ɓu̵u̵lı̵́ na'a.
Ɨ́ nii moo sə̧"ȩ́ vu̵ sə̧' moo yúú Yesu woolı̵́
(Matío 26:59-66; Márkus 14:55-64; Yoohá̧na 18:19-24)
66Ya̧g ka̧'a̧m ka tú sú̵'ú̵ máa, ı̵́ nii Yúúda vu̵ sú̵g kan gbanaa hȩn ha"ı̵́ vu̵ kan nán moo Tayɨɨ tú"í vu̵, vu̵ pa̧ŋ Yesu laan ı̵́ nii moo sə̧"ȩ́ voolı̵́. 67Vu̵ vigi: “A̧m o̧d vɔ́ ú̵, móo ı̵́ nán sənnáa?”
A̧máa Yesu hí̧i̧d vu̵: “Kóó a̧n o̧d ví si̧', víń fȩȩ né sá̧ḿ. 68Tow a̧n vi ví moo, víń hí̧i̧ ní á̧ḿ. 69A̧máa diga 'ya̧'a̧ yɛ, ı̵́ míí Tayɨɨ ka ba'an ya yɛ, míń dəŋ mbaa nag nán Tayɨɨ ı̵́ néélȩ́ na'a zu woolı̵́.”
70Ya voo 'waapád ku̵u̵ ki ná' máa, vu̵ o̧: “Ɨ́ yo̧ga̧a̧? Mɔ́ Waa Tayɨɨ woo naa?”
Yesu hí̧i̧d vu̵: “Ví o̧ sú̵'ú̵ naa? Mí wu̵ yu̵.”
71Ku̵u̵ ki ı̵́ yo̧go̧ máa, vu̵ ó̧ń: “Moo ȩn ba duu soo ví nán ya̧g du̵lı̵́ vu̵lá? Aga ba ki ví moo ya̧g woolı̵́ sú̵'ú̵ náa?”
Currently Selected:
Lúg 22: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
