Yoohá̧na Moo dənée
Moo dənée
Sa̧a̧m moo to̧o̧ 'maŋ ndaddú̵ yȩ voolı̵́ máa, ı̵́ Yoohá̧na woo moo moo dɨ kə́d. Ya voo ndaddú̵ á̧ḿ, vu̵u̵ moo moo hȩn ndɔ́gɔné Yesu woo vu̵ (sapíitər 18 kan 19). A̧máa hȩn moo to̧o̧ 'maŋ ı̵́ tóó ku̵u̵ moo máa, báń nuŋ vu̵ ví ı̵́ Yoohá̧na woolı̵́ waaná' aga nɔ. A̧máa Yoohá̧na wu̵ dágá, wu̵ pa'a moo yȩ tóó vu̵: lig pú̵lı̵́ kaa Kanáalȩ́ (2:1-12), kanné Yesu woo kan Níkodém (3:1-21), moo mbalı̵́ woo kan wakȩ́ȩ́ Samaríi (4:1-12), za̧a̧né nán kpee mam Betéstalı̵́ (5:1-18), kan za̧a̧né nán ka ha̧y yə̧mná máa woo (9:1-41). Hȩn gú̵gu̵né dɨ ı̵́ yo̧go̧. Kaa gú̵gú̵n Yoohá̧na kan moo to̧o̧ 'maŋ ı̵́ tóó vu̵ tée, Yoohá̧na 'yɛ́n hȩn Yesu woo ka kɔ́ hágá yɛlı̵́ máa vu̵ debtere woolı̵́ ɓu̵u̵lı̵́ na'a né. A̧máa hȩn Yoohá̧na ka bíńda máa, bíńda séý moo gbo̧o̧ vu̵ yu̵. Yúú voolı̵́ á̧ḿ, Yoohá̧na yaan moo tú"í Yesu woo vu̵ yu̵ ɓu̵u̵lı̵́ na'a.
Moo dəné Yoohá̧na woo (1:1-18) máa, mbaa kɔ́ ı̵́ moo pa'ané tóó wɔgɔ. Yoohá̧na tú'ud ba ví Yesu kɔ́ ı̵́ “Moo” ı̵́ káákáá Tayɨɨ woo ka tii nánán ma, ka ya mbaa kan nánán ı̵́ hágá yɛlı̵́ máa vu̵ wɔgɔ. “Moo” yȩ wu̵ pa̧ŋ vágád káákáá kan túlí kan moo yȩ́ń.
Yoohá̧na səgən hȩn bindigo woo vu̵ ya idú yúú “sey” Yesu woolı̵́. “Sey” Yesu woo tú' sey nɔm woo nɔ. Ka' ı̵́ dágá woolı̵́ máa, Yoohá̧na bíńda hȩn ku̵u̵ ya̧a̧ tíŋ́ “sey” yȩlȩ́; ka' ı̵́ idú woolı̵́ máa, bíńda hȩn ku̵u̵ ya̧a̧ sey “sey” Yesu woo ka ya̧ sú̵'ú̵ má nɔ. Ba ho̧ ví sey “sey” Yesu woo ka ya̧ sú̵'ú̵ máa, Yesu nuŋ nɔm woo, a̧máa nuŋ na"ȩ́ woo wu̵lı̵́ á̧ḿ (2:4, 12:23).
—Tíŋ́ “sey” Yesu woolı̵́ (dəŋ 1:19 há̧á̧ a 'wáa 12:50 woolı̵́): Ka' yɛlı̵́ máa, ba nuŋ ví moo ya̧g du̵lı̵́ tóó vu̵: ı̵́ Yoohá̧na ı̵́ mam Tayɨɨ wooné woo, kan ı̵́ waa duulí woo A̧ndɛrée, kan ı̵́ Filíb woo, kan ı̵́ Natanaɛ́l woo; kóó nɔ́nná o̧ hȩn ı̵́ woo ka gaa, ka ho̧ yúú Yesu woolı̵́ máa. Pig ka' yȩlȩ́ Yoohá̧na duu pa'a moo nánán tóó voo Yesu ka kan kan vu̵ máa, duu pa'a moo hȩn sa̧ga̧ tóó vu̵ gúndɛm Yesu ka kɔ́ vu̵ wu̵lı̵́ máa á̧ḿ. Yoohá̧na hí̧í̧ aa ki ví moo taalı̵́ hȩn sa̧ga̧ voo du̵u̵lı̵́ na'a. Yoohá̧na 'waa moo dəné woo dágá yȩ, vud moo palı̵́ gbo̧o̧ Yesu woo vu̵ tú' wu̵lı̵́ (12:37-50).
—Sey “sey” Yesu woo ka ya̧ sú̵'ú̵ máa (13:1), Yesu gbɔd waa duulí woo vu̵ moo taalı̵́ ı̵́ sí̧'í̧d woo vu̵, mbaa kɔ́ ı̵́ moo yȩ́ń woo wɔgɔ (sapíitər 13 há̧á̧ 16). Pig woolı̵́, Yesu ɓá' Tayɨɨ, mbɔ́g zó̧ó̧ woo moo dɔ́lı̵́ woo ya nɔmmé, mbɔ́g kan moo nán ı̵́ a gbɔd vu̵ kan Tayɨɨ pig nɔm woolı̵́ máa vu̵ á̧ḿ (sapíitər 17). Pig woolı̵́ máa, Yoohá̧na duu bíńda hȩn moo to̧o̧ 'maŋ ı̵́ tóó ku̵u̵ moo máa á̧ḿ: ma"ȩ́ Yesu woo, kan si̧'i̧ní woo, kan nɔm woo yúú la' vbagadı̵́, kan bɛ́ɛ́g woo nán ku̵u̵ la maa leená máa (sapíitər 18 há̧á̧ 20). Zá̧ga̧ mam vúnní páskalı̵́ máa, Yesu vúd maa Maaríi ı̵́ Magdaláa, kan waa duulí woo vu̵, kan Tomás á̧ḿ. Sapíitər 21 woolı̵́ máa, Yoohá̧na bíńda Piɛ́r vu̵ kan waa duulí tóó vu̵ gúú, vu̵ kan kan Yesu ka' mam Tiberíalı̵́. Moo ı̵́ sí̧'í̧d woo yɛ mbaa kɔ́ ı̵́ moo tóó Yoohá̧na ka bíńda ha' pigim debtere woolı̵́ máa wɔgɔ.
Moo “sí̧'í̧d” Yoohá̧na woo (20:30-31) tú'ud ba ví moo ȩn pȩ́ń Yoohá̧na ba bíńda debtere woo yɛlá. Hí̧í̧ bi pa̧ŋ ba ví laan Yesu woolı̵́, moo aa gaa ví Yesu ba wu̵ ı̵́ nán sənné, ba Waa Tayɨɨ woo nɔ. Tée báń nuŋ ví vágád ı̵́ káákáá woolı̵́ á̧ḿ, moo Yesu wu̵ “mbaa kɔ́ ı̵́ hi̧naa laalı̵́ Tayɨɨ woolı̵́ wɔgɔ, wu̵ tú' moo yȩ́ń yúú Tayɨɨ woolı̵́, wu̵ ı̵́ ka pú̵ nán vu̵ vágád káákáá á̧ḿ” (14:6).
Currently Selected:
Yoohá̧na Moo dənée: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.